The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ព័ត៌មាន​នៅ​មាន​បញ្ហា​ប្រឈម​ក្នុង​ការ​អនុវត្ត​ការងារ

ក្រសួង​ព័ត៌មាន​នៅ​មាន​បញ្ហា​ប្រឈម​ក្នុង​ការ​អនុវត្ត​ការងារ

សន្និបាត​បូក​សរុប​ការងារ​របស់​ក្រសួង​ព័ត៌មាន​កាលពី​ម្សិលមិញ។
សន្និបាត​បូក​សរុប​ការងារ​របស់​ក្រសួង​ព័ត៌មាន​កាលពី​ម្សិលមិញ។ ផា លីណា

ក្រសួង​ព័ត៌មាន​នៅ​មាន​បញ្ហា​ប្រឈម​ក្នុង​ការ​អនុវត្ត​ការងារ

ភ្នំពេញៈ មន្ត្រី​អគ្គនាយកដ្ឋាន​នៅ​ក្រសួង​ព័ត៌មាន​កាលពី​ម្សិលមិញ​បាន​បង្ហាញ​ពី​បញ្ហា​ប្រឈម​របស់​ខ្លួន​ក្នុង​ការ​បំពេញ​ការងារ​ឱ្យ​មាន​ប្រសិទ្ធភាព​ដោយសារ​ខ្វះ​មន្ត្រី​ជំនាញ ខ្វះ​ថវិកា និង​ស្នើ​ឱ្យ​លោក​រដ្ឋមន្ត្រី​ ខៀវ កាញារីទ្ធ ជំរុញ​ទៅ​រដ្ឋាភិបាល​ក្នុង​ការ​ផ្តល់​កញ្ចប់​ថវិកា​បន្ថែម​ទៀត​ដើម្បី​ទ្រទ្រង់​វិស័យ​ព័ត៌មាន។

តាម​របាយការណ៍​ក្នុង​សន្និបាត​បូក​សរុប​ការងារ​វិស័យ​ព័ត៌មាន និង​សោតទស្សន៍​ឆ្នាំ ២០១៥ និង​ទិសដៅ​ការងារ​សម្រាប់​អនុវត្ត​ឆ្នាំ ២០១៦ ដែល​ធ្វើ​ឡើង​នៅ​ក្រសួង​ព័ត៌មាន​បាន​លើក​ឡើង​ថា​ទន្ទឹម​នឹង​ការ​យក​ចិត្ត​ទុក​ដាក់​ពង្រឹង​ពង្រីក​វិសាលភាព គុណភាព​នៃ​ការ​ផ្សព្វផ្សាយ​ក្រសួង​ក៏​កំពុង​ជួប​បញ្ហា​ប្រឈម​លើ​ការ​​គ្រប់គ្រង​អង្គភាព​ចំណុះ​ទាំងអស់​ក្នុង​ឆ្នាំ ២០១៥ បើ​ទោះ​ជា​ក្រសួង​បាន​រៀបចំ​ប្រឡង​ជ្រើសរើស​ក្របខ័ណ្ឌ​ថ្មី​ចំនួន​ ៧១ នាក់​បន្ថែម​ទៀត​ក្តី។

របាយការណ៍​បន្ត​ថា​ទោះ​ជា​យ៉ាង​ណា​នៅ​ខ្វះ​មន្ត្រី​សម្រាប់​ធ្វើការ​ដដែល​ពោល​គឺ​ខ្វះ​អ្នក​មាន​ឆន្ទៈ​ និង​ជំនាញ​ការងារ​តែ​ក៏​លើស​មន្ត្រី​ដែល​​ខ្វះ​សមត្ថភាព និង​មិន​​ទាន់​មាន​ជំនាញ​ពិត​ផង​ដែរ។

របាយការណ៍​បាន​សង្កត់​ធ្ងន់​ថា​ «មន្ត្រី​ក្មេងៗ​មួយ​ចំនួន​ដែល​បាន​តាំង​ស៊ប់​ក្នុង​ក្របខ័ណ្ឌ​ហើយ​ហាក់​ដូចជា​គ្រាន់​តែ​មក​ផ្ញើ​ក្នុង​ក្របខ័ណ្ឌ​របស់​ក្រសួង​តែ​ទៅ​ធ្វើការ​កន្លែង​ផ្សេង»។

ក្នុង​របាយការណ៍​នេះ​បាន​លើក​ឡើង​ពី​បញ្ហា​ប្រឈម​ដែល​រួម​មាន​កង្វះ​ថវិកា​សម្រាប់​ស្តារ​កែ​លម្អ​ប្រព័ន្ធ​បរិក្ខារ​ផ្សាយ​គ្មាន​គ្រឹះស្ថាន​សិក្សា​ក្នុង​ប្រទេស​សម្រាប់​បណ្តុះ​បណ្តាល​លើ​វិស័យ​ប្រព័ន្ធ​ផ្សាយ​ Digital គឺជា​ឧបសគ្គ​ដល់​អ្នក​ជំនាន់​ថ្មី​សម្រាប់​យុគសម័យ Digital ដែល​នឹង​មក​ដល់​នៅ​ឆ្នាំ ២០២០។

របាយការណ៍​បន្ត​ថា​ «កង្វះ​ទីតាំង​ធ្វើ​ការងារ​សម្រាប់​អ្នក​បម្រើ​ការងារ​ជំនាញ​បន្ទប់​កាត់ត​ថ្មី​របស់​អ្នក​សារព័ត៌មាន​ជាពិសេស​កម្លាំង​អ្នក​ជំនាញ​ទទក​ចូល​និវត្តន៍​ជា​បន្ត​បន្ទាប់​តែ​អ្នក​បន្ត​វេន​នៅ​មាន​កម្រិត​លើ​ជំនាញ​អេឡិចត្រូនិក និង​ម៉ាស៊ីន​ផ្សាយ»។

ទាក់ទង​នឹង​របាយការណ៍​នេះ​អគ្គនាយក​នៃ​អគ្គនាយកដ្ឋាន​ព័ត៌មាន​ និង​សោតទស្សន៍​លោក ផុស សុវណ្ណ ថ្លែង​នៅលើ​វេទិកា​ថា​ដោយ​ឃើញ​បញ្ហា​នេះ​ហើយ​អគ្គនាយកដ្ឋាន​ទាំង​អស់​ខ្វះខាត​ជាង​គេ​គឺ​ថវិកា និង​សម្ភារបរិក្ខារ​ដើម្បី​អភិវឌ្ឍ​អង្គភាព​របស់​ខ្លួន​ឱ្យ​ប្រសើរ។

លោក​ថា៖ «ពី​ឆ្នាំ​នេះ​តទៅ​ខ្ញុំ​សូម​សំណូមពរ​ដល់​ឯកឧត្តម​រដ្ឋមន្ត្រី​បង្កើន​កញ្ចប់​ថវិការ​បស់​ក្រសួង​ព័ត៌មាន​ដែល​បច្ចុប្បន្ន​មាន ១៥ លាន​ដុល្លារ​ក្នុង ១ ឆ្នាំ​ឱ្យ​កើន​ដល់ ៤០ លាន​ដុល្លារ​ក្នុង ១ ឆ្នាំ​ទើប​ក្រសួង​មាន​លទ្ធភាព​អភិវឌ្ឍ និង​ធ្វើការ​កែ​ទម្រង់​ការងារ​ប្រព័ន្ធ​ផ្សព្វផ្សាយ​របស់​យើង​បាន»។

លោក​បាន​បន្ត​ថា​បច្ចុប្បន្ន​អគ្គនាយកដ្ឋាន​របស់​លោក​មាន​ទិសដៅ​ការងារ​ច្រើន​ដែល​បាន​លើក​ឡើង​ប៉ុន្តែ​ដោយសារ​ខ្វះខាត​ថវិកា​ធ្វើ​ឱ្យ​រាំង​ខ្ទប់​ការងារ និង​គម្រោង​ពុំ​បាន​ឈាន​ទៅ​មុខ​នោះ​ទេ។

នៅក្នុង​ពិធី​នោះ​ក៏​មាន​ប្រធាន​មន្ទីរ​ព័ត៌មាន​ខេត្ត​ និង​អគ្គនាយកដ្ឋាន​មួយ​ចំនួន​បាន​លើក​ឡើង​ពី​កង្វះ​ថវិកា​ក្នុង​ការ​ចេញ​ទៅ​បំពេញ​បេសកកម្ម​នៅ​ក្រៅ​ប្រទេស​ដែល​ជា​បញ្ហា​ប្រឈម​មួយ​ផង​ដែរ។

រដ្ឋមន្ត្រី​ក្រសួង​ព័ត៌មាន​លោក ខៀវ កាញារីទ្ធ ពុំ​បាន​ឆ្លើយតប​ទាក់ទង​នឹង​សំណើ​សុំ​បន្ថែម​ថវិកា​នោះ​ទេ​ប៉ុន្តែ​លោក​ថា​នឹង​ទិញ​សម្ភារ​ថ្មីៗ​រួមមាន​កៅអី និង​កុំព្យូរទ័រ​ជូន​ទីភ្នាក់ងារ​ព័ត៌មាន AKP ដើម្បី​ធ្វើ​ព័ត៌មាន​ឱ្យ​កាន់​តែ​មាន​ប្រសិទ្ធភាព។

លោក​ថា​ «មន្ត្រី​ថ្មី​ឱ្យ​តែ​ចូល AKP គាត់​មាន​លេស​គេចវេះ​មិន​ចង់​ធ្វើការ​គ្រាន់តែ​ឃើញ​កៅអី​ខ្ពើម​អង្គុយ​ព្រោះ​ចាស់​​ពេក​កៅអី​តាំង​ពី​ឆ្នាំ ១៩៧៩ ​អ៊ីចឹង​មន្ត្រី​អស់​សង្ឃឹម​ទើប​​ទិញ​ថ្មី​ឱ្យ​តាមពិត​មន្ត្រី​ដែល​ពូកែ​បំផុត​ត្រូវ​ធ្វើការ​នៅ AKP ព្រោះ​ជា​ប្រភព​ធំ»។

អ្នក​នាំពាក្យ​ក្រសួង​ព័ត៌មាន​លោក អ៊ុក គឹមសេង ប្រាប់​ភ្នំពេញ​ប៉ុស្តិ៍​តាម​ទូរស័ព្ទ​ដោយ​សុំ​មិន​អត្ថាធិប្បាយ​ជុំវិញ​សំណើ​សុំ​បង្កើន​កញ្ចប់​ថវិកា​នេះ​ទេ។

យ៉ាង​ណា​ក៏ដោយ​លោក​បាន​ឱ្យ​ដឹង​ថា​រដ្ឋមន្ត្រី​ក្រសួង​បាន​ដាក់​ផែនការ​បណ្តុះ​បណ្តាល​ដល់​អ្នក​ខ្វះ​ជំនាញ​ទៅ​តាម​អគ្គនាយកដ្ឋាន​ដើម្បី​បង្កើន​ប្រសិទ្ធភាព​ការងារ។

លោក​ថា «យើង​បាន​រៀបចំ​អស់​ហើយ​អ៊ីចឹង​មន្ទីរ​ព័ត៌មាន​ទូទាំង​ប្រទេស​អាច​បញ្ជូន​មន្ត្រី​មក​រៀនសូត្រ​តាម​ប្រភេទ​នៃ​ការងារ​របស់​គាត់»។ លោក​មិន​អាច​ប្រាប់​ពី​ចំនួន​បុគ្គលិក​ដែល​កំពុង​ធ្វើការ​នៅ​ក្រសួង​ព័ត៌មាន​បាន​ទេ​ដោយសារ​គ្មាន​តួលេខ​នៅ​ក្នុង​ដៃ។

បើ​តាម​របាយការណ៍​ក្រសួង​ព័ត៌មាន​បាន​ដាក់​ទិសដៅ​សម្រាប់​ឆ្នាំ​ ២០១៦ ដោយ​ជំរុញ​ឱ្យ​មាន​ការ​ផលិត​ និង​ផ្សព្វផ្សាយ​ប្រកប​ដោយ​គុណភាព​ជុំវិញ​កម្មវិធី​ការ​អប់រំ កម្សាន្ត សំខាន់​គឺ​សិល្បៈ វប្បធម៌​ជាតិ​ មាន ល្ខោន យីកេ និង​អាយ៉ៃ​ជាដើម។ បណ្តុះ​បណ្តាល​មន្ត្រី​ទាំង​បច្ចេកទេស​ទាំង​ផលិត​គ្រប់គ្រង និង​បង្កើន​កិច្ចសហប្រតិបត្តិការ​ជាមួយ​បណ្តា​ទូរទស្សន៍​ចិន កូរ៉េ វៀតណាម ជប៉ុន និង​ប្រទេស​ថៃ៕

អត្ថបទគួរចាប់អារម្មណ៍