មណ្ឌលគិរីៈ ក្រសួងបរិស្ថាន និងអង្គការមូលនិធិអភិរក្ស និងសង្គ្រោះសត្វព្រៃកម្ពុជា (WWF) កំពុងសិក្សាលើឯកសារទស្សនទានជាមួយភាគីពាក់ព័ន្ធ ដើម្បីរៀបចំបង្កើតតំបន់ស្នូលស្ដារសត្វព្រៃឡើងវិញ នៅក្នុងដែនជម្រកសត្វព្រៃស្រែពក បន្ទាប់ពីធនធានជាជីវចម្រុះនៅលើពិភពលោករួមទាំងកម្ពុជាមានការធ្លាក់ចុះ។
លោក នេត្រ ភក្ត្រា អ្នកនាំពាក្យក្រសួងបរិស្ថានថ្លែងនៅថ្ងៃទី ១៨ ឧសភាថា គម្រោងនៃការស្ដារសត្វព្រៃឡើងវិញនេះគឺកំពុងស្ថិតនៅក្នុងដំណាក់កាលនៃការរៀបចំទស្សនទាន ការពិគ្រោះយោបល់ជាមួយនឹងអ្នកពាក់ព័ន្ធនានា ដើម្បីក្ដាប់នូវបញ្ហាជុំវិញការបង្កើតតំបន់ស្នូលស្ដារសត្វព្រៃឡើងវិញ ដើម្បីឈានទៅដល់ការរៀបចំយុទ្ធសាស្ដ្រជារួមមួយក្នុងការការពារ និងអភិរក្សសត្វព្រៃនៅកម្ពុជា។
លោកថ្លែងថា៖ «សកម្មភាពសំខាន់ៗចំពោះការស្ដារសត្វព្រៃឡើងវិញនេះ គឺការបង្កើតតំបន់ស្ដារសត្វព្រៃតាមរយៈការហ៊ុមជារបង។ ការបង្ក្រាប និងការទប់ស្កាត់នូវការជួញដូរសត្វព្រៃខុសច្បាប់ និងការដាក់ចេញនូវវិធានការតឹងរ៉ឹងបំផុតសម្រាប់ការពង្រឹងការអនុវត្ដច្បាប់នៃការជួញដូរសត្វព្រៃខុសច្បាប់នៅក្នុងខេត្ដជាពិសេសនៅក្នុងតំបន់ព្រំដែនអន្តរជាតិដែលជាចំណុចគោលដៅនៃការផ្គត់ផ្គង់សត្វព្រៃទៅទីផ្សារក្រៅប្រទេស»។
បើតាមលោក នេត្រ ភក្ត្រា ធនធានជីវចម្រុះនៅលើពិភពលោកមិនមែនតែនៅកម្ពុជាទេ គឺមាននិន្នាការនៃការធ្លាក់ចុះហើយគិតជាមធ្យមអត្រានៃការធ្លាក់ចុះចំនួនសត្វព្រៃជាសកលគឺមានប្រមាណ ៦៨ ភាគរយ គិតចាប់តាំងពីឆ្នាំ ១៩៧០ រហូតមក។
នៅក្នុងនោះមានសត្វព្រៃចំនួន ១ លានប្រភេទកំពុងប្រឈមនឹងការឈានទៅជិតផុតពូជ។ នៅក្នុងតំបន់អាស៊ីអាគ្នេយ៍វិបត្ដិដ៏ធ្ងន់ធ្ងរនៃការបរបាញ់សត្វព្រៃខុសច្បាប់កំពុងតែបំផ្លិចបំផ្លាញធនធានធម្មជាតិ សត្វព្រៃដ៏មានតម្លៃក្នុងសម្ទុះមួយដ៏គួរឱ្យព្រួយបារម្ភ។
លោក ភក្ត្រា បញ្ជាក់ថា៖ «ជាក់ស្ដែងលទ្ធផលនៃការស្រាវជ្រាវ និងការតាមដានសត្វព្រៃក្នុងរយៈពេល ១០ ឆ្នាំកន្លងទៅនេះនៅក្នុងដែនជម្រកសត្វព្រៃស្រែពក និងដែនជម្រកសត្វព្រៃភ្នំព្រិចបានបង្ហាញពីការធ្លាក់ចុះនៃចំនួនសត្វទន្សោង សត្វខ្លារខិន និងសត្វឈ្លូស បណ្ដាលមកពីការបរបាញ់ និងការរាលដាលនៃការដាក់អន្ទាក់ក្នុងដែនជម្រកសត្វព្រៃនេះ»។
ចំណែកសត្វរមាំង សត្វខ្ទីង និងសត្វប្រើស នៅបែកខ្ញែកគ្នាជាហ្វូងៗ ដែលមានចំនួននៅសេសសល់នៅតិចតួចបំផុត ហើយក៏កំពុងប្រឈមនឹងការឈានទៅរកការផុតពូជនៅក្នុងតំបន់ទេសភាពព្រៃរបោះនៅភាគខាងកើតនៃខេត្ដមណ្ឌលគិរីនេះដែរ។
លោកថ្លែងថា៖ «ចំពោះបញ្ហានេះ ដើម្បីបញ្ចៀសភាពវិនាសផុតពូជនៃសត្វព្រៃសំខាន់ៗទាំងនេះ តាមរយៈការដាក់ចេញ និងការរៀបចំនូវការស្ដារ និងការអភិរក្សនូវពូជសត្វព្រៃសំខាន់ៗប្រកបដោយប្រសិទ្ធភាព គឺជាការចាំបាច់»។
លោកឱ្យដឹងថា ក្នុងរយៈពេលប៉ុន្មានឆ្នាំចុងក្រោយនេះ គឺក្រសួងបរិស្ថាន និងអង្គការ WWF កម្ពុជា បានសហការពង្រឹងការអនុវត្ដច្បាប់ និងទទួលបានលទ្ធផលជាវិជ្ជមាន ជាច្រើននៅក្នុងការទប់ស្កាត់ចំពោះការបង្ក្រាបបទល្មើសព្រៃឈើ និងសត្វព្រៃនេះ។ ប៉ុន្ដែទោះបីជាយ៉ាងណាយើងនៅមានបញ្ហាប្រឈម និងការគំរាមកំហែងដល់សត្វព្រៃកំពុងតែកើតមានឡើង ហើយដើម្បីដោះស្រាយនូវស្ថានភាពនេះ និងដើម្បីធ្វើឱ្យចំនួនសត្វព្រៃកើនឡើងវិញ ចាំបាច់ត្រូវតែដាក់ចេញនូវការអភិរក្សបែបទំនើបកម្មថ្មីមួយដែលមិនធ្លាប់ត្រូវបានអនុវត្ដពីមុនមក។
លោកបញ្ជាក់ថា៖ «បើយើងនិយាយពីឱកាសនៃការស្ដារឡើងវិញនូវសត្វព្រៃនៅក្នុងប្រទេសកម្ពុជាទាំងនៅក្នុងដែនជម្រកសត្វព្រៃស្រែពក និងដែនជម្រកសត្វព្រៃភ្នំព្រិច និងនៅតំបន់ផ្សេងទៀត គឺយើងគិតថា នៅមិនទាន់យឺតពេលនៅឡើយទេ។ ប៉ុន្ដែវាទាមទារឱ្យមានការប្ដេជ្ញាចិត្ដខ្ពស់ រួមជាមួយវិធីសាស្ត្រអភិរក្សថ្មីៗផងដែរ។ បើពុំនោះទេតំបន់ទេសភាពព្រៃរបោះដ៏អស្ចារ្យគឺអាចនឹងមានសភាពស្ងាត់ជ្រងំមិនមានវត្ដមានសត្វព្រៃសំខាន់ៗក្នុងពេលអនាគត»។
លោក សេង ទៀក នាយកប្រចាំប្រទេសនៃមូលនិធិអភិរក្ស និងសង្គ្រោះសត្វព្រៃកម្ពុជា (WWF) ថ្លែងថា គម្រោងស្ដារសត្វព្រៃឡើងវិញនេះ គឺកំពុងរៀបចំផែនការ និងដំណើរការពិគ្រោះយោបល់ជាមួយមន្ទីរបរិស្ថាន និងដែនជម្រកសត្វព្រៃខេត្ត។
លោក កែវ សុភគ៌ ប្រធានមន្ទីរបរិស្ថានខេត្ដមណ្ឌលគិរីបានឱ្យដឹងថា ការរៀបចំបង្កើតតំបន់ស្ដារសត្វព្រៃឡើងវិញក្នុងតំបន់ស្នូលនៃដែនជម្រកសត្វព្រៃស្រែពកនេះ គឺធ្វើលើផ្ទៃដីប្រមាណពី ៥០០ ទៅ ៦០០ គីឡូម៉ែត្រការ៉េ។
លោកថ្លែងថា៖ «យើងបានប្រជុំពិភាក្សាជាមួយភាគីពាក់ព័ន្ធ និងអង្គការ WWF កម្ពុជា ចំនួន ២ លើករួចមកហើយ ក្នុងនោះ លើកទី១ គឺប្រជុំកម្រិតថ្នាក់ជាតិ នៅក្រសួងបរិស្ថានហើយលើកទី២ ប្រជុំកម្រិតថ្នាក់មូលដ្ឋានកាលពីថ្ងៃទី ១៤ ខែឧសភានេះ នៅមន្ទីរបរិស្ថានខេត្ដផ្ទាល់ដើម្បីអភិវឌ្ឍនូវទស្សនទានក្នុងការបង្កើតតំបន់ស្នូលស្ដារសត្វព្រៃឡើងវិញនេះ»៕