ស្ទឹងត្រែងៈ ក្រសួងបរិស្ថានចាប់ផ្តើមរៀបចំវេទិកាយុវជនជជែកពិភាក្សាអំពីបរិស្ថានលើកទី ៤០ នៅខេត្តស្ទឹងត្រែងកាលពីថ្ងៃទី ២៤ សីហា ក្រោមប្រធានបទ «ការគ្រប់គ្រងធនធានធម្មជាតិជាភារកិច្ចរបស់រដ្ឋបាលថ្នាក់ក្រោមជាតិ» ដើម្បីផ្តល់ឱកាសដល់សិស្សតាមបណ្តាខេត្តស្វែងយល់បន្ថែមអំពីបញ្ហាបរិស្ថាន និងចូលរួមចែករំលែកចំណេះដឹងទាំងនោះទៅដល់សហគមន៍របស់ពួកគេ។
លោក នេត្រ ភក្ត្រា អ្នកនាំពាក្យក្រសួងបរិស្ថានប្រាប់ភ្នំពេញប៉ុស្ដិ៍កាលពីថ្ងៃទី ២៥ សីហា ថាឆ្នាំនេះគឺជាវេទិកាលើកទី ៤០ ហើយសម្រាប់ការរៀបចំវេទិកាយុវជនជជែកពិភាក្សាអំពីបរិស្ថាន។ ឆ្នាំនេះក៏ជាឆ្នាំទី ២ ដែលក្រសួងបរិស្ថានបានរៀបចំវេទិកានៅតាមបណ្តាខេត្តផងដែរដើម្បីផ្តល់ឱកាសដល់សិស្សានុសិស្សនៅតាមបណ្តាខេត្ត បានសិក្សាស្វែងយល់បន្ថែមអំពីបញ្ហាបរិស្ថាន។
លោកថ្លែងថា៖ «វេទិកាឆ្នាំនេះមានភាពខុសប្លែកពីឆ្នាំមុន ដោយក្រសួងនឹងនាំសិស្សានុសិស្សទៅទស្សនកិច្ចសិក្សានៅក្នុងតំបន់ដែនជម្រកសត្វព្រៃដើម្បីឱ្យពួកគាត់ស្វែងយល់អំពីធនធានធម្មជាតិដោយផ្ទាល់នៅក្នុងតំបន់នោះ។ ឆ្នាំកន្លងទៅក្រសួងបានរៀបចំវេទិកាដោយគ្រាន់តែឱ្យសិស្សប្រកួតប្រជែងនៅភ្នំពេញ និងសិក្សាស្រាវជ្រាវលើឯកសារប៉ុណ្ណោះ»។
កាលពីថ្ងៃទី ២៤ ខែសីហា លោក ផៃ ប៊ុនឈឿន រដ្ឋលេខាធិការក្រសួងបរិស្ថានបានដឹកនាំមន្ដ្រី រួមមាន លោក ជួប ប៉ារីស៍ អគ្គនាយកនៃអគ្គនាយកដ្ឋានចំណេះដឹងព័ត៌មានបរិស្ថាននៃក្រសួងបរិស្ថាន និងលោក ម៉ុម សារឿន អភិបាលខេត្ដស្ទឹងត្រែងព្រមទាំងលោកគ្រូ អ្នកគ្រូ សិស្សានុសិស្សជាច្រើនរូបទៀតបើកការណែនាំឆ្ពោះទៅដំណើរការវេទិកានេះក្នុងខេត្ដស្ទឹងត្រែង។
លោក ផៃ ប៊ុនឈឿន ថ្លែងថា វេទិកាឆ្នាំនេះគឺមានលក្ខណពិសេសជាងការប្រកួតប្រជែងឆ្នាំកន្លងទៅដោយបេក្ខជនដែលចូលរួមប្រកួតប្រជែងក្នុងវេទិកានេះអាចសិក្សាស្រាវជ្រាវលើប្រធានបទជាក់ស្តែង ដែលកំពុងតែកើតមានក្នុងមូលដ្ឋានរបស់ខ្លួន។ ផ្តោតលើការការពារ និងអភិរក្សធនធានធម្មជាតិ ការប្រែប្រួលអាកាសធាតុ និងការអភិវឌ្ឍជីវភាពសហគមន៍មូលដ្ឋានជាដើម។
លោក ជួប ប៉ារីស៍ បានថ្លែងថា រាល់ឆ្នាំអគ្គនាយកដ្ឋានចំណេះដឹង និងព័ត៌មានបរិស្ថានតែងតែរៀបចំវេទិកាជជែកពិភាក្សាអំពីបរិស្ថាននេះនៅរាជធានីភ្នំពេញ ដើម្បីផ្តល់ឱកាសឱ្យសិស្សានុសិស្សមកពីបណ្តាសាកលវិទ្យាល័យនានា បញ្ចេញសមត្ថភាព សិក្សាស្រាវជ្រាវ។ ស្វែងរកចំណេះដឹង បទពិសោធថ្មីៗ តាមបែបវិទ្យាសាស្ត្រ និងចែករំលែកនូវចំណេះដឹងទាំងនោះទៅដល់សាធារណជនទូទៅឱ្យយល់ដឹងអំពីសារៈសំខាន់នៃបរិស្ថាន។
លោកថ្លែងថា៖ «វេទិកានេះក៏សំដៅចូលរួមអនុវត្តទាំងអស់គ្នាជាមួយរាជរដ្ឋាភិបាលក្នុងគោលដៅថែរក្សាបាននូវការការពារ និងអភិរក្សបរិស្ថាន ដើម្បីធានាបាននូវការអភិវឌ្ឍប្រកបដោយចីរភាពផងដែរ»។
លោក ម៉ុម សារឿន សាទរចំពោះកិច្ចសហការរបស់ក្រសួងបរិស្ថាន និងអង្គការដៃគូពាក់ព័ន្ធនានាក្នុងការរៀបចំវេទិកានេះឡើងក្នុងខេត្ដស្ទឹងត្រែង។ លោកថ្លែងថា៖ «សិស្សានុសិស្សត្រូវយកចិត្តទុកដាក់ ត្រងត្រាប់ សិក្សា ស្រាវជ្រាវយកបទពិសោធល្អដើម្បីឈានទៅរកការប្រកួតយកជយលាភីនាពេលខាងមុខ»។
បើតាមលោក នេត្រ ភក្ត្រា វេទិកាឆ្នាំនេះសិស្សមកពីសាលារៀនចំនួន ១៦ នឹងចូលរួមក្នុងការប្រកួតប្រជែងគ្នា។ ការប្រកួតប្រជែងមាន ៣ វគ្គបានចាប់ផ្ដើមវគ្គដំបូងកាលពីដើមខែមិថុនា រហូតដល់ដើមខែតុលាជាការប្រកួតផ្ដាច់ព្រ័ត្រ។
លោកបញ្ជាក់ថា ក្នុងនោះមានវគ្គទី ១ គឺវគ្គណែនាំវគ្គទី ២ គឺវគ្គជម្រុះ និងវគ្គទី ៣ គឺវគ្គប្រកួតផ្ដាច់ព្រ័ត្រ។ លោកបន្ថែមថា ប្រធានបទសម្រាប់ការជជែកពិភាក្សាសម្រាប់វេទិកា ទាំងមូលគឺផ្តោតសំខាន់ទៅលើការគ្រប់គ្រងព្រៃឈើ ធនធានធម្មជាតិ ជីវចម្រុះ និងបញ្ហាការប្រែប្រួលអាកាសធាតុនៅជុំវិញខេត្ដទាំង ៤ ស្ថិតក្នុងភូមិសាស្ដ្រតំបន់ព្រៃឡង់។
លោក ភក្ត្រា ឱ្យដឹងថា សាលារៀនទាំង ១៦ ដែលចូលរួមប្រកួតប្រជែងក្នុងវេទិកានេះក្នុង ១ សាលាមានសិស្សចូលរួមចំនួន ៤ នាក់ និងគ្រូ ១ នាក់។ ដូច្នេះសរុបទាំង ១៦ សាលា គឺមានសិស្ស និងគ្រូសរុបចំនួន ៨០ នាក់។ ចំណែកវគ្គបញ្ចប់គឺជ្រើសរើសយកសាលារៀនចំនួន ៨ ដើម្បីប្រកួតផ្ដាច់ព្រ័ត្រ។ សាលាទាំង ១៦ នេះមានសាលារៀនចំនួន ៨ មកពីរាជធានីភ្នំពេញ និង ៨ សាលារៀនទៀតមកពីខេត្ដចំនួន ៤ នៅជុំវិញតំបន់ដែនជម្រកសត្វព្រៃព្រៃឡង់ រួមមានខេត្ដកំពង់ធំ ស្ទឹងត្រែង ក្រចេះ និងខេត្តព្រះវិហារ៕