The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ប្រកាស​ហាម​គណនី​ហ្វេសប៊ុក ៦ ​ផ្សព្វផ្សាយ​លក់​ឱសថ​ដែល​គ្មាន​លេខ​បញ្ជិកា

ក្រសួង​ប្រកាស​ហាម​គណនី​ហ្វេសប៊ុក ៦ ​ផ្សព្វផ្សាយ​លក់​ឱសថ​ដែល​គ្មាន​លេខ​បញ្ជិកា

Content image - Phnom Penh Post
ក្រសួង​ប្រកាស​ហាម​គណនី​ហ្វេសប៊ុក ៦ ​ផ្សព្វផ្សាយ​លក់​ឱសថ​ដែល​គ្មាន​លេខ​បញ្ជិកា និង​គ្មាន​ការទទួលស្គាល់​ពី​ក្រសួង​សុខាភិបាល។ រូបថត MOH

ក្រសួង​ប្រកាស​ហាម​គណនី​ហ្វេសប៊ុក ៦ ​ផ្សព្វផ្សាយ​លក់​ឱសថ​ដែល​គ្មាន​លេខ​បញ្ជិកា

ភ្នំពេញៈ ក្រសួង​សុខាភិបាល​បាន​ចេញ​សេចក្តីប្រកាស​ស្តីពី​ការហាមឃាត់​គណនី​ហ្វេសប៊ុក​ចំនួន​ ៦ ​ដែល​បាន​កំពុង​ផ្សព្វផ្សាយ​លក់​ឱសថ​បុរាណ ដែល​គ្មាន​លេខ​បញ្ជិកា និង​គ្មាន​ការទទួលស្គាល់​ពី​ក្រសួង​សុខាភិបាល ហើយ​មន្ត្រី​បាន​អំពាវនាវ​ទៅដល់​សាធារណជន​មិន​ត្រូវ​ទិញ​ឱសថ​ខុសច្បាប់​ដែល​ត្រូវបាន​គេ​ផ្សព្វផ្សាយ​លក់​តាម​ប្រព័ន្ធ​អនឡាញ​នោះឡើយ​។

ក្រសួង​សុខាភិបាល​បានចេញ​សេចក្តីប្រកាស​ពី​ម្សិលមិញ​ថា តាម​ការពិនិត្យ​ឃើញ​លើ​បណ្តាញ​សង្គម​ហ្វេសប៊ុក​មាន​គណនី​ចំនួន​ ៦ បាន​ធ្វើការ​ផ្សព្វផ្សាយ​លក់​ឱសថ​បុរាណ​ឈ្មោះ ISOTIN PLUS B/10ml x6 Vials ក្នុងនោះ​មាន ក្រុមហ៊ុន Eye doctor Cambodia, សុខភាព​ភ្នែក​, Dr ភ្នែក​, ថ្នាំ​បន្តក់​ភ្នែក Isotine Plus, Docter Eye និង Isotine plus ទឹក​បន្តក់​ភ្នែក​អ៊ីសូទីន​។ «​ការផ្សព្វផ្សាយ​នេះ​មាន​ការបំផ្លើស​ហួស​ពី​ការពិត​ដូចជា ព្យាបាល​ជំងឺ​ដុះ​កន្ទុយថ្លែន ភ្នែក​ឡើងបាយ ភ្នែក​មីញ៉ូប ទឹក​ដក់​ក្នុង​ភ្នែក​រលាក​បាត​ភ្នែក​ជាដើម​»​។

ក្រសួង​បន្តថា​អនុលោម​តាមច្បាប់​ស្តីពី​ការគ្រប់គ្រង​ឱសថ និង​ច្បាប់​ស្តីពី​វិសោធនកម្ម​ច្បាប់​ស្តីពី​ការគ្រប់គ្រង​ឱសថ​តម្រូវ​ឱ្យ​រាល់​ការចរាចរ​ផលិតផល​ឱសថ​ក្នុង​ប្រទេស​កម្ពុជា​ត្រូវ​មាន​លេខ​ទិដ្ឋាការ ឬ​លេខ​បញ្ជិកា​ពី​ក្រសួងសុខាភិបាល​។ ក្រសួង​ថា​៖ «​សូម​ប្រជាពលរដ្ឋ​មុននឹង​ទិញ​ផលិតផល​ឱសថ​សូម​ពិនិត្យមើល​លតាបត្រ​ដែលមាន​បិទ​លើ​សម្បក​វេចខ្ចប់ ហើយ​លតាបត្រ​ទិដ្ឋាការ ឬ​បញ្ចិកា​ត្រឹមត្រូវ​គឺ​មាន​ ២ ​ផ្នែក ទី​ ១ ​ផ្នែក​ខាងលើ​មានឈ្មោះ​គ្រឹះស្ថាន​អាហរ័ណ​នីហរ័ណ​ និង​ទី​ ២ ផ្នែក​ខាងក្រោម​មាន​លេខ​ទិដ្ឋាការ​ ឬ​បញ្ចិកា​»​។

មន្ត្រី​សុខាភិបាល​មួយរូប​ដែល​សុំ​មិន​បញ្ចេញ​ឈ្មោះ​បាន​ឱ្យដឹងថា ក្រសួង​តែងតែ​មាន​ការសហការ​ជាមួយ​នឹង​ស្ថាប័ន​ពាក់ព័ន្ធ​ផ្សេងៗ​ក្នុង​ការបង្ក្រាប​ឱសថស្ថាន ក្រុមហ៊ុន និង​កន្លែង​ដែល​លក់​ឱសថ​ខុសច្បាប់​នានា​។ លោក​ថា ការលក់ ការផលិត​ឱសថ​ដែល​គ្មាន​ការទទួល​ស្គាល់​ពី​ក្រសួងសុខាភិបាល នៅតាម​ប្រព័ន្ធ​អនឡាញ​មាន​ច្រើន​គួរឱ្យ​កត់សម្គាល់​ហើយ​ក្នុងនោះ ក្រសួង​តែងតែ​ចាត់វិធានការ​រឹតបន្តឹង​ និង​អនុវត្ត​ទៅតាម​ច្បាប់​ស្តីពី​ការគ្រប់គ្រង​ឱសថ​ដែល​តម្រូវឱ្យ​រាល់​ការចរាចរ​ផលិតផល​ឱសថ​ក្នុង​ប្រទេស​កម្ពុជា​ត្រូវ​មាន​លេខ​ទិដ្ឋាការ​ ឬ​លេខ​បញ្ចិកា​ពី​ក្រសួង​សុខាភិបាល​។

លោក​ថា​៖ «​ទាក់ទង​នឹង​ឱសថ​ខុសច្បាប់​ និង​ការផ្សព្វផ្សាយ​ខុសច្បាប់ យើង​នឹង​មាន​ការផាកពិន័យ​អន្តរកាល ហើយ​បើ​មាន​ការរកឃើញ​នូវ​ឱសថ​ក្លែងក្លាយ​នឹងមាន​ការដាក់​ទោសទណ្ឌ​រហូត​ដល់​ទោសឧក្រិដ្ឋ ប៉ុន្តែ​កន្លងមក​យើង​មិនទាន់​មាន​ករណីនេះ​នៅឡើយ​ទេ​គឺ​យើង​មាន​ត្រឹមតែ​ទោសទណ្ឌ​ជា​ការផាកពិន័យ​តែប៉ុណ្ណោះ​»​។

លោក​ពន្យល់ថា ឱសថស្ថាន​ស្របច្បាប់​គឺជា​ឱសថស្ថាន​ដែលមាន​លិខិតអនុញ្ញាត​ត្រឹមត្រូវ ហើយ​ប្រសិនបើ​កន្លែង​នោះ​មិនមាន​ដាក់​ស្លាក​សញ្ញា​ត្រឹមត្រូវ​ និង​មិនមាន​លិខិតអនុញ្ញាត​ពី​ក្រសួង គឺ​សុំ​ប្រជាពលរដ្ឋ​ ឬ​អ្នកទិញ​ថ្នាំ​ទាំងអស់​ត្រូវ​ធ្វើការ​ប្រុងប្រយ័ត្ន និង​ពិនិត្យមើល​ឱ្យបាន​ច្បាស់លាស់​។ «​យើង​ក៏​សូម​ធ្វើការ​ហាមឃាត់​ជាដាច់ខាត​ក្នុង​ការប្រើប្រាស់​ឱសថ​ដែល​លក់​តាម​អនឡាញ​ដែល​មិនមាន​ការគ្រប់គ្រង ហើយ​ក្រសួង​ក៏​មិនដែល​ឱ្យមាន​ច្បាប់​លក់​ឱសថ​អនឡាញ​ដែរ​។ ការប្រើប្រាស់​ឱសថ​មិន​ត្រឹមត្រូវ​នឹងធ្វើ​ឱ្យ​ប៉ះពាល់​ទៅដល់​សុខភាព​របស់​អ្នកប្រើប្រាស់​»​។

លោកស្រី​ ឱ វណ្ណឌីន​អ្នក​នាំពាក្យ​ក្រសួងសុខាភិបាល​បាន​ប្រាប់​ ភ្នំពេញ​ ប៉ុស្តិ៍​ ម្សិលមិញ​ថា ក្រសួង​បាន​ធ្វើ​ការងារ​នេះ​ដោយ​សកម្ម ហើយ​ក្រសួង​ក៏បាន​ដាក់​ពិន័យ​តាម​ច្បាប់​បាន​ច្រើន និង​បាន​ណែនាំ​ឱ្យមក​ធ្វើតាម​ផ្លូវច្បាប់​បាន​មួយចំនួន​ហើយ​ផងដែរ​។

លោកស្រី​ថ្លែងថា​៖ «​យើង​នឹង​ខិតខំ​ធ្វើជា​បន្តបន្ទាប់​ទៀត​តែ​តម្រូវ​ឲ្យ​មាន​ការចូលរួម​ពី​អ្នកប្រើប្រាស់​ផងដែរ​។ សូមកុំ​ទិញ​ផលិតផល​ណា​ដែល​មិនមាន​បិទ​លតាបត្រ​ ឬ​ម៉ាញ៉ែត​ត្រឹមត្រូវ​»​។

យោងតាម​របាយការណ៍​របស់​នាយកដ្ឋាន​ឱសថ ចំណីអាហារ បរិក្ខារពេទ្យ និង​គ្រឿងសម្អាង​ចេញ​ផ្សាយ​កាលពី​ដើម​ខែធ្នូ ឆ្នាំ​ ២០២០ ​បាន​ឱ្យដឹងថា នៅ​ទូទាំង​ប្រទេស​មាន​ឱសថស្ថាន​ឱសថស្ថានរង «​ក​» និង​ឱសថស្ថាន​រង​ «​ខ​» សរុប​ចំនួន ៣ ១៥៦ ​កន្លែង អគារ​លក់​ឱសថ​បុរាណ​ខ្មែរ-ចិន​ចំនួន​ ១៥២ ​កន្លែង​៕

អត្ថបទគួរចាប់អារម្មណ៍