ភ្នំពេញ៖ ស្រ្តីជនជាតិខ្មែរ អាយុ ៥៥ ឆ្នាំ ម្នាក់ទៀត បានស្លាប់ដោយសារជំងឺកូវីដ ១៩ នៅរសៀលថ្ងៃសុក្រ ទី ០៩ ខែមេសានេះ ដែលធ្វើឱ្យកម្ពុជាមានអ្នកស្លាប់ដោយសារជំងឺនេះកើនឡើងដល់ ២៥ នាក់ ពីព្រឹត្តិការណ៍សហគមន៍ ២០ កុម្ភៈ។
យោងតាមសេចក្តីជូនដំណឹងរបស់ក្រសួងសុខាភិបាលដែលបានចេញនៅយប់ថ្ងៃនេះ បានឱ្យដឹងថា យោងតាមការផ្តល់ព័ត៌មានពីមន្ទីរពេទ្យមិត្តភាពខ្មែរ-សូវៀត ស្ត្រីអ្នកជំងឺនេះ រស់នៅសង្កាត់ព្រែកលាប ខណ្ឌជ្រោយចង្វារ រាជធានីភ្នំពេញ បានស្លាប់បាត់បង់ជីវិតនៅម៉ោង ០២:៥៦ នាទីរសៀល។
អ្នកជំងឺខាងលើត្រូវបានរកឃើញវិជ្ជមានកូវីដ ១៩ នៅថ្ងៃទី ៣០ ខែមីនា ហើយត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ប៉ុន្តែដោយសារស្ថានភាពអ្នកជំងឺមានសភាពធ្ងន់ធ្ងរតាំងពីចូលសម្រាកពេទ្យដំបូង តម្រូវឱ្យក្រុមគ្រូពេទ្យប្រើប្រាស់ម៉ាស៊ីនជំនួយដង្ហើមតាំងពីថ្ងៃចូលសម្រាកពេទ្យដំបូង។
ក្រសួងបានបញ្ជាក់ថា តែទោះបីជាក្រុមគ្រូពេទ្យបានខិតខំជួយសង្គ្រោះតាមលក្ខណៈបច្ចេកទេសយ៉ាងណាក៏ដោយ ក៏មិនអាចជួយអ្នកជំងឺបានដែរ ហើយស្ថានភាពអ្នកជំងឺកាន់តែធ្ងន់ធ្ងរឡើងៗ។
ក្រសួងសុខាភិបាលថា៖ «ការសន្និដ្ឋានរបស់ក្រុមគ្រូពេទ្យ ស្ត្រីនេះបានស្លាប់បាត់បង់ជីវិតដោយខ្សោយសួតធ្ងន់ធ្ងរ រលាកសួតសងខាង ដោយសារវីរុសកូវីដ ១៩ លើអ្នកជំងឺទឹកនោមផ្អែម»។
គិតត្រឹមថ្ងៃ ០៩ ខែ មេសា ឆ្នាំ ២០២១ នេះ កម្ពុជាមានអ្នកមានវីរុសកូវីដ ១៩ សរុបចំនួន ៣ ៦០៤ នាក់ អ្នកជាសះស្បើយសរុបចំនួន ១ ៩៨៤ នាក់ អ្នកកំពុងព្យាបាលចំនួន ១ ៥៩១នាក់ ៕