ភ្នំពេញៈ ក្រសួងមហាផ្ទៃបានប្រកាសបិទបញ្ចប់ការទទួលពាក្យស្នើសុំជាជនបរទេសអន្តោប្រវេសន្ត និងបណ្ណស្នាក់នៅអចិន្រៃ្តយ៍ ប៉ុន្តែបានណែនាំដល់រដ្ឋបាលថ្នាក់ក្រោមជាតិ និងអង្គភាពនគរបាលគ្រប់លំដាប់ថ្នាក់ឲ្យចេញលិខិតរដ្ឋបាល និងលិខិតអត្រានុកូលដ្ឋានឲ្យ សហព័ទ្ធខ្មែរ (ស្រ្តី-បុរសមានប្តីប្រពន្ធ ជនបរទេស) កូន និងជនបរទេស អន្តោប្រវេសន្ត។
ការណែនាំ និងការប្រកាសរបស់ក្រសួងមហាផ្ទៃនេះធ្វើឡើង បន្ទាប់ពីបានសម្រេចបិទបញ្ចប់ការដកហូតឯកសារមិនប្រក្រតី ដែលមានសរុបចំនួន ៣៦ ០៩៤ ឯកសារ ពីជនបរទេសអន្តោប្រវេសន្តដែលស្មើនឹង ១៩ ៣៩៥ គ្រួសារនិងមាន ៩ សញ្ជាតិ គិតត្រឹមថ្ងៃទី ៣១ ខែ ឧសភា ឆ្នាំ ២០១៩។
តាមសេចក្តីណែនាំដែលចុះហត្ថលេខាដោយលោកស ខេង រដ្ឋមន្ត្រីក្រសួងមហាផ្ទៃកាលពីថ្ងៃទី ១ ខែ កក្កដា ឆ្នាំ ២០១៩ ដែលភ្នំពេញប៉ុស្តិ៍ទើបទទួលបានកាលពីម្សិលមិញបានឲ្យដឹងថា ក្រសួងមហាផ្ទៃ បានអង្កេតឃើញថា អាជ្ញាធរមូលដ្ឋានមួយចំនួននៅមានភាពស្រពេចស្រពិលអំពីគោលការណ៍ច្បាប់ ដែលនាំឲ្យមានភាពស្ទាក់ស្ទើរ ក្នុងការចេញលិខិតរដ្ឋបាល ឬលិខិតអត្រានុកូលដ្ឋានដល់សហព័ទ្ធជាខ្មែរមានកូននឹងជន បរទេស អន្តោប្រវេសន្ត បន្ទាប់ពី ការដកហូតឯកសាររដ្ឋបាល កម្ពុជាមិនប្រក្រតី ឬត្រូវបានក្រសួងមហាផ្ទៃ ពិនិត្យចេញប្រកាសទទួលស្គាល់ជាជនបរទេស អន្តោប្រវេសន៍ និងបណ្ណស្នាក់នៅអចិន្រៃ្តយ៍។
សេចក្តីណែនាំបានពន្យល់ថា ក្រោយពេលបញ្ចប់ឱសានវាទ នៃការទទួលពាក្យសុំប្រកាស ទទួលស្គាល់ជាជនបរទេស អន្តោប្រវេសន្ត ការទទួលពាក្យសុំបណ្ណស្នាក់នៅអចិន្រៃ្តយ៍និងការទទួល បណ្តឹងតវ៉ា ដើម្បីឲ្យការផ្តល់សេវា រដ្ឋបាលកាន់តែមានភាពល្អប្រសើរ សម្រាប់បម្រើសេចក្តីត្រូវការចាំបាច់ របស់សហព័ទ្ធ ជាខ្មែរ និងកូនរបស់ពួកគេ ដែលត្រូវបានដកហូតឯកសារព្រមទាំងជនបរទេស អន្តោប្រវេសន្ត។ «ក្រសួងមហាផ្ទៃសូមធ្វើការណែនាំដល់រដ្ឋបាលថ្នាក់ក្រោមជាតិ និងអង្គភាពនគរបាលគ្រប់លំដាប់ថ្នាក់ដែលមានការពាក់ព័ន្ធ ត្រូវផ្តល់សំបុត្រកំណើត សេចក្តីចម្លងសំបុត្រកំណើត ឬសំបុត្របញ្ជាក់ កំណើត សៀវភៅស្នាក់នៅ (ក២) សៀវភៅគ្រួសារ (ក៤) ដល់គ្រួសារ និងសមាជិកគ្រួសារជាខ្មែរ ដែលមានកំណត់ហេតុដកហូតឯកសាររដ្ឋបាលកម្ពុជាមិនប្រក្រត្រី ចេញដោយក្រុមការងារ ដកហូតឯកសារ នៃអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ នៅពេលមានការស្នើសុំ»។
លោក តុប នេត អ្នកនាំពាក្យអគ្គនាយកដ្ឋានអត្តសញ្ញាណកម្មឲ្យដឹងថា សេចក្តីណែនាំនេះមានន័យថាចំពោះប្រជាពលរដ្ឋខ្មែរ ដែលគាត់មានសហព័ទ្ធជាបរទេសមានសិទ្ធិទទួលបានលិខិតរដ្ឋបាល និងលិខិតអត្រានុកូលដ្ឋាន ដូចជាពលរដ្ឋដទៃទៀតហើយសហព័ទ្ធជាបរទេសអាចទទួលលិខិត កំណើតបានគ្រាន់តែបញ្ជាក់សញ្ជាតិរបស់គាត់។
លោកបញ្ជាក់ថា៖ «គាត់ (អាជ្ញាធរមូលដ្ឋាន) អាចចេញលិខិត អត្រានុកូលដ្ឋាន ដូចជាសំបុត្រកំណើត ជូនបរទេសបានគ្រាន់តែបញ្ជាក់ថា ជនបរទេសនោះជាជនជាតិអីកាលណាក្មេងធំឡើង ៤ ឬ ៥ ឆ្នាំ គាត់ត្រូវចូលសាលា កាលណា គាត់អត់មានលិខិតអត្រានុកូលដ្ឋាន គាត់មិនអាចចូលសាលារៀនបានទេ»។
លោកបន្ថែមថា កន្លងទៅអគ្គនាយកដ្ឋានអត្តសញ្ញាណកម្មនិងអគ្គនាយកដ្ឋានអន្តោប្រវេសន៍ បានសហការគ្នាចុះផ្សព្វផ្សាយនិងបំពាក់បំប៉នដល់មូលដ្ឋានជារឿយៗ ហើយថា បន្ទាប់ពីឱសានវាទនេះអគ្គនាយកដ្ឋានអត្តសញ្ញាណកម្មនឹងបញ្ជូនមន្ត្រីជំនាញរបស់ខ្លួន ចុះបណ្តុះបណ្តាលមន្ត្រីមូលដ្ឋាន ឲ្យយល់ដឹងច្បាស់អំពីនីតិវិធីនៃការផ្តល់ឯកសារ និងអប់រំសាធារណជនឲ្យយល់ដឹងពីនីតិវិធីនេះផងដែរ។
ជាមួយគ្នានេះលោក កែវ វណ្ណថន អ្នកនាំពាក្យនាយកដ្ឋានអន្តោប្រវេសន៍បានលើកឡើងថា ការចេញលិខិតរដ្ឋបាល និងការចេញលិខិតអត្រានុកូលដ្ឋានឲ្យសហព័ទ្ធខ្មែរ កូននឹងជនបរទេស អន្តោប្រវេសន្តនេះជួយឲ្យមានភាពងាយស្រួល ដល់អាជ្ញាធរ ក្នុងការគ្រប់គ្រង ជនអន្តោប្រវេសន៍ និងរៀបចំសន្តិសុខ។
លោកបញ្ជាក់ដូច្នេះថា៖ «វាងាយស្រួលក្នុងការគ្រប់គ្រងចំនួនជនអន្តោប្រវេសន៍និងសន្តិសុខ»។
សេចក្តីណែនាំរបស់ក្រសួងមហាផ្ទៃបញ្ជាក់ថា៖ «ការផ្តល់ឬចេញលិខិតទាំងឡាយខាងលើនេះ ត្រូវអនុវត្ត ស្របតាម បែបបទនីតិវិធី បទដ្ឋានគតិយុត្ត ពាក់ព័ន្ធជាធរមាននិងឋានានុក្រម ដែលបានកំណត់។ បណ្ណស្នាក់នៅអចិន្រៃ្តយ៍អាចត្រូវបានប្រើប្រាស់ដើម្បីបម្រើជីវភាពប្រចាំថ្ងៃ និងទទួលបាននូវការផ្តល់សេវារដ្ឋបាលសេវាសាធារណៈនានាលើកលែងតែសិទ្ធិដែលត្រូវបានហាមឃាត់ដោយច្បាប់ចំពោះជនបរទេស»។
សេចក្តីណែនាំនេះបានបន្ថែមថា ទទួលបានសេចក្តីណែនាំនេះអគ្គលេខាធិការនៃអគ្គលេខាធិការដ្ឋាន អគ្គស្នងការនៃអគ្គស្នងការដ្ឋាននគរបាលជាតិ អគ្គនាយកនៃអគ្គនាយកដ្ឋានរដ្ឋបាល អគ្គនាយកនៃអគ្គនាយកដ្ឋានអត្តសញ្ញាណកម្ម អភិបាលនៃគណៈអភិបាលរាជធានី-ខេត្ត និងអង្គភាពពាក់ព័ន្ធ ក្រោមឱវាទក្រសួងមហាផ្ទៃត្រូវផ្សព្វផ្សាយ និងចាត់ចែងអនុវត្តឲ្យមានប្រសិទ្ធភាព។
ទន្ទឹមគ្នានេះដែរក្រសួងមហាផ្ទៃក៏បានប្រកាសបិទការទទួលពាក្យស្នើសុំជាបរទេស អន្តោប្រវេសន្តនិងបណ្ណស្នាក់នៅអចិន្ដ្រៃយ៍ដែលនៅក្នុងការប្រកាសនោះបញ្ជាក់ដូច្នេះថា៖ «ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ (ស ខេង) សម្រេច ត្រូវបញ្ចប់ការទទួលពាក្យស្នើសុំជាជនបរទេស អន្តោប្រវេសន្ត និងបណ្ណស្នាក់នៅអចិន្រៃ្តយ៍ដែលបានចែងកំណត់ចុះថ្ងៃទី ១១ ខែ កញ្ញា ឆ្នាំ ២០១៧ ស្តីពីបែបបទ នីតិវិធី ការពិនិត្យ ការចុះបញ្ជីទទួលស្គាល់ជនបរទេសអន្តោប្រវេសន្តក្នុងព្រះរាជាណាចក្រកម្ពុជាចាប់ពីថ្ងៃទី ១ ខែ កក្កដា ឆ្នាំ ២០១៩ តទៅ»។
លោក តុប នេត បញ្ជាក់ថា បន្ទាប់ពីឱសានវាទ «នៅពេលដែលយើងឃើញគាត់ (ជនបរទេស) កាន់ឯកសារមិនប្រក្រត្រី យើងនឹងអនុវត្តតាមនីតិវិធីច្បាប់»៕