.jpg)
សមត្ថកិច្ចបង្ហាញជនបរទេសពីការចុះឈ្មោះក្នុងបញ្ជីនៅសៀមរាបថ្មីៗនេះ។ រូបថត អគ្គនាយកដ្ឋានអន្តោប្រវេសន៍
ភ្នំពេញៈ អគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានប្រកាសថា នឹងមិនផ្តល់ទិដ្ឋាការបន្តឲ្យជនបរទេសស្នាក់នៅប្រទេសកម្ពុជាទេ ប្រសិនបើពួកគេពុំមានឈ្មោះនៅក្នុងប្រព័ន្ធគ្រប់គ្រងវត្តមានជនបរទេសនៅកម្ពុជា (FPCS) ដោយនឹងត្រូវអនុវត្តចាប់ពីថ្ងៃទី ១ ខែកក្កដា ឆ្នាំ ២០២០ តទៅ។
ការប្រកាសនេះបានធ្វើឡើងតាមរយៈលិខិតរបស់លោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ស្ដីពីការអនុវត្ដវិធានការមិនផ្ដល់ទិដ្ឋាការបន្តរយៈពេលស្នាក់នៅក្នុងព្រះរាជាណាចក្រកម្ពុជាដែលបានផ្ញើទៅស្នងការនគរបាលរាជធានី-ខេត្តកាលពីថ្ងៃទី ២៧ ខែមេសា បន្ទាប់ពីមានការឯកភាពពីលោកឧបនាយករដ្ឋមន្ត្រី ស ខេង រដ្ឋមន្ដ្រីក្រសួងមហាផ្ទៃកាលពីថ្ងៃទី ១០ ខែមេសា។
លិខិតនោះបានបញ្ជាក់ថា៖ «ក្នុងគោលដៅជំរុញអនុវត្ដឲ្យមានប្រសិទ្ធភាពសេចក្ដីណែនាំលេខ ០២៨ ស.ណ.ន របស់ក្រសួងមហាផ្ទៃស្ដីពីការគ្រប់គ្រងវត្ដមានជនបរទេសក្នុងព្រះរាជាណាចក្រកម្ពុជា អគ្គនាយកដ្ឋានអន្តោប្រវេសន៍នឹងអនុវត្ដវិធានការមិនផ្ដល់ទិដ្ឋាការបន្តរយៈពេលស្នាក់នៅក្នុងព្រះរាជាណាចក្រកម្ពុជាចំពោះជនបរទេសណាដែលគ្មានឈ្មោះនៅក្នុងប្រព័ន្ធគ្រប់គ្រងវត្ដមានជនបរទេសក្នុងព្រះរាជាណាចក្រកម្ពុជា (FPCS) ចាប់ពីថ្ងៃទី ១ ខែកក្កដា ឆ្នាំ ២០២០ តទៅ»។
ជាមួយនេះដែរអគ្គនាយកដ្ឋានអន្តោប្រវេសន៍បានស្នើដល់ស្នងការនគរបាលរាជធានី-ខេត្ដទាំងអស់ឲ្យផ្សព្វផ្សាយគោលការណ៍ណែនាំនេះជូនដល់ម្ចាស់ ឬអ្នកកាន់កាប់លំនៅឋានគ្រប់ប្រភេទដើម្បីឲ្យធ្វើសេចក្ដីរាយការណ៍ពីវត្ដមានជនបរទេសដែលបានស្នាក់ក្នុងលំនៅឋានរបស់ខ្លួនទៅក្នុងប្រព័ន្ធ (FPCS) ដើម្បីទទួលបានការអនុញ្ញាតឲ្យបន្តស្នាក់នៅ។
លោក អាត់ បូនី អ្នកនាំពាក្យអគ្គនាយកដ្ឋានអន្តោប្រវេសន៍បានបញ្ជាក់បន្ថែមកាលពីម្សិលមិញថា ជាគោលការណ៍ជនបរទេសដែលស្នាក់នៅកម្ពុជាគឺត្រូវតែចុះបញ្ជីដើម្បីងាយស្រួលគ្រប់គ្រង។ ដូច្នេះដើម្បីសម្រួលដល់ការងារនេះអគ្គនាយកដ្ឋានអន្តោប្រវេសន៍បានបង្កើតប្រព័ន្ធបច្ចេកទេសឌីជីថល អនឡាញមួយ ដើម្បីផ្ដល់ភាពងាយស្រួលក្នុងការចុះបញ្ជីដល់ជនបរទេសដែលត្រូវស្នាក់នៅប្រទេសកម្ពុជា។
លោកថ្លែងថា៖ «មានន័យថា ទាំងផ្ទះសំណាក់ ទាំងសណ្ឋាគារ នៅពេលមានភ្ញៀវមកស្នាក់នៅគឺត្រូវតែចុះបញ្ជីឈ្មោះជនបរទេសនោះនៅក្នុងប្រព័ន្ធគ្រប់គ្រងវត្ដមានជនបរទេសក្នុងព្រះរាជាណាចក្រកម្ពុជា (FPCS) ដែលមានអ៊ែប (App) ទាំងក្នុងប្រព័ន្ធប្រតិបត្ដិការ Android និង iOS។ ប្រសិនបើជនបរទេសមិនបានចុះឈ្មោះក្នុងប្រព័ន្ធគ្រប់គ្រងនេះទេ មានន័យថា ជននោះគឺលួចស្នាក់នៅខុសច្បាប់ហើយ»។
លោក អាត់ បូនី បានបញ្ជាក់ថា កន្លងមកសមត្ថកិច្ចពាក់ព័ន្ធ និងកម្លាំងអគ្គនាយកដ្ឋានអន្តោប្រវេសន៍បានចុះណែនាំ អប់រំ ដល់ម្ចាស់ផ្ទះសំណាក់ សណ្ឋាគារក៏ដូចជា ម្ចាស់លំនៅឋានទូទាំងប្រទេសអំពីការចុះឈ្មោះជនបរទេសនេះរួចអស់ហើយ។ ដូច្នេះប្រសិនបើមិនអនុវត្ដទៀតនឹងចាត់វិធានការតាមច្បាប់របស់កម្ពុជាដែលមានជាធរមាន។
ទោះជាយ៉ាងណាលោក អាត់ បូនី មិនទាន់អាចបង្ហាញទិន្នន័យបច្ចុប្បន្នភាពរបស់ជនបរទេសដែលកំពុងស្នាក់នៅកម្ពុជាបានទេ ដោយលោកបានបញ្ជាក់ថាក្រុមការងារបច្ចេកទេសកំពុងបូកសរុបទិន្នន័យនេះ៕
