The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួងបរិស្ថាន ជូនដំណឹង​ឲ្យ​ចូលរួម​ការ​ពារ និង​ទប់​ស្កាត់​ភ្លើង​ឆេះ​ព្រៃ

ក្រសួងបរិស្ថាន ជូនដំណឹង​ឲ្យ​ចូលរួម​ការ​ពារ និង​ទប់​ស្កាត់​ភ្លើង​ឆេះ​ព្រៃ

Content image - Phnom Penh Post
ភ្លើង​​ឆេះ​ព្រៃ​នៅ​តំបន់​អភិរក្ស​ព្រែកទាល់កន្លង​មក​​​។ ភ្នំពេញ ប៉ុសិ៍្ត

ក្រសួងបរិស្ថាន ជូនដំណឹង​ឲ្យ​ចូលរួម​ការ​ពារ និង​ទប់​ស្កាត់​ភ្លើង​ឆេះ​ព្រៃ

ភ្នំពេញៈ ក្រសួងបរិស្ថាន បានចេញ​សេចក្តីជូន​ដំណឹង ដល់​ស្ថាប័ន​ជំនាញ​ពាក់ព័ន្ធ រួមទាំង​ប្រជាពលរដ្ឋ ឲ្យ​ចូលរួម​ទប់ស្កាត់​ភ្លើង​ឆេះ​ព្រៃ ក្នុង​តំបន់​ការពារ​ធម្មជាតិ និង​របៀង​អភិរក្ស​ជីវៈ​ចម្រុះ ខណៈ​ដែល​កម្ពុជា​នឹង​ទទួល​រង​ឥទ្ធិពល​បាតុភូត​អែល​នីណូ ដែល​អាកាស​ធាតុ​នឹង​ឡើង​កម្តៅ​ខ្លាំង​នៅ​ក្នុង​រដូវ​ប្រាំង​នេះ។

តាម​សេចក្តីជូនដំណឹង របស់​ក្រសួងបរិស្ថាន ដែល​ចេញ​កាលពី​ម្សិលមិញ​អំពី​វិធានការ​ទប់​ស្កាត់​ភ្លើង​ឆេះ​ព្រៃ​នេះ​គឺ​យោង​ទៅ​តាម​សារាចរ​ណែនាំ​ចុះ​ថ្ងៃទី ១៧ ខែ​មករា ឆ្នាំ ២០១៩ របស់​រាជ​រដ្ឋាភិបាល​កម្ពុជា​ស្តីពី​ការ​ចាត់​វិធានការ​ថែរក្សា​ទឹក​ទុក ខណៈ​កម្ពុជា​នឹង​ទទួល​រង​ដោយ​ប្រយោល ពី​ឥទ្ធិពល​បាតុភូត អែល​នីណូ (El Nino) នឹង​បង្ក​ឱ្យ​ធាតុ​អាកាស​នា​រដូវ​ប្រាំង​នេះ ពិសេស​ក្នុង​ខែ​មេសា និង​ឧសភា មាន​សភាព​ក្តៅ​ហួត​ហែង សីតុណ្ហភាព​អតិបរមា នៅ​ពេល​ខ្លះ​អាច​ហក់​ឡើង​ដល់ ៤០ អង្សា ទៅ ៤២ អង្សា។

សេចក្ដីជូនដំណឹង​នេះ​បាន​បញ្ជាក់ថា អាកាសធាតុ​ក្តៅ​ហួតហែង​របៀបនេះ នឹង​ធ្វើ​ឱ្យ​ព្រៃឈើ នៅ​ក្នុង​ប្រទេស​កម្ពុជា ងាយ​ទទួល​រង​នូវ​បាតុភូត​ភ្លើង​ឆេះ​ព្រៃ ដោយសារ​កត្តា​ធម្មជាតិ និង​សកម្មភាព​មនុស្ស។ តាម​ការ​កត់​សម្គាល់​របស់​ក្រសួង​បរិស្ថាន និង​យោង​តាម​របាយ​ការណ៍​ពី​ថ្នាក់​ក្រោម​ជាតិ ថ្នាក់​ជាតិ និង​ថ្នាក់​តំបន់ បញ្ហា​ភ្លើង​ឆេះ​ព្រៃ​តែងតែ​កើត​មាន​នៅ​ក្នុង​តំបន់​ការពារ​ធម្មជាតិ និង​របៀង​អភិរក្ស​ជីវៈចម្រុះ​នានា របស់​ប្រទេស​កម្ពុជា​ជា​រៀង​រាល់​ឆ្នាំ ជាពិសេស​ក្នុង​រដូ​វប្រាំង។

លោក នេត្រ ភក្ដ្រា អ្នកនាំពាក្យ​ក្រសួងបរិស្ថាន បាន​ថ្លែង​កាលពី​ម្សិលមិញ​ថា៖ «នេះ​ជា​វិធានការ​បង្ការ​ទុក​ជាមុន ព្រោះ​ជា​រៀង​រាល់​ឆ្នាំ នៅ​រដូវ​ប្រាំង​តែង​តែ​មាន​ការ​ឆេះ​ព្រៃ​នៅ​តំបន់​ខ្លះ​ដោយ​កត្តា​ធម្មជាតិ និង​កត្តា​មនុស្ស។ ឆ្នាំនេះ ប្រុង​ប្រយ័ត្ន​ខ្លាំង​ជាង​នេះ ព្រោះ​ឆ្នាំនេះ អាកាស​ធាតុ​អាច​ហួត​ហែង​ខ្លាំង ងាយ​នឹង​បង្កើត​ឱ្យ​មាន​អគ្គិភ័យ​ជា​យថា​ហេតុ​ដោយសារ​ទង្វើ​មនុស្ស​ចាប់​សត្វ ឬ​ដុត​សំណល់​ក្នុង​តំបន់​ការពារ​ធម្ម​ជាតិ»។

កត្តា​ចម្បង​ដែល​បង្កឱ្យមាន ភ្លើង​ឆេះ​ព្រៃ​ញឹកញាប់​បំផុត​នា​រដូវ​ប្រាំង មាន​ដូចជា ការ​កាប់​ឆ្ការ​ដុត​រាន​ព្រៃ​ធ្វើជា​កម្ម​សិទ្ធិ ដើម្បី​ដាំ​ដំណាំ​កសិកម្ម​ផ្សេងៗ ការ​ធ្វើ​កសិកម្ម​ពនេចរ ការ​តាំង​ទីលំនៅ​ថ្មីៗ និង​ការ​ដុត​ព្រៃ​ដើម្បី​ចាប់​សត្វព្រៃ និង​ការ​ធ្វេស​ប្រហែស​របស់​មនុស្ស។

បើតាម​សេចក្តីជូនដំណឹង​ដដែល​ដើម្បី​បង្ការ និង​ទប់ស្កាត់​ភ្លើង​ឆេះ​ព្រៃ ក្រសួង​បរិស្ថាន បាន​ធ្វើ​សេចក្តី​ណែនាំ​ដល់​អង្គភាព​ជំនាញ រដ្ឋបាល​ថ្នាក់​ក្រោម​ជាតិមន្ទីរ​បរិស្ថាន អាជ្ញា​ធរមាន​សមត្ថកិច្ច រួមទាំង​សហគមន៍​មូលដ្ឋាន និង​អ្នក​ពាក់ព័ន្ធ​ទាំង​អស់​ឱ្យ​អនុវត្ត​វិធានការ​ចំនួន ៦ ចំណុច។

វិធានការ​ទាំងនោះ​រួមមាន ទប់ស្កាត់​និង​ណែនាំ​ឱ្យមាន​ការ​ប្រុង​ប្រយ័ត្ន​ខ្ពស់​ពី​ការ​ប្រើប្រាស់​ភ្លើង​ជា​មធ្យោបាយ​ដើម្បី​ប្រមូល​ផល អនុផល​ព្រៃឈើ ការដុត​ព្រៃ​ស្ទាក់​ចាប់​សត្វ និង​ការ​ដុត​វាល​ស្មៅ។ ទប់ស្កាត់​ការ​កាប់​ឆ្ការ​ទន្ទ្រាន ឈូស​ឆាយ ដុត​ព្រៃឈើ និង​ព្រៃ​លិច​ទឹក ក្នុង​គោល​បំណង​ផ្សេង​ទៀត ដែល​ជា​សកម្មភាព​ល្មើស​ច្បាប់ និង​បង្ក​ឱ្យ​មាន​ភ្លើង​ឆេះ​ព្រៃឈើ ព្រៃ​លិច​ទឹក​និង​រាល​ដាល​ដល់​ផ្ទះ​សំបែង​របស់​ប្រជា​ពលរដ្ឋ ស្នាក់ការ ស្នាក់​ការរង និង​ហេដ្ឋា​រចនា​សម្ព័ន្ធ​រូបវន្ត​នានា នៅ​ក្នុង និង​ជុំវិញ​តំបន់​ការពារ​ធម្មជាតិ​ជាដើម។

ក្រសួងបរិស្ថាន​បាន​រំឭកថា អនុលោម​តាមច្បាប់​ស្តីពី​តំបន់ការពារ​ធម្មជាតិ មាត្រា ៦២ ការ​បង្ក​ឱ្យមាន​ភ្លើង​ឆេះ​ព្រៃ​ដោយ​ចេតនា ជា​បទ​ល្មើស​ធនធាន​ធម្មជាតិ​ថ្នាក់​ទី​ ៤ ដែល​ត្រូវ​ផ្តន្ទាទោស និង​ផាក​ពិន័យ​ជា​ប្រាក់។

តាមរយៈ​សេចក្តី​ជូនដំណឹង​នេះ ក្រសួងបរិស្ថាន​មាន​ជំនឿ និង​ទំនុកចិត្ត ចំពោះ​គ្រប់​អង្គភាព​ជំនាញ រដ្ឋបាល​ថ្នាក់​ក្រោម​ជាតិ កងកម្លាំង​ប្រដាប់​អាវុធ​សហគមន៍ ព្រះសង្ឃ និង​ពលរដ្ឋ​បាន​យល់​ច្បាស់​ពីករណីយ​កិច្ច​ក្នុង​ការ​ការពារ​ទប់ស្កាត់ និង​បង្ការ​ភ្លើង​ឆេះ​ព្រៃ ដោយ​រួម​សហការ​យ៉ាង​ជិតស្និទ្ធ​ជាមួយ​នឹង​មន្ទីរ​បរិស្ថាន​រាជធានី-ខេត្ត អនុវត្ត​តាម​សេចក្តី​ជូន​ដំណឹង​នេះ ប្រកប​ដោយ​ប្រសិទ្ធភាព​ខ្ពស់៕

(កែសម្រួល សូ វិសាល)

អត្ថបទគួរចាប់អារម្មណ៍