.jpg)
លោក ខៀវ កាញារីទ្ធ (ស្តាំ) និងលោក ប៉ាន សូរស័ក្តិ។ រូបថត ក្រសួងព័ត៌មាន
ភ្នំពេញៈ ក្រសួងពាណិជ្ជកម្ម និងក្រសួងព័ត៌មានបានចេញប្រកាសអន្តរក្រសួងស្តីពីការគ្រប់គ្រងការចុះបញ្ជីពាណិជ្ជកម្ម និងកិច្ចការពារម៉ាក និងពាណិជ្ជនាម សម្រាប់អាជ្ញាបណ្ណលើវិស័យព័ត៌មាន និងសោតទស្សន៍ ដោយទុករយៈពេលឲ្យ ៦ ខែ ដើម្បីឲ្យរូបវន្តបុគ្គល ឬនីតិបុគ្គល ដែលបានធ្វើអាជីវកម្ម ឬសេវាកម្មនេះ ចុះបញ្ជីនៅក្រសួងពាណិជ្ជកម្ម។
ប្រកាសអន្តរក្រសួងដែលចុះហត្ថលេខារួមគ្នា ដោយលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន នៅថ្ងៃទី ២៨ សីហា និងទើបត្រូវបានផ្សព្វផ្សាយនៅថ្ងៃទី ១ ខែកញ្ញា បានឲ្យដឹងថា ប្រកាសនេះមានគោលបំណងគ្រប់គ្រងការចុះបញ្ជីពាណិជ្ជកម្មសម្រាប់អាជ្ញាបណ្ណលើវិស័យព័ត៌មាន និងសោតទស្សន៍។
បន្ថែមពីនេះ ប្រកាសនេះក៏មានខ្លឹមសារឲ្យស្ថាប័នទាំងនេះ ស្នើសុំចុះបញ្ជីម៉ាក ឬពាណិជ្ជនាម ក្នុងគោលបំណងដើម្បីធានាអត្តសញ្ញាណនៃអង្គភាពនីមួយៗ មិនឲ្យជាន់លើអត្តសញ្ញាណនៃអង្គភាពដទៃទៀត ក្នុងន័យការពារការប្រកួតប្រជែងមិនស្មោះត្រង់ផងដែរ។
ប្រកាសអន្តរក្រសួងដែលមាន ៦ ជំពូក និង ១៤ មាត្រានេះ បានឲ្យដឹងទៀតថា គ្រប់រូបវន្តបុគ្គល ឬនីតិបុគ្គលទាំងអស់ នឹងមិនអនុញ្ញាតឲ្យប្រើប្រាស់ម៉ាក និងពាណិជ្ជនាម ដែលបណ្តាលឲ្យប៉ះពាល់ដល់សណ្តាប់ធ្នាប់ជាសាធារណៈ សីលធម៌សង្គម ឬប្រពៃណីល្អរបស់ជាតិ និងម៉ាកដែលមិនអាចចុះបញ្ជីបាននោះទេ។
ប្រកាសបញ្ជាក់ថា៖ «រាល់រូបវន្តបុគ្គល ឬនីតិបុគ្គលដែលបានធ្វើអាជីវកម្ម ឬសេវាកម្មលើវិស័យព័ត៌មាន និងសោតទស្សន៍ ត្រូវស្នើសុំចុះបញ្ជីពាណិជ្ជកម្ម និងអាចស្នើសុំចុះបញ្ជីម៉ាក និងពាណិជ្ជនាម នៅក្រសួងពាណិជ្ជកម្ម ក្នុងរយៈពេល ៦ខែ គិតចាប់ពីថ្ងៃចុះហត្ថលេខាតទៅ។ បើមានការចាំបាច់ ក្រសួងពាណិជ្ជកម្ម អាចសម្រេចបន្តរយៈពេលនេះ បានចំនួន ៦ ខែទៀត»។
លោក មាស សុភ័ណ្ឌ អ្នកនាំពាក្យក្រសួងព័ត៌មាន បានប្រាប់ភ្នំពេញប៉ុស្តិ៍នៅថ្ងៃទី ១ ខែកញ្ញា ថា ប្រកាសអន្តរក្រសួងនេះនឹងអាចចូលរួមដោះស្រាយបញ្ហាដែលធ្លាប់កើតមានឡើង ដែលបណ្តាលឲ្យស្ថាប័នសារព័ត៌មាន និងសោតទស្សន៍មួយចំនួន តែងកើតមានជុំវិញបញ្ហាម៉ាក ពាណិជ្ជនាម ដែលមានភាពស្រដៀងគ្នា។
លោកបន្តថា ការសម្រេចរបស់ក្រសួងក្នុងពេលនេះ គឺមិនមែនជាការដាក់សម្ពាធ ឬបន្ទុកបន្ថែមទៅដល់ស្ថាប័នទាំងនេះនោះទេ គឺក្នុងន័យលើកទឹកចិត្តដល់ស្ថាប័នទាំងនោះ ឲ្យមានការចូលរួមបន្ថែមទៀត ដើម្បីការពារភាពត្រឹមត្រូវរបស់ខ្លួនតាមផ្លូវច្បាប់ប៉ុណ្ណោះ។
លោកបញ្ជាក់ថា៖ «គោលបំណង់នៃប្រកាសរួមនេះ គឺចង់លើកទឹកចិត្តឲ្យស្ថាប័នដែលបានចុះបញ្ជីនៅក្រសួងព័ត៌មាន គាត់ត្រូវបានទទួលនូវការការពារដោយច្បាប់ នៃការប្រើប្រាស់ពាណិជ្ជនាម និងបញ្ជីម៉ាកនៅក្នុងវិស័យសារព័ត៌មានរបស់គាត់ ដើម្បីកុំឲ្យមានវិវាទនៃការប្រើប្រាស់ឈ្មោះ ឬផ្លាកសញ្ញានៃអង្គភាពមួយៗទៅថ្ងៃក្រោយ»។
បើតាម លោក មាស សុភ័ណ្ឌ គិតត្រឹមឆមាសទី១ ឆ្នាំ ២០២០ នេះ ក្រសួងបានទទួលការចុះបញ្ជី ពីកាសែតចំនួន ៤៥២ អង្គភាព ទស្សនាវដ្តីចំនួន ១៩៦ អង្គភាព ព្រឹត្តិបត្រចំនួន ២២ អង្គភាព គេហទំព័រ និង TV Online ចំនួន ៦២១ អង្គភាព ស្ថានីយវិទ្យុចំនួន ២២១ អង្គភាព និងទូរទស្សន៍សរុបចំនួន ២៣៩ អង្គភាព។
លោក លាង ដឺលុច នាយកប្រតិបត្តិសារព័ត៌មានអនឡាញថ្មីៗ គាំទ្រចំពោះចំណាត់ការនេះ ដោយលោកថ្លែងថា វាមានសារសំខាន់ដល់ស្ថាប័នព័ត៌មានទាំងអស់ ដោយមានការការពារដោយច្បាប់ បើទោះបីជាត្រូវជាប់កាតព្វកិច្ចមួយចំនួនក៏ដោយ។ លោកបន្ថែមថា ក្រៅពីទទួលបានការការពារដោយច្បាប់ វិធានការណ៍នេះ ក៏បានជួយការពារផលប្រយោជន៍ទាំងក្រុមហ៊ុន និងប្រយោជន៍សាធារណៈទៀតផង។
លោកបញ្ជាក់ថា៖ «ឲ្យតែមានការលួច ចម្លង ឬលួចបន្លំម៉ាកយីហោអីហ្នឹង គឺវាប៉ះពាល់ខ្លាំងមែនទែន។ ដូចជាយើង ធ្វើការវិជ្ជាជីវៈ គឺជារឿងមួយ តែសារព័ត៌មានដែលមានម៉ាកប្រហែលគ្នា ប៉ុន្តែជាក្រុមហ៊ុនមិនចុះបញ្ជី ហើយគ្មានវិជ្ជាជីវៈ នោះវាប៉ះពាល់ដល់ស្ថាប័នយើង ដែលមានការយល់ច្រឡំ ហើយទម្រាំតែមានការរកឃើញ គឺបានប៉ះពាល់ដល់ស្ថាប័នត្រឹមត្រូវរួចមកហើយ។ លើសពីហ្នឹង គឺបានប៉ះពាល់ដល់ប្រយោជន៍សាធារណៈ ដែលបានផ្សាយព័ត៌មានមិនត្រឹមត្រូវ»។
លោក ដឺលិច បានប្រាប់ពីសារប្រយោជន៍ដែលក្រុមហ៊ុនរបស់លោក ទទួលបានពីការគោរពតាមច្បាប់ត្រឹមត្រូវ គឺមិនត្រឹមតែជួយការពារស្ថាប័នរបស់លោក ពីការលួចបន្លំនោះទេ គឺថែមទាំងជួយការពារដល់ទំនុកចិត្តដល់ដៃគូសហការណ៍របស់លោក ឲ្យមានភាពជឿជាក់ លើស្ថាប័នរបស់លោក ដែលគ្រប់ស្ថាប័នព័ត៌មាន គួរតែត្រូវបានចុះបញ្ជី និងគោរពតាមច្បាប់ឲ្យបានត្រឹមត្រូវ៕
