ភ្នំពេញៈ លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ និងមន្ត្រីជំនាញគ្រោងបើកកិច្ចប្រជុំមួយនៅថ្ងៃចន្ទនេះដើម្បីពិនិត្យលើសំណើសុំអនុគ្រោះទោសដល់ទណ្ឌិតចំនួន ២៥២ នាក់ (ស្រី ១៦ នាក់) នៅក្នុងឱកាសពិធីបុណ្យពិសាខបូជាក្នុងឆ្នាំ ២០១៩ នេះ។ យោងតាមហ្វេសប៊ុករបស់ក្រសួងយុត្តិធម៌កាលពីថ្ងៃទី ៤ ខែ ឧសភា។
ហ្វេសប៊ុកដដែលនេះបានឱ្យដឹងថា សំណើសុំអនុគ្រោះទោសត្រូវបានស្នើឡើងដោយគណៈកម្មការរាជធានី ខេត្ត (ពន្ធនាគាររាជធានី ខេត្ត) ចំនួន ២២ និងមណ្ឌលអប់រំកែប្រែចំនួន ៣ (ម១+ម៣+ម៤) ។លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ ប្រាប់ភ្នំពេញប៉ុស្តិ៍ថា នេះជាការអនុវត្តដែលធ្វើឡើងជាប្រក្រតី៣ដងក្នុងរយៈពេល ១ ឆ្នាំ។
លោក ជិន ម៉ាលីន បានបញ្ជាក់ថា៖ «សម្រាប់បុណ្យពិសាខបូជាខាងមុខហ្នឹង អ៊ីចឹងយើងធ្វើការពិនិត្យនូវសំណើដែលស្នើឡើងពីគណៈកម្មការថ្នាក់ខេត្តមុននឹងសម្រេចបញ្ជូនទៅរដ្ឋាភិបាលដើម្បីបញ្ជូនទៅព្រះករុណាបន្តទៀត»។
លោក ជិន ម៉ាលីន បានឲ្យដឹងទៀតថា ដើម្បីទទួលបានការបន្ធូរបន្ថយ និងលើកលែងទោសបាន ជាគោលការណ៍ច្បាប់ទណ្ឌិតត្រូវតែអនុវត្តទោសបានមួយចំនួននៅក្នុងពន្ធនាគារ មានន័យថា អ្នកដែលអនុវត្តទោសបាន ១ ភាគ ៣ អាចទទួលបានការបន្ទូរបន្ថយទោស ហើយអ្នកដែលអនុវត្តទោសបាន ២ ភាគ ៣ អាចទទួលបានការលើកលែងទោស។
ប៉ុន្តែនេះមិនមែនជាលក្ខខណ្ឌតែមួយទេ វាគួបផ្សំជាមួយនឹងលក្ខខណ្ឌនៃការកសាងកែប្រែក្នុងពន្ធនាគារទៀតដែលឆ្លងកាត់តាមការវាយតម្លៃតាំងពីក្រុមការងារក្នុងពន្ធនាគារ គណៈកម្មការថ្នាក់ខេត្តរហូតដល់គណៈកម្មការថ្នាក់ជាតិ។ សំខាន់គឺអ្នកដែលមានសាលក្រមស្ថាពរ មានន័យថាអ្នកក្លាយជាទណ្ឌិតត្រូវមានសាលក្រមស្ថាពរ។
ក្រសួងមហាផ្ទៃ អគ្គនាយកដ្ឋានពន្ធនាគារ ទីស្តីការគណៈរដ្ឋមន្ត្រី និងតំណាងអយ្យការតុលាការ នឹងចូលរួមពិនិត្យសំណើនេះផងដែរ។
លោក អំ សំអាត អ្នកស៊ើបអង្កេតជាន់ខ្ពស់អង្គការសិទិ្ធមនុស្សលីកាដូថ្លែងថា៖ «យើងចង់ឱ្យមានការពិនិត្យពិច័យឱ្យបានតម្លាភាពនិងយុត្តិធម៌ចំពោះទណ្ឌិតឬក៏ពិរុទ្ធជនដែលមានលក្ខខណ្ឌគ្រប់គ្រាន់ក្នុងការបន្ធូរបន្ថយនៃការលើកលែងទោសនោះហើយត្រូវតែទទួលបាននូវសិទ្ធិដូចគ្នាក្នុងការស្នើសុំ កុំឱ្យមានការរើសអើង ឬមានភាពមិនប្រក្រតីពីក្រោមមក»៕