ភ្នំពេញៈ ក្រសួងប្រៃសណីយ៍និងទូរគមនាគមន៍បានបង្កើតកម្មវិធីមួយក្នុងបំណងស្វែងរកស្ត្រីឆ្នើមផ្នែកបច្ចេកវិទ្យានិងដើម្បីក្លាយជាស្ដ្រីគំរូក្នុងការលើកទឹកចិត្តដល់ស្ដ្រីផ្សេងទៀតឱ្យស្វែងយល់អំពីការប្រើប្រាស់បច្ចេកវិទ្យា ខណៈការចុះឈ្មោះបេក្ខនារីដើម្បីចូលរួមប្រកួតប្រជែងបាននិងកំពុងដំណើរការចាប់ពីថ្ងៃទី ២៥ ខែមករា រហូតដល់ថ្ងៃទី ២៥ ខែកុម្ភៈ។
តាមកម្មវិធីក្រសួងដែលមានឈ្មោះថា «កម្មវិធីស្ដ្រីកម្ពុជាក្នុងវិស័យបច្ចេកវិទ្យាឆ្នាំ ២០១៩» នឹងស្វែងរកស្ដ្រីឆ្នើមចំនួន ៥ ប្រភេទដែលមានជំនាញខាងបច្ចេកវិទ្យា ដូចជា សហគ្រិនឆ្នើមស្ដ្រីក្នុងបច្ចេកវិទ្យា វិស្វករស្ដ្រីជោគជ័យក្នុងជំនាញបច្ចេកវិទ្យាគមនាគមន៍និងព័ត៌មាន (ICT) ស្ដ្រីដែលបានចូលរួមជំរុញនូវការប្រើប្រាស់បច្ចេកវិទ្យាសម្រាប់ការអភិវឌ្ឍសង្គមឬសហគមន៍ ស្ដ្រីដែលបង្កើតមាតិកាព័ត៌មានច្នៃប្រឌិត និងពន្លកថ្មីដែលជាស្ដ្រីមានវ័យក្រោមអាយុ ១៨ ឆ្នាំ។
លោកស្រី យិន ហួតអេលី ប្រធានការិយាល័យរដ្ឋបាលនៃអគ្គនាយកដ្ឋានបច្ចេកវិទ្យា គមនាគមន៍ និងព័ត៌មាននិងជាមន្ត្រីសម្របសម្រួលកម្មវិធីនេះបានប្រាប់កាសែតភ្នំពេញប៉ុស្ដិ៍ថា កម្មវិធីប្រកួតប្រជែងស្ដ្រីក្នុងវិស័យបច្ចេកវិទ្យាឆ្នាំនេះគឺចាប់ផ្ដើមធ្វើឡើងក្នុងឆ្នាំ ២០១៨ ហើយស្ដ្រីដែលចង់ចូលរួមប្រកួតសមត្ថភាពគ្នាក្នុងកម្មវិធីនេះបានមានដូចជា ស្ដ្រីដែលគិតថាខ្លួនមានលទ្ធភាពផលិតបង្កើតថ្មីៗដោយបង្ហោះនូវវីដេអូដែលទទួលបានការចាប់អារម្មណ៍ច្រើនឬជាស្ដ្រីដែលកំពុងត្រៀមខ្លួនដើម្បីប្រើប្រាស់ចំណេះដឹងផ្នែកបច្ចេកវិទ្យាជួយជំរុញឱ្យអាជីវកម្មរបស់ខ្លួនឱ្យកាន់តែរីកចម្រើន។
លោកស្រី បានបញ្ជាក់ថា៖ «ស្ដ្រីដែលគាត់ចូលរួមប្រជែងនេះគឺជាស្ដ្រី Role Model ដើម្បីជំរុញឱ្យស្ដ្រីផ្សេងៗទៀតដែលមិនហ៊ានចូលរួមប្រកួតឬក៏គិតថាខ្លួនឯងមិនទាន់សម័យកាលអ៊ីចឹង។ ចង់ឱ្យស្ដ្រីដែលគាត់ចូលរួមហ្នឹង គាត់ជួយជំរុញស្ដ្រីផ្សេងទៀតឱ្យក្លាយជាស្ដ្រីដែលអាចប្រើប្រាស់បច្ចេកវិទ្យាដែលអាចយល់ដឹងបច្ចេកវិទ្យាបានច្រើន។ គឺយើងចង់ឱ្យស្ដ្រីបញ្ចេញនូវស្នាដៃរបស់គាត់ឱ្យអស់លទ្ធភាព ព្រោះស្ដ្រីខ្លះគិតថាគាត់អត់អាចធ្វើបាន ព្រោះយល់ថារឿងបច្ចេកវិទ្យាគឺសម្រាប់តែបុរសទេ»។
លោកស្រីបន្ថែមថា បេក្ខនារីដែលចង់ចូលរួមប្រកួតគឺអាចចុះឈ្មោះនិងទទួលបានបន្ថែមតាមការតភ្ជាប់ http://cbrd.gov.kh/nominations ឬសារអេឡិចត្រូនិក info@cbrd.gov.kh ។
សេចក្ដីជូនព័ត៌មានក៏បានបញ្ជាក់ដែរថា ក្រសួងប្រៃសណីយ៍និងទូរគមនាគមន៍និងជ្រើសរើសដោយសម្រិតសម្រាំងនូវបេក្ខនារីទាំងអស់ដែលបានដាក់ប្រកួតហើយផ្ដល់ពានរង្វាន់
កិត្តិយសដល់ស្ដ្រីឆ្នើមនៅកម្មវិធីតាំងបង្ហាញបច្ចេកវិទ្យាដ៏ធំដំបូងមួយនៅកម្ពុជានៅថ្ងៃទី ១៥ ខែមីនា ឆ្នាំ ២០១៩។
លោកស្រី យិន ហួតអេលីបញ្ជាក់ទៀតថា៖ «តាមការអង្កេតរបស់ខ្ញុំ ស្ដ្រីវ័យចាប់ពី ៥០ ឆ្នាំចុះ គឺប្រហែល៨០ភាគរយប៉ុណ្ណោះដែលគាត់អាចប្រើបច្ចេកវិទ្យាបាន។ បច្ចេកវិទ្យាយើងកន្លែងនេះ មិនមែនទាក់ទងគាត់ចេះជួសជុលកុំព្យូទ័រ ចេះសរសេរកូដអីទេ បច្ចេកវិទ្យាក្នុងកម្មវិធីនេះ គឺគាត់អាចប្រើស្មាតហ្វូនប្រើអ៊ីនធឺណិតបាន អាហ្នឹងក៏ថា បច្ចេកវិទ្យាដែរ»៕