មណ្ឌលគិរីៈ ក្រសួងបរិស្ថានកំពុងជំរុញកិច្ចសហប្រតិបត្តិការជាមួយនឹងអង្គការដៃគូពាក់ព័ន្ធនានា ដើម្បីដាក់កាមេរ៉ា ស្វ័យប្រវត្តិ សម្រាប់ថតសកម្មភាពនៃវត្តមានសត្វនៅក្នុងតំបន់ការពារធម្មជាតិទាំងអស់នៅកម្ពុជា ព្រោះវត្តមានសត្វ នៅក្នុងតំបន់ការពារធម្មជាតិ គឺវាជាផ្នែកមួយសំខាន់ក្នុងការអភិរក្ស និងផ្នែកអភិវឌ្ឍ ទេសចរណ៍ធម្មជាតិ។
លោក នេត្រ ភក្ត្រា អ្នកនាំពាក្យក្រសួងបរិស្ថានបានឲ្យដឹងថា គ្រប់តំបន់ការពារធម្មជាតិស្ទើរតែទាំងអស់ មានដាក់នូវកាមេរ៉ាស្វ័យប្រវត្តិសម្រាប់ថតប្រភេទសត្វព្រៃក្នុងតំបន់ការពារធម្មជាតិដែលសារៈប្រយោជន៍គឺទី ១ ដើម្បីឲ្យដឹងពីវត្តមានសត្វព្រៃក្នុងតំបន់ការពារធម្មជាតិ និងទី ២ គឺដើម្បីរៀបចំផែនការ ការពារ និងអភិរក្សនូវតំបន់ដែនជម្រកសត្វព្រៃទាំងអស់ដែលមានវត្តមានសត្វព្រៃ។
លោកថ្លែងថា៖ «យើងឃើញថា តាមរយៈកាមេរ៉ាសុវត្ថិភាព តំបន់ការពារធម្មជាតិ យើងបានឃើញមានប្រភេទសត្វជាច្រើន ប្រភេទហើយក្នុងនោះក៏មានប្រភេទសត្វកម្រផងដែរ ដូចជា សត្វរមាំង សត្វខ្ទីង ខ្លាឃ្មុំ ដំរី ខ្លារខិន និងប្រភេទសត្វផ្សេងៗទៀត» ។
បើតាមលោក ភក្ត្រា ក្នុងឆ្នាំ ២០២០ កន្លងទៅ ក្រសួងបរិស្ថានបានដោះអន្ទាក់ជាង ៥ ម៉ឺន និងចាប់បានកាំភ្លើងកែច្នៃប្រមាណជាង ៤០០ ដើម ដែលអន្ទាក់ និងកាំភ្លើងកែច្នៃទាំងនោះបានបង្កគ្រោះថ្នាក់បំផុតសម្រាប់សត្វព្រៃ។
តាមការសិក្សាស្រាវជ្រាវក្នុងរយៈពេល ១០ ឆ្នាំមកនេះ ប្រភេទសត្វមួយចំនួន មានការកើនឡើង ប្រភេទសត្វមួយចំនួនមានការថយចុះ និងប្រភេទសត្វមួយចំនួនទៀតនៅថេរ។
ប្រភេទសត្វទាំងអស់នោះមានដូចជា សត្វទន្សោង ខ្ទីង ជ្រូកព្រៃ ក្ងោក ឈ្លូស រមាំង ជាដើមដែលនេះជាប្រភេទសត្វ ក្រចកជើង ៤ ហើយ ប្រភេទស្វា មានស្វាតូចពណ៌លឿង ស្វាកន្ទុយស ស្វាត្រោស ស្រាព្រាហ្ម ជាដើម។
ហ្វេសប៊ុកអង្គការសមាគមអភិរក្សសត្វព្រៃ ហៅកាត់ WCS នៅថ្ងៃនេះបានឱ្យដឹងថា សត្វព្រៃសំខាន់ៗចំនួន ១០ ប្រភេទ ត្រូវបានថតឃើញដោយម៉ាស៊ីនថតស្វ័យប្រវត្តិ ដែលក្រុមអភិរក្សបានដាក់បង្កប់ក្នុងដែនជម្រកសត្វព្រៃកែវសីមា ខេត្តមណ្ឌលគិរី ចន្លោះពីខែមីនា ដល់ចុងខែមេសាកន្លងទៅនេះ។
អង្គការ WCS ប្រចាំនៅកម្ពុជាបានបញ្ជាក់ថា ប្រភេទសត្វព្រៃសំខាន់ៗទាំងនោះរួមមាន ប្រើស ខ្ទីង ស្វាត្រោស ឈ្លូស ជ្រូកព្រៃ កាំប្រមា ក្ងោក ស្វាអង្គត់ ស្តេចកូលីត និងស្កាធំ។
«រូបសត្វព្រៃទាំងនេះ ត្រូវបានក្រុមការងារទាញយកពីម៉ាស៊ីនថតសត្វព្រៃស្វ័យប្រវត្តិ ដែលដាក់បង្កប់ចំនួន ១០ គ្រឿង កាលពីខែមីនាកន្លងទៅ ដើម្បីតាមដានវត្តមាននៃប្រភេទសត្វព្រៃដែលមានដោយកម្រ និងជិតផុតពូជបំផុតក្នុងដែនជម្រកសត្វព្រៃកែវសីមា»។
អង្គការ WCS បញ្ជាក់ថា កាលពីសប្តាហ៍កន្លងទៅនេះ ក្រុមការងារស្រាវជ្រាវសត្វព្រៃនៃអង្គការ WCS សហការជាមួយសហគមន៍មូលដ្ឋានបានចុះបំពេញការងារទីវាល នៅតាមតំបន់សំខាន់ៗមួយចំនួន ស្ថិតក្នុងដែនជម្រកសត្វព្រៃកែវសីមា ដើម្បីស្វែងរកមើលអន្ទាក់ដែលពួកព្រានបានដាក់ខុសច្បាប់ ដើម្បីចាប់សត្វព្រៃ និងស្រាវជ្រាវបន្ថែមអំពីវត្តមាននៃប្រភេទសត្វព្រៃដែលមានដោយកម្រ និងជិតផុតពូជ។
«ក្រុមការងារបានចំណាយពេលចំនួនមួយសប្តាហ៍ ក្នុងការដើររុករកតាមតំបន់គោលដៅសំខាន់ៗ និងដោះបានអន្ទាក់ចំនួន ៣១ អន្ទាក់ ដែលអន្ទាក់ទាំងនេះ គឺជាកត្តាគំរាមកំហែងដ៏ធំមួយ រួមចំណែកក្នុងការសម្លាប់សត្វព្រៃគ្រប់ប្រភេទនៅប្រទេសកម្ពុជាក្នុងរយៈពេលកន្លងមក»៕