ភ្នំពេញ៖ ក្រសួងបរិស្ថានបានជ្រើសរើសយកថ្ងៃទី ១០ ខែឧសភា ដើម្បីប្រារព្ធទិវាសត្វស្លាបទេសន្តរប្រវេសន៍ពិភពលោក ដែលត្រូវបានប្រារព្ធឡើងជារៀងរាល់ឆ្នាំ ដើម្បីអប់រំផ្សព្វផ្សាយ និងលើកកម្ពស់ការយល់ដឹងអំពីការអភិរក្សសត្វស្លាបទេសន្តរប្រវេសន៍ និងទីជម្រករបស់ពួកវា។
ទិវាសត្វស្លាបទេសន្តរប្រវេសន៍ពិភពលោកឆ្នាំ ២០២១ ធ្វើឡើងក្រោមប្រធានបទច្រៀងហោះហើរ និងសំកាំង ដូចសត្វស្លាប!។
សត្វស្លាបទេសន្តរប្រវេសន៍ គឺជាប្រភេទសត្វស្លាបដែលធ្វើការផ្លាស់ទីជារៀងរាល់ឆ្នាំទៅតាមផ្លូវហោះហើររបស់ពួកវាពីរដងក្នុងមួយឆ្នាំ ពីតំបន់ពងកូនទៅតំបន់សំចត ឬតំបន់ស្វែងរកចំណីដែលឆ្លងកាត់ប្រទេសជាច្រើននៅជុំវិញពិភពលោក។
ក្រសួងបរិស្ថានបញ្ជាក់ក្នុងហ្វេសប៊ុកនៅថ្ងៃទី ៩ ខែឧសភាថា៖ «ដូចនេះការងារអភិរក្សសត្វស្លាបទេសន្តរប្រវេសន៍ គឺទាមទារឱ្យមានការចូលរួម និងសហការពីបណ្តាប្រទេសនានាដែលស្ថិតនៅផ្លូវហោះហើររបស់ពួកវា»។
ផ្លូវហោះហើរសត្វស្លាបគឺជាពាក្យដែលប្រើសម្រាប់បង្ហាញពីតំបន់ភូមិសាស្ត្រមួយដែលសត្វស្លាបជាច្រើនធ្វើការផ្លាស់ទីពីជម្រកពងកូនទីសំចត និងទីតាំងស្វែងរកចំណីក្នុងរដូវកាលជាក់លាក់មួយជាប្រចាំឆ្នាំ។
បច្ចុប្បន្ននៅលើពិភពលោកមានផ្លូវហោះហើរសត្វសា្លបចំនួន ៩ ហើយប្រទេសកម្ពុជាមានទីតាំងស្ថិតនៅក្នុងផ្លូវហោះហើរសត្វស្លាបអាស៊ីខាងកើត-អូស្ត្រាលី និងបានចូលជាសមាជិកកិច្ចសហប្រតិបត្តិការអន្តរជាតិនៃភាពជាដៃគូផ្លូវហោះហើរសត្វស្លាបអាស៊ីខាងកើត-អូស្ត្រាលី ចាប់តាំងពីឆ្នាំ ២០០៧ ដោយមានក្រសួងបរិស្ថានជាសេនាធិការ។
ក្រសួងបរិស្ថានបញ្ជាក់ថា៖ «ក្នុងនាមជាប្រទេសសមាជិក កម្ពុជាបានយកចិត្តទុកដាក់យ៉ាងខ្លាំងក្នុងការសិក្សាស្រាវជ្រាវអប់រំផ្សព្វផ្សាយ និងអភិរក្សសត្វស្លាបទេសន្តរប្រវេសន៍ និងទីជម្រករបស់ពួកវា។ ជាក់ស្តែងក្នុងឆ្នាំ ២០១៩ តំបន់ការពារទេសភាពអន្លង់ព្រីងត្រូវបានទទួលស្គាល់ជាតំបន់នៃបណ្តាញផ្លូវហោះហើរសត្វស្លាបអាស៊ីខាងកើត-អូស្ត្រាលីដោយលេខាធិការដ្ឋានកិច្ចសហប្រតិបត្តិការអន្តរជាតិនៃភាពជាដៃគូផ្លូវហោះហើរសត្វស្លាបអាស៊ីខាងកើត-អូស្ត្រាលី»។
លោក នេត្រ ភក្ត្រា អ្នកនាំពាក្យក្រសួងបរិស្ថានបានប្រាប់ភ្នំពេញប៉ុស្តិ៍នៅថ្ងៃទី ៩ ខែឧសភាថា កម្ពុជាមានសត្វស្លាបប្រមាណជាង ៥០០ ប្រភេទ។
ក្រសួងបរិស្ថានបានសហការជាមួយអង្គការដៃគូដូចជាអង្គការ Birdlife International អង្គការ WCS ឬអង្គការ WWF ដែលមានកិច្ចសហប្រតិបត្តិការក្នុងការការពារ និងអភិរក្សសត្វស្លាប។
លោកថ្លែងថា៖ «នៅក្នុងតំបន់ការពារធម្មជាតិហ្នឹងគឺយើងរៀបចំជំរឿនជាប្រចាំឆ្នាំនូវប្រភេទសត្វត្មាត ជាប្រភេទសត្វដែលកម្រ។ នៅស្រុកខ្មែរយើងនេះគឺនៅសល់តែប្រមាណ ១០០ ក្បាលទេកាលដែលយើងធ្វើជំរឿនកាលពីឆ្នាំ ២០២០ កន្លងទៅ។ ក្រៅពីនោះក៏មានសត្វប្រយ៉ងដែលជាប្រភេទសត្វជិតផុតពូជ ហើយមានតែនៅស្រុកខ្មែរទេ ៩៩ ភាគរយ គឺនៅកម្ពុជាយើងមានប្រមាណជិត ៤០០ ក្បាល»។
លោក ភក្ត្រា ថ្លែងថាក្រសួងបរិស្ថាន និងអង្គការដៃគូធ្វើការការពារសម្បុកពងកូន ជាពិសេសប្រភេទសត្វស្លាបដែលអភិរក្សខ្លាំងគឺនៅតំបន់បឹងទន្លេសាបដែលជាតំបន់សម្បូរទៅដោយសត្វស្លាប ដោយសារតែវាជាតំបន់ព្រៃលិចទឹកហើយសម្បូរត្រី។ ក្រៅពីនេះក្រសួងបរិស្ថានក៏រៀបចំផែនការអភិរក្សនៅតំបន់ថ្មីៗមួយចំនួនហើយកន្លងទៅនេះតំបន់មួយចំនួនចាប់ផ្តើមមានកំណើនសត្វស្លាប។
លោកថ្លែងថា៖ «ការអភិរក្សប្រភេទសត្វមិនមែនតែសម្រាប់ការពារនូវប្រភេទជីវៈចម្រុះនោះទេ ក៏ប៉ុន្តែក៏ជាការជំរុញមួយទៀតទៅលើការអភិវឌ្ឍផ្នែកទេសចរណ៍ធម្មជាតិ ដើម្បីរកចំណូលជូនដល់ប្រជាពលរដ្ឋដែរ»៕