.jpg)
ទិដ្ឋភាពភ្នំណាមលៀរ ក្នុងខេត្តមណ្ឌលគិរី។ រូបថត ភ្នំពេញ ប៉ុស្តិ៍
មណ្ឌលគិរី៖ ក្រសួងបរិស្ថាន ប្រកាសទទួលស្គាល់សហគមន៍តំបន់ការពារធម្មជាតិភ្នំណាមលៀរ នៃដែនជម្រកសត្វព្រៃភ្នំណាមលៀរ ស្ថិតក្នុងភូមិពូទឺត ឃុំប៊ូស្រា ស្រុកពេជ្រដា ខេត្តមណ្ឌលគិរី ដែលមានផ្ទៃដីជាង ៦០០ ហិកតា ខណៈសហគមន៍រំពឹងនឹងអាចការពារធនធានធម្មជាតិដែលមានក្នុងសហគមន៍នេះ បានពេញលេញ។
សេចក្តីប្រកាសរបស់ក្រសួងបរិស្ថានចុះហត្ថលេខាដោយលោក សាយ សំអាល់ កាលពីថ្ងៃទី ៦ មេសា បានឱ្យដឹងថា ការរៀបចំបង្កើតសហគមន៍តំបន់ការពារធម្មជាតិ «ភ្នំណាមលៀរ ក្នុងគោលបំណងបង្កើនការចូលរួមគ្រប់គ្រងប្រើប្រាស់ធនធានធម្មជាតិប្រកបដោយចីរភាព និងរួមចំណែកលើកកម្ពស់ជីវភាពសហគមន៍ មូលដ្ឋានស្របតាមគោលនយោបាយរបស់រាជរដ្ឋាភិបាល។
សេចក្តីប្រកាសដដែលបានបញ្ជាក់ថា៖ «សហគមន៍តំបន់ការពារធម្មជាតិ «ភ្នំណាមលៀរ ត្រូវចុះកិច្ចព្រមព្រៀងជាមួយអគ្គនាយកដ្ឋាន សហគមន៍មូលដ្ឋាននៃក្រសួងបរិស្ថាន និងត្រូវរៀបចំលក្ខន្តិកៈ ព្រមទាំងផែនការគ្រប់គ្រងសហគមន៍របស់ខ្លួនស្របតាមគោលការណ៍ណែនាំស្តីពីនីតិវិធី និងដំណើរការរៀបចំសហគមន៍តំបន់ការពារធម្មជាតិ និង ច្បាប់ស្តីពីតំបន់ការពារធម្មជាតិ»។
សហគមន៍តំបន់ការពារធម្មជាតិ «ភ្នំណាមលៀរ» នៃដែនជម្រកសត្វព្រៃភ្នំណាមលៀរ មានផ្ទៃដីសរុបទំហំ ៦៦៨ ហិកតា (ប្រាំមួយរយហុបសិបប្រាំបីហិកតា) ខណៈសហគមន៍នេះ មានប្រជាពលរដ្ឋជិត ២០០ គ្រួសារ ដែលភាគច្រើនគឺជាជនជាតិដើមភាគតិចព្នង។
លោក បែវ សាលាយ សមាជិកសហគមន៍តំបន់ការពារធម្មជាតិ «ភ្នំណាមលៀរ មានក្តីសប្បាយរីករាយដែលសហគមន៍នេះ ត្រូវបានទទួលស្គាល់ជាផ្លូវការ ដែលលោករំពឹងថា ប្រជាសហគមន៍ នឹងអាចចូលរួមដោយបើកចំហក្នុងការការពារធនធានធម្មជាតិដែលនៅសេសសល់ ដូចជា ព្រៃឈើ សត្វព្រៃ និងវប្បធម៌របស់ខ្លួន។
លោកបញ្ជាក់ថា៖ «យើងត្រូវបានទទួលស្គាល់នេះ គឺចំណុចដែលសំខាន់ គឺយើងបានចូលរួមការពារសម្រស់ធម្មជាតិ ដើមឈើ សត្វព្រៃ និងប្រពៃណី ឲ្យបានគង់វង្ស ដែលច្រើនតែមានអ្នកមួយចំនួន ខិលខូច គេចេះតែបំផ្លិតបំផ្លាញ»។
លោក បែវ សាលាយ សង្ឃឹមថា នៅពេលមានការទទួលស្គាល់ជាផ្លូវការនេះ សហគមន៍លោកនឹងអាចរៀបចំផែនការ និងយុទ្ធសាស្ត្របានពេញលេញ ក្នុងការចូលរួមការពារធនធានទាំងនេះ ខណៈបច្ចុប្បន្នតំបន់ការពារភ្នំណាមលៀរ កំពុងតែរងការរំលោភបំពានស្ទើរតែរាល់ថ្ងៃ៕
