.jpg)
តំបន់ការពារធនធានធម្មជាតិព្រៃឡង់ក្នុងខេត្តកំពង់ធំ។ រូបថត AKP
ភ្នំពេញ: ក្រសួងបរិស្ថានបាននិងកំពុងរៀបចំការបង្កើតទីស្នាក់ការរួមមួយនៅតំបន់មុំ ៣ (កំពង់ធំ ស្ទឹងត្រែង ក្រចេះ) ក្នុងដែនជម្រកសត្វព្រៃ ព្រៃឡង់សម្រាប់មន្ត្រីឧទ្យានុរក្សប្រចាំការរួមគ្នា ដើម្បីត្រួតពិនិត្យ និងការទប់ស្កាត់បទល្មើសធនធានធម្មជាតិ ជាពិសេសទប់ស្កាត់មិនឲ្យមានការទន្ទ្រានដែនជម្រកសត្វព្រៃព្រៃឡង់។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានឲ្យដឹងពីម្សិលមិញថា ការបង្កើតទីស្នាក់ការថ្មីមួយនេះ ដើម្បីត្រួតពិនិត្យ និងការពារទប់ស្កាត់បទល្មើសធនធានធម្មជាតិ ជាពិសេសត្រួតពិនិត្យការដឹកជញ្ជូនផល អនុផលព្រៃឈើ ដែលបានពីការឈូសឆាយដីក្រុមហ៊ុនសម្បទានសេដ្ឋកិច្ចដែលឆ្លងកាត់ ឬជាប់តំបន់ព្រៃឡង់។ លើសពីនេះ ដើម្បីទប់ស្កាត់កុំឲ្យមានអ្នកប៉ះពាល់ដែនជម្រកសត្វព្រៃព្រៃឡង់ និងបង្ការការលួចដកហូតផលព្រៃឈើណាមួយពីតំបន់ព្រៃឡង់។
លោកបន្តថា ការបង្កើតប៉ុស្តិ៍ថ្មីនេះគឺជាយន្តការការពារធនធានធម្មជាតិដែលអាចផ្ទុកមន្ត្រីឧទ្យានុរក្សជិត ១០០ នាក់។
ជាមួយគ្នានេះក្រសួងបរិស្ថានក៏បានពិភាក្សាជាមួយគម្រោងព្រៃឡង់បៃតងរបស់អង្គការ USAID ក្នុងការកសាងស្នាក់ការមន្ត្រីឧទ្យានុរក្សនៅតំបន់មុំ ៣ នៃខេត្តកំពង់ធំ ស្ទឹងត្រែង និងក្រចេះផងដែរ។
លោកបញ្ជាក់ថា៖ «លើសពីនេះទៀត យើងគ្រោងនឹងបង្កើតស្នាក់ការមុំ ៣ ស្ទឹងត្រែង ព្រះវិហារ និងកំពង់ធំមួយបន្ថែមទៀត ប៉ុន្ដែមិនទាន់ច្បាស់លាស់ទេ។ ហើយស្នាក់ការទាំងនេះនឹងបម្រើការងារស្នាក់នៅរបស់មន្ត្រីឧទ្យានុរក្សផង និងបម្រើឲ្យការបង្ក្រាបទប់ស្កាត់បទល្មើសធនធានធម្មជាតិផង»។
លោក សៅ សុភាព រដ្ឋលេខាធិការក្រសួងបរិស្ថាននៅថ្ងៃទី ៧ ខែឧសភានេះបានដឹកនាំក្រុមការងារក្រសួងបរិស្ថានចុះពិនិត្យទីតាំងជុំវិញព្រៃឡង់ក្នុងភូមិសាស្ត្រខេត្តកំពង់ធំ និងព្រះវិហារ ដើម្បីស្វែងរកទីតាំងសមស្របសម្រាប់សាងសង់ស្នាក់ការរួមមួយក្នុងការបង្កើនប្រសិទ្ធភាពក្នុងការការពារ និងអភិរក្សធនធានធម្មជាតិនៅក្នុងដែនជម្រកសត្វព្រៃ «ព្រៃឡង់»។
គេហទំព័រក្រសួងព័ត៌មានបានដកស្រង់សម្ដីលោក សៅ សុភាព កាលពីថ្ងៃទី ៧ ខែឧសភា ថា ស្នាក់ការនេះនឹងប្រើប្រាស់ជាកន្លែងប្រមូលផ្តុំនូវធនធានបច្ចេកទេស ការអនុវត្តច្បាប់ ការគ្រប់គ្រងកម្លាំងការពារ ល្បាត ប្រចាំការ និងអន្តរាគមន៍លើបទល្មើសធនធានធម្មជាតិដែលអាចកើតឡើងនៅក្នុងតំបន់ការពារធម្មជាតិនេះ ហើយដែលអាចផ្តល់លទ្ធភាពឲ្យមានការចូលរួមពីក្រសួង ស្ថាប័ន និងដៃគូសហការផ្សេងទៀត។
លោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារបានថ្លែងពីម្សិលមិញថា លោកមិនទាន់បានដឹងពីគម្រោងបង្កើតទីស្នាក់ការនៅតំបន់មុំ ៣ នៃដែនជម្រកសត្វព្រៃព្រៃឡង់ទេ ដោយសារថ្នាក់លើមិនទាន់បានផ្ដល់ដំណឹងមកខេត្តព្រះវិហារនៅឡើយ។
លោកថា៖ «ខ្ញុំអត់ទាន់ដឹងផង ប្រហែលក្រសួងមិនទាន់ជូនដំណឹងមកខេត្តព្រះវិហារ»។
លោក តុប កក្កដា ប្រធានមន្ទីរបរិស្ថានខេត្តកំពង់ធំបានថ្លែងពីម្សិលមិញថា លោកបានចុះពិនិត្យទីតាំងបង្កើតទីស្នាក់ការថ្មីនេះជាមួយថ្នាក់ដឹកនាំក្រសួងបរិស្ថានហើយ ដោយក្រុមការងារបានកំណត់យកតំបន់អូរងាវដែលជាចំណុចប្រសព្វ ឬតំបន់មុំ ៣ នៃខេត្តព្រះវិហារ ខេត្តក្រចេះ និងកំពង់ធំ។ ស្នាក់ការថ្មីនេះ ដើម្បីត្រួតពិនិត្យការនាំចេញ-ចូលរបស់ក្រុមហ៊ុនដែលទទួលបានដីសម្បទានសេដ្ឋកិច្ចនៅក្បែរៗតំបន់ព្រៃឡង់។
លោកបញ្ជាក់ថា៖ «ទីស្នាក់ការនេះ គឺភាគីពាក់ព័ន្ធទាំងអស់ដែលទទួលសិទ្ធិចូលរួមការពារតំបន់ព្រៃឡង់អាចមកស្នាក់អាស្រ័យបាន ដើម្បីចូលរួមការងារជាមួយមន្ត្រីជំនាញ។ យើងត្រូវតែរឹតបន្ដឹងច្បាប់បន្ថែមទៀត ដើម្បីការពារធនធានធម្មជាតិព្រៃឡង់នេះ»។
លោក នេត្រ ភក្ត្រា បានថ្លែងថានេះគឺជាកិច្ចខិតខំប្រឹងប្រែងរបស់ក្រសួងបរិស្ថាន មន្ត្រីឧទ្យានុរក្ស និងសហគមន៍នៃតំបន់ការពារធម្មជាតិក្នុងការការពារ និងអភិរក្សធនធានធម្មជាតិក្នុងតំបន់ព្រៃឡង់ឲ្យបានគង់វង្សសម្រាប់មនុស្សរាប់ជំនាន់ទៅមុខទៀត។
លោកបន្តថា ទោះបីជាមានការចុះទប់ស្កាត់ និងបង្ក្រាបទាំងយប់ទាំងថ្ងៃពីសំណាក់មន្ត្រីឧទ្យានុរក្ស និងសមាជិកនៃសហគមន៍តំបន់ការពារធម្មជាតិក៏បទល្មើសធនធានធម្មជាតិទ្រង់ទ្រាយតូចដូចជា ការលបលួចកាប់ឈើ ការទន្ទ្រានរានយកដីធ្វើជាកម្មសិទ្ធិ ការបរបាញ់ និងការដាក់អន្ទាក់សត្វព្រៃ នៅតែបន្ដកើតមាននៅក្នុងតំបន់ព្រៃឡង់ដែលចាំបាច់ត្រូវចាត់វិធានការទប់ស្កាត់ និងបង្ក្រាបបន្តទៀត។
លោកបញ្ជាក់ថា៖ «មានកត្តាផ្សេងៗដែលជំរុញឲ្យមានបទល្មើសទាំងនេះក្នុងនោះរួមមាន កត្ដាជីវភាពរបស់ប្រជាសហគមន៍ដែលធ្លាប់តែពឹងអាស្រ័យទៅលើផល អនុផលព្រៃឈើ និងការទាក់ទាញ និងញុះញង់ពីសំណាក់ក្រុមឈ្មួញទុច្ចរិត គួបផ្សំនឹងចំនួនមន្ដ្រីឧទ្យានុរក្សដែលបានឈរជើងនៅក្នុងតំបន់នោះនៅមានកម្រិតនៅឡើយ។ តែយើងមានការតាំងចិត្តខ្ពស់ក្នុងការទប់ស្កាត់ និងបង្ក្រាបយ៉ាងម៉ឺងម៉ាត់ប្រឆាំងនឹងបទល្មើសដែលកើតឡើងស្របតាមច្បាប់នានា»។ របាយការណ៍ក្រសួងបរិស្ថានឲ្យដឹងថា ដែនជម្រកសត្វព្រៃ « ព្រៃឡង់» ស្ថិតនៅក្នុងភូមិសាស្ត្រខេត្តចំនួន ៤ គឺខេត្តកំពង់ធំ ព្រះវិហារ ក្រចេះ និងខេត្តស្ទឹងត្រែង ដែលមានផ្ទៃដីសរុបជាង ៤៣១ ៦៨៣ ហិកតា៕
