.jpg)
លោក សាយ សំអាល់ រដ្ឋមន្ត្រីក្រសួងបរិស្ថាន ថ្លែងនៅក្នុងសន្និបាតប្រចាំឆ្នាំកាលពីម្សិលមិញ។ ហុង មិនា
ភ្នំពេញៈ លោក សាយ សំអាល់ រដ្ឋមន្ត្រីក្រសួងបរិស្ថានបានថ្លែងនៅក្នុងសន្និបាតប្រចាំឆ្នាំកាលពីម្សិលមិញដោយបានដាក់ចេញនូវយុទ្ធសាស្ត្របន្តសហការជាមួយក្រសួងពាក់ព័ន្ធ ២ ដើម្បីពង្រឹងភាពស្និទ្ធស្នាលក្នុងការបញ្ជ្រាបកម្មវិធីសិក្សាស្ដីអំពីបរិស្ថានសម្រាប់ទិសដៅការងារឆ្នាំ ២០២១ ដល់សិស្សានុសិស្សចាប់ពីថ្នាក់មត្តេយ្យរហូតដល់ថ្នាក់ទី ១២ ព្រោះការអប់រំផ្សព្វផ្សាយពីបញ្ហាបរិស្ថានជាចំណុចគន្លឹះដោះស្រាយបញ្ហាប្រឈមមួយចំនួនដូចជា ការងារគ្រប់គ្រងសំរាម សំណល់រឹង និងទឹកកខ្វក់ទីប្រជុំជននៅកម្ពុជា។
នៅក្នុង «សន្និបាតបូកសរុបលទ្ធផលការងារបរិស្ថានឆ្នាំ ២០២០ និងលើកទិសដៅការងារឆ្នាំ ២០២១» នៅទីស្តីការក្រសួងបរិស្ថានកាលពីម្សិលមិញ លោករដ្ឋមន្ត្រីបានប្រកាសដៃគូសហការជាមួយក្រសួងអប់រំ យុវជន និងកីឡា និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
លោករដ្ឋមន្ដ្រីថ្លែងថា៖ «យុទ្ធសាស្ដ្រ និងគោលនយោបាយបន្ទាប់ ត្រូវធ្វើការជាប់ជាមួយក្រសួងអប់រំទាក់ទងទៅនឹងកម្មវិធីសិក្សាដើម្បីបញ្ជ្រាបកម្មវិធីសិក្សាស្ដីអំពីបរិស្ថានចាប់ពីថ្នាក់មត្តេយ្យរហូតដល់ថ្នាក់ទី ១២ យើងត្រូវតែធ្វើកិច្ចការងារនេះ។ យើងក៏ត្រូវសហការជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ព្រោះដើម្បីកាត់បន្ថយផលប៉ះពាល់បរិស្ថាន គឺយើងត្រូវពឹងផ្អែកខ្ពស់ទៅលើបច្ចេកវិទ្យា និងវិទ្យាសាស្ដ្រខ្ពស់។ ដូច្នេះ ដើម្បីកាត់បន្ថយផលប៉ះពាល់ យើងត្រូវធ្វើការងារនេះ ដើម្បីប្រើប្រាស់នូវបច្ចេកវិទ្យាថ្មី វិទ្យាសាស្ដ្រថ្មី បច្ចេកទេសថ្មី ដើម្បីជួយកាត់បន្ថយផលប៉ះពាល់ដល់បរិស្ថាន»។
លោករដ្ឋមន្ដ្រីបានបញ្ជាក់ថា ការងារគ្រប់គ្រងសំរាម សំណល់រឹង និងទឹកកខ្វក់ទីប្រជុំជននៅកម្ពុជានៅមានបញ្ហាប្រឈមមួយចំនួន បើទោះបីកន្លងមកក្រសួងបានខិតខំកសាងក្របខ័ណ្ឌគោលនយោបាយ ច្បាប់ និងគតិយុត្តជាច្រើនគួរឱ្យកត់សម្គាល់ក៏ដោយ។
បញ្ហាប្រឈមមួយចំនួន ព្រោះហេតុថា សង្គមជាតិកម្ពុជាមានការវិវឌ្ឍលឿន ជាពិសេសកំណើនសេដ្ឋកិច្ច និងជីវភាពប្រជាពលរដ្ឋខ្ពស់បានជំរុញឱ្យមានកំណើនការប្រើប្រាស់ច្រើន (mass consumption) កំណើនប្រជាជន និងការពង្រីកតំបន់ក្រុង និង ទីប្រជុំជនដែលធ្វើឱ្យសមត្ថភាពប្រព័ន្ធគ្រប់គ្រងដែលមានស្រាប់មិនអាចរ៉ាប់រងបាន។
លោករដ្ឋមន្ដ្រីបានឱ្យដឹងថា ក្រសួងក៏បានជួយអន្តរាគមន៍ដល់ក្រុង និងស្រុកដែលមានបញ្ហាប្រឈមខ្លាំងក្នុងការគ្រប់គ្រងសំរាម សំណល់រឹងដោយក្នុងនោះបានផ្តល់ឡដុតសំរាមខ្នាតតូច រថយន្តដឹកសំរាម ធុងសំរាម និងម៉ូតូកង់ ៣ ដឹកសំរាមជាដើម។
លោករដ្ឋមន្ដ្រីថ្លែងថា៖ «ទោះជាយ៉ាងណាក្តី ធនធានមនុស្សនៅរដ្ឋបាលថ្នាក់ក្រោមជាតិនៅតែជាបញ្ហាប្រឈមធំមួយដែលយើងត្រូវបន្តចូលរួមដោះស្រាយបន្ថែមទៀត។ ក្រសួងបរិស្ថានក៏បានជំរុញ និងចូលរួមធ្វើទំនើបកម្មប្រព័ន្ធគ្រប់គ្រងសំរាម សំណល់រឹង ដោយគិតគូរគ្រប់ជ្រុងជ្រោយពីដើមខ្សែដល់ចុងខ្សែដោយចាប់ផ្តើមពីរាជធានីភ្នំពេញមុនហើយនឹងបន្តអនុវត្តការងារនេះនៅតាមទីប្រជុំជនសំខាន់ៗមួយចំនួនទៀត»។
លោក រស់ សុវាចា អ្នកនាំពាក្យក្រសួងអប់រំថ្លែងកាលពីម្សិលមិញថា បរិស្ថានសាលារៀនល្អជះឥទ្ធិពលវិជ្ជមានលើការរៀន និងបង្រៀន។ ក្រសួងអប់រំបានបញ្ចូលខ្លឹមសារពាក់ព័ន្ធនឹងផលប៉ះពាល់នៃការប្រើប្រាស់ប្លាស្ទិក និងការងារបរិស្ថានទូទៅចូលក្នុងកម្មវិធីសិក្សា និងបញ្ជ្រាបខ្លឹមសារពាក់ព័ន្ធចាប់ពីកម្រិតមត្តេយ្យសិក្សា ហើយក្រសួងទាំង ២ នឹងបន្តកិច្ចសហការលើការងារបរិស្ថាន។
លោកថ្លែងថា៖ «ក្រសួងអប់រំបាន និងបន្តអនុវត្តកម្មវិធីសិក្សាស្តីពីបរិស្ថាន និងលើកទឹកចិត្តសិស្សានុសិស្សគ្រប់កម្រិតសិក្សាឱ្យស្រឡាញ់ និងចូលរួមថែរក្សា ការពារបរិស្ថានសាលារៀន»។
លោក ផៃ ប៊ុនឈឿន រដ្ឋលេខាធិការប្រចាំការក្រសួងបរិស្ថានបានបង្ហាញរបាយការណ៍ក្នុងសន្និបាតកាលពីម្សិលមិញដែរថា ក្រសួងបរិស្ថានបានចូលរួមរៀបចំប្រព័ន្ធថ្មីសម្រាប់គ្រប់គ្រងសំរាមរាជធានីភ្នំពេញបានបំពាក់ឡដុតសំរាមចំនួន ១៦ ទីតាំងសំខាន់ៗបានរៀបចំបណ្តុះបណ្តាលបច្ចេកទេស និងសិក្ខាសាលាដល់ក្រុង ស្រុក ដើម្បីលើកកម្ពស់ការយល់ដឹងស្តីពីការគ្រប់គ្រងសំរាម សំណល់រឹង ទីប្រជុំជន និងការកាត់បន្ថយសំណល់ប្លាស្ទិកដល់សាធារណជន និងរាជធានី ខេត្តគោលដៅ។
លោកថា៖ «ក្រសួងក៏បានជំរុញ និងអនុវត្តលិខិតបទដ្ឋានគតិយុត្តលើការងារវាយតម្លៃហេតុប៉ះពាល់បរិស្ថាន និងចុះជំរុញការប្រមូលមូលនិធិបរិស្ថាន និងសង្គម»៕
