The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ប្រកាស​ឲ្យ​ក្រុមហ៊ុន​ចូល​ដេញ​ថ្លៃ​អាជីវកម្ម​បូមខ្សាច់

ក្រសួង​ប្រកាស​ឲ្យ​ក្រុមហ៊ុន​ចូល​ដេញ​ថ្លៃ​អាជីវកម្ម​បូមខ្សាច់

គ្រឿងចក្រ​កំពុង​ចូក​ខ្សាច់​ដាក់​ឡាន​នៅ​ដេប៉ូ​ខ្សាច់​នៅ​កោះពេជ្រ​កាលពី​ម្សិលមិញ​។
គ្រឿងចក្រ​កំពុង​ចូក​ខ្សាច់​ដាក់​ឡាន​នៅ​ដេប៉ូ​ខ្សាច់​នៅ​កោះពេជ្រ​កាលពី​ម្សិលមិញ​។ ម៉ៃ វីរៈ

ក្រសួង​ប្រកាស​ឲ្យ​ក្រុមហ៊ុន​ចូល​ដេញ​ថ្លៃ​អាជីវកម្ម​បូមខ្សាច់

ភ្នំពេញៈក្រសួង​រ៉ែ និង​ថាមពល កាលពី​ម្សិលមិញ​បាន​ប្រកាស​បើក​ឲ្យ​ក្រុមហ៊ុន​ក្នុង​ស្រុក និង​ក្រុមហ៊ុន​បរទេស ចូលរួម​ដាក់ ពាក្យ​ដេញ​ថ្លៃ​លើ​អាជីវកម្ម​បូមខ្សាច់ ដើម្បី​ទទួល​យក​អាជ្ញាប័ណ្ណ ស្តារ​ផ្លូវ​នាវា​ចរណ៍​ទន្លេ​មេគង្គ​ចំនួន ៤ ឡូត៍ ក្នុង​​ខេត្ត​កំពង់ចាម និង​ខេត្ត​កណ្តាល​។

សេចក្តី​ជូន​ដំណឹង​របស់​ក្រសួង​រ៉ែ និង​ថាមពល​ ចុះ​ថ្ងៃ​ទី​ ២១ ខែ​មេសា​នេះ ជា​ការបើក​ដេញ​ថ្លៃ​ជា​សាធារណៈ​លើក​ដំបូង​ដែល​អនុវត្ត​ទៅលើ​រាល់​បណ្តា​ក្រុមហ៊ុន​ក្នុង​ស្រុក គិត​ទាំង​សហគ្រាស​ឯកត្តបុគ្គល​ និង​ក្រុមហ៊ុន​បរទេស​ដែល​បាន​ចុះបញ្ជី​ត្រឹមត្រូវ​នៅ​ក្រសួង​ដើម្បី​ទទួល​បាន​សិទ្ធិ​ធ្វើ​អាជីវកម្ម​ខ្សាច់ នៅ​តំបន់​ប្រឡាយ​ស្តៅតាឯក ស្ថិត​ក្នុង​ស្រុក​កងមាស ខេត្ត​កំពង់ចាម និង​ស្រុក​មុខ​កំពូល ស្រុក​ខ្សាច់​កណ្តាល ខេត្ត​កណ្តាល​។ ជាមួយ​គ្នា​នេះ ក្រសួង បាន​តម្រូវ​ឲ្យ​ក្រុមហ៊ុន បំពេញ​បែប​បទ​ឯកសារ តាមរយៈ​អង្គភាព​លទ្ធកម្ម​នៃ​ក្រសួង យ៉ាង​យូរ​ត្រឹម​ថ្ងៃ​ទី​ ២៩ ខែ​ឧសភា ដែល​ជា​ថ្ងៃ​ចុងក្រោយ​នៃ​ការ​ទទួល​ពាក្យ និង​ជា​ថ្ងៃ​សម្រាប់​បើក​សំណើ​ដេញ​ថ្លៃ។

រដ្ឋលេខាធិការ​ក្រសួង​រ៉ែ និង​ថាមពល និង​ជា​អ្នកនាំពាក្យ​ លោក ម៉េង សក្តិធារ៉ា បាន​ឲ្យ​ដឹង​ថា ការប្រកាស​ដេញ​ថ្លៃ​នេះ គឺ​ដើម្បី​បង្កើន​តម្លាភាព​ក្នុង​វិស័យ​នេះ និង​ជា​អត្ថប្រយោជន៍​លើ​ចំណូល​ជាតិ​ហើយ​ទីតាំង​ខ្សាច់ ​៤ ឡូត៍​ថ្មី​នេះ គឺ​​ស្ថិត​នៅ​ជាប់​នឹង​ទីតាំង​ខ្សាច់ ៣ ឡូត៍ ដែល​ក្រសួង បាន​​សម្រេច​ផ្តល់​​អាជ្ញាប័ណ្ណ​បូមខ្សាច់​ទៅ​ឲ្យ​កំពង់ផែ​ស្វយ័ត​ភ្នំពេញ​កាលពី​សប្តាហ៍​មុន​ដើម្បី​ឲ្យ​ក្រុមហ៊ុន​ឯកជន​ មាន​សិទ្ធិ​ក្នុង​ការប្រកួត​ប្រជែង​ដោយ​គោរព​ទៅ​តាម​លក្ខខណ្ឌ​កំណត់​របស់​ក្រសួង​ដូចជា​ការបង្ហាញ​ទំហំ​ក្បាល​បូម​ត្រូវ​មាន​សាឡង់ ឬ​ទូក មាន​អ្នកបច្ចេកទេស​ជំនាញ​ខាង​បូម​ជាដើម។

លោក​ថា៖ «បរិវេណ​ខ្សាច់ ៤ ឡូត៍​នេះ ត្រូវ​បែងចែក​មួយ​ឡូត៍ សម្រាប់​មួយ​ក្រុមហ៊ុន​មាន​ន័យ​ថា យើង​​បើក​ផ្តល់​អាជ្ញាប័ណ្ណ​បូមខ្សាច់​ចំនួន ៤ សម្រាប់​ក្រុមហ៊ុន​ដែល​ដេញ​បាន​នោះ​។ ការ​ដាក់​ដេញ​ថ្លៃ​គឺ​កម្រិត​អប្បបរមា​ពី​ ៤០ សេន/ដុល្លារ​សម្រាប់​ខ្សាច់​​មួយ​​ម៉ែត្រ​គុប»។

កាលពី​ថ្ងៃ​ទី ១០ ខែ​មេសា ឆ្នាំ ២០១៥ ក្រសួង​រ៉ែ និង​ថាមពល បាន​សម្រេច​ផ្តល់​អាជ្ញាប័ណ្ណ​លើក​ដំបូង​ចំនួន​ពីរ​ឲ្យ​កំពង់ផែ​​ស្វយ័ត​ភ្នំពេញ​ដើម្បី​ស្តារ​ផ្លូវ​នាវាចរណ៍​នៅ​តាម​បណ្តោយ​ដងទន្លេ​មេគង្គ តាម​ផ្លូវ​ជាតិ​លេខ​ ១ លេខ ៥ លេខ​ ៦ និង​ដេប៉ូ​នៅ​កោះពេជ្រ ដាក់​លក់​ខ្សាច់​ប្រមាណ​​ពី ២ ទៅ ៣ ​​ម៉ឺន​ម៉ែត្រគុប ទៅ​ឲ្យ​ដេប៉ូ ១០ ​កន្លែង​ក្នុង​តម្លៃ​ពី ៤,៥ ដុល្លារ ទៅ​​ ៥ ​​ដុល្លារ​ក្នុង​មួយ​ម៉ែត្រគុប​។

អគ្គនាយក​កំពង់ផែ​ស្វយ័ត​ភ្នំពេញ លោក ហ៊ឺ បាវី បាន​ឲ្យ​ដឹង​កាលពី​ម្សិលមិញ​​ថា ក្រោយពី​ទទួល​បាន​អាជ្ញាប័ណ្ណ​បូម​ខ្សាច់ កំពង់ផែ​ស្វយ័ត​បាន​ដំណើរការ​ចែកចាយ​ខ្សាច់​ដោយ​ផ្អែក​លើ​តម្រូវការ​ជាក់ស្តែង រហូត​ដល់​ទៅ​ចំនួន ១២ ​ដេប៉ូ​​តាម​​តម្លៃ​កំណត់។

លោក​ថា៖ «យើង​បាន​ឃើញ​ពី​តម្រូវការ​ខ្សាច់​នៅ​ម្តុំ​អ្នក​លឿង​​​ត្រើយ​ខាង​​លិច​ជា​ទីតាំង​​មួយ​ដែល​កំពង់ផែ​បាន​ទទួល​​នូវ​សិទ្ធិ​ធ្វើ​អាជីវកម្ម​ខ្សាច់ តែ​មិន​ទាន់​បាន​ដំណើរការ​នៅ​ឡើយ ហេតុនេះ​យើង​បាន​កំពុង​រៀបចំ​របាយការណ៍​ទៅ​ក្រសួង​ហើយ​ក្រសួង​នឹង​សម្រេច​ពី​ចំនួន​​ដេប៉ូ​បន្ថែម ឲ្យ​ខាង​យើង​លក់​ឲ្យ»។

បើ​តាម​លោក ម៉េង សក្តិធារ៉ា ពាក់ព័ន្ធ​នឹង​តម្រូវការ​ទីផ្សារ​ខ្សាច់​នេះ​ក្រសួង​ក៏បាន​និង​កំពុង​ពិចារណា​ទៅលើ​ការស្នើសុំ​ពង្រីក​​ដេប៉ូ​ចែកចាយ​របស់​កំពង់ផែ​ស្វយ័ត និង​ពាក្យសុំ​របស់​ម្ចាស់​ដេប៉ូ​ផ្ទាល់​ផង​ដែរ ដើម្បី​ពិនិត្យ​លើ​លទ្ធផល​នៃ​តម្រូវការ​ខ្សាច់​នេះ៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។