ភ្នំពេញៈ ក្រសួងសាធារណការ និងដឹកជញ្ជូនបានរៀបចំកែសម្រួលនីតិវិធីមួយចំនួនទាក់ទងនឹងការផ្តល់សេវាក្នុងវិស័យដឹកជញ្ជូនតាមផ្លូវទឹកនៅទូទាំងប្រទេសដោយសម្រេចប្រគល់សិទ្ធិដល់រដ្ឋបាលរាជធានី-ខេត្តដើម្បីធ្វើឱ្យការផ្តល់សេវាមានប្រសិទ្ធភាព តម្លាភាព និងរហ័សទាន់ចិត្ត ជាអ្វីដែលសង្គមស៊ីវិលថា ការសម្រេចនេះស្របតាមការចង់បានរបស់ពលរដ្ឋ។
នៅក្នុងសេចក្តីណែនាំរបស់ក្រសួងសាធារណការ និងដឹកជញ្ជូនចុះថ្ងៃ ១៤ ខែកក្កដា និងត្រូវបានផ្សព្វផ្សាយនាពេលថ្មីៗនេះបានឲ្យដឹងថា ក្រសួងបានធ្វើប្រតិភូកម្មសេវាសាធារណ:ជាច្រើនក្នុងវិស័យដឹកជញ្ជូនដោយក្នុងនោះវិស័យដឹកជញ្ជូនផ្លូវទឹកដែលមានដូចជា ការផ្តល់បណ្ណសម្គាល់ជលយាន ការត្រួតពិនិត្យ លក្ខណ:បច្ចេកទេសជលយាន និងការផ្តល់លិខិតអនុញ្ញាតធ្វើអាជីវកម្មដឹកជញ្ជូនផ្លូវទឹក។
ក្រសួងសាធារណការបានបន្តថា ការកែសម្រួលនីតិវិធីនេះដើម្បីធានាប្រសិទ្ធភាពដល់ការផ្តល់សេវារដ្ឋបាលក្នុងវិស័យដឹកជញ្ជូនផ្លូវទឹកនៅអង្គភាពច្រកចេញចូលតែមួយនៃរដ្ឋបាលរាជធានី-ខេត្ត។ ក្នុងនោះផ្តល់សមត្ថកិច្ចដល់រដ្ឋបាលរាជធានី-ខេត្តមានកាតព្វកិច្ចក្នុងការផ្តល់បណ្ណសម្គាល់ ការត្រួតពិនិត្យលក្ខណ:បច្ចេកទេស និងការផ្តល់លិខិតអនុញ្ញាតធ្វើអាជីវកម្មសម្រាប់ជលយានដែលមានចំណុះពី ៤០ តោនចុះក្រោម ផ្ទុកអ្នកដំណើរពី ៥០ នាក់ចុះក្រោម និងកម្លាំងម៉ាស៊ីនពី ៩០ សេះចុះក្រោមប៉ុណ្ណោះ។
ក្រសួងបញ្ជាក់ថា៖ «រដ្ឋបាល រាជធានី-ខេត្តត្រូវធ្វើរបាយការណ៍ទៀងទាត់អំពីការផ្តល់បណ្ណសម្គាល់ការត្រួតពិនិត្យលក្ខណ:បច្ចេកទេសជលយាន និងការផ្តល់លិខិតអនុញ្ញាតធ្វើអាជីវកម្មដឹកជញ្ជូនផ្លូវទឹកមកក្រសួងសាធារណការ និងដឹកជញ្ជូនដោយចម្លងជូនក្រសួងមហាផ្ទៃតាមគោលការណ៍កំណត់។ គ្រប់អង្គភាពទាំងអស់ត្រូវអនុវត្តតាមខ្លឹមសារនេះឲ្យមានប្រសិទ្ធភាព និងដោយស្មារតីទទួលខុសត្រូវខ្ពស់»។
ទោះជាយ៉ាងណាក្រសួងបញ្ជាក់ថា រាល់លិខិតឯកសារទាំងអស់ត្រូវធ្វើតាមច្រកចេញ-ចូលតែមួយ ដើម្បីងាយស្រួលគ្រប់គ្រង និងការអនុវត្តស្របតាមលិខិតបទដ្ឋានគតិយុត្តជាធរមាន។ រីឯសម្រង់ព័ត៌មានត្រូវធ្វើបច្ចុប្បន្នភាពជាទៀងទាត់យ៉ាងតិច ១ ឆ្នាំម្តង។
លោក ម៉ក់ ស៊ីដេត អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែនៃក្រសួងសាធារណការ និងដឹកជញ្ជូនបានប្រាប់ភ្នំពេញប៉ុស្តិ៍ពីម្សិលមិញថា ការកែសម្រួលបែបបទ និងនីតិវិធីនេះគឺគ្រាន់តែការចែករំលែកកិច្ចការមួយចំនួនទៅថ្នាក់ក្រោមជាតិតាមការដាក់ចេញរបស់ក្រសួងមហាផ្ទៃ។
លោកបញ្ជាក់ថា៖ «យើងធ្វើតាមរដ្ឋាភិបាលដែលបានផ្ទេរសេវាមួយចំនួនឲ្យថ្នាក់ក្រោមជាតិដែលឲ្យច្រកចេញចូលតែមួយគាត់អាចធ្វើទៅតាមកម្រិតសមត្ថភាពដែលអាចទទួលខុសត្រូវបាន។ ចំពោះជលយានដែលមានចំណុះលើសពីការកំណត់ក្នុងសេចក្តីណែនាំនេះ គឺត្រូវមកទទួលសេវារដ្ឋាភិបាលនៅក្រសួងសាធារណការដដែល»។
លោក ម៉ក់ ស៊ីដេត បានឲ្យដឹងដែរថា ក្រសួងនឹងចុះបណ្តុះបណ្តាល និងផ្សព្វផ្សាយទៅមន្ត្រីនៅតាមច្រកចេញចូលតែមួយដែលមិនមានបទពិសោធដើម្បីបានចំណេះដឹងជាក់លាក់ក្នុងការផ្តល់សេវាជូនពលរដ្ឋ។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាបានសាទរចំពោះការផ្ទេរសមត្ថកិច្ចខ្លះមកកាន់ថ្នាក់ក្រោមជាតិនេះ ពិសេសតាមច្រកចេញចូលតែមួយដែលភាគច្រើនមានការពេញចិត្តពីពលរដ្ឋ ហើយក៏បានចូលរួមកាត់បន្ថយអំពើពុករលួយផងដែរ។
លោកថា៖ «ជាវិធីមួយកាត់បន្ថយការចំណាយ ការកកស្ទះ ការធ្វើដំណើររបស់ប្រជាជនដែលត្រូវឡើងមកទីរួមស្រុក ឬទីរួមខេត្ត ឬឡើងមកភ្នំពេញក្នុងការស្វែងរកសេវាទាំងនេះ។ មួយទៀតក៏កាត់បន្ថយការជួបជុំគ្នា កកកុញក្នុងសម័យកូវីដ១៩នេះផងដែរ។ ខ្ញុំក៏សង្ឃឹមថារដ្ឋាភិបាលក៏ដូចជាដៃគូគាំទ្រនឹងបន្តពង្រឹងពង្រីកទាំងគុណភាព និងបរិមាណច្រកចេញចូលតែមួយ...»៕