.jpg)
លោក នេត្រ ភក្ត្រា និងពលរដ្ឋចូលរួមដាំដើមឈើក្នុងសហគមន៍ភូមិតាហ៊ុយ។ រូបថត ក្រសួងបរិស្ថាន
ភ្នំពេញៈ លោក នេត្រ ភក្ដ្រា រដ្ឋលេខាធិការ ក្រសួងបរិស្ថានកាលពីថ្ងៃសៅរ៍សប្ដាហ៍មុនបានអំពាវនាវដល់ពលរដ្ឋឲ្យចូលរួមក្នុងជីវភាពប្រចាំថ្ងៃដោយដាំដើមឈើក្នុងបរិវេណសាលារៀនវត្ដអារាម និងនៅតាមសហគមន៍នៅឃុំកំពង់ប្រាសាទ ស្រុកពាមជរ ខេត្តព្រៃវែង។
លោក ភក្ត្រា ថ្លែងថា៖ «សូមបងប្អូនប្រជាពលរដ្ឋចូលរួមប្រតិបត្តិមេត្រីភាពបរិស្ថាននៅក្នុងជីវិតប្រចាំថ្ងៃដោយស្រឡាញ់បរិស្ថាន និងធនធានធម្មជាតិឲ្យកាន់តែខ្លាំងជាពិសេសចូលរួមដាំដើមឈើក្នុងបរិវេណសាលា ឬវត្តអារាម និងនៅតាមសហគមន៍របស់បងប្អូនប្រជាពលរដ្ឋ ដើម្បីកម្ពុជាស្អាត និងបៃតង»។
លោក នេត្រ ភក្ដ្រា បានបញ្ជាក់កាលពីម្សិលមិញថា ក្រសួងបរិស្ថានមិនកំណត់ចំនួនចំពោះការជំរុញការដាំដើមឈើនេះទេ។ ប៉ុន្ដែបើអាចដាំបានច្រើនកាលណាល្អកាលនោះ។ នេះជាការជំរុញចលនាប្រជាពលរដ្ឋបន្ថែមលើកម្មវិធីផ្សេងៗដែលរដ្ឋាភិបាល និងសមាគមអង្គការក្រៅរដ្ឋាភិបាលមាន។
លោកបញ្ជាក់ថា៖ «ការដាំដើមឈើនៅក្នុងបរិវេណសាលារៀន ឬវត្តអារាមគឺជួយបង្កើតភាពបៃតង បង្កើតបរិយាកាសល្អ បង្កភាពងាយស្រួល និងជាកន្លែងប្រកបដោយផាសុកភាពសម្រាប់សិស្សានុសិស្សរៀនសូត្រ»។
លោក ភក្ត្រា លើកឡើងថាការដាំឈើបង្កើតភាពបៃតងនេះគឺស្របតាមគោលការណ៍នៃសាលាមេត្រីបរិស្ថានដែលក្រសួងបរិស្ថានបាននិងកំពុងធ្វើកិច្ចសហប្រតិបត្តិការក្នុងការជំរុញឲ្យសាលារៀននៅទូទាំងប្រទេសមានប្រតិបត្តិមេត្រីភាពបរិស្ថានល្អ ជាកន្លែងបណ្តុះធនធានមនុស្សប្រកបដោយគុណភាព និងមានការទទួលខុសត្រូវបរិស្ថាន។
ការដាំដើមឈើនេះ គឺជាវិធានការជាក់ស្តែងនៅក្នុងការបន្ស៊ាំទៅនឹងការប្រែប្រួលអាកាសធាតុ ការឡើងកម្តៅនៃភពផែនដី ព្រោះការប្រែប្រួលអាកាសធាតុបានជះឥទ្ធិពលអាក្រក់ដល់ដំណើរការអភិវឌ្ឍរបស់ប្រទេសហើយក៏ជាបញ្ហារួមរបស់ពិភពលោកផងដែរ។
លោកបានបញ្ជាក់ថា៖ «កម្ពុជាមិនមែនជាប្រទេសដែលបង្កឲ្យមានការប្រែប្រួលអាកាសធាតុឡើយ ប៉ុន្តែជាអ្នកដែលទទួលរងគ្រោះពីការប្រែប្រួលអាកាស។ ចំណែកការដាំដើមឈើប្រភេទពូជឈើប្រណីតដូចជាធ្នង់ បេង នាងនួន និងគគីរជាដើមនៅតាមសហគមន៍ វត្តអារាម និងនៅតាម សាលារៀនជាការចូលរួមចំណែកក្នុងការការពារ និងអភិរក្សជីវចម្រុះជាពិសេសប្រភេទឈើកម្រមួយចំនួននៅក្នុងស្រុក»។
លោក ភក្ត្រា បញ្ជាក់ថា បច្ចុប្បន្នក្រសួងបរិស្ថានបានកំពុងគ្រប់គ្រង និងអភិរក្សតំបន់ការពារធម្មជាតិក្នុងនោះរួមមានឧទ្យានជាតិ ដែនជម្រកសត្វព្រៃ តំបន់ទេសភាព តំបន់ប្រើប្រាស់ច្រើនយ៉ាង តំបន់រ៉ាមសា និង តំបន់បេតិកភណ្ឌធម្មជាតិ និងតំបន់របៀងអភិរក្សជីវចម្រុះ ប្រព័ន្ធតំបន់ការពារធម្មជាតិសរុបជាង ៦០ កន្លែងដែលមានផ្ទៃដីសរុបជាង ៧,២ លានហិកតាដែលស្មើនឹងប្រមាណ ៤១ ភាគរយនៃផ្ទៃដីប្រទេសកម្ពុជា។
លោក លុយ តិចឆេង ប្រធានអង្គការយុវតារាកម្ពុជា (Youth Star Cambodia) ដែលជាអង្គការរៀបចំកម្មពិធីដាំកូនឈើក្រោមប្រធានបទ «ឈើមួយដើម ជីវិតមួយ» ដោយសហការជាមួយក្រសួងបរិស្ថានកាលពីថ្ងៃសៅរ៍សប្ដាហ៍មុននេះបានថ្លែងថា ក្រោយការរៀបចំពិធីដាំដើមឈើនេះប្រជាពលរដ្ឋនៅសហគមន៍មានការចូលរួមច្រើន។
ដូច្នេះអង្គការលោកនឹងបន្ដសហការជាមួយក្រសួងបរិស្ថានរៀបចំពិធីដាំកូនឈើនេះឲ្យបានច្រើនថែមទៀតនៅឆ្នាំក្រោយ។ ពិធីដាំកូនឈើនេះគឺបានផ្សារភ្ជាប់ យុវជន និងវិស័យឯកជនទៅប្រជាពលរដ្ឋនៅតាមសហគមន៍ជនបទឲ្យពួកគាត់ចូលរួមក្នុងការអភិវឌ្ឍ និងធ្វើជាគំរូ កុមារ និងយុវជននៅក្នុងសហគមន៍នោះ ឲ្យពួកគាត់ចេះថែរក្សា និងការពារបរិស្ថាន និងបង្កើតភាពបៃតងនៅក្នុងសាលារៀន វត្ដអារាម និងសហគមន៍ពួកគាត់»។
លោកបានបន្ដថា៖ «យើងចង់បណ្ដុះស្មារតីដល់ពលរដ្ឋទាំងអស់ឲ្យមានភាពស្ម័គ្រចិត្ដចូលរួមថែរក្សាបរិស្ថាន ព្រោះបញ្ហាបរិស្ថានគឺជាបញ្ហារបស់មនុស្សគ្រប់រូបក្នុងនាមជាពលរដ្ឋត្រូវចូលរួមថែរក្សា។ តាមរយៈកម្មវិធីនេះយើងឃើញថា ពលរដ្ឋនៅសហគមន៍ពួកគាត់មានការចូលរួមច្រើនមែនទែន ក្នុងការសហការក្នុងកម្មវិធីដាំកូនឈើនេះ ដោយពួកគាត់បានប្រើប្រាស់ធនធានដែលមានស្រាប់នៅសហគមន៍ពួកគាត់ក្នុងការដាំដើមឈើ និងថែរក្សាដើមឈើការអំពាវនាវដល់ពលរដ្ឋឲ្យចូលរួមដាំដើមឈើនេះគឺជាការដាស់អារម្មណ៍មួយបន្ថែមទៀតដល់ពលរដ្ឋ»៕
