ភ្នំពេញៈ ក្រសួងព័ត៌មាន កាលពីម្សិលមិញ បានបើកកិច្ចប្រជុំបិទទ្វារ ដើម្បីពិភាក្សាអំពីការផ្សព្វផ្សាយ «ព័ត៌មានក្លែងក្លាយ» នៅលើប្រព័ន្ធផ្សព្វផ្សាយសង្គម។ លោក អ៊ុក គឹមសេង អ្នកនាំពាក្យក្រសួងព័ត៌មានបានថ្លែងថា រដ្ឋមន្ត្រីក្រសួងព័ត៌មានលោក ខៀវ កាញារីទ្ធ បានដឹកនាំកិច្ចប្រជុំនេះ ប៉ុន្តែលោកបានបដិសេធបញ្ជាក់លម្អិតអំពីបញ្ហាដែលបានពិភាក្សានោះ។
លោក គឹមសេង ថ្លែងថា៖ «វាគ្រាន់តែជាការត្រូតពិនិត្យមើលថា តើយើងនឹងធ្វើអ្វីជាមួយការផ្សព្វផ្សាយព័ត៌មានក្លែងក្លាយនោះ។ លោករដ្ឋមន្ត្រីបានណែនាំយើងដោយគាត់ចង់ឱ្យយើងនិយាយអំពីការឆ្លើយតបទៅនឹងការផ្សព្វផ្សាយព័ត៌មានក្លែងក្លាយលើប្រព័ន្ធផ្សព្វផ្សាយសង្គម»។
លោក គឹមសេង បានបដិសេធថា ក្រុមមន្ត្រីកំពុងធ្វើសេចក្តីព្រាងច្បាប់ថ្មីលើបញ្ហានេះ ទោះបីជាក្រសួងបានបង្ហោះនៅលើទំព័រហ្វេសប៊ុករបស់ខ្លួនកាលពីម្សិលមិញថាមន្ត្រីកំពុងពិភាក្សាអំពីការត្រួតពិនិត្យឡើងវិញ«លើប្រកាសអន្តរក្រសួង»ក្តី។
លោកបានថ្លែងដែរថា ការពិភាក្សានេះគឺមិនទាក់ទងនឹងសេចក្តីព្រាង«ច្បាប់ប្រព័ន្ធផ្សព្វផ្សាយសង្គម»ទេ ដែលវាត្រូវបានប្រកាសដោយតំណាងរាស្ត្រគណបក្សប្រជាជនលោក ឈាង វ៉ុន កាលពីខែមុននោះទេ។
នៅពេលនោះលោក វ៉ុន បានថ្លែងថា ក្រុមអ្នកតាក់តែងច្បាប់កំពុងស្វែងរកការដាក់ទោសលើអ្នកប្រើប្រាស់ប្រព័ន្ធផ្សព្វផ្សាយសង្គមដែលកំពុង «វាយប្រហារបុគ្គលសាធារណៈដោយខុសច្បាប់និងគ្មានភ័ស្តុតាង»។
នៅពេលទាក់ទងកាលពីម្សិលមិញ លោក ឈាង វុន បានឆ្លើយថា៖« ខ្ញុំមិននិយាយជាមួយកាសែតភ្នំពេញប៉ុស្តិ៍ទេ»។
រដ្ឋមន្ត្រីក្រសួងព័ត៌មានលោក ខៀវ កាញារីទ្ធ មិនអាចទាក់ទងបានទេកាលពីម្សិលមិញ។ ដោយឡែក អ្នកនាំពាក្យក្រសួងមហាផ្ទៃលោក ខៀវ សុភ័គ បានថ្លែងថា លោកមិនមានព័ត៌មានអំពីច្បាប់ស្តីប្រព័ន្ធផ្សព្វផ្សាយសង្គមណាមួយទេពីព្រោះវា «មិនមែនជាការទទួលខុសត្រូវរបស់ខ្ញុំ»។
បញ្ហាស្តីអំពីការអត្ថាធិប្បាយតាមប្រព័ន្ធអនឡាញនេះ បានកើនឡើងខ្លាំងកាលពីឆ្នាំមុន ជាបញ្ហាមួយដែលធ្វើឲ្យនាយិកាមជ្ឈមណ្ឌលសិទ្ធិមនុស្សកម្ពុជាលោកស្រី ចក់ សុភាព បានហៅថាជាក្តីបារម្ភដ៏ជ្រាលជ្រៅ។
នៅក្នុងឧទាហរណ៍ថ្មីបំផុតមួយ គឺបុរសម្នាក់មកពីខេត្តកំពង់ចាម ត្រូវបានចាប់ខ្លួននៅថ្ងៃរៀបអាពាហ៍ពិពាហ៍របស់ខ្លួនកាលពីខែមុនពាក់ព័ន្ធនឹងការហៅរដ្ឋាភិបាលកម្ពុជាថា «ផ្តាច់ការ» នៅក្នុងឃ្លីបវីដេអូមួយដែលបង្ហោះលើហ្វេសប៊ុក។
បើតាមលោកស្រី សុភាព ពាក្យថា «ព័ត៌មានក្លែងក្លាយ» ជាញឹកញាប់ត្រូវបានប្រើដោយអ្នកនយោបាយទាំងនៅអាមេរិកនិងកម្ពុជាដើម្បីរារាំងការរិះគន់អំពីកំហុសរបស់ខ្លួន។ លោកស្រីថ្លែងតាមរយៈអ៊ីមែលថា៖ «ភាពខុសគ្នាសំខាន់នៅកម្ពុជាគឺថារដ្ឋាភិបាលមានអំណាចតាមដានមើលការរិះគន់»។
លោកស្រី សុភាព បន្ថែមថា ជាមួយនឹងការបិទបណ្តាញផ្សព្វផ្សាយព័ត៌មានឯករាជ្យដូចជាវិទ្យុអាស៊ីសេរីនិងកាសែតខេមបូឌាដេលី គឺប្រជាជនកម្ពុជាកាន់តែច្រើនឡើងៗ ហាក់ដូចជាងាកទៅរកប្រព័ន្ធ សង្គមវិញ ទាំងសម្រាប់ទទូលព័ត៌មាននិងជាវេទិកាការបញ្ចេញមតិផ្ទាល់ខ្លួន។ លោកស្រីថ្លែងថា ៖«ដូច្នេះហើយទើបមានការយកចិត្តទុកដាក់កាន់តែច្រើនឡើងទៅលើប្រព័ន្ធ អនឡាញគឺមិនមែនជារឿងភ្ញាក់ផ្អើលនោះទេ….» ។
លោកស្រី ក៏បានបញ្ជាក់ដែរថា រាល់ដំណើរការនីតិវិធីណាមួយ គួរតែត្រូវបានធ្វើឡើងប្រកបដោយតម្លាភាពនិងមានការចូលរួមពីសង្គមស៊ីវិលនិងសាធារណជន។
អ្នកជំនាញផ្នែកច្បាប់លោក យឿង សុធារ៉ា បានថ្លែងថា ច្បាប់ឬសេចក្តីប្រកាសថ្មីណាមួយត្រូវតែធ្វើតាមច្បាប់គោល ហើយនៅក្នុងករណីនេះគឺរដ្ឋធម្មនុញ្ញកម្ពុជា។
លោក សុធារ៉ា ថ្លែងថា៖«ជំពូក៣ស្តីអំពីសិទ្ធិសេរីភាពក្នុងការបញ្ចេញមតិ សេរីភាពនៃការបញ្ចេញមតិ ហើយសិទ្ធិនេះមិនអាចត្រូវបានគេរំលោភបានទេ»។
លោក Sutawan Chanprasert មន្ត្រីកម្មវិធីរបស់អង្គការ Asian Forum for Human Rights and Development ដែលមានមូលដ្ឋាននៅទីក្រុងបាងកកបានយល់ស្របថាពាក្យ «ព័ត៌មានក្លែងក្លាយ» គឺវាមានលក្ខណៈទូលំទូលាយណាស់ដែលវាអាចក្លាយជាឧបករណ៍នយោបាយបានយ៉ាងងាយប្រសិនបើច្បាប់នោះត្រូវបានអនុម័ត។
លោក Chanprasert បានបញ្ជាក់ថា៖« ស្ថានភាពនេះមើលទៅហាក់ដូចជាកំពុងកើនឡើងនិងកាន់តែធ្ងន់ទៅៗ ដោយសារការបោះឆ្នោតជាតិនឹងចូលមកដល់នាពេលខាងមុខហើយសម្រាប់រដ្ឋាភិបាលដើម្បីរក្សាអំណាចរបស់ខ្លួនផង»៕ NS