ភ្នំពេញៈ ច្បាប់ចំនួន ៣ រួមមាន ច្បាប់ព្រៃឈើ ច្បាប់ជលផល និងច្បាប់តំបន់ការពារធម្មជាតិត្រូវបានក្រសួងមហាផ្ទៃ ក្រសួងបរិស្ថាន ក្រសួងកសិកម្មរុក្ខាប្រមាញ់ និង នេសាទរួមទាំងគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) សម្រេចជាគោលការណ៍ថានឹងស្នើធ្វើវិសោធនកម្មដើម្បីអនុវត្តឱ្យមានប្រសិទ្ធភាព។
ការសម្រេចបែបនេះបានធ្វើឡើងក្នុងពេលជួបពិភាក្សាគ្នារវាងស្ថាប័នទាំងនេះនៅក្រសួងមហាផ្ទៃកាលពីម្សិលមិញ បន្ទាប់ពីរដ្ឋមន្ត្រីក្រសួងមហាផ្ទៃបានរិះគន់ច្បាប់ព្រៃឈើ និងស្តីបន្ទោសមន្ត្រីជាន់ខ្ពស់ចំពោះការបណ្តោយឲ្យកើតបទល្មើសព្រៃឈើដែលខ្លះប្រើលេសសម្អាតអាងទំនប់វារីអគ្គិសនីទៅបំផ្លាញព្រៃឈើ។
លោក សក់ សេដ្ឋា រដ្ឋលេខាធិការក្រសួងមហាផ្ទៃបានថ្លែងប្រាប់ភ្នំពេញប៉ុស្តិ៍កាលពីម្សិលមិញថា ក្រសួងកសិកម្ម ក្រសួងបរិស្ថាន ក្រសួងមហាផ្ទៃ និងលេខាធិការដ្ឋានរបស់ (គ.ជ.អ.ប) បានឯកភាពគ្នាជាគោលការណ៍ថាធ្វើវិសោធនកម្មច្បាប់ទាំងនេះ។
លោកថា៖ «ព្រឹកមិញថ្នាក់ដឹកនាំបានឯកភាពយកច្បាប់ ៣ មកធ្វើវិសោធនកម្មរួមមាន៖ ច្បាប់ព្រៃឈើ ច្បាប់ជលផល និងច្បាប់តំបន់ការពារធម្មជាតិ។
ជាគោលការណ៍យើងបែងចែកសមត្ថកិច្ចរវាងក្រសួង ២ គឺក្រសួងកសិកម្ម និងក្រសួងបរិស្ថាន។ ទី ២ ការចែកសមត្ថកិច្ចរវាងថ្នាក់ជាតិ និងថ្នាក់ក្រោមជាតិដើម្បីឲ្យមានការចូលរួមពីរដ្ឋបាលថ្នាក់ក្រោមជាតិនៅក្នុងវិស័យព្រៃឈើ ជលផល និងការគ្រប់គ្រងតំបន់ធម្មជាតិ និងទី ៣ យើងពិនិត្យមើលឡើងវិញទំនាក់ទំនងរវាងមន្ត្រីនគរបាលយុត្តិធម៌ និងអ្នកពាក់ព័ន្ធ»។
យ៉ាងណាក្ដីបើតាមលោក សក់ សេដ្ឋា នៅមានដំណាក់កាលច្រើនទៀត ក្នុងនោះមានការពិនិត្យពីក្រុមបច្ចេកទេសដើម្បីរៀបចំជាសេចក្តីព្រាងជាក់ស្តែង ការរៀបចំឲ្យមានវេទិកាពិគ្រោះយោបល់ជាសាធារណៈ ការបញ្ជូនទៅគណៈរដ្ឋមន្ត្រី និងសភាជាតិដើម្បីអនុម័ត។
លោកបានបន្ថែមថា៖ «ជាបទពិសោធកន្លងមកក្នុងការធ្វើវិសោធនកម្មច្បាប់មួយ យើងត្រូវការពេលរាប់ខែដែរ ហើយច្បាប់នេះមានរហូតដល់ទៅ ៣ ដូច្នេះយើងអាចប្រើពេលរហូតដល់ ៥ ទៅ ៦ ខែឯណោះ...»។
លោកបន្តថាការធ្វើវិសោធនកម្មច្បាប់ទាំង ៣ នេះគឺដើម្បីឱ្យស៊ីគ្នាជាមួយច្បាប់ថ្មីៗពាក់ព័ន្ធជាមួយវិមជ្ឈការ និងវិសហមជ្ឈការច្បាប់រៀបចំអង្គការ ច្បាប់ក្រមព្រហ្មទណ្ឌទាក់ទងនឹងទោសទណ្ឌ...ជាដើម។
អតីតតំណាងរាស្ត្រអតីតគណបក្សសង្គ្រោះជាតិលោក អ៊ូ ច័ន្ទរ័ត្ន បានគាំទ្រការធ្វើវិសោធនកម្មច្បាប់ទាំង ៣ នេះដោយលោកសង្ឃឹមថានឹងអាចផ្តល់អំណាចទៅមន្ត្រីថា្នក់ក្រោមជាតិដើម្បីជួយការពារព្រៃឈើ និងធនធានធម្មជាតិក្នុងដំណាក់កាលចុងក្រោយនៃការហិនហោចនេះ។
លោកថា៖ «យើងមើលឃើញកន្លងមកមិនមានប្រសិទ្ធភាពទេ ដោយសារគ្មានអ្នកតាមដានការអនុវត្តរបស់រដ្ឋបាលព្រៃឈើ ទោះបីជាគាត់ឃុបឃិតជាមួយឈ្មួញ និងប្រព្រឹត្តអំពើពុករលួយនៅតាមតំបន់នីមួយៗក្ដី។ ខ្ញុំគិតថាវានឹងមានប្រសិទ្ធភាពជាងមុន ក៏ប៉ុន្តែរហូតទល់ពេលនេះវាសឹងតែហួសពេលទៅហើយ ដោយសារព្រៃឈើយើងវាចង់ហិនហោច និងវិនាសទៅហើយ ហើយបើវិធានការនេះមានប្រសិទ្ធភាព វាអាចជួយទប់ស្កាត់ការហិនហោចចុងក្រោយ»។
ទន្ទឹមនឹងនោះ លោកឧបនាយករដ្ឋមន្ត្រី ស ខេង ក៏ធ្លាប់បានរិះគន់ច្បាប់ព្រៃឈើផងដែរចំពោះការមិនផ្តល់អំណាចឱ្យអាជ្ញាធរដែនដីដែលជាផ្នែកមួយធ្វើឱ្យការងារបង្ក្រាបពុំមានប្រសិទ្ធភាព៕