ភ្នំពេញៈ ក្រសួងបរិស្ថានបានចេញប្រកាសមួយដែលកំណត់ផ្ទៃដី ៥០៦ ហិកតានៅក្នុងតំបន់ភ្នំក្រវាញជាតំបន់ការពារ ដើម្បីអភិរក្សដើមក្រវាញ ក្នុងស្រុកវាលវែង ខេត្តពោធិ៍សាត់។
ប្រកាសនេះដែលចុះហត្ថលេខាដោយរដ្ឋមន្ត្រីក្រសួងបរិស្ថានលោក សាយ សំអាល់កាលពីថ្ងៃអង្គារមានគោលបំណងការពារ និងអភិរក្សដើមក្រវាញ ដែលជាប្រភេទដើមឈើដែលកំពុងក្លាយជាដើមឈើកម្រនៅក្នុងប្រទេសកម្ពុជា។
លោក ជា សំអាង អគ្គនាយកនៃអគ្គនាយកដ្ឋានអភិរក្សធនធានធម្មជាតិនៃក្រសួងបរិស្ថានបានថ្លែងកាលពីថ្ងៃពុធថា អាជ្ញាធរក៏ចង់លើកកម្ពស់ការយល់ដឹង និងធានាថាដើមក្រវាញអាចត្រូវការថែរក្សានៅក្នុងប្រទេសនេះ។
លោក សំអាង បានថ្លែងបន្តថាប្រជាជនអាចប្រើប្រាស់ដើមក្រវាញសម្រាប់ជាស្បៀងអាហារ និងថ្នាំពេទ្យ។
លោក សំអាង បានបញ្ជាក់ថា៖ «វាជាប្រភេទនៃថ្នាំបុរាណ ហើយយើងចាត់ទុកវាជាបេតិកភណ្ឌធម្មជាតិនៅតំបន់នោះ ដូច្នេះវាចាំបាច់ដែលត្រូវការពារ»។ «ក្រសួងការពារតំបន់នេះ ប៉ុន្តែរហូតមកដល់ពេលនេះមិនទាន់បានផ្តោតជាក់លាក់លើដើមក្រវាញទេ។ ក្រសួងក៏មិនទាន់បានកំណត់ថាតើក្រសួងនឹងការពារដើមក្រវាញដូចម្តេចនៅក្នុងតំបន់ការពារពីការប្រមូលផលទ្រង់ទ្រាយធំៗ»។
លោកបន្តថា ការបំពានប្រកាសនេះត្រូវបានកំណត់រួចហើយនៅក្នុងច្បាប់ ប៉ុន្តែសម្រាប់ការអនុវត្តត្រូវការអនុវត្តច្បាប់ឲ្យបានតឹងរ៉ឹង។ ប៉ុន្តែនឹងត្រូវការកំណត់លក្ខខណ្ឌសម្រាប់ការអនុញ្ញាតឲ្យគ្រួសារប្រជាពលរដ្ឋមូលដ្ឋានប្រមូលផលដើមក្រវាញក្នុងលក្ខខណ្ឌទទួលខុសត្រូវ និងក្នុងទ្រង់ទ្រាយតូច ដើម្បីធានាអនាគតយូរអង្វែងនៃដើមក្រវាញ។ សហគមន៍នៅតែអាចពឹងផ្អែកលើការប្រមូលផលដើមក្រវាញ ប៉ុន្តែត្រូវធ្វើឲ្យប្រាកដថា វាមានលក្ខណៈចីរភាព។ ប្រជាពលរដ្ឋមិនអាចប្រមូលផលច្រើនតាមដែលពួកគេចង់នោះទេ។ យើងនៅត្រូវការធ្វើការស្រាវជ្រាវបន្ថែមនៅឡើយអំពីរបៀបដើម្បីសម្រេចការងារនេះ»។
លោក ហេង សុភាណា អភិបាលស្រុកវាលវែងបានស្វាគមន៍គំនិតផ្តួចផ្តើមរបស់ក្រសួង។
លោកបានថ្លែងថា៖ «ប្រសិនបើក្រសួងអាចធ្វើ វាល្អសម្រាប់ប្រជាពលរដ្ឋមូលដ្ឋាន ហើយវាសំខាន់សម្រាប់ខេត្តរបស់យើង ដោយសារវាជាអត្តសញ្ញាណនៃខេត្តរបស់យើង»៕ PS