The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ប្រកាស​ពី​ការ​កើនឡើង​កម្តៅ​ ធ្វើឲ្យ​ខ្វះ​ទឹក​ប្រើប្រាស់ ​និង​​អាកាសធាតុ​ក្តៅ​ហួតហែង​ខ្លាំង




ក្រសួង​ប្រកាស​ពី​ការ​កើនឡើង​កម្តៅ​ ធ្វើឲ្យ​ខ្វះ​ទឹក​ប្រើប្រាស់ ​និង​​អាកាសធាតុ​ក្តៅ​ហួតហែង​ខ្លាំង

បុរស​ម្នាក់​កំពុង​ដើរ​កាត់​ដី​វាល​ប្រេះ​បែក​ក្រហែង​។
បុរស​ម្នាក់​កំពុង​ដើរ​កាត់​ដី​វាល​ប្រេះ​បែក​ក្រហែង​។ ហេង ជីវ័ន

ក្រសួង​ប្រកាស​ពី​ការ​កើនឡើង​កម្តៅ​ ធ្វើឲ្យ​ខ្វះ​ទឹក​ប្រើប្រាស់ ​និង​​អាកាសធាតុ​ក្តៅ​ហួតហែង​ខ្លាំង

ភ្នំពេញៈ ក្រសួង​ធនធាន​ទឹក និង​ឧតុនិយម​បាន​ព្យាករណ៍​ថា​រលក​កម្តៅ​នៅ​រដូវ​ប្រាំងក្នុង​ខែ​មេសា និង​ឧសភា​ក្នុង​ឆ្នាំ ២០១៦ នឹង​កើន​ពី ៤០ ទៅ ៤១ អង្សាសេ​ដែល​ជា​ការ​​ព្រមាន​ពី​ការ​ខ្វះ​ទឹក​ប្រើប្រាស់​របស់​ប្រជា​កសិករ​ខណៈ​ដែល​រដូវវស្សា​អាច​នឹង​មក​ដល់​យឺត​ហើយ​មាន​​ភ្លៀង​ធ្លាក់​តិច​នៅ​ដើម​រដូវ។

រដ្ឋមន្ត្រី​​ក្រសួង​ធនធាន​ទឹក និង​ឧតុនិយម​លោក លឹម គានហោ បាន​ចេញ​សេចក្តី​ជូន​ដំណឹង​កាលពី​ថ្ងៃ​ម្សិលមិញ​ថា​ក្រោយពី​បាន​​តាម​ដាន​ទៅ​លើ​ស្ថានភាព​ទូទៅ​នៃ​អាកាសធាតុ​ពិសេស​ការ​តាមដាន​លើ​កម្រិត​សីតុណ្ហភាព​នៅ​លើ​ផ្ទៃ​មហាសមុទ្រ​ប៉ាស៊ីហ្វិក​ខាង​លិច និង​សមុទ្រ​ចិន​ខាង​​ត្បូង​ចាប់ពី​ខែ ​មីនា ​ឆ្នាំ​ ២០១៥ ​មក​ឃើញ​ថា​កម្រិត​សីតុណ្ហភាព​នៅ​តំបន់​ទាំង​ពីរ​​នេះ​​មាន​ការ​កើនឡើង ពី ០,៥ ទៅ ១ អង្សាសេ​ហើយ​បើ​តាម​ការ​ព្យាករ​នៅក្នុង​ឆ្នាំ​ ២០១៦ ខាង​មុខ​កម្រិត​សីតុណ្ហភាព​មាន​និន្នាការ​កើន​ឡើង​​​បន្តិច​ថែម​ទៀត។

ក្រសួង​បន្ត​ថា​​ ការ​កើន​ឡើង​នៃ​កម្រិត​សីតុណ្ហភាព​នេះ​អាច​នឹង​ធ្វើឲ្យ​ស្ថានភាព​អាកាសធាតុ​នៅ​កម្ពុជា​ចាប់ពី​ខែ​ធ្នូ ឆ្នាំ​ ២០១៥ ដល់​​ខែ​ឧសភា ឆ្នាំ​​ ២០១៦ នឹង​មាន​សភាព​ក្តៅ​ហួតហែង​នា​​រដូវប្រាំង​ជា​ពិសេស​​ខែ​មេសា និង​ឧសភា​ដែល​​ធ្វើឲ្យ​សីតុណ្ហភាព​អតិបរមា​នឹង​កើន​ដល់​ពី​ ៤០ ទៅ​ ៤១ ​​អង្សាសេ​ហើយ​​រដូវវស្សា​ឆ្នាំ​ ២០១៦ អាច​នឹង​មក​ដល់​យឺត​ហើយ​នៅ​ដើម​រដូវ​​មាន​​ភ្លៀង​​ធ្លាក់​តិច។

ក្រសួង​​អំពាវនាវ​ថា៖ ​«សូម​​ក្រសួង​ស្ថាប័ន​ពាក់ព័ន្ធ​អាជ្ញាធរ​ដែនដី និង​សាធារណជន​ជ្រាប​ជា​ព័ត៌មាន និង​ចូល​រួម​ថែរក្សា​ទឹក​​ទុក​សម្រាប់​បម្រើ​ដល់​ការ​ប្រើប្រាស់​ប្រចាំ​ថ្ងៃ​ក៏​ដូចជា​សម្រាប់​វិស័យ​កសិកម្ម»​។

ប្រធាន​នាយកដ្ឋាន​ឧតុនិយម​នៃ​ក្រសួង​ធនធាន​ទឹក​លោក អ៊ុំ រីណា បាន​ថ្លែង​ថា​ការ​ព្យាករ​នេះ​គឺជា​ព័ត៌មាន​បឋម​ដែល​​ផ្តល់​ជូន​ដល់​ប្រជាពលរដ្ឋ​ឲ្យ​ត្រៀម​សម្រាប់​ការ​ប្រើប្រាស់​ទឹក​ និង​បង្ការ​ជំងឺ​ផ្សេងៗ​ដោយសារ​ការ​​កើនឡើង​កម្តៅ​នេះ។

Content image - Phnom Penh Post
ក្មេងៗមកលោតទឹក ឲ្យត្រជាក់ខ្លួនលេង គេច​ពី​កម្តៅខ្លាំង ក្នុងអូរមួយនៅ​ខេត្ត​កណ្តាល កាល​ពី​ដើម​ឆ្នាំ​នេះ។ ម៉ៃ វីរៈ

លោក​ថា៖ «​នៅ​ឆ្នាំ​ ២០១៥ ក្នុង​ខែ​មេសា និង​ឧសភា​ហ្នឹង​រលក​កម្តៅ​ក្តៅ​ខ្លាំង​ហ្នឹង​គឺ​ក្នុង​រង្វង់​ ៤០ អង្សាសេ​ ហើយ​បើ​យើង​ប្រៀបធៀប​រយៈពេល​ដូច​គ្នា​នេះ​នៅ​ឆ្នាំ​ ២០១៦ ​ហ្នឹង​យើង​ឃើញ​ថា​វា​អត់​ថយ​ទេ​កម្តៅ​វា​នៅ​តែ​ក្តៅ​ខ្លាំង»​។

លោក រីណា បន្ត​ថា​សម្រាប់​រដូវរងា ឬ​សីតុណ្ហភាព​ដែល​ធ្លាក់​ចុះ​​ត្រជាក់​សម្រាប់​ឆ្នាំ​នេះ​នៅ​មិន​ទាន់​មាន​សញ្ញាណ​ណា​មួយ​នៅ​ឡើយ​ទើប​ក្រសួង​នៅ​​មិន​ទាន់​ជូន​ដំណឹង​ជា​ផ្លូវការ​។

លោក​ថា ​កាលពី​ឆ្នាំ​មុន​ សីតុណ្ហភាព​ចាប់ផ្តើម​ត្រជាក់​ចាប់ពី​ពាក់​កណ្តាល​ខែ​វិច្ឆិកា​អូស​បន្លាយ​ដល់​ខែ ​កុម្ភៈ​ ប៉ុន្តែ​សម្រាប់​ឆ្នាំ​នេះ​តាម​ការ​ព្យាករ​មិន​ផ្លូវការ​សីតុណ្ហភាព​ត្រជាក់​អាច​ចាប់​ផ្តើម​នៅ​ចុង​ខែ​ធ្នូ ឬ​ពាក់​កណ្តាល​ខែ​មករា​តែ​មិន​ត្រជាក់​ខ្លាំង​ដូច​ឆ្នាំ​ទៅ​ទេ​។

អ្នក​នាំពាក្យ​ក្រសួង​កសិកម្ម​លោក ឡោ រស្មី បាន​ថ្លែង​ថា​ក្រសួង​ពាក់ព័ន្ធ​បាន​កំពុង​អភិវឌ្ឍ​​ប្រព័ន្ធ​ធារា​សាស្ត្រ និង​​បាន​​ត្រៀម​វិធានការ​សម្រាប់​ការ​ឆ្លើយតប​នឹង​​ការ​ប្រែប្រួល​អាកាសធាតុ​នេះ​ដូចជា​ពូជ​ស្រូវ​ និង​ដំណាំ​ព្រមទាំង​ចេញ​សារាចរ​ដល់​មន្ត្រី​ថ្នាក់​មូលដ្ឋាន​ឲ្យ​ចុះ​ផ្សព្វផ្សាយ​ពី​ការ​ប្រើប្រាស់​ពូជ​ដំណាំ​នេះ និង​ការ​ធ្វើ​ភាវូបនីយកម្ម​កសិកម្ម​ទៅ​ដល់​ប្រជាកសិករ​ប្រមាណ ៨០%​​។

លោក​បញ្ជាក់​ថា៖ «​ក្រសួង​នឹង​ប្រជុំ​វាយតម្លៃ​លើ​ការងារ​កសិកម្ម​នា​ពេល​ឆាប់ៗ​ខាង​មុខ​ដើម្បី​ពិនិត្យ​មើល​ពី​បញ្ហា​ប្រឈម​ និង​ធ្វើការ​ដោះស្រាយ​សម្រាប់​ជា​ផលប្រយោជន៍​របស់​ប្រជាកសិករ​»​។

លោក តឹក វណ្ណារ៉ា នាយក​ប្រតិបត្តិ​វេទិកា​អង្គការ​មិនមែន​រដ្ឋាភិបាល​ស្តីពី​កម្ពុជា​ដែល​ធ្វើការ​លើ​បញ្ហា​បម្រែ​បម្រួល​អាកាសធាតុ​បាន​គាំទ្រ​ចំពោះ​ការ​ផ្តល់​ព័ត៌មាន​ជា​មុន​ពី​ការ​កើន​ឡើង​កម្តៅ​នេះ​ដើម្បី​ឲ្យ​ប្រជាពលរដ្ឋ​អាច​បន្សាំ​ការ​រស់នៅ​ជាពិសេស​ប្រជាកសិករ​អាច​​មាន​វិធានការ​​ឆ្លើយតប​ជា​មុន​សម្រាប់​របរ​កសិកម្ម​​របស់​ពួកគាត់។

លោក​ក៏​បាន​ជំរុញ​ឲ្យ​គណៈប្រតិភូ​រាជរដ្ឋាភិបាល​​​ និង​អង្គការ​សង្គម​ស៊ីវិល​ដែល​នឹង​ចូលរួម​ក្នុង​កិច្ចប្រជុំ​កំពូល​​អនុសញ្ញា​សហប្រជាជាតិ​ស្តីពី​ការ​ប្រែប្រួល​អាកាសធាតុ​នៅ​ដើម​ខែ​ធ្នូ​នេះ​អាច​​លើក​បញ្ហា​​ការ​កើនឡើង​កម្តៅ​នេះ​ប្រាប់​ទៅ​ប្រទេស​អភិវឌ្ឍន៍​ឲ្យ​បង្កើន​ការ​យក​ចិត្ត​ទុក​ដាក់​បន្ថែម​ទៀត​ព្រម​ទាំង​ផ្តល់​ថវិកា​ និង​ផ្ទេរ​បច្ចេកវិទ្យា​ក្នុង​ការ​កាត់​បន្ថយ និង​បន្សាំ​ការ​ប្រែប្រួល​អាកាសធាតុ​ដល់​ប្រទេស​កំពុង​អភិវឌ្ឍន៍ និង​អភិវឌ្ឍន៍​តិចតួច​៕

អត្ថបទគួរចាប់អារម្មណ៍