ព្រះវិហារ: ក្រុមយុវជន ព្រះសង្ឃ និងសហគមន៍ព្រៃព្រះរកាបានយកញត្តិមកដាក់ជូនរដ្ឋមន្ត្រីក្រសួងបរិស្ថាន ដើម្បីស្នើឲ្យចាត់វិធានការតាមច្បាប់ ចំពោះបទល្មើសព្រៃឈើ និងសត្វព្រៃដែលនៅតែបន្តកើតឡើង បន្ទាប់ពីពួកគេបានចុះល្បាតព្រៃ ៩ លើក រកឃើញបទល្មើសព្រៃឈើ ៩៨ ករណី។ ក្រសួងបរិស្ថានបានទទួលយកញត្តិនេះ ហើយគ្រោងនឹងបញ្ជូនមន្ត្រីឲ្យចុះធ្វើការស៊ើបអង្កេត។
តាមញត្តិរបស់ប្រជាសហគមន៍ព្រៃព្រះរកាចំនួន ៣ ទំព័រ ដែលមានស្នាមមេដៃចំនួន ១៥៤ នាក់ បានដាក់ជូនលោក សាយ សំអាល់ រដ្ឋមន្ត្រីក្រសួងបរិស្ថាន នៅថ្ងៃទី ២៨ កុម្ភៈ បានសរសេរនៅត្រង់ចំណុចទី ១ ថាការផាកពិន័យអន្តរកាលពុំមានប្រសិទ្ធភាព ដោយសារជនល្មើសមានថៅកែជាអ្នកបង់លុយជំនួស ដូច្នេះពួកគេនៅតែអាចចូលព្រៃកាប់ឈើបន្តទៀត។
ចំណុចទី ២ នៃញត្តិសរសេរថា មានផ្លូវខ្វាត់ខ្វែងក្នុងព្រៃងាយស្រួលដល់ក្រុមជនល្មើសដឹកជញ្ជូនឈើ និងសត្វព្រៃ។ ទី៣- ពុំមានការស៊ើបអង្កេតរកអ្នកនៅពីក្រោយខ្នងចាំទទួលទិញឈើ នៅពេលចាប់ជនល្មើសបានម្ដងៗ។ ទី៤- ពុំមានយន្តការតាមដានត្រួតពិនិត្យដាក់ទោសមន្ត្រីអនុវត្តច្បាប់មិនល្អ ឬមន្ត្រីឃុបឃិតជាមួយឈ្មួញពាក់ព័ន្ធ។ ទី៥- ពុំមានការចុះពិនិត្យតាមផ្ទះពលរដ្ឋនៅជុំវិញដែនជម្រកសត្វព្រៃព្រះរកា និងទី៦- ជនល្មើសចូលអារឈើ និងដឹកជញ្ជូនឈើនៅពេលយប់បង្កការលំបាកក្នុងការឃាត់ ឬចាប់មកអនុវត្តច្បាប់របស់មន្ត្រីជំនាញ។
លោក ថង ស៊ុត តំណាងប្រជាសហគមន៍ទាំង ១៥៤ នាក់ដែលមានស្នាមមេដៃនៅក្នុងញត្តិបានថ្លែងថា ក្រុមលោកចំនួនជាង ២០ នាក់ បានយកញត្តិមានស្នាមមេដៃនេះមកដាក់ជូនលោក សាយ សំអាល់ រដ្ឋមន្ត្រីក្រសួងបរិស្ថាន ដើម្បីស្នើឲ្យលោកជួយអន្តរាគមន៍ទៅមន្ត្រីជំនាញមូលដ្ឋាន ពង្រឹងការអនុវត្តច្បាប់ចំពោះបទល្មើសព្រៃឈើនៅក្នុងព្រៃព្រះរកាស្ថិតនៅប្រជុំជនស្រុកឆែប ជាំក្សាន្ដ និងស្រុកត្បែងមានជ័យ ខេត្តព្រះវិហារ។
លោកបន្តថា បទល្មើសព្រៃឈើចំនួន ៩៨ ករណី ដែលពួកលោករួមគ្នាចុះល្បាតចំនួន ៩ លើក ចាប់តាំងពីដើមឆ្នាំ ២០១៩ រហូតមកដោយរឹបអូសឈើបានជាង ៤០០ (៤១៨) បន្ទះក្នុងនោះមានប្រភេទឈើ គគីរ កកោះ ផ្ដៀក ពពេល និងស្រឡៅជាដើម។ លោកថា ខ្លឹមសារញត្តិនេះបានភ្ជាប់ភ័ស្តុតាងមួយចំនួនរួមមាន លេខ GPS ឃ្លីបវីដេអូបង្ហាញពីសកម្មភាពអ្នកដឹកឈើខុសច្បាប់ដែលក្រុមជនល្មើសសារភាពថា ខ្លួនដឹកឈើឲ្យថៅកែមានអំណាចម្នាក់។
លោកបញ្ជាក់ថា៖ «យើងខ្ញុំសង្កេតឃើញមានសកម្មភាពនៃការកាប់បំផ្លាញព្រៃឈើកើតមានជាហូរហែ ឥតស្រាកស្រាន្តពីសំណាក់ក្រុមជនខិលខូចដែលបានចូលទៅកាប់ និងដឹកឈើធ្វើអាជីវកម្ម បើទោះបីជារដ្ឋាភិបាលបានដាក់តំបន់នេះចូលជាដែនជម្រកសត្វព្រៃព្រះរកាតាំងពីឆ្នាំ ២០១៦ យ៉ាងណាក្តី»។
លោក ហែត ណៃ ពលរដ្ឋសហគមន៍ម្នាក់ដែលបានមកដាក់ញត្តិនៅក្រសួងបរិស្ថានពីថ្ងៃទី ២៨ ខែកុម្ភៈផងដែរបានឲ្យដឹងថា ការដោះស្រាយបញ្ហានេះនឹងមិនមានអ្វីលំបាកទេ ប្រសិនបើរដ្ឋាភិបាល និងក្រសួងបរិស្ថានមានឆន្ទៈដោះស្រាយ ព្រោះពលរដ្ឋសហគមន៍បានបង្ហាញគោលគំនិតមួយចំនួនដាក់ក្នុងខ្លឹមសារញត្តិរួចជាស្រេច ដើម្បីបង្ក្រាបបទល្មើសព្រៃឈើឲ្យមានប្រសិទ្ធភាពដោយក្រសួង ត្រូវតែរកអ្នកនៅពីក្រោយខ្នងនៃសកម្មភាពកាប់ឈើ និងដឹកជញ្ជូនឈើខុសច្បាប់ក្នុងព្រៃព្រះរកា។
លោកបញ្ជាក់ថា៖ «យើងមើលឃើញថា ការអនុវត្តច្បាប់នៅដែនជម្រកសត្វព្រៃព្រះរកាហ្នឹងមានដែរ ប៉ុន្តែវានៅមិនទាន់គ្រប់គ្រាន់ទេ។ ក្រៅពីសកម្មភាពល្បាតដោយមន្ត្រីឧទ្យានុរក្សហ្នឹង ខ្ញុំគិតថាក្រសួងត្រូវមានយុទ្ធសាស្ត្របន្ថែមទៀតដូច្នេះចង់ឲ្យក្រសួងហ្នឹងបង្ហាញយុទ្ធសាស្ត្រពីសកម្មភាពខ្លួនឯងជាក់លាក់»។
លោក នេត្រ ភត្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានថ្លែងយ៉ាងខ្លីកាលពីម្សិលមិញថា មន្ត្រីក្រសួងបរិស្ថានបានទទួលយកញត្តិនេះពីប្រជាសហគមន៍រួចរាល់ហើយដោយក្រសួងគ្រោងនឹងចាត់បញ្ជូនមន្ត្រីជំនាញចុះពិនិត្យស្ថានភាពជាក់ស្ដែងលើទីតាំងនោះផ្ទាល់ដូចដែលមានសរសេរនៅក្នុងខ្លឹមសារញត្តិរបស់សហគមគន៍។
គួររំឭកថា ព្រៃព្រះរកាគឺជាព្រៃធំទី ២ បន្ទាប់ពីព្រៃឡង់ដែលស្ថិតនៅចំណុចប្រសព្វនៃស្រុក ៣ ក្នុងខេត្តព្រះវិហារដូចជា ស្រុកត្បែងមានជ័យ ស្រុកជាំក្សាន្ត និងស្រុកឆែបដែលលាតសន្ធឹងលើផ្ទៃដី ៩៥ ៩០៥ ហិកតា ដែលសម្បូរទៅដោយជីវចម្រុះសត្វព្រៃគ្រប់ប្រភេទ និងឈើប្រណីតជាពិសេសដើមឈើទាលដើមជ័រទឹកដែលមានប្រជាពលរដ្ឋរស់នៅក្នុងតំបន់នេះចំនួន ១៥ ០៤៦ នាក់ ក្នុងភូមិចំនួន ២១ ភូមិ៕