ភ្នំពេញ: ក្រសួងបរិស្ថានបានជំរុញឱ្យអភិបាលនៃគណៈអភិបាលរាជធានី-ខេត្ត អនុវត្តសារាចររបស់រាជរដ្ឋាភិបាលស្ដីពីវិធានទប់ស្កាត់ និងកាត់បន្ថយការបំពុលខ្យល់សាធារណៈដែលចេញពីរោងចក្រឧស្សាហកម្ម យានយន្ត ការដុតកាកសំណល់ និងភ្លើងឆេះព្រៃដែលអាចជាហានិភ័យបង្កការប៉ះពាល់សុខភាពប្រជាពលរដ្ឋ និងបរិស្ថាន។
«ជារៀងរាល់ឆ្នាំនៅពេលចាប់ផ្ដើមឈានចូលដល់រដូវប្រាំង ជាពិសេសក្នុងអំឡុងខែធ្នូដល់ខែមេសា ស្ថានភាពគុណភាពខ្យល់មានការធ្លាក់ចុះគួរឱ្យបារម្ភ ជាពិសេសកំណើនកំហាប់ភាគល្អិតនិចលអណ្ដែតក្នុងខ្យល់ (PM10 និងPM2.5) មានកម្រិតលើសស្ដង់ដាកំណត់ដែលអាចជាហានិភ័យបង្កការប៉ះពាល់សុខភាពប្រជាពលរដ្ឋ និងបរិស្ថាន»។ យោងតាមលិខិតក្រសួងបរិស្ថានស្នើទៅអភិបាលនៃគណៈអភិបាលរាជធានី-ខេត្តកាលពីថ្ងៃទី ៨ ខែធ្នូ ដែល ភ្នំពេញ ប៉ុស្ដិ៍ ទទួលបាន។
ក្រសួងបរិស្ថានបានអង្កេតប្រភព និងសកម្មភាពសំខាន់ៗដែលជាហេតុបង្កឱ្យមានកំណើនកំហាប់ភាគល្អិតនិចលនេះមានជាអាទិ៍ ការបញ្ចេញផ្សែងពីរោងចក្រឧស្សាហកម្មពីយានយន្តប្រើប្រាស់ម៉ាស៊ូតចេញពីចំហេះឥន្ធនៈផ្សេងៗ ជាពិសេសករណីភ្លើងឆេះព្រៃ ការដុតសំណល់កសិកម្ម ការដុតវាលស្មៅ ការដុតរានព្រៃ ការដុតគល់ជញ្ជ្រាំង ការដុតសំណល់រឹងសំរាមនៅទីលម្ហ និងទីលានចាក់សំណល់ និងការហុយធូលីពីការដ្ឋានសំណង់ជាដើម។
ក្រសួងបរិស្ថានក៏បានអំពាវនាវដល់អភិបាលនៃគណៈអភិបាលរាជធានី-ខេត្ត ឱ្យជួយជំរុញការផ្សព្វផ្សាយដល់រដ្ឋបាលក្រុង ស្រុក ឃុំ សង្កាត់ និងប្រជាពលរដ្ឋពីវិធានការមួយចំនួនក្នុងការទប់ស្កាត់បញ្ហាភ្លើងឆេះព្រៃ ការដុតសំណល់សំរាម សំណល់រឹងនៅតាមទីលម្ហ ការដុតសម្អាតសំណល់ការដ្ឋានសំណង់ និងការឆេះតាមទីលានចាក់សំរាម។ ចាត់វិធានការទប់ស្កាត់ការហុយធូលីពីការដ្ឋានសំណល់ ការកែលម្អរចនាសម្ព័ន្ធផ្លូវថ្នល់ និងការហុយធូលីពីដងផ្លូវ និងទីសាធារណៈ។
ក្រសួងបរិស្ថានបញ្ជាក់ថា៖ «អប់រំប្រជាពលរដ្ឋកុំឱ្យដុតសំរាម សំណល់រឹង ដុតវាលស្មៅ ដុតគល់ជញ្ជ្រាំង និងការដុតសំណល់កសិកម្មផ្សេងៗទៀត។ ធ្វើការសម្អាតអនាម័យនៅតាមដងផ្លូវ និងតាមទីធ្លាសាធារណៈឱ្យបានជាប់ជាប្រចាំ និងត្រៀមមធ្យោបាយបង្ការទប់ស្កាត់ជាមុនក្នុងករណីភ្លើងចេះព្រៃជាយថាហេតុ»។
លោក ហេង យ៉ុនគូរ៉ា នាយកប្រតិបត្តិអង្គការកែច្នៃ និងអនាម័យសហគមន៍ (CSARO) បានឱ្យដឹងថា ការដុតព្រៃ ការដុតសំណល់នានា និងការដុតសំណល់រឹង សំរាមនៅទីលម្ហ ឬទីលានចាក់សំណល់ពិតជាបានបង្កបញ្ហាច្រើនដល់បរិយាកាស ជាពិសេសការបំពុលខ្យល់។ ដូច្នេះបញ្ហានេះទាមទារឱ្យមានការចូលរួមកាត់បន្ថយ ឬទប់ស្កាត់ពីគ្រប់និន្នាការទាំងអស់។ មន្ត្រីជំនាញត្រូវតែដើរតួជាគំរូបង្ហាញពីសកម្មភាពផ្សព្វផ្សាយឱ្យបានទូលំទូលាយដល់ពលរដ្ឋ និងអ្នកពាក់ព័ន្ធ៕