.jpg)
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ចុះត្រួតពិនិត្យគុណភាពផ្លូវជាតិលេខ ៧ នាពេលកន្លងមក។ រូបថត MPWT
ភ្នំពេញៈ ក្រសួងសាធារណការ និងដឹកជញ្ជូននឹងមិនចេញវិញ្ញាបនបត្របញ្ជាក់ឱ្យក្រុមហ៊ុនចិនដែលទទួលសាងសង់ផ្លូវជាតិលេខ ៧ [ក្រចេះ-ត្បូងឃ្មុំ] មាន ប្រវែង ១៦៤ គីឡូម៉ែត្រឡើយ ប្រសិនបើការស្ថាបនាផ្លូវនេះមិនអនុវត្តតាមកិច្ចសន្យា និងសៀវភៅបន្ទុកស្ដង់ដាផ្លូវឱ្យបាន ១០០ ភាគរយ ព្រោះការស្ថាបនានេះ ក្រសួងពិនិត្យឃើញបញ្ហាបច្ចេកទេសមួយចំនួនទាក់ទងនឹងការសាងសង់។
នេះបើតាមលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនថ្លែងពេលដឹកនាំគណៈប្រតិភូ និងក្រុមបច្ចេកទេសជំនាញរបស់ក្រសួងចុះត្រួតពិនិត្យគុណភាព និងលក្ខណៈបច្ចេកទេសសាងសង់កំណាត់ផ្លូវជាតិលេខ ៧ ក្នុងខេត្ដក្រចេះកាលពីម្សិលមិញ។ ក្នុងដំណើរចុះពិនិត្យនេះ មានការចូលរួមពីតំណាងក្រុមហ៊ុនម៉ៅការសាងសង់ ក្រុមហ៊ុនទីប្រឹក្សាបច្ចេកទេស និងមន្ត្រីនៃមន្ទីរសាធារណការ និងដឹកជញ្ជូនខេត្តក្រចេះ និងខេត្តត្បូងឃ្មុំ។
លោកថ្លែងថា គម្រោងផ្លូវជាតិលេខ ៧ គឺជាគម្រោងគ្រប់គ្រងទ្រព្យសម្បត្តិផ្លូវទី ២ (Road Asset Management) មានប្រវែងសរុប ១៦៤ គីឡូម៉ែត្រ ដោយលើកកម្ពស់គុណភាពផ្លូវពី DBST ទៅជា AC។ គម្រោងនេះត្រូវបានបែងចែកជា ៣ ការដ្ឋានធំៗ ប្រើប្រាស់រយៈពេលសាងសង់ចំនួន ១៨ ខែ និងរយៈពេលថែទាំចំនួន ៣៦ ខែ។ សាងសង់ដោយក្រុមហ៊ុន ចិនត្រួតពិនិត្យលក្ខណៈបច្ចេកទេសដោយក្រុមហ៊ុនកូរ៉េ និងចំណាយថវិកាប្រមាណជាង ៣៦ លានដុល្លារអាមេរិក។ មកដល់បច្ចុប្បន្នកំណាត់ផ្លូវនេះសាងសង់បានប្រមាណ ៨០ ភាគរយហើយ។
លោក ស៊ុន ចាន់ថុល ថ្លែងថា៖ «ក្រសួងសាធារណការ និងដឹកជញ្ជូននឹងមិនទាន់ចេញវិញ្ញាបនបត្របញ្ជាក់ឱ្យក្រុមហ៊ុនសាងសង់ឡើយ ដោយសារមានបញ្ហាបច្ចេកទេសមួយចំនួនទាក់ទងនឹងការសាងសង់»។
លោកណែនាំឱ្យក្រុមហ៊ុនម៉ៅការសាងសង់ ក្រុមហ៊ុនទីប្រឹក្សាបច្ចេកទេស និងភាគីពាក់ព័ន្ធសហការគ្នាកែសម្រួលលក្ខណៈបច្ចេកទេសឱ្យបានត្រឹមត្រូវ។ ជាពិសេសត្រូវអនុវត្តតាមកិច្ចសន្យា និងសៀវភៅបន្ទុកឱ្យបាន ១០០ ភាគរយ។
លោកទេសរដ្ឋមន្ត្រីអំពាវនាវដល់ពលរដ្ឋអ្នកប្រើប្រាស់ផ្លូវទាំងអស់ឱ្យទុកចិត្តក្រសួងសាធារណការ និងដឹកជញ្ជូន។ លោកថា៖ «បើផ្លូវនោះពិនិត្យមិនមានគុណភាពស្របតាមលក្ខណៈបច្ចេកទេសទេ ក្រសួងនឹងមិនទទួលយកផ្លូវនោះឡើយ។ ព្រោះក្រសួងឈរលើគោលការណ៍ សាងសង់ផ្លូវឱ្យមានគុណភាព រឹងមាំ ជាប់បានយូរអង្វែង ហើយក្រសួងនឹងធ្វើការត្រួតពិនិត្យជាប្រចាំតាមការដ្ឋានសាងសង់ទាំងអស់ក្រោមដែនសមត្ថកិច្ចរបស់ក្រសួងនៅក្នុងព្រះរាជាណាចក្រកម្ពុជា»។
បើតាមលោក ចាន់ថុល បច្ចុប្បន្នក្រុមហ៊ុនម៉ៅការសាងសង់ផ្លូវនេះកំពុងកែលម្អ លក្ខណៈបច្ចេកទេសត្រង់ចំណុចទាំងឡាយណាដែលមិនសមស្របតាមលក្ខណៈបច្ចេកទេសឱ្យបានត្រឹមត្រូវតាមលក្ខណៈបច្ចេកទេសឡើងវិញ។
លោកថ្លែងថា៖ «អ៊ីចឹងបានយើងពិភាក្សាគ្នាជាមួយក្រុមហ៊ុន KCI ដែលជាក្រុមហ៊ុនបច្ចេកទេស ត្រួតពិនិត្យការងារនេះ។ ក្រុមហ៊ុនបច្ចេកទេសបានឯកភាពហើយ តាមរយៈអ្នកបច្ចេកទេសរបស់សាធារណការ និងដឹកជញ្ជូនថា ការសាងសង់នេះមានកន្លែងមួយចំនួនខុសនឹងលក្ខណៈបច្ចេកទេស»។
លោកថា៖ «ដូច្នេះក្រុមហ៊ុនទទួលខុសត្រូវសាងសង់បានឯកភាពធ្វើផ្លូវនេះឡើងវិញ។ ដូចបងប្អូនបានឃើញសកម្មភាពមួយចំនួនក្នុងពេលនេះហើយ គាត់បានកាយឡើងវិញ។ គាត់អ៊ុតកៅស៊ូហើយ យើងទទួលយកមិនបានឥឡូវគាត់កាយឡើងវិញ គាត់ឯកភាពធ្វើឡើងវិញ»។
ទោះយ៉ាងណាលោក ស៊ុន ចាន់ថុល សរសើរក្រុមហ៊ុនដែលទទួលស្គាល់នូវកំហុស ហើយសហការគ្នាជាមួយក្រសួងសាធារណការ និងក្រុមហ៊ុនបច្ចេកទេស KCI ជាក្រុមហ៊ុនពិនិត្យលក្ខណៈបច្ចេកទេសផ្លូវក្នុងការរកនីតិវិធីដោះស្រាយបញ្ហាស្ថាបនាផ្លូវនេះឡើងវិញ។
លោកបានណែនាំដល់ក្រុមហ៊ុនទទួលស្ថាបនាផ្លូវនេះត្រូវយកគ្រឿងចក្រមកកាយដីចាស់ៗចេញមិនអាចយកកៅស៊ូ ៥ ហ៊ុនទៅអ៊ុតពីលើផ្លូវចាស់បានទេ។ លោកថា កន្លែងខ្លះត្រូវកាយវាចោលបង្ហាប់ឡើងវិញ ទើបចាក់កៅស៊ូ ប៉ុន្ដែមួយចំនួនមិនបានកាយចេញទេ។ ទៅចាក់កៅស៊ូពីលើការស្ថាបនាបែបនេះធ្វើឱ្យផ្លូវខូច៕
