ភ្នំពេញៈ ក្រោយព័ត៌មានក្លែងក្លាយត្រូវបានចាត់ទុកជាចលនាបំពុល និងបង្កភាពចលាចលនៅក្នុងសង្គមទាំងប្រទេសកម្ពុជា និងបណ្ដាប្រទេសក្នុងពិភពលោក ក្រសួងព័ត៌មានកាលពីថ្ងៃសុក្រសប្ដាហ៍មុនបានប្រកាសបើកការប្រកួតស្នាដៃផលិតវីដេអូអប់រំប្រឆាំងនឹងព័ត៌មានក្លែងក្លាយដំបូងដល់សាធារណជនដើម្បីស្រង់គំនិតលើការប្រឆាំងនឹងព័ត៌មានក្លែងក្លាយនេះ។
លោក ផុស សុវណ្ណ ប្រតិភូរាជរដ្ឋាភិបាលទទួលបន្ទុកអគ្គនាយកព័ត៌មាន និងសោតទស្សន៍ប្រាប់ភ្នំពេញប៉ុស្ដិ៍ពីថ្ងៃអាទិត្យថា នេះជាលើកដំបូងដែលក្រសួងព័ត៌មានផ្ដើមបង្កើតកម្មវិធីប្រកួតប្រជែងស្នាដៃផលិតវីដេអូដល់សាធារណជនឲ្យបានចូលរួមបង្ហាញស្នាដៃរបស់ខ្លួនតាមរយៈវីដេអូប្រឆាំងនឹងព័ត៌មានក្លែងក្លាយបែបនេះ ដើម្បីផ្ដល់ឱកាសឲ្យទាំងអស់គ្នាបង្ហាញគំនិតប្រយុទ្ធប្រឆាំងនឹងព័ត៌មានក្លែងក្លាយ។
លោកថ្លែងថា៖ «យើងបង្កើតគណៈកម្មការមួយសម្រាប់ធ្វើការងារនេះ ក្នុងនោះមានថ្នាក់ដឹកនាំនៃក្រសួងព័ត៌មានដែលពួកគាត់បានចូលនិវត្ដន៍រួចហើយ និងជាទីប្រឹក្សាក្រសួងជាដើមដែលធ្លាប់មានជំនាញខាងផលិតវីដេអូ និងព័ត៌មាន ដើម្បីឲ្យពួកគាត់ជួយពិនិត្យមើលលើការប្រកួតនេះឲ្យទទួលបានគុណភាព និងប្រសិទ្ធភាព»។
លោកឲ្យដឹងថាការបង្កើតកម្មវិធីប្រកួតនេះក្រោយពីមានគំនិតផ្តួចផ្ដើមមួយ ក្រោយពេលក្រសួងព័ត៌មានប្រជុំជាមួយវិទ្យាស្ថានអភិវឌ្ឍន៍វិស័យប្រព័ន្ធផ្សព្វផ្សាយនៅអាស៊ី (Asia-Pacific Institute for Broadcasting Development) កាលពីខែសីហាកន្លងទៅនៅទីក្រុងអង្គរខេត្ដសៀមរាប។ ចំណែកវិទ្យាស្ថាននេះក៏កំពុងសិក្សាស្រាវជ្រាវលើព័ត៌មានក្លែងក្លាយនេះដែរ។
លោកបន្ថែមថា ជំហានដំបូងក្រសួងព័ត៌មាននឹងទទួលយកបេក្ខជនដែលចាប់អារម្មណ៍ចូលរួមការប្រកួតនេះសិន ទើបឈានដល់ការទទួលវីដេអូ និងប្រកាសលទ្ធផលនៅពេលក្រោយនាចុងឆ្នាំ ២០១៩។
លោកបញ្ជាក់ថា៖ «ការផលិតវីដេអូនៃការប្រកួតនេះគឺយើងចង់ឲ្យសាធារណជនធ្វើវីដេអូជាខ្លឹមសារណាមួយដែលមានន័យជុំវិញការប្រឆាំងនឹងព័ត៌មានក្លែងក្លាយ។ ការប្រកួតនេះយើងមិនប្រកាន់ចំពោះអ្នកណាទេ គឺយើងចង់បានគំនិតពីគ្រប់ផ្នែកទាំងអស់តែម្ដង»។
សេចក្ដីជូនដំណឹងកាលពីថ្ងៃទី ៦ កញ្ញាដែលចុះហត្ថលេខាដោយលោក ខៀវ កាញារីទ្ធ រដ្ឋមន្ដ្រីក្រសួងព័ត៌មានបានបញ្ជាក់ថាការប្រកួតប្រជែងនេះនឹងជ្រើសរើសយកវីដេអូអប់រំខ្លីរយៈពេល ៥ នាទីក្រោមប្រធានបទ «ការប្រឌិតព័ត៌មានក្លែងក្លាយជះឥទ្ធិពលដល់សង្គម»។
សេចក្ដីជូនដំណឹងឲ្យដឹងថា បេក្ខជនជយលាភីនឹងទទួលបានរង្វាន់ដូចជាលេខ ១ ទទួលបានពានរង្វាន់វីដេអូអប់រំ ប្រឆាំងនឹងព័ត៌មានក្លែងក្លាយពីក្រសួងព័ត៌មាន និងថវិកាចំនួន ៤ លានរៀល លេខ ២ ទទួលបានថវិកាចំនួន ៣ លានរៀល និងលេខ ៣ ទទួលបានថវិកាចំនួន ១ លាន ៥ សែនរៀល។
ក្រសួងបន្ថែមថាសាធារណជន សិស្ស-និស្សិតដែលមានបំណងចង់ចូលរួមប្រកួតប្រជែងអាចផ្ញើប្រវត្តិរូបសង្ខេប និងខ្លឹមសារអត្ថបទដែលខ្លួនគ្រោងផលិតវីដេអូមកនាយកដ្ឋានព័ត៌មាន និងសោតទស្សន៍ ឬទំនាក់ទំនងទៅកាន់អ៊ីមែល chhon.navy89@gamail.com ចាប់ពីថ្ងៃទី ១ ខែកញ្ញានេះរហូតដល់ថ្ងៃទី ១៨ ខែ តុលា ឆ្នាំ ២០១៩ សម្រាប់វគ្គជម្រុះដំបូង។
លោក ណុប វី នាយកមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ចាត់ទុកសកម្មភាពនៃការប្រកួតផលិតវីដេអូអប់រំជុំវិញព័ត៌មានក្លែងក្លាយនេះ ជារឿងមួយសំខាន់ក្នុងការផ្ដល់ចំណេះដឹងទៅដល់ប្រជាពលរដ្ឋឲ្យបានយល់ដឹងពីព័ត៌មានក្លែងក្លាយ។
លោកថ្លែងថា៖ «រដ្ឋាភិបាលគួរតែមានការពង្រីកការអប់រំផ្សព្វផ្សាយចំពោះបញ្ហាព័ត៌មានក្លែងក្លាយនេះឲ្យបានរឹតតែច្រើនថែមទៀត ហើយការអប់រំផ្សព្វផ្សាយអំពីព័ត៌មានក្លែងក្លាយនេះស្ថាប័នឯកជនក៏គួរចូលរួមក្នុងការផ្សព្វផ្សាយដល់ពលរដ្ឋផងដែរដើម្បីឲ្យពលរដ្ឋបានដឹងពីព័ត៌មានណាពិត និងមិនពិត»។
បើតាមលោក ណុប វី លោកសង្កេតឃើញថាព័ត៌មានក្លែងក្លាយនៅតែត្រូវបានជនមួយចំនួនយកមកប្រើប្រាស់ធ្វើឲ្យបរិយាកាសសង្គមមិនល្អ និងបង្កបញ្ហាដល់ប្រជាពលរដ្ឋចំពោះការផ្សព្វផ្សាយ ឬការប្រើប្រាស់បណ្ដាញសង្គម និងអ៊ីនធឺណិតជាដើម៕