.jpg)
លោក សៅ សុភាព ពេលចូលរួមក្នុងកម្មវិធីនៅក្រសួងបរិស្ថានពីម្សិលមិញ។ ហេង ជីវ័ន
ភ្នំពេញៈ តំណាងក្រសួងបរិស្ថាន ក្រសួងអប់រំ យុវជន និងកីឡា ក្រសួងព័ត៌មាន និងក្រសួងទេសចរណ៍សហការជាមួយទីភ្នាក់ងារជំនួយអាមេរិក (USAID) កាលពីម្សិលមិញបានបើកយុទ្ធនាការ «ការពារព្រៃឡង់តាមរយៈការទាក់ទងផ្លាស់ប្ដូរឥរិយាបថសង្គម» ដោយផ្តោតលើបរិស្ថាន ដើម្បីការពារព្រៃឈើ និងសត្វព្រៃនៅកម្ពុជា។
តាមសេចក្ដីប្រកាសព័ត៌មានស្ដីពីការសម្ពោធជាផ្លូវការនូវយុទ្ធនាការនេះបានឱ្យដឹងថា ដោយទទួលស្គាល់ពីសារៈសំខាន់នៃព្រៃឈើក្នុងតំបន់ទេសភាពជីវចម្រុះសម្បូរបែបដែលបានមកពីព្រៃឈើ និងអត្ថប្រយោជន៍ព្រៃឈើដែលទ្រទ្រង់ជីវភាពរស់នៅ USAID និងក្រសួងពាក់ព័ន្ធសំខាន់ៗនៅកម្ពុជាបានព្រមព្រៀងសហការគ្នាលើកកម្ពស់ការចូលរួមរបស់សាធារណជនក្នុងការការពារព្រៃឈើ និងសត្វព្រៃតាមរយៈយុទ្ធនាការនេះបន្ថែមទៀត។
លោកស្រី វីណា រែដឌី នាយិកាបេសកកម្ម USAID បានថ្លែងថា យុទ្ធនាការនេះ បង្ហាញពីភាពជាដៃគូយូរអង្វែងរបស់ USAID ក្នុងវិស័យបរិស្ថាននៅកម្ពុជាក៏ដូចជាការបន្តការប្ដេជ្ញាចិត្តចំពោះការអភិរក្សជីវចម្រុះដ៏មានសារៈសំខាន់របស់កម្ពុជា។
លោកស្រីថា៖ «យើងសង្ឃឹមថា យុទ្ធនាការនេះនឹងជួយលើកទឹកចិត្ដប្រជាជនកម្ពុជាច្រើនថែមទៀតក្នុងចូលរួមការពារកេរដំណែលធម្មជាតិរបស់ខ្លួន»។
បើតាម USAID យុទ្ធនាការនេះគឺជាកិច្ចខិតខំប្រឹងប្រែងរួមគ្នារវាងគម្រោងអនាគតបៃតងកម្ពុជា USAID និងគម្រោងព្រៃឡង់បៃតង USAID ដើម្បីអភិរក្សតំបន់ទេសភាពព្រៃឡង់។ យុទ្ធនាការនេះមានគោលដៅលើកកម្ពស់ការយល់ដឹងអំពីមុខងារសំខាន់ៗនៃប្រព័ន្ធអេកូឡូស៊ី និងជីវចម្រុះរបស់ព្រៃឡង់ទៅដល់សាធារណជនក៏ដូចជាលើកកម្ពស់ការផ្លាស់ប្ដូរឥរិយាបថ និងសកម្មភាពជាវិជ្ជមានដែលមានតួនាទីពង្រឹង អភិរក្សជីវចម្រុះ និងការពារព្រៃឈើ។
លោក សៅ សុភាព រដ្ឋលេខាធិការក្រសួងបរិស្ថានដែលធ្វើជាអធិបតីនៃពិធីសម្ពោធយុទ្ធនាការនេះបានថ្លែងដែរថា ក្រសួងបរិស្ថានជឿថា យុទ្ធនាការនេះឆ្លើយតបនឹងការប្តេជ្ញាចិត្តរបស់រាជរដ្ឋាភិបាលលើការគ្រប់គ្រងព្រៃឈើ និងជីវចម្រុះ ប្រកបដោយចីរភាពដូចដែលមានចែងក្នុងច្បាប់រដ្ឋធម្មនុញ្ញស្តីពីការការពារបរិស្ថាន និងការគ្រប់គ្រងធនធានធម្មជាតិ។ ជាមួយនេះក៏ស្របនឹងយុទ្ធសាស្ត្រចតុកោណដំណាក់កាលទី៤ និងផែនការយុទ្ធសាស្ត្រអភិវឌ្ឍន៍ជាតិឆ្នាំ ២០១៩-២០២៣ ផងដែរ។
លោកថ្លែងថា៖ «ក្នុងបរិបទនេះយើងឃើញថា យុទ្ធនាការនេះគឺជាការបង្កើនកិច្ចខិតខំប្រឹងប្រែងរបស់យើងដើម្បីសម្រេចបាននូវការផ្លាស់ប្តូរឥរិយាបថដ៏មានន័យ និងការលើកកម្ពស់សកម្មភាពជាវិជ្ជមានឆ្ពោះទៅរកកិច្ចការពារព្រៃឈើ និងការអភិរក្សជីវចម្រុះនៅក្នុងប្រទេសរបស់យើង»។
លោកបានបញ្ជាក់ថា៖ «ខ្ញុំសង្ឃឹម និងជឿជាក់យ៉ាងមុតមាំថា គម្រោងនេះនឹងអាចជួយផ្តល់ព័ត៌មានផ្តល់ការអប់រំ និងទទួលបានការចូលរួមពីសំណាក់ប្រជាជនកម្ពុជាទាំងក្មេង និងចាស់ស្តីអំពីការការពារព្រៃឡង់ ហើយអ្វីដែលយើងទាំងអស់គ្នាចាំបាច់ត្រូវធ្វើនោះ គឺការពារបរិស្ថានដ៏ស្រស់ស្អាតរបស់យើងឱ្យគង់វង្ស»។
បើតាមលោក សៅ សុភាព ចាប់តាំងពីឆ្នាំ ២០១៥ មករាជរដ្ឋាភិបាលបានចេញអនុក្រឹត្យប្រគល់ភារកិច្ចឱ្យក្រសួងបរិស្ថានជាអ្នកគ្រប់គ្រងតំបន់អភិរក្ស។
ជាលទ្ធផលក្រសួងបានដាក់បញ្ចូលតំបន់ការពារធម្មជាតិចំនួន ៦៦ កន្លែង ដែលមានផ្ទៃដីសរុប ៧,២៥ លានហិកតា ស្មើនឹង ៤០ ភាគរយ នៃផ្ទៃដីប្រទេសកម្ពុជា គិតត្រឹមថ្ងៃទី ២០ ខែ ឧសភា ឆ្នាំ ២០២០៕
វីដេអូ៖
