ភ្នំពេញៈ ក្រសួងការងារបានប្រកាសបើកប្រាក់ឧបត្ថម្ភដល់កម្មករនិយោជិតកាត់ដេរ និងទេសចរណ៍ដែលត្រូវបានព្យួរការងារជាង ៣៣ ០០០ នាក់នៃរោងចក្រ និងសហគ្រាសទាំង ១១១ ដែលរងផលប៉ះពាល់ពីជំងឺកូវីដ១៩ ដោយការបើកប្រាក់ឧបត្ថម្ភនេះធ្វើឡើងតាមរយៈភ្នាក់ងារវីង។
សេចក្តីជូនដំណឹងរបស់ក្រសួងការងារកាលពីថ្ងៃអង្គារបញ្ជាក់ថា៖ «ធនាគារឯកទេសវីងនឹងផ្ញើសារអំពីការបើកប្រាក់ឧបត្ថម្ភរបស់រាជរដ្ឋាភិបាលទៅលេខទូរស័ព្ទដែលបងប្អូនបានផ្តល់មកឱ្យក្រសួងតាមរយៈរដ្ឋបាលរោងចក្រ សហគ្រាសនាពេលកន្លងមក»។
សេចក្តីជូនដំណឹងបញ្ជាក់ថា ប្រាក់ឧបត្ថម្ភនេះនឹងត្រូវបើកផ្តល់ជាប្រាក់រៀល និងអាស្រ័យលើចំនួនថ្ងៃនៃការព្យួរកិច្ចសន្យាការងារ។ ប្រាក់ឧបត្ថម្ភចំនួន ៦០ ៧៥០ រៀល (១៥ ដុល្លារ) គឺសម្រាប់ការព្យួរកិច្ចសន្យាការងាររយៈពេល ៧ ថ្ងៃដល់ ១០ ថ្ងៃចំនួន ១២១ ៥០០ រៀល (៣០ ដុល្លារ) សម្រាប់រយៈពេល ១១ ថ្ងៃ ដល់ ២០ ថ្ងៃ និង ១៦២ ០០០ រៀល (៤០ ដុល្លារ) សម្រាប់ការព្យួរការងារពី ២១ ថ្ងៃដល់ ១ ខែ។
សេចក្តីជូនដំណឹងបន្តថា៖ «ដើម្បីចៀសវាងការលំបាកក្នុងការបង្វិលថវិកាសងរាជរដ្ឋាភិបាលវិញក្នុងករណីរោងចក្រ សហគ្រាសសុំចូលធ្វើការមុនកាលកំណត់នៃរយៈពេលព្យួរកិច្ចសន្យាការងារនោះប្រាក់ឧបត្ថម្ភនឹងត្រូវចែកចេញជា ២ ដងសម្រាប់បងប្អូនដែលព្យួរកិច្ចសន្យាការងារចាប់ពី ២១ ថ្ងៃដល់ ១ ខែ និងត្រូវបែងចែកជា ៤ ដងសម្រាប់បងប្អូនដែលព្យួរកិច្ចសន្យាការងាររយៈពេល ២ ខែដោយក្នុង ១ ដងស្មើនឹងថវិកាចំនួន ៨១ ០០០ រៀល (២០ ដុល្លារអាមេរិក)»។
បើតាមសេចក្តីជូនដំណឹងធនាគារវីងនឹងបង្វិលប្រាក់ឧបត្ថម្ភនេះជូនរដ្ឋាភិបាលវិញ ក្នុងករណីដែលកម្មករនិយោជិតមិនបានទៅបើកប្រាក់ឧបត្ថម្ភនេះរយៈពេល ១០ ថ្ងៃក្រោយពីទទួលបានសារតាមទូរស័ព្ទពីធនាគារឯកទេសវីង។ ដើម្បីបើកប្រាក់ឧបត្ថម្ភនេះ ក្រសួងការងារណែនាំឱ្យកម្មករនិយោជិត ត្រូវយកអត្តសញ្ញាណប័ណ្ណសញ្ជាតិខ្មែរ និងទូរស័ព្ទដែលទទួលបានសារនោះទៅកាន់ភ្នាក់ងារវីងដែលនៅជិតបំផុត។
ក្រសួងបញ្ជាក់ថា៖ «បងប្អូនមិនតម្រូវឱ្យបង់ថ្លៃសេវាទៅភ្នាក់ងារវីងឡើយពេលបើកប្រាក់ឧបត្ថម្ភនេះ»។
ក្រសួងការងារបានណែនាំឱ្យកម្មករនិយោជិតទំនាក់ទំនងសួរព័ត៌មានបន្ថែម ទៅរដ្ឋបាលរោងចក្រ សហគ្រាសរបស់ខ្លួន ប្រសិនបើពួកគេមិនបានទទួលសារទូរស័ព្ទពីធនាគារវីង។
លោក ហេង សួរ អ្នកនាំពាក្យក្រសួងការងារបានប្រាប់ភ្នំពេញប៉ុស្តិ៍កាលពីថ្ងៃអង្គារថា ការផ្ញើសារទៅកាន់សាមីខ្លួនផ្ទាល់បែបនេះ គឺជាមធ្យោបាយផ្ទាល់ក្នុងការជំរុញដល់កម្មករនិយោជិតបើកប្រាក់ឧបត្ថម្ភនេះឱ្យបានតាមពេលកំណត់។
លោក ឃុន ថារ៉ូ អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅថាសង់ត្រាល់បានប្រាប់ភ្នំពេញប៉ុស្តិ៍កាលពីថ្ងៃអង្គារថា លោកស្វាគមន៍ទៅនឹងការពន្លឿនការទូទាត់ប្រាក់ឧបត្ថម្ភរបស់រាជរដ្ឋាភិបាល ទៅដល់កម្មករនិយោជិតនេះ ពីព្រោះវាអាចជួយដល់បន្ទុករបស់ពួកគាត់បានមួយចំនួន។
ប៉ុន្តែលោកចង់ឱ្យប្រាក់ឧបត្ថម្ភនេះបានគ្របដណ្តប់ទៅដល់កម្មករវិស័យផ្សេងៗទៀត មិនត្រឹមតែវិស័យវាយនភណ្ឌកាត់ដេរ ស្បែកជើង និងវិស័យទេសចរណ៍ប៉ុណ្ណោះទេ។
លោកថ្លែងថា៖ «យើងចង់ឲ្យអាហ្នឹងវាគ្របដណ្តប់ទៅដល់កម្មករនិយោជិតវិស័យផ្សេងៗទៀត ព្រោះវិស័យសេវាកម្មនេះក៏កម្មករគាត់ទទួលរងផលប៉ះពាល់ច្រើន។ សេដ្ឋកិច្ចក្រៅប្រព័ន្ធហ្នឹងក៏គាត់ទទួលរងផលប៉ះពាល់ច្រើន។ វិស័យសំណង់ កម្មករក៏គាត់ប្រឈមទៅនឹងបញ្ហាសេដ្ឋកិច្ច នៅពេលដែលគាត់បាត់បង់ការងារ។ ប្រសិនជាវិសាលភាពនៅក្នុងការគ្របដណ្តប់ហ្នឹងទៅឱ្យវិស័យផ្សេងទៀតអាហ្នឹងវារឹតតែប្រសើរ»៕