ភ្នំពេញៈ ក្រសួងព័ត៌មានកាលពីថ្ងៃពុធម្សិលមិញបានបង្ហាញពីគណនីហ្វេសប៊ុក និងគេហទំព័រហ្វេសប៊ុកចំនួន ៤៧ ដែលកំពុងផ្សព្វផ្សាយព័ត៌មានមិនពិតអំពីការឆ្លងជំងឺកូវីដ ១៩ ដោយមានចេតនាដើម្បីបង្កាច់បង្ខូចឈ្មោះរាជរដ្ឋាភិបាល និងបង្កឱ្យពលរដ្ឋមានការភ័យខ្លាច និងបានព្រមានចាត់វិធានការប្រសិនបើគណនីហ្វេសប៊ុក និងគេហទំព័រទាំងនេះមិនព្រមធ្វើការកែប្រែ។
សេចក្ដីប្រកាសព័ត៌មានរបស់អគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មានស្ដីពី «ការផ្សព្វផ្សាយព័ត៌មានមិនពិតតាមបណ្ដាញប្រព័ន្ធផ្សព្វផ្សាយអំពីការឆ្លងជំងឺកូវីដ ១៩ បានបញ្ជាក់ថា៖ «ទន្ទឹមនឹងការខិតខំប្រឹងប្រែងរបស់ក្រសួងសុខាភិបាល ក្រសួង ស្ថាប័នពាក់ព័ន្ធសាធារណជន និងអ្នកសារព័ត៌មានក្នុងការប្រយុទ្ធនឹងជំងឺកូវីដ ១៩ ក៏មានអ្នកប្រើប្រាស់បណ្ដាញសង្គមមួយចំនួនបែរជាបង្កើតព័ត៌មានមិនពិតក្នុងចេតនាបន្លំ បំភ្លៃ បំភាន់ បង្វែរស្ថានការណ៍ដើម្បីបង្កាច់បង្ខូចឈ្មោះរាជរដ្ឋាភិបាលកម្ពុជា និងបង្កឱ្យប្រជាពលរដ្ឋមានការភ័យខ្លាច»។
ក្រសួងព័ត៌មានបានអំពាវនាវដល់សាធារណជនទាំងអស់ឲ្យតាមដានព័ត៌មាននៅក្នុងគេហទំព័រហ្វេសប៊ុកផ្លូវការរបស់ក្រសួងសុខាភិបាល ឬគេហទំព័រហ្វេសប៊ុកផ្លូវការរបស់នាយកដ្ឋានប្រយុទ្ធនឹងជំងឺឆ្លង និងគេហទំព័រហ្វេសប៊ុកផ្លូវការរបស់ក្រសួងស្ថាប័នពាក់ព័ន្ធ ដើម្បីស្វែងយល់ និងទទួលបានព័ត៌មានពិតទាក់ទងនឹងជំងឺកូវីដ ១៩ នេះ។
ក្រសួងព័ត៌មានបានបង្ហាញគណនីហ្វេសប៊ុក (Facebook Account) ចំនួន ២៥ និងទំព័រហ្វេសប៊ុក (Facebook Page) ចំនួន ២២ ដែលផ្សព្វផ្សាយព័ត៌មានមិនពិតនោះរួមមាន គេហទំព័រហ្វេសប៊ុកឈ្មោះ កាមទេព លឹម ហុង, Romnea William Monyreach, Seng Ratana, Hun Kosal, Sdam Husen, សេដាសម័យតេជោ ខេត្ដស្វាយរៀង, Chm Chn, Sophea Rachana, Preab Sor, ចាន់ ចក្រី, Soung Sophorn, Rin Roth, និង Sadad Samathy។ ចំណែកគណនីហ្វេសប៊ុករួមមាន ព័ត៌មានពិតពីកម្ពុជា, ជនអនាមិក, មាឃ ម៉ិច, សំរ៉ាកការ សំរ៉ាកការ, កាមទេព លឹម ហុង, Chan Rina, Dara Meng, Ir Channa, Vibol Mao, Vichet Chan, Rin Roth, the Cambodia Daily Khmer, Ch7HD News, Sovannara Som, Klork Kheab, Chhun Vean Khmer, Sovannara Som, News Fast ជាដើម។
លោក ផុស សុវណ្ណ ប្រតិភូរាជរដ្ឋាភិបាលទទួលបន្ទុកអគ្គនាយកព័ត៌មាន និងសោតទស្សន៍នៃក្រសួងព័ត៌មានបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា ក្នុងចំណោមគណនីហ្វេសប៊ុក និងទំព័រហ្វេសប៊ុកទាំងអស់ខាងលើនេះបានផ្សព្វផ្សាយព័ត៌មានមិនពិតពីជំងឺកូវីដ ១៩ និងផ្សព្វផ្សាយព័ត៌មានដោយគ្មានប្រភពត្រឹមត្រូវ ហើយគណនីហ្វេសប៊ុក និងទំព័រហ្វេសប៊ុកទាំងនេះមួយចំនួនក្រុមការងារក្រសួងបានប្រាប់ឱ្យធ្វើការកែប្រែ និងមួយចំនួនទៀតកំពុងដាក់ក្នុងការត្រួតពិនិត្យបន្ត។ លោកបន្តថា៖ «យើងចាំមើលប្រហែល ១ សប្ដាហ៍ទៀតប្រសិនបើម្ចាស់គណនី និងគេហទំព័រខាងលើមិនមានការកែប្រែទេ យើងនឹងចាត់ការទៅក្រសួងពាក់ព័ន្ធដើម្បីមានចំណាត់ការបន្តទៀត»។
ក្លិបអ្នកកាសែតកម្ពុជា (CCJ) កាលថ្ងៃពុធម្សិលមិញបានចេញសេចក្ដីអំពាវនាវចំពោះអ្នកសារព័ត៌មានអំពីការផ្សព្វផ្សាយព័ត៌មានលើករណីជំងឺកូវីដ ១៩ នេះក្រោយយល់ឃើញថាសារព័ត៌មានបាននិងកំពុងដើរតួនាទីយ៉ាងសំខាន់ក្នុងការផ្តល់ព័ត៌មានពិតជូនប្រជាពលរដ្ឋ និងដោយយល់ឃើញថា បញ្ហាកូវីដ ១៩ ជារឿងសំខាន់មួយដែលទាមទារឱ្យគ្រប់ភាគីពាក់ព័ន្ធក៏ដូចជាប្រជាពលរដ្ឋម្នាក់ៗចូលរួមក្នុងការបង្ការ ទប់ស្កាត់ និងប្រយុទ្ធប្រឆាំងកុំឱ្យមានការរីករាលដាលទៅក្នុងសហគមន៍ក៏ដូចជាដើម្បីបញ្ចៀសការរើសអើង។
CJ បានអំពាវនាវដល់អ្នកសារព័ត៌មានទាំងអស់ដែលកំពុងប្រកបអាជីពវិជ្ជាជីវៈក្នុងប្រទេសកម្ពុជាយកចិត្តទុកដាក់ចំពោះចំណុចសំខាន់ៗមួយចំនួនដូចជា សូមធ្វើសេចក្តីរាយការណ៍ព័ត៌មានពាក់ព័ន្ធនឹងបញ្ហាកូវីដ ១៩ ប្រកបដោយភាពច្បាស់លាស់ស្របតាមបច្ចេកទេសផ្នែកវេជ្ជសាស្ត្រ ដោយសំអាងទៅលើការពន្យល់របស់អ្នកជំនាញ ឬលើការស្រាវជ្រាវឯកសារតាមលក្ខណៈវិទ្យាសាស្ត្រឱ្យបានត្រឹមត្រូវ ដើម្បីចៀសវាងការផ្តល់ព័ត៌មានមិនច្បាស់លាស់ធ្វើឱ្យប្រជាពលរដ្ឋមានការភាន់ច្រឡំអំពីកូវីដ ១៩។
សូមប្រកាន់ក្រមសីលធម៌វិជ្ជាជីវឱ្យបានខ្ពស់បំផុតក្នុងការគោរពសិទ្ធិឯកជនរបស់អ្នកដែលឆ្លងវីរុសកូរ៉ូណាដោយមិនត្រូវបញ្ចេញអត្តសញ្ញាណរបស់ពួកគេជាដាច់ខាតមិនថាអ្នកនោះជាជនបរទេស ឬខ្មែរនោះឡើយលើកលែងតែអ្នកនោះជាបុគ្គលសាធារណៈសំខាន់ៗដែលក្រសួងសុខាភិបាលប្រកាសជាផ្លូវការ ឬសាមីខ្លួនផ្ទាល់ជាអ្នកប្រកាសជាសាធារណៈ។ សូមធ្វើសេចក្តីរាយការណ៍ពាក់ព័ន្ធនឹងករណីអ្នកឆ្លងវីរុសកូរ៉ូណាដោយចៀសវាងការប្រើពាក្យពេចន៍ ឬសំនួនវោហារណា ដែលនាំឱ្យមានការបែងចែក ឬការរើសអើងចំពោះបុគ្គល ឬសហគមន៍ណាមួយ។
CCJ សង្ឃឹមថា៖ «អ្នកសារព័ត៌មានទាំងអស់នឹងប្រើប្រាស់តួនាទីរបស់ខ្លួនប្រកបដោយការទទួលខុសត្រូវទាំងចំពោះមុខក្រមសីលធម៌វិជ្ជាជីវៈសារព័ត៌មានផង និងចំពោះបទដ្ឋានបច្ចេកទេសផ្នែកវេជ្ជសាស្ត្រផងដើម្បីធានាថា សារព័ត៌មានបានបំពេញតួនាទីយ៉ាងល្អក្នុងការផ្តល់ព័ត៌មានពិតឥតក្លែងបន្លំ និងគ្មានការរើសអើង ដើម្បីជាប្រយោជន៍ដល់សាធារណជនទូទៅក៏ដូចជាប្រយោជន៍សម្រាប់សង្គមទាំងមូល»៕