ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈរៀបចំធទិវាពិភពលោក ដើម្បីសុវត្ថិភាព និងសុខភាពការងារឆ្នាំ ២០២០ តាមរយៈប្រព័ន្ធអ៊ីនធឺណិត វីដេអូ Conference ខណៈរដ្ឋាភិបាលណែនាំឲ្យកម្មករនិយោជិត ប្រារព្ធទិវានេះដោយការឈប់សម្រាកតាមផ្ទះចៀសវាងមានការប្រមូលផ្តុំ។
កាលពីម្សិលមិញមានអ្នកចូលរួមចន្លោះពី ៥០០ នាក់ ទៅ ១ ០០០ នាក់ តាមរយៈប្រព័ន្ធអ៊ីនធឺណិត វីដេអូ Conference ដើម្បីប្រារព្ធពិធីទិវាពិភពលោក ដើម្បីសុវត្ថិភាព និងសុខភាពការងារឆ្នាំ ២០២០ ក្រោមប្រធានបទ «បញ្ឈប់ការរាតត្បាតសកល៖ ការរៀបចំផែនការឆ្លើយតបគ្រោះអាសន្នដើម្បីបញ្ឈប់ការឆ្លងរីករាលដាលនៃជំងឺកូវីដ១៩ នៅកន្លែងធ្វើការ»។
ក្រសួងការងារ បណ្តុះបណ្តាលវិជ្ជាជីវៈបានឲ្យដឹងថា ទិវានេះមានការចូលរួមដោយថ្នាក់ដឹកនាំក្រសួងការងារកម្ពុជា អង្គការអន្តរជាតិខាងការងារសម្រាប់ប្រទេសកម្ពុជា ថៃ និងឡាវ តំណាងសមាគមរោងចក្រកាត់ដេរនៅកម្ពុជា តំណាងសហជីព និងស្ថាប័នពាក់ព័ន្ធមួយចំនួនទៀត។
ទំព័រហ្វេសប៊ុករបស់ក្រសួងការងារបានឲ្យដឹងបន្តថា៖ «នេះជាឆ្នាំទី ១៥ ដែលក្រសួងការងារ និងបណ្តុះបណ្តាលវិជ្ជាជីវៈរៀបចំទិវាពិភពលោក ដើម្បីសុខភាព និងសុវត្ថិភាពការងារក្រោមកិច្ចសហការផ្នែកបច្ចេកទេសជាមួយអង្គការអន្តរជាតិខាងការងារ (ILO) តាមរយ:គម្រោងរោងចក្រកាន់តែប្រសើរនៅកម្ពុជា (ILO-BFC) និងគម្រោងលើកកម្ពស់ស្តង់ដាសុខភាព និងសុវត្ថិភាពការងារក្នុងវិស័យសំណង់ (ILO-OSH) ក្នុងគោលបំណងជំរុញគ្រប់ភាគីពាក់ព័ន្ធដើម្បីរៀបចំផែនការឆ្លើយតប និងវិធានការចាំបាច់នានាក្នុងការទប់ស្កាត់ការរីករាលដាលនៃជំងឺកូវីដ១៩នៅកន្លែងធ្វើការ»។
លោក អ៊ិត សំហេង រដ្ឋមន្ត្រីក្រសួងការងារបានមានប្រសាសន៍ក្នុងឱកាសនោះថានៅក្នុងបរិបទនៃការរីករាលដាលការឆ្លងជាសកលនៃជំងឺកូវីដ១៩ រាជរដ្ឋាភិបាលកម្ពុជាបានដាក់ចេញនូវវិធានការបង្ការ ទប់ស្កាត់ នឹងប្រយុទ្ធប្រឆាំងកូវីដ ១៩ ប្រកបដោយប្រសិទ្ធភាពខ្ពស់។
លោកបន្តថា ក្រសួងសុខាភិបាលបានធ្វើការយ៉ាងជិតស្និទ្ធ និងហ្មត់ចត់ដោយផ្ទាល់ជាមួយអង្គការសុខភាពពិភពលោក និងកំពុងបន្តផ្សព្វផ្សាយអប់រំស្តីពីជំងឺកូវីដ ១៩ នេះ ដល់ប្រជាជនទូទាំងប្រទេស ដើម្បីផ្តល់ចំណេះដឹងពីសុខភាពសាធារណៈលើការបង្ការខ្លួនឲ្យចៀសផុតពីការឆ្លង។
លោកបញ្ជាក់ថា៖ «ក្រសួងការងារ និងបណ្តុះបណ្តាលវិជ្ជាជីវៈបានចេញនូវសេចក្តីណែនាំបន្ថែមជាបន្តបន្ទាប់ ថែមទាំងបានចាត់ក្រុមការងារឱ្យចុះធ្វើសកម្មភាពផ្សព្វផ្សាយ និងបង្រៀនដល់រដ្ឋបាល ប្រធានក្រុម ប្រធានផ្នែករោងចក្រ សហគ្រាសពីវិធីបង្ការ ទប់ស្កាត់ និងប្រយុទ្ធប្រឆាំងជំងឺកូវីដ ១៩»។
លោក Graeme Buckley នាយកប្រចាំប្រទេសអង្គការអន្តរជាតិខាងការងារសម្រាប់ប្រទេសកម្ពុជា ថៃ និងឡាវបានថ្លែងតាមវីដេអូ Conference ពីទីក្រុងបាងកក ប្រទេស ថៃ ថាក្នុងអំឡុងពេលប៉ុន្មានខែចុងក្រោយនេះភាគីពាក់ព័ន្ធបានចូលរួមយ៉ាងសកម្មក្នុងការឆ្លើយតបទៅនឹងមេរោគកូវីដ ១៩ ជាពិសេសការចាត់វិធានការដោះស្រាយពីការគំរាមកំហែងដល់កម្មករនិយោជិតនៅតាមបណ្តារោងចក្រកាត់ដេរ។
លោកបន្តថា៖ «អង្គការ ILO រួមទាំងគម្រោងរោងចក្រកាន់តែប្រសើរនៅកម្ពុជា និងគម្រោងលើកកម្ពស់ស្តង់ដាសុខភាព និងសុវត្ថិភាពនៅកន្លែងការងាររបស់អង្គការ ILO នៅក្នុងប្រទេស កម្ពុជា ប្តេជ្ញាធ្វើការរួមគ្នាជាមួយភាគីពាក់ព័ន្ធទាំងអស់ ដើម្បីសម្រេចនូវចក្ខុវិស័យពិភពលោកដែលមានកន្លែងការងារកាន់តែមានសុខភាព និងសុវត្ថិភាព ប្រសើរឡើងសម្រាប់ប្រជាជនទាំងអស់»។
ជាមួយគ្នានេះដែរ រដ្ឋាភិបាលបានចេញសារាចរណែនាំមួយក្នុងន័យចូលរួមអបអរទិវាពលកម្មអន្តរជាតិ ១ ឧសភាដែលជាខួបលើកទី ១៣៤ ក្រោមប្រធានបទ «សន្តិភាព និងការងារសមរម្យ»។ ប៉ុន្តែដោយសារតែបច្ចុប្បន្នកម្ពុជាកំពុងប្រឈមជំងឺកូវីដ ១៩ រដ្ឋាភិបាលបានណែនាំឲ្យគ្រប់ស្ថាប័ន ជាពិសេសកម្មករនិយោជិតទាំងអស់ត្រូវចូលរួមរៀបចំរំឭកខួបអបអរទិវានេះ តាមរូបភាពនៃការឈប់សម្រាកតាមផ្ទះជាមួយក្រុមគ្រួសារ ឬកន្លែងស្នាក់នៅ។
សារាចរដដែលបានបន្តថា ក្រសួង និងស្ថាប័នពាក់ព័ន្ធរដ្ឋបាលរាជធានី ខេត្តទាំងអស់ត្រូវបន្តចូលរួមផ្សព្វផ្សាយ ណែនាំប្រជាពលរដ្ឋ ជាពិសេសកម្មករនិយោជិត និងពលករកម្ពុជាដែលវិលត្រឡប់មកស្រុកកំណើតឲ្យចូលរួមអនុវត្តឲ្យបានហ្មត់ចត់តាមការណែនាំរបស់ក្រសួងសុខាភិបាល និងក្រសួងការងារ ដើម្បីចូលរួមបង្ការ ទប់ស្កាត់ និងប្រយុទ្ធប្រឆាំងជំងឺកូវីដ ១៩ ទាំងអស់គ្នា។
រដ្ឋាភិបាលថ្លែងថា៖ «ទន្ទឹមនឹងនេះត្រូវបន្តធានារក្សាការពារសន្តិសុខ សុវត្ថិភាព សណ្តាប់ធ្នាប់សាធារណៈក្នុងឱកាសនៃការរំឭកខួបនៃទិវាពលកម្មអន្តរជាតិ ១ ឧសភា ឆ្នាំ ២០២០ នេះ»៕