.jpg)
អ្នកចូលរួមក្នុងសិក្ខាសាលាស្តីពីបរិស្ថានកាលពីថ្ងៃទី ២៧ ខែតុលា។ រូបថត ក្រសួងបរិស្ថាន
ភ្នំពេញ: ក្រសួងបរិស្ថានគ្រោងបោះពុម្ពផ្សាយរបាយការណ៍ស្តីពីស្ថានភាពបរិស្ថានជាតិលើកទី ៤ ជា ២ ភាសា (ខ្មែរ និងអង់គ្លេស) នៅចុងឆ្នាំ ២០២០ ដើម្បីចែកជូនក្រសួង ស្ថាប័ន អង្គការសង្គមស៊ីវិលជាតិ និងអន្តរជាតិប្រើប្រាស់ជាទិន្នន័យរួមមួយទាក់ទងបរិស្ថាន ដោយចៀសវាងការប្រើប្រាស់ទិន្នន័យផ្សេងៗពីគ្នា ខណៈភាគីពាក់ព័ន្ធបានបញ្ចប់ការពិគ្រោះយោបល់រួចរាល់។
មន្ត្រីជំនាញក្រសួងបរិស្ថាន ក្រសួង ស្ថាប័ន អង្គភាពពាក់ព័ន្ធ សាកលវិទ្យាល័យ អង្គការជាតិ និងអន្តរជាតិដែលទទួលបន្ទុក ការងារទាក់ទងបរិស្ថាន និងធនធានធម្មជាតិនៅថ្ងៃទី ២៧ ខែតុលា បានជួបជុំគ្នាក្នុងសិក្ខាសាលាពិគ្រោះយោបល់បញ្ចប់លើ «សេចក្តីព្រាងរបាយការណ៍ស្ថានភាពបរិស្ថានជាតិលើកទី ៤» នៅសណ្ឋាគារកាំបូឌីយ៉ាណា។
លោក ជួប ប៉ារីស៍ អគ្គនាយកនៃអគ្គនាយកដ្ឋានចំណេះដឹង និងព័ត៌មានបរិស្ថាននៃក្រសួងបរិស្ថានបានថ្លែងថា របាយការណ៍ជាលើកទី ៤ ដែលបានធ្វើជាលក្ខណៈអន្តរជាតិ ដោយមានលក្ខណពិសេសច្រើនជាង ៣ លើកមុនៗនេះ ព្រោះក្រសួងបានអញ្ជើញទីប្រឹក្សាជាតិ និងអន្តរជាតិ ដើម្បីចូលរួមបង្កើតជារបាយការណ៍ដែលអាចប្រើប្រាស់ជាអន្តរជាតិ។
លោកបានបន្តថា របាយការណ៍នេះមានរួមបញ្ចូលប្រធានបទសំខាន់ៗចំនួន ៧ ដូចជា គុណភាពខ្យល់ ការប្រែប្រួលអាកាសធាតុ ជីវចម្រុះ (ព្រៃឈើ និងសត្វព្រៃ) ទឹកសាប ដី (ការប្រើប្រាស់ដី និងគុណភាពដី) សំណល់ (សំណល់រឹង និងសំណល់រាវ) និងសុវត្ថិភាពចំណីអាហារ។ ប្រធានបទទាំងនេះនឹងត្រូវបានចងក្រងជាសៀវភៅមួយដែលអាចឱ្យក្រសួង ស្ថាប័ន អង្គការសង្គមស៊ីវិល និងសាធារណជនប្រើប្រាស់សម្រាប់សិក្សាស្រាវជ្រាវទាក់ទងបរិស្ថាន។
លោកបញ្ជាក់ថា៖ «ខ្ញុំរំពឹងថា បន្ទាប់ពីរបាយការណ៍នេះផ្សាយចេញទៅគឺស្ថាប័នពាក់ព័ន្ធ អង្គការដៃគូ អាចប្រើប្រាស់ទិន្នន័យនេះជាគោល ដើម្បីចៀសវាងការប្រើប្រាស់ទិន្នន័យផ្សេងៗគ្នា។ ជាមួយគ្នានេះរបាយការណ៍នឹងធ្វើការបោះពុម្ពផ្សាយជា ២ ភាសា គឺភាសាខ្មែរ និងអង់គ្លេសនៅចុងឆ្នាំនេះ ប៉ុន្ដែខ្ញុំមិនទាន់ដឹងពីចំនួនដែលត្រូវបោះពុម្ពទេ»។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានថ្លែងក្នុងកម្មវិធីនេះថា ភាគីពាក់ព័ន្ធបានបញ្ចប់ការពិគ្រោះយោបល់លើសេចក្តីព្រាងរបាយការណ៍ស្តីពីស្ថានភាពបរិស្ថានជាតិលើកទី ៤ នេះហើយ។ របាយការណ៍នេះ ពិតជាមានសារៈសំខាន់សម្រាប់ប្រទេសកម្ពុជា។ បរិស្ថាន គឺជាការងារពហុវិស័យ និងពហុជំនាញដែលក្នុងន័យនេះតម្រូវឱ្យមានការចូលរួមផ្តល់គំនិតយោបល់ មតិ ក៏ដូចជាការចែករំលែកទិន្នន័យព័ត៌មានគ្នាសម្រាប់ការកសាងរបាយការណ៍ស្ថានភាពបរិស្ថានជាតិ។
លោកបន្តថា បើទោះបីជាក្រសួងបរិស្ថានជាអ្នករៀបចំ និងសម្របសម្រួលក្ដី ប៉ុន្តែផលប្រយោជន៍គឺសម្រាប់ប្រជាជនកម្ពុជាទាំងមូល សម្រាប់ក្រសួង ស្ថាប័ន អង្គការសង្គមស៊ីវិលជាតិ អន្តរជាតិទាំងអស់ប្រើប្រាស់ ដើម្បីអាចមានទិន្នន័យរួមតែមួយក្នុងការប្រើប្រាស់ជាមូលដ្ឋានច្បាស់លាស់។
លោកបញ្ជាក់ថា៖ «ការកសាងរបាយការណ៍នេះ គឺជាការចងក្រង ប្រមូលផ្តុំឯកសារ ទិន្នន័យគោល និងព័ត៌មានបែបវិទ្យាសាស្ត្រអំពីបរិស្ថាន និងធនធានធម្មជាតិ សម្រាប់អ្នករៀបចំគោលនយោបាយអ្នកធ្វើផែនការ អ្នកគ្រប់គ្រង អ្នកសិក្សាស្រាវជ្រាវ វិនិយោគិន អង្គការជាតិ និងអន្តរជាតិប្រើប្រាស់ជាមូលដ្ឋាន ដើម្បីសម្រេចបានទៅតាមគោលបំណងរៀងៗខ្លួន តួយ៉ាងដូចជាការធ្វើសេចក្តីសម្រេចការអភិវឌ្ឍប្រកបដោយចីរភាព ស្របតាមកម្មវិធីនយោបាយជាតិ ការបង្កើនចំណេះដឹងបញ្ញាញាណក្នុងវិស័យបរិស្ថាន»។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុកថ្លែងថា លោកមិនទាន់បានដឹងពីរបាយការណ៍ស្ថានភាពបរិស្ថានជាតិលើកទី ៤ នេះឱ្យបានស៊ីជម្រៅនៅឡើយ ប៉ុន្ដែលោកជំរុញឱ្យភាគីពាក់ព័ន្ធបង្ហាញព័ត៌មានជាក់លាក់ មិនបិទបាំងរបាយការណ៍ទាក់ទងបទល្មើសកាប់ព្រៃឈើ ការបំពុលបរិស្ថាននានា ការកាប់ទន្ទ្រានដីព្រៃ និងបញ្ហាមួយចំនួនទៀត។
លោកបញ្ជាក់ថា៖ «ខ្ញុំមិនទាន់មានជំនឿទៅលើរបាយការណ៍ស្ថានភាពបរិស្ថានជាតិលើកទី ៤ នេះទាំងស្រុងថា អាចបង្ហាញព័ត៌មានពិតដល់សាធារណជន។ ខ្ញុំគិតថា របាយការណ៍នេះគេគ្រាន់តែចង់បង្ហាញពីសមិទ្ធផលដែលក្រសួងបានធ្វើកន្លងមក ពោលគឺមិនបង្ហាញអ្វីដែលជាបញ្ហាប្រឈមពិតៗជូនសាធារណជនបានស្វែងយល់ និងចូលរួមដោះស្រាយទេ»៕
