The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​បរិស្ថាន​ ស្នើ​ក្រសួងកសិកម្ម​សហការ​រឿង​កាប់​ឈើ​នៅ​ព្រៃឡង់




ក្រសួង​បរិស្ថាន​ ស្នើ​ក្រសួងកសិកម្ម​សហការ​រឿង​កាប់​ឈើ​នៅ​ព្រៃឡង់

Content image - Phnom Penh Post
ទិដ្ឋភាព​ទីតាំង​ក្រុមហ៊ុន Think BioTech Co., Ltd ដែល​នៅ​ជិត​តំបន់​ព្រៃឡង់​។ រូបថត សហការី

ក្រសួង​បរិស្ថាន​ ស្នើ​ក្រសួងកសិកម្ម​សហការ​រឿង​កាប់​ឈើ​នៅ​ព្រៃឡង់

ភ្នំពេញៈ ​រដ្ឋមន្ដ្រី​ក្រសួង​បរិស្ថាន​បាន​ដាក់​លិខិត​មួយ​ទៅ​រដ្ឋមន្ដ្រី​ក្រសួង​កសិកម្ម​រុក្ខាប្រមាញ់ និង​នេសាទ​ដើម្បី​ស្នើសុំ​សហការ​ស្រាវជ្រាវ​ពី​សកម្មភាព​នៃ​ការអភិវឌ្ឍ​របស់​ក្រុមហ៊ុន Think BioTech Co., Ltd និង​ក្រុមហ៊ុន Angkor Plywood Company បន្ទាប់ពី​ក្រសួង​បរិស្ថាន​ទទួល​បាន​របាយការណ៍​ពី​សហគមន៍​អឺរ៉ុប​ប្រចាំ​កម្ពុជា និង​ USAID/CAMBODIA ស្ដីពី​ការកាប់​ព្រៃឈើ​ខុសច្បាប់​នៅ​ក្នុង​តំបន់​ព្រៃឡង់​។

យោងតាម​លិខិត​ចុះហត្ថលេខា​ដោយ​លោក សាយ សំអាល់ រដ្ឋមន្ដ្រី​ក្រសួង​បរិស្ថាន​ផ្ញើជូន​រដ្ឋមន្ដ្រី​ក្រសួង​កសិកម្ម រុក្ខាប្រមាញ់ និង​នេសាទ​កាលពី​ថ្ងៃ​​ទី​ ១៦ ខែ​ កញ្ញា ដែល​ភ្នំពេញប៉ុស្ដិ៍​ទើប​ទទួល​បាន​កាលពី​ម្សិលមិញ​បាន​បង្ហាញថា ក្រសួង​បរិស្ថាន​បាន​ទទួល​របាយការណ៍​ចេញ​ដោយ​សហគមន៍​អឺរ៉ុប​ប្រចាំ​កម្ពុជា និង​ USAID/CAMBODIA ​ស្តីពី​ការកាប់​ដើមឈើ​ច្បោះ​ជ័រ និង​ប្រភេទ​ឈើ​មាន​តម្លៃ​ផ្សេងទៀត​របស់​ក្រុមហ៊ុន Think BioTech Co.,Ltd ក្នុង​ «​ព្រៃឡង់​» ​ក្បែរ​តំបន់​ដីសម្បទាន​​របស់​ក្រុមហ៊ុន​ហើយ​ដើមឈើ​ទាំងនោះ​ត្រូវបាន​យក​ទៅ​កែច្នៃ​ដោយ​ក្រុមហ៊ុន Angkor Plywood Company​។

នៅក្នុង​លិខិត​នោះ​លោក សាយ សំអាល់ បញ្ជាក់ថា​៖ «​សហគមន៍​អឺរ៉ុប និង​USAID/CAMBODIA បានស្នើ​សុំ​រាជរដ្ឋាភិបាល​ស៊ើបអង្កេត និង​មាន​វិធានការ​ចំពោះ​ករណី​ទាំងនេះ ដើម្បី​ធានា​បន្ត​កិច្ចការពារ និង​អភិរក្ស​ព្រៃឡង់​។ ដើម្បី​ជា​មូលដ្ឋាន​សម្រាប់​ធ្វើ​សេចក្តី​រាយការណ៍​ជូន​ប្រមុខ​រាជរដ្ឋាភិបាល ក្រសួង​បរិស្ថាន សូម​ឯកឧត្តម​រដ្ឋមន្ត្រី​ (​ក្រសួងកសិកម្ម រុក្ខាប្រមាញ់ និង​នេសាទ​) ​ពិនិត្យ​ស្រាវជ្រាវ​ផ្តល់​ព័ត៌មាន​អំពី​ស្ថានភាព និង​សកម្មភាព​នៃ​ការអភិវឌ្ឍ​របស់​ក្រុមហ៊ុន​ Think BioTech Co., Ltd និង​ក្រុមហ៊ុន​ AngkorPlywoodCompany ​មក​ក្រសួង​បរិស្ថាន​»​។

រដ្ឋមន្ដ្រី​ក្រសួងបរិស្ថាន​បន្ថែមថា​៖ «​ខ្ញុំបាទ​សូម​ជម្រាប​ឯកឧត្តម​រដ្ឋមន្ត្រី​ឱ្យបាន​ជ្រាប​ផងដែរ​ថា ទីតាំង​ក្រុមហ៊ុន​ Think BioTech Co., Ltd មិន​ស្ថិត​នៅ​ក្នុង​ដែនជម្រក​សត្វព្រៃ​ “​ព្រៃឡង់​” ​ក្រោម​សមត្ថកិច្ច​ក្រសួងបរិស្ថាន​ទេ គឺ​ស្ថិត​ក្រោម​សមត្ថកិច្ច​ក្រសួង​កសិកម្ម រុក្ខាប្រមាញ់​ និង​នេសាទ​»​។

តាម​លិខិត​ដដែល​លោក សាយ សំអាល់ ក៏បាន​បញ្ជាក់​ដែរ​ថា​ក្រសួង​បរិស្ថាន​នឹង​រៀបចំ​លិខិត​សុំ​អន្តរាគមន៍​ទៅ​អភិបាលខេត្ត​ពាក់ព័ន្ធ​ដើម្បី​រៀបចំ​ក្រុម​ការងារ​ចម្រុះ​ដឹកនាំ​ដោយ​អភិបាល​​ខេត្ត​ដើម្បី​ចុះ​ពិនិត្យ និង​ចាត់វិធានការ​ចាំបាច់​លើ​ករណី​នេះ​។

លោក​បាន​បន្ដថា​៖ «​ក្នុង​ករណី​រកឃើញ​កំហុស​ពាក់ព័ន្ធ​ការកាប់​ប្រមូល​ឈើ​ពី​ដែនជម្រក​សត្វព្រៃ​ «​ព្រៃឡង់​» ​របស់​ក្រុមហ៊ុន Think BioTech Co.,Ltd ក្រសួងបរិស្ថាន​នឹង​ពិភាក្សា​ជាមួយ​ក្រសួងកសិកម្ម រុក្ខាប្រមាញ់​ និង​នេសាទ​ដើម្បី​ស្នើសុំ​ទៅ​រាជរដ្ឋាភិបាល​ពិនិត្យ​សម្រេច និង​មាន​វិធាន​ការបន្ត​»​។

រដ្ឋលេខាធិការ និង​ជា​អ្នក​នាំពាក្យ​ក្រសួងបរិស្ថាន លោក នេត្រ ​ភក្ត្រា ថ្លែង​កាលពី​ថ្ងៃ​អាទិត្យ​ម្សិលមិញ​ថា​៖ «​ខ្ញុំ​មិនមាន​ព័ត៌មាន​អ្វី​វិវឌ្ឍន៍​ចុងក្រោយ​ពី​បញ្ហា​នេះ​ទេ​»​។

លោក ស្រី វុឌ្ឍី អគ្គលេខាធិការ និង​ជា​អ្នកនាំពាក្យ​ក្រសួង​កសិកម្ម រុក្ខាប្រមាញ់ និង​នេសាទ មិនអាច​ទាក់ទង​សុំ​ការបកស្រាយ​ជុំវិញ​ករណី​នេះ​បានទេ ដោយសារ​ទូរស័ព្ទ​លោក​មិនមាន​អ្នក​ទទួល​កាលពី​ម្សិលមិញ​។

លោក ហេង ស្រស់ សកម្មជន​ការពារ​ព្រៃឈើ​បាន​ថ្លែងថា​លោក​កំពុង​ស៊ើបអង្កេត​ករណី​របស់​ក្រុមហ៊ុន​ទាំង​ ២ ​ខាងលើ ខណៈ​សកម្មភាព​កាប់​ឈើ​របស់​ក្រុមហ៊ុន​ទាំងនេះ​បាន​ធ្វើ​នៅ​​តំបន់​ព្រៃឡង់​ស្ថិតក្នុង​ទីតាំង​ខេត្ដ​ក្រចេះ និង​ខេត្ដ​ស្ទឹងត្រែង​។

លោក​បាន​ថ្លែងថា​៖ «​ក្រុមហ៊ុន​ទាំង​ ២ ​ខាង​លើ​នេះ​សុទ្ធតែ​ជា​ក្រុមហ៊ុន​ដែល​បាន​កាប់​ឈើ​ចេញ​ពី​តំបន់​ព្រៃឡង់​ដឹក​យក​ទៅ​លក់​នៅក្រៅ​ប្រទេស ហើយ​បើ​យើង​មើល​ពី​ការស្នើ​របស់​​រដ្ឋមន្ដ្រី​ក្រសួងបរិស្ថាន ទៅ​រដ្ឋមន្ដ្រី​ក្រសួងកសិកម្ម​នេះ ហាក់បី​ដូចជា​កំពុងតែ​រុញ​កំហុស​ដាក់គ្នា​ទៅវិញទៅមក ដោយ​មិនបាន​​រួមគ្នា​ទប់ស្កាត់​ការកាប់បំផ្លាញ​ព្រៃឈើ​នៅ​កម្ពុជា​»​។

លោក ស្រស់ បាន​អះអាង​ថា​សកម្មជន​ព្រៃឈើ និង​ពលរដ្ឋ​រស់នៅ​តំបន់​ព្រៃឡង់​ធ្លាប់​បាន​ប្ដឹង និង​ស្នើសុំ​អាជ្ញាធរ​ខេត្ដ​ឲ្យ​ចាត់​វិធានការ​ចំពោះ​​ក្រុមហ៊ុន​ទាំង​ ២ ​ខាងលើ ប៉ុន្ដែ​មិន​ត្រឹម​តែ​គ្មាន​វិធានការ​ទេ បែរ​ជា​ជួយ​បិទបាំង​សកម្មភាព​កាប់​ឈើ​ល្មើសច្បាប់​ទៅវិញ​។

លោក​បាន​លើកឡើង​ថា បើ​ក្រសួង​ពាក់ព័ន្ធ មិនមាន​វិធានការ​ទប់ស្កាត់​សកម្មភាព​កាប់ឈើ​របស់​ក្រុមហ៊ុន​ទាំង​ ២ ​ឲ្យ​បាន​ទាន់​ពេលវេលា​ទេ ព្រៃឡង់​អាច​នឹង​រង​នូវ​វិនាសកម្ម​ជាក់​ជា​មិនខាន​៕

អត្ថបទគួរចាប់អារម្មណ៍

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។

  • ភ្នំពេញៈ ក្រសួង​អប់រំ យុវជន​ និង​កីឡា​កំពុង​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍ ព្រមទាំង​ដៃគូ​អភិវឌ្ឍន៍ និង​វិស័យ​ឯកជន ដើម្បី​រៀបចំ​តភ្ជាប់​ប្រព័ន្ធ​អ៊ីនធឺណិត​ដល់​គ្រឹះស្ថានសិក្សា​សាធារណៈ​​ក្នុង​រយៈពេល​ ៤ ​ឆ្នាំ​ (​ឆ្នាំ​ ២០២០-២០២៣) ​ដើម្បី​ផ្ដល់​ការរៀន​ និង​ការបង្រៀន​តាមបែប​ឌីជីថល​​ដែល​ការអនុវត្ត​ត្រូវធ្វើ​ឡើងជា​ជំហានៗ​ចាប់ពី​ចុងឆ្នាំ​នេះ​ទៅ​។