.jpg)
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន។ រូបថត ហ៊ាន រង្សី
ភ្នំពេញៈ ក្រសួងព័ត៌មានគ្រោងបញ្ជូនមន្ដ្រីបច្ចេកទេសរបស់ខ្លួនទៅបណ្ដុះបណ្ដាលបន្ថែមនៅបណ្ដាប្រទេសជាមិត្ដដែលជឿនលឿនផ្នែកបច្ចេកវិទ្យាព័ត៌មានដើម្បីបង្កើនសមត្ថភាពមន្ដ្រីក្នុងក្រសួងព័ត៌មាន និងអភិវឌ្ឍប្រព័ន្ធផ្សព្វផ្សាយរបស់ជាតិឱ្យដើរទាន់និន្នាការឌីជីថល។
លោក ផុស សុវណ្ណ ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មានថ្លែងកាលពីម្សិលមិញថា៖ «ឯកឧត្ដមរដ្ឋមន្ត្រីធ្លាប់បានលើកឡើងចំពោះការរៀបចំហេដ្ឋារចនាសម្ព័ន្ធទូរទស្សន៍ឌីជីថលទៅថ្ងៃអនាគត ដូច្នេះយើងត្រូវការកម្លាំងច្រើន ហើយពាក់ព័ន្ធនឹងធនធានមនុស្សនេះកន្លងទៅខាងទូរទស្សន៍ជាតិ ទទក គាត់បានលើកពីបញ្ហាចោទច្រើនជាងគេថាមន្ដ្រីដែលមានជំនាញបានចូលនិវត្ដន៍អស់ហើយចំណែកមន្ដ្រីក្មេងៗជំនាន់ក្រោយសមត្ថភាពពួកគាត់នៅមានកម្រិត។ ដូចដឹងស្រាប់ហើយប្រទេសយើងការបណ្ដុះបណ្ដាលខាងផ្នែកបច្ចេកទេស បច្ចេកវិទ្យានៅមានកម្រិតនៅឡើយ»។
លោក ផុស សុវណ្ណ បញ្ជាក់ថា រដ្ឋមន្ដ្រីក្រសួងព័ត៌មានធ្លាប់បានឲ្យដឹងថា លើកក្រោយក្រសួងព័ត៌មាននឹងជ្រើសរើសមន្ដ្រីផ្នែកខាងបច្ចេកទេសច្រើន និងជ្រើសរើសមន្ដ្រីដែលទើបប្រឡងបញ្ចប់មធ្យមសិក្សាដើម្បីក្រសួងអាចបញ្ជូនពួកគាត់ទៅរៀនបន្តតាមជំនាញបច្ចេកទេសដែលក្រសួងត្រូវការតែម្តង។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានថ្លែងក្នុងពេលប្រារព្ធទិវានារីអន្តរជាតិ ៨ មីនាលើកទី ១០៩ កាលពីថ្ងៃទី ១១ ខែមីនានេះនៅភោជនីយដ្ឋានទន្លេបាសាក់ ២ ថា បច្ចុប្បន្នវិស័យព័ត៌មាននៅបណ្តាប្រទេសផ្សេងៗមានការជឿនលឿនហើយប្រទេសខ្លះមានបច្ចេកទេស និងសមត្ថភាពខ្ពស់ក្នុងការគ្រប់គ្រងប្រព័ន្ធបច្ចេកទេសបានយ៉ាងល្អប្រសើរ។ ដូច្នេះកម្ពុជាត្រូវតែបញ្ជូនមន្ត្រីជំនាញទៅសិក្សារៀនសូត្រពីគេ។
លោករដ្ឋមន្ដ្រីថ្លែងថា៖ «ម្សិលមិញពេលទៅជួបជាមួយទូតជប៉ុន ក៏ខ្ញុំបាននិយាយរំឭកគាត់ ជាពិសេសទុកឱកាសឱ្យខាងទូរទស្សន៍ជាតិកម្ពុជា ដើម្បីទៅរៀននៅក្រុមហ៊ុន Sony និងក្រុមហ៊ុនបច្ចេកវិទ្យាធំៗផ្សេងទៀត ដើម្បីឱ្យគេជួយបង្ហាត់អំពីការងារឌីជីថល និងការងាររៀបចំឆាករៀបចំកម្មវិធី»។
លោករដ្ឋមន្ត្រីបានថ្លែងថា បច្ចុប្បន្នក្រសួងព័ត៌មានបានភ្ជាប់កិច្ចសហការជាមួយបណ្តាប្រទេសជាច្រើនក្នុងនោះក្រៅពីការផ្លាស់ប្តូរព័ត៌មានគ្នាទៅវិញ-ទៅមកក៏មានផ្លាស់ប្ដូរទស្សនកិច្ចសិក្សា និងបញ្ជូនមន្ត្រីជំនាញទៅសិក្សារៀនសូត្រពីបច្ចេកទេសផ្សព្វផ្សាយ ផលិតព័ត៌មានជាដើម។
លោក ខៀវ កាញារីទ្ធ បញ្ជាក់ថា «ទទក» នឹងដំឡើងបច្ចេកវិទ្យាឌីជីថលចាប់ពីឆ្នាំ ២០២១ ហើយនឹងបំបែកចេញជា ៣ ប៉ុស្តិ៍បន្ថែមទៀត។ អង្គភាពចំនួន ៣ ដែលធ្វើការលើវិស័យសារព័ត៌មានរបស់ជាតិនឹងមានការងារធ្វើច្រើនបន្ទាប់ពីដំឡើងបច្ចេកវិទ្យាឌីជីថល ដូចជា វិទ្យុជាតិកម្ពុជា ទូរទស្សន៍ជាតិកម្ពុជា និងទីភ្នាក់ងារសារព័ត៌មានកម្ពុជា (AKP) ជាដើម។
លោករដ្ឋមន្ដ្រីថ្លែងថា៖ «យើងត្រូវការធ្វើច្រើនហើយធ្វើឱ្យចប់ក្នុងរយៈពេល ៣ ឆ្នាំ»៕
