ភ្នំពេញ: លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបាននាំយកថវិកាជាង ៨០០ លានរៀល ដែលបានពីការលក់លេខពិសេសផ្ទាល់ខ្លួន "កម្ពុជា 5" ទៅជូនមូលនិធិនៃមន្ទីរពេទ្យគន្ធបុប្ផា ខណៈក្រសួងលក់លេខពិសេសនេះបានជាង ១ ៤០០ ស្លាក លេខដោយទទួលបានថវិកាសរុបចំនួនជាង ៤ លានដុល្លារ ក្នុងរយៈពេល ៦ ខែកន្លងមក។
លោក ហ៊ាង សុទ្ធាយុត្តិ ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និងជាអ្នកនាំពាក្យក្រសួងសាធារណការ និងដឹកជញ្ជូនបានថ្លែងពីម្សិលមិញថា ក្រសួងសាធារណការ និងដឹកជញ្ជូនបានបើកលក់លេខចុះបញ្ជីពិសេសផ្ទាល់ខ្លួនកាលពីដើមឆ្នាំនេះ សម្រាប់រថយន្តមានលក្ខណពិសេសអាចកុម្ម៉ង់តាមការពេញចិត្ត និងតាមតម្រូវការដែលជាការផ្តល់ជម្រើសសម្បូរបែបជូនពលរដ្ឋ។ ស្លាកលេខប្រភេទនេះបង្ហាញពីអត្តសញ្ញាណកម្ពុជាលើឆាកអន្តរជាតិដែលអាចកៀរគរចំណូលបន្ថែមជូនរដ្ឋ និងអាចអនុញ្ញាតឲ្យម្ចាស់រថយន្តរក្សាលេខនោះទុកសម្រាប់ចុះបញ្ជីលើរថយន្តថ្មីរបស់ខ្លួនក្រោយៗទៀត។
លោកបញ្ជាក់ថា៖ «យើងលក់លេខពិសេសផ្ទាល់ខ្លួនបានប្រមាណជាង ១ ៤០០ ស្លាកលេខដោយទទួលបានថវិកាសរុបចំនួនជាង ៤ លានដុល្លារអាមេរិក ចាប់តាំងពីថ្ងៃទី ៧ ខែ មករា ឆ្នាំ ២០២០ នៃការបើកដំណើរការដំបូងរហូតដល់ខែមិថុនានេះ ដោយថវិកាទាំងអស់ត្រូវប្រមូលចូលរដ្ឋ។ ចំពោះលេខប្រភេទ «កម្ពុជា 5» ត្រូវបានលក់ដាច់អស់ហើយ ដោយបានថវិកាសរុប ៨០០ ៤៨០ ០០០ រៀល ប៉ុន្តែត្រូវបានប្រគល់ថវិកាទាំងអស់នេះជូនមន្ទីរពេទ្យគន្ធបុប្ផា»។
លោកបន្ថែមថា ការបរិច្ចាគថវិកាវិភាគទានសប្បុរសធម៌នេះគឺជាលើកទី ២ ហើយដែលក្រសួងបានប្រគល់ជូនមន្ទីរពេទ្យគន្ធបុប្ផាដោយយោងតាមអនុសាសន៍ប្រមុខរាជរដ្ឋាភិបាលដែលបានអនុញ្ញាតដើម្បីចូលរួមចំណែកពិនិត្យ និងការព្យាបាលជំងឺកុមារ។
ថ្ងៃទី ១៧ ខែមិថុនា លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបាននាំយកថវិកា ដែលបានពីការលក់លេខពិសេសផ្ទាល់ខ្លួន "កម្ពុជា 5" ចំនួនជាង ៨០០ លានរៀលទៅប្រគល់ជូនមន្ទីរពេទ្យគន្ធបុប្ផានៅក្រសួងសេដ្ឋកិច្ច និងហិរញ្ញវត្ថុ ដោយមានលោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជាជាអ្នកទទួល។
នៅក្នុងគេហទំព័រហ្វេសប៊ុកក្រសួងសាធារណការ និងដឹកជញ្ជូនដែលបានដកស្រង់ប្រសាសន៍លោក ស៊ុន ចាន់ថុល ឲ្យដឹងថា យោងតាមការសម្រេចរបស់លោកនាយករដ្ឋមន្ត្រី ហ៊ុន សែន បានអនុញ្ញាតឲ្យប្រគល់ថវិកានេះជូនមន្ទីរពេទ្យគន្ធបុប្ផាក្នុងនាមរាជរដ្ឋាភិបាលកម្ពុជាដោយដាក់បញ្ចូលទៅក្នុងមូលនិធិគន្ធបុប្ផាកម្ពុជា ដើម្បីចូលរួមចំណែកក្នុងការពិនិត្យ និងការព្យាបាលជំងឺកុមារនៅក្នុងមន្ទីរពេទ្យគន្ធបុប្ផា។
លោកបន្តថា ការលក់លេខពិសេសផ្ទាល់ខ្លួនកន្លងទៅនេះជាប្រភពចំណូលថ្មីមួយទៀតដោយក្រសួងសេដ្ឋកិច្ច និងហិរញ្ញវត្ថុ និងក្រសួងសាធារណការ និងដឹកជញ្ជូនបានបង្កើតឲ្យមានការលក់ និងដេញថ្លៃដើម្បីជាគុណប្រយោជន៍ដល់ការរកថវិកាជាតិ។ លោកថា៖ «ចំណូលពីការលក់លេខពិសេសផ្ទាល់ខ្លួន “កម្ពុជា 5” ដែលមានទឹកប្រាក់ជាង ៨០០ លានរៀល គឺជាប្រវត្តិសាស្ត្រមួយដែលប្រភេទលេខពិសេសផ្ទាល់ខ្លួនមួយនេះលក់បានក្នុងតម្លៃខ្ពស់គួរជាទីមោទនៈ»។
តាមសេចក្ដីប្រកាសព័ត៌មានរបស់មូលនិធិគន្ធបុប្ផាចុះថ្ងៃទី ១៧ ខែមិថុនា ដែលភ្នំពេញប៉ុស្ដិ៍ទទួលបានកាលពីម្សិលមិញបានដកស្រង់ប្រសាសន៍របស់លោក អូន ព័ន្ធមុនីរ័ត្ន ឲ្យដឹងថា ការឧបត្ថម្ភរបស់រាជរដ្ឋាភិបាលកម្ពុជាគឺពុំមានការថយចុះនោះទេ បើទោះបីជាការរាតត្បាតនៃជំងឺកូវីដ ១៩ បាន និងកំពុងមានផលប៉ះពាល់អវិជ្ជមានចំពោះសេដ្ឋកិច្ច និងសង្គមកម្ពុជាក៏ដោយ។
លោកបានលើកទឹកចិត្តចំពោះមន្ត្រីពាក់ព័ន្ធដែលកន្លងមកបានបំពេញការងារទទួលបានលទ្ធផលល្អ និងបានស្នើឲ្យបន្តកិច្ចសហការទៀត ដើម្បីធ្វើឲ្យសេវានេះកាន់តែល្អប្រសើរ និងអាចរកចំណូលជូនរដ្ឋបានកាន់តែច្រើន។
ជាមួយនេះដែរលោក អូន ព័ន្ធមុនីរ័ត្ន បានអំពាវនាវដល់គ្រប់ក្រសួង ស្ថាប័នរដ្ឋ វិស័យឯកជន និងសាធារណជនទាំងក្នុង និងក្រៅប្រទេសឲ្យបន្ត រួមចំណែកក្នុងសកម្មភាពមនុស្សធម៌នេះក្នុងគោលដៅរួមតែមួយគត់គឺដើម្បីរក្សានិរន្តរភាពនៃកិច្ចដំណើរការបស់មន្ទីរពេទ្យគន្ធបុប្ផាដើម្បីសង្គ្រោះ និងលើកកម្ពស់សុខុមាលភាពរបស់ទារក និងកុមារនៅកម្ពុជា៕