.jpg)
លោក មាស ប៉ូ (ឆ្វេង) អ្នកនាំពាក្យក្រសួងប្រៃសណីយ៍ក្នុងសន្និសីទកាសែតពីថ្ងៃចន្ទ។ រូបថត រង្សី
ភ្នំពេញៈ ក្រសួងប្រៃសណីយ៍ និងទូរគមនាគមន៍បានបង្ហាញពីវឌ្ឍនភាពនៃការផ្សារភ្ជាប់ទំនាក់ទំនង សេវាកម្ម និងការងារផ្សេងៗបានល្អប្រសើរទៅដល់ប្រជាពលរដ្ឋនៅគ្រប់ទីកន្លែងទូទាំងប្រទេសតាមរយៈការអភិវឌ្ឍវិស័យប្រៃសណីយ៍ និងទូរគមនាគមន៍នៅកម្ពុជា។
លោក មាស ប៉ូ អនុរដ្ឋលេខាធិការ និងជាអ្នកនាំពាក្យក្រសួងនេះបានថ្លែងក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្តរបស់ក្រសួងប្រៃសណីយ៍ និងទូរគមនាគមន៍» ដែលរៀបចំដោយអង្គភាពអ្នកនាំពាក្យរាជរដ្ឋាភិបាលកាលពីថ្ងៃចន្ទនៅទីស្ដីការគណៈរដ្ឋមន្ដ្រីថារាល់សេវាទាំងអស់គ្រប់វិស័យត្រូវបានខិតឱ្យបានកាន់តែជិតកៀកនឹងប្រជាជនដែលសព្វថ្ងៃការបន្ថែមសេវាថ្មីៗបានជួយបង្កើនទំនុកចិត្ដរបស់ប្រជាជនលើការប្រើប្រាស់សេវាប្រៃសណីយ៍។ ចំពោះសេវាទូរគមនាគមន៍សម័យថ្មីនេះបានជួយជំរុញការលើកកម្ពស់សេដ្ឋកិច្ចដោយប្រជាជនគ្រប់រូបទទួលបានអត្ថប្រយោជន៍ ទោះពួកគាត់នៅទីណាក៏អាចទាក់ទងគ្នាបានយ៉ាងជិតស្និទ្ធតាមរយៈទូរស័ព្ទដៃដែរ។
លោកថ្លែងថា៖ «ជាពិសេសដោយសារទូរស័ព្ទដៃស្មាតហ្វូនដែលកំពុងពេញនិយមពីសំណាក់ស្រទាប់យុវវ័យ សិស្សនិស្សិត មន្ដ្រីរាជការ និយោជិត បុគ្គលិក ពលករ កម្មករ កម្មការិនី អាជីវករ បណ្ដាក្រុមហ៊ុនធ្វើធុរកិច្ចតូចធំ បានប្រើប្រាស់មធ្យោបាយទូរគមនាគមន៍បច្ចេកទេសទូរគមនាគមន៍ និងព័ត៌មានសម័យទំនើបនេះសម្រាប់បំពេញការងារបានរហ័សទាន់ពេលវេលា ដោះស្រាយជីវភាពរស់នៅផ្ញើប្រាក់ពីកន្លែងមួយទៅកន្លែងមួយទៀតបានទាន់ចិត្ដមានសុវត្ថិភាព»។
លោកលើកឡើងទៀតថា តាមរយៈវិស័យទូរគមនាគមន៍នេះ អ្នកសិក្សាអាចសិក្សាស្រាវជ្រាវ រៀនសូត្ររហូតដល់ការប្រកបអាជីវកម្មក៏បានផ្លាស់ប្ដូរពីលក្ខណៈប្រពៃណីបែរមកប្រើប្រាស់ប្រព័ន្ធសេវាអ៊ីនធឺណិត ដើម្បីដោះដូរ អីវ៉ាន់ លក់ទិញ ទំនិញ ដោយប្រើប្រាស់បច្ចេកវិទ្យាទំនើប នាពេលបច្ចុប្បន្ននេះ។ លោកបន្ដថាដូច្នេះហើយបានជាយើងសង្កេតឃើញថា ការអភិវឌ្ឍបច្ចេកវិទ្យាឌីជីថលបានកាត់បន្ថយគម្លាតពីទីក្រុង និងជនបទឱ្យខិតមកជិតគ្នា។
ពីមុននៅតាមជនបទសេវាទូរស័ព្ទពុំទាន់មានសមត្ថភាពគ្របដណ្ដប់ទូទាំងប្រទេសនៅឡើយ ភាគច្រើនអ្នកនៅទីប្រជុំជនមានអាទិភាពទទួលបានសេវាពេញលេញជាងអ្នកនៅជនបទ។ ប៉ុន្ដែឥឡូវបន្ទាប់ពីក្រសួងបានឱ្យមានបណ្ដាញខ្សែកាប្លិ៍អុបទិកទៅដល់ជនបទជាបណ្ដើរៗដោយបានកសាងហេដ្ឋារចនាសម្ព័ន្ធបង្កើតស្ថានីយអង់តែននៅតាមទីកន្លែងដែលពុំទាន់មានតាមរយៈមូលនិធិសេវាសកលដែលជាយន្តការជួយលើកទឹកចិត្ដដល់ប្រតិបត្ដិករទូរគមនាគមន៍ឲ្យហ៊ានវិនិយោគនៅតាមទីជនបទដោយការចំណាយរបស់ពួកគេអាចកាត់រំលស់ពីចំនួនវិភាគទាន ដែលពួកគេមានកាតព្វកិច្ចត្រូវបង់ទៅសេវាសកល (USO)។
លោក ប៉ូ បញ្ជាក់ថា៖ «យន្តការនេះបានផ្ដល់លទ្ធភាពឱ្យប្រជាពលរដ្ឋនៅតាមភូមិ ឃុំ ដែលពីមុនពុំទាន់មានសេវាអ៊ីនធឺណិតគឺពុំអាចទូទាត់ថ្លៃទំនិញ ឬលក់ទំនិញពួកគាត់បានឡើយ ទាល់តែពួកគាត់ធ្វើដំណើរទៅកាន់ទីកន្លែងនោះដោយផ្ទាល់ តែពេលនេះពួកគាត់ សហគមន៍គាត់មានសេវាផ្ញើ បើកប្រាក់នៅក្បែរលំនៅឋាន»។
លោកបានលើកឡើងថា កត្ដានេះបង្ហាញឱ្យឃើញថា ចាប់តាំងពីពេលដែលរាជរដ្ឋាភិបាលបានជំរុញការអភិវឌ្ឍឱ្យកាន់តែទំនើបនូវសេវាទូរគមនាគមន៍ និងព័ត៌មានបានផ្ដល់ឱកាសជូនដល់ប្រជាជនឲ្យចាប់ផ្ដើមស្គាល់ពីវិសាលភាពនៃការប្រើប្រាស់បច្ចេកវិទ្យាថ្មីនេះ និងក៏បានផ្លាស់ប្តូរស្ថានភាពគ្រួសារសហគមន៍ផងដែរ។
លោកលើកឡើងថា ពលរដ្ឋម្នាក់ៗកំពុងជាប់មមាញឹកចំពោះការប្រកបមុខរបររៀងៗខ្លួនដែលបានផ្លាស់ប្ដូរផ្នត់គំនិត បែរមកនិយមការប្រកួតប្រជែងតាមបែបទំនើប ទាំងការសិក្សា ការងារ ធុរកិច្ច បែបបច្ចេកវិទ្យាឌីជីថលវិញ។
គួរបញ្ជាក់ផងដែរថា បច្ចុប្បន្នរាជរដ្ឋាភិបាលកម្ពុជាកំពុងរៀបចំគោលនយោបាយជាតិដោយគ្រប់គ្រងរដ្ឋបាលប្រទេសជារដ្ឋាភិបាលឌីជីថល ក្នុងនោះក្រសួងប្រៃសណីយ៍ និងទូរគមនាគមន៍ ក៏ជាក្រសួងសមាជិក ក្នុងចំណោមក្រសួងពាក់ព័ន្ធនានាក្នុងការរៀបចំគោលនយោបាយឌីជីថលនេះផងដែរ៕
