.jpg)
លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មានវិទ្យា និងសោតទស្សន៍នៃក្រសួងព័ត៌មាន ថ្លែងនាពេលកន្លងមក។ ហុង មិនា
ភ្នំពេញៈ ក្រសួងព័ត៌មានបានរកឃើញប្រភពព័ត៌មាននានា ដោយបានផ្សព្វផ្សាយព័ត៌មានមិនពិត និងដំណឹងក្លែងក្លាយ ញុះញង់ រិះគន់ និងជេរប្រមាថថ្នាក់ដឹកនាំ និងព្រះមហាក្សត្រចំនួន ១ ៣៤៣ ករណី ក្នុងឆ្នាំ ២០២០ ក្នុងនោះបានលុបអាជ្ញាប័ណ្ណប្រព័ន្ធផ្សព្វផ្សាយចំនួន ៣ ដែលផ្សាយបំពានច្បាប់ធ្ងន់ធ្ងរ។ នេះបើតាមលោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មានវិទ្យា និងសោតទស្សន៍នៃក្រសួងព័ត៌មាន។
លោក ផុស សុវណ្ណ ថ្លែងនៅក្នុងសិក្ខាសាលាស្ដីពីការប្រើប្រាស់អ៊ីនធឺណិតប្រកបដោយសុវត្ថិភាពក្នុងអំឡុងពេលនៃការរីករាលដាលជំងឺកូវីដ ១៩ កាលពីម្សិលមិញថា ក្នុងជាង ១ ពាន់ករណីនេះ មាន ១០៣ ប្រភព សកម្មក្នុងការផ្សព្វផ្សាយព័ត៌មានមិនពិត ដំណឹងក្លែងក្លាយ ញុះញង់ រិះគន់ ជេរប្រមាថថ្នាក់ដឹកនាំ និងព្រះមហាក្សត្រ។
លោកថ្លែងថា៖ «គណនីបណ្ដាញទំនាក់ទំនងសង្គមដែលផ្សព្វផ្សាយព័ត៌មានមិនពិត ដែលមានឈ្មោះចុះបញ្ជីត្រឹមត្រូវ គឺយើងប្រាប់ឱ្យធ្វើការកែតម្រូវ ឬដកព័ត៌មាននោះចេញ។ គណនីបណ្ដាញទំនាក់ទំនងសង្គមដែលគ្មានការចុះបញ្ជីផ្លូវការត្រឹមត្រូវយើងបានបញ្ជូនទៅក្រសួងមហាផ្ទៃ ឬស្ថាប័នពាក់ព័ន្ធដើម្បីធ្វើការពិនិត្យស្រាវជ្រាវចាត់ការតាមច្បាប់»។
បើតាមរបាយការណ៍ គណៈកម្មការតាមដានការផ្សព្វផ្សាយព័ត៌មានក្លែងក្លាយនៃក្រសួងព័ត៌មានបានឱ្យដឹងថា ក្នុងករណីទាំងនោះ ក្រុមការងាររបស់ក្រសួងព័ត៌មានបានជូនដំណឹងឱ្យកែតម្រូវចំនួន ៤៩ ករណី។ ប្រគល់ឱ្យអគ្គស្នងការនគរបាលជាតិចាត់វិធានការចំនួន ៣៦ ករណី។ ប្រគល់ទៅនិយតករទូរគមនាគមន៍កម្ពុជាចំនួន ២ ករណីបានបិទគេហទំព័រ។ ប្រគល់ជូនក្រុមហ៊ុនហ្វេសប៊ុក ៨ ករណី ក្នុងនោះបានលុបមាតិកាចំនួន ១ និងបិទគណនីចំនួន ២។ កាលពីឆ្នាំមុននេះអគ្គស្នងការនគរបាលជាតិបានឃាត់ខ្លួនបុគ្គល ២ រូបដែលបង្ហោះសារប្រមាថថ្នាក់ដឹកនាំ និងបង្កចលាចលក្នុងសង្គមគឺឈ្មោះ ណី ណាក់ ម្ចាស់គេហទំព័រហ្វេសប៊ុក IMan-KH និងឈ្មោះ ងិន ស៊ុយទ្រី ម្ចាស់គណនីហ្វេសប៊ុកជាច្រើនមានដូចជា Bong Seyha, Try Seangmey ជាដើម។
លោក សុវណ្ណ ក៏បានអញ្ជើញប្រព័ន្ធផ្សព្វផ្សាយដែលមិនគោរពក្រមសីលធម៌វិជ្ជាជីវៈសារព័ត៌មានមកអប់រំចំនួន ២ អង្គភាពដែរ គឺអង្គភាព K01 និងអង្គភាពផែនដីថ្មី (PDT-News) និងបានលុបអាជ្ញាប័ណ្ណប្រព័ន្ធផ្សព្វផ្សាយបំពានច្បាប់ធ្ងន់ធ្ងរចំនួន ៣ គឺអង្គភាព គេហទំព័រចក្រវាឡ ធីវីអនឡាញ, គេហទំព័រ TVFB និងគេហទំព័រ និងវិទ្យុរិទ្ធិសែន។
លោក សុវណ្ណ បញ្ជាក់ថា ការរីកចម្រើនលើវិស័យបច្ចេកវិទ្យា ប្រព័ន្ធផ្សព្វផ្សាយបានចូលរួមយ៉ាងសកម្មក្នុងការពង្រីកការតភ្ជាប់ទំនាក់ទំនងរបស់មនុស្សជាតិ និងបានផ្តល់អត្ថប្រយោជន៍ជាច្រើនដល់ប្រតិបត្តិករ សោតទស្សន៍ និងម្ចាស់ប្រព័ន្ធផ្សព្វផ្សាយនានា។ ប៉ុន្តែបច្ចេកវិទ្យាទំនើបនេះក៏បានធ្វើឱ្យការផ្សព្វផ្សាយ និងការចែករំលែកព័ត៌មានមិនពិត ឬដំណឹងក្លែងក្លាយបានកាន់តែលឿនជាងពេលមុនទ្វេដង ហើយបង្កផលប៉ះពាល់យ៉ាងធំធេងដល់ការសម្រេចចិត្តរបស់ប្រជាពលរដ្ឋក្នុងការរស់នៅប្រចាំថ្ងៃ និងបង្កឱ្យអត់សណ្តាប់ធ្នាប់សង្គមផងដែរ។
លោក ណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) សង្កេតឃើញការអនុវត្ដច្បាប់របស់សមត្ថកិច្ចចំពោះអ្នកសារព័ត៌មានក្នុងឆ្នាំ ២០២០ មានសភាពរឹតតែធ្ងន់ធ្ងរដែលឈានដល់ការបិទសិទ្ធិសេរីភាពរបស់អ្នកសារព័ត៌មានក្នុងការអនុវត្ដតួនាទីរបស់ខ្លួន។ លោកថ្លែងថា៖ «កាលពីឆ្នាំមុននេះ យើងសង្កេតឃើញអ្នកសារព័ត៌មានជាច្រើនត្រូវបានប្រឈមមុខចំពោះតុលាការ ក្រោយពេលពួកគេអនុវត្ដសិទ្ធិរបស់ពួកគេ»។
ក្នុងឆ្នាំ ២០២០ សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) បានទទួលបណ្តឹង និងជួយអន្តរាគមន៍ដោះស្រាយបណ្តឹងលើអ្នកកាសែតកម្ពុជាចំនួន ៣៣ ករណី ដែលបណ្តឹងទាំងនោះមិនសូវផ្អែកទៅលើច្បាប់ស្តីពីរបបសារព័ត៌មាននោះទេ គឺជារឿងវិវាទដីធ្លី។ ស.ស.ស.ក អះអាងថា កម្ពុជាគ្មានចំណុចព្រួយបារម្ភពីសេរីភាពសារព័ត៌មានឡើយ។ នេះបើយោងតាមរបាយការណ៍ ស.ស.ស.ក ចុះថ្ងៃទី ១១ ខែមករា៕
