ភ្នំពេញៈ ក្រសួងពាណិជ្ជកម្មទុកពេល ៣០ ថ្ងៃឲ្យក្រុមហ៊ុននាំចូលចែកចាយ និងផ្គត់ផ្គង់ផលិតផលសម្រាប់ចិញ្ចឹមទារក និងកុមារទាំងអស់អនុវត្តតាមខ្លឹមសារ និងបំពេញតាមលក្ខខណ្ឌច្បាប់ ហើយក្នុងករណីមិនបំពេញតាមការណែនាំក្រសួងនឹងចាត់វិធានការផ្អាកជាបណ្តោះអាសន្ននូវការចរាចរ និងដកហូតផលិតផលទាំងនោះ។
ការព្រមានយ៉ាងដូច្នេះបន្ទាប់ពីក្រសួងពាណិជ្ជកម្មបានសង្កេតឃើញថា ក្នុងរយៈពេលកន្លងមកនេះការចរាចរផលិតផលមួយចំនួន សម្រាប់ចិញ្ចឹមទារក និងកុមារនៅលើទីផ្សារនៅកម្ពុជា គឺមិនបានអនុវត្តតាមខ្លឹមសារនៃអនុក្រឹត្យឆ្នាំ ២០០៥ ស្តីពីការផ្សព្វផ្សាយលក់ផលិតផល សម្រាប់ចិញ្ចឹមទារក និងកុមារ និងប្រកាសឆ្នាំ ២០០៧ ស្តីពីការអនុវត្តអនុក្រឹត្យស្តីការផ្សព្វផ្សាយលក់ផលិតផលសម្រាប់ចិញ្ចឹមទារក និងកុមារនោះទេ។
ក្រសួងពាណិជ្ជកម្មបានឲ្យដឹងនៅក្នុងសេចក្តីជូនដំណឹងដែលបានផ្សព្វផ្សាយកាលពីម្សិលមិញថា ដោយម្ចាស់ក្រុមហ៊ុនប្រកបអាជីវកម្មនាំចូល ចែកចាយ និងផ្គត់ផ្គង់ ផលិតផលសម្រាប់ចិញ្ចឹមទារក និងកុមារទាំងនោះមិនទាន់បំពេញកាតព្វកិច្ចរបស់ខ្លួននៅលើសម្បកវេចខ្ចប់ជាប់នឹងផលិតផលរបស់ខ្លួន ដូចជា ការបង្ហាញណែនាំវិធីប្រើផលិតផលជាភាសាខ្មែរ និងជាពិសេសពាក្យថា «គ្មានអ្វីប្រសើរជាងការបំបៅកូនដោយទឹកដោះម្តាយតែមួយមុខគត់រហូតបាន ៦ ខែ និងបន្តការបំបៅដោះម្តាយរហូតបានអាយុ ២ ឆ្នាំ» ឬលើសឡើយ។
ដើម្បីលើកទឹកចិត្តឱ្យមានការបំបៅកូនដោយទឹកដោះម្តាយ និងការធ្វើពាណិជ្ជកម្មដោយសុចរិត ក្រសួងពាណិជ្ជកម្មសូមណែនាំដល់ក្រុមហ៊ុនធ្វើអាជីវកម្មនាំចូលចែកចាយ និងផ្គត់ផ្គង់ផលិតផលសម្រាប់ចិញ្ចឹមទារក និងកុមារទាំងអស់ត្រូវអនុវត្តឱ្យបានត្រឹមត្រូវតាមខ្លឹមសារច្បាប់ និងឯកសារគតិយុត្តដែលកំពុងមានជាធរមាននៅកម្ពុជា។
ក្រសួងបញ្ជាក់ថា៖ «ក្នុងរយៈពេល ៣០ ថ្ងៃ បន្ទាប់ពីថ្ងៃចេញសេចក្តីជូនដំណឹងនេះប្រសិនបើមន្ត្រីនៃអគ្គនាយកដ្ឋាន ក.ប.ប. នៃក្រសួងពាណិជ្ជកម្ម រកឃើញផលិតផលសម្រាប់ចិញ្ចឹមទារក និងកុមារប្រភេទណាមួយមិនបានអនុវត្តតាមខ្លឹមសារ ឬមិនបានបំពេញតាមលក្ខខណ្ឌតម្រូវផ្សេងៗទៀត មន្ត្រីអគ្គនាយកដ្ឋាន ក.ប.ប នៃក្រសួងពាណិជ្ជកម្ម នឹងចាត់វិធានការផ្អាកជាបណ្តោះអាសន្ននូវការចរាចរ និងដកហូតចេញពីទីផ្សារ ឬអនុវត្តនីតិវិធីផ្សេងៗទៀត ដោយអនុលោមតាមច្បាប់ស្តីពីការគ្រប់គ្រងគុណភាព សុវត្ថិភាព លើផលិតផលទំនិញ និងសេវាច្បាប់ស្តីពីកិច្ចការពារអ្នកប្រើប្រាស់ និងបទប្បញ្ញត្តិជាធរមានផ្សេងៗទៀតដោយមិនលើកលែង»។
បន្ថែមពីនេះក្រសួងពាណិជ្ជកម្មក៏ប្រកាសនឹងបន្តសកម្មភាពការងាររបស់ខ្លួន ដោយឈរលើអាណត្តិការងារតាមតួនាទី និងភារកិច្ចដោយសង្ឃឹមជឿជាក់យ៉ាងមុតមាំលើកិច្ចសហការពីគ្រប់ភាគីពាក់ព័ន្ធក្នុងការជំរុញការអនុវត្តច្បាប់ និងលិខិតបទដ្ឋានគតិយុត្តនានាឱ្យប្រព្រឹត្តទៅបានល្អប្រសើរ និងដើម្បីផលប្រយោជន៍សម្រាប់សង្គមជាតិទាំងមូល។
យោងតាមឧបសម្ព័ន្ធ ១ នៃលក្ខខណ្ឌតម្រូវមួយចំនួនដែលមានចែងក្នុងអនុក្រឹត្យឆ្នាំ ២០០៥ បានប្បញ្ញត្តិថា ចំពោះផលិតផលសម្រាប់ចិញ្ចឹមទារក និងកុមារទាំងអស់ដែលអាចចរាចរនៅក្នុងប្រទេសកម្ពុជាបានគឺត្រូវមានលិខិតអនុញ្ញាតត្រូវមានស្លាកសញ្ញាត្រឹមត្រូវ ដែលបង្ហាញជាអក្សរខ្មែរ ដោយអាចអានបានត្រូវមានអាសយដ្ឋានក្រុមហ៊ុនផលិតច្បាស់លាស់ ត្រូវមានកាលបរិច្ឆេទផុតកំណត់ និងតារាងធាតុផ្សំ រួមទាំងតារាងអាហារូបត្ថម្ភ និងការណែនាំពីរបៀបប្រើប្រាស់។
ឧបសម្ព័ន្ធ ១ ដដែលក៏បានបញ្ញត្តិដែរថា សម្រាប់ទឹកដោះគោម្សៅសម្រាប់ចិញ្ចឹមទារក និងកុមារ ត្រូវតែមានបង្ហាញពីអាយុកុមារ និងទារកដែលអាចប្រើប្រាស់បាន និងផលប៉ះពាល់ទៅលើអ្នកប្រើប្រាស់ រួមទាំងបង្ហាញនូវសារអប់រំក្នុងន័យជំរុញឲ្យមានការបំបៅដោះកូនដោយទឹកដោះ។
ដោយឡែកចំពោះដបបំបៅ ក្បាលដោះជ័រ និងប្រដាប់ជញ្ជក់លេងសម្រាប់ទារក និងកុមារ ត្រូវតែមានសារណែនាំអំពីការប្រើប្រាស់ឲ្យបានត្រឹមត្រូវជាពិសេសខ្លឹមសារដែលមានសារៈសំខាន់ក្នុងន័យជំរុញឲ្យអាណាព្យាបាលចូលរួមបំបៅដោះកូនដោយទឹកដោះម្តាយ។
លោក វាសនា ដែលជាបុគ្គលិកផ្នែកគ្រប់គ្រងនៅក្នុងក្រុមហ៊ុនលក់ផលិតផលសម្រាប់ទារក និងកុមារមួយសុំមិនបញ្ចេញឈ្មោះក្រុមហ៊ុនបានសាទរចំពោះចំណាត់ការរបស់ក្រសួងដោយថ្លែងថា ក្រុមហ៊ុនរបស់លោកបានអនុវត្តយ៉ាងត្រឹមត្រូវរាល់សេចក្តីណែនាំ និងលិខិតបទដ្ឋាននានា ដើម្បីចរាចរផលិតផលសម្រាប់ទារក និងកុមារ ខណៈនៅលើទីផ្សារជាក់ស្តែង ពិតជាមានការចរាចរនូវផលិតផលទាំងនេះដោយមិនបានត្រឹមត្រូវពិតមែន។
លោកបន្តថា ការដែលនាំចូល ចែកចាយផលិតផលទាំងនេះ ដោយមិនបានឆ្លងកាត់ការត្រួតពិនិត្យបានត្រឹមត្រូវ គឺមិនត្រឹមតែមានគ្រោះថ្នាក់ដល់ទារក និងកុមារនោះទេ ក៏បានធ្វើឲ្យប៉ះពាល់ដល់ការប្រកួតប្រជែងរបស់ក្រុមហ៊ុនមួយចំនួនដែលបានអនុវត្តយ៉ាងល្អតាមច្បាប់ផងដែរ។
លោកបញ្ជាក់ថា៖ «ទាក់ទងនឹងផលិតផលផ្សេងៗដែលគេយកមកមិនស្របច្បាប់ ឬគ្មានស្តង់ដា គួរតែអនុវត្តតាមគោលការណ៍របស់ក្រសួង ខណៈផលិតផលដែលនាំចូលមិនត្រឹមត្រូវអាចមានតម្លៃថោកជាង។ ចំពោះមតិយោបល់ខ្ញុំវិញ ខ្ញុំគិតថា ការជ្រើសរើសផលិតផលក្នុងទីផ្សារសម្រាប់កូនៗរបស់ពលរដ្ឋគឺនៅមានកម្រិតនៅឡើយ ដែលខ្ញុំសង្ឃឹមថា នៅពេលឆាប់ៗខាងមុខនេះ ពួកគាត់នឹងមិនគិតទៅលើតម្លៃរបស់ផលិតផលនោះទេ គឺសំខាន់គុណភាពរបស់ផលិតផល និងត្រូវទទួលការប្រឹក្សាយោបល់ឲ្យបានត្រឹមត្រូវ»៕