The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង​ព្រមាន​ចាត់ការ​តាមច្បាប់​ អ្នក​បន្ត​ផ្សព្វផ្សាយ​ព័ត៌មាន​មិន​ពិត




ក្រសួង​ព្រមាន​ចាត់ការ​តាមច្បាប់​ អ្នក​បន្ត​ផ្សព្វផ្សាយ​ព័ត៌មាន​មិន​ពិត

Content image - Phnom Penh Post
អាខោន​ហ្វេសប៊ុក​ដែល​ក្រសួង​ថា ផ្សាយ​ព័ត៌មាន​មិន​ពិត​។ រូបថត AKP

ក្រសួង​ព្រមាន​ចាត់ការ​តាមច្បាប់​ អ្នក​បន្ត​ផ្សព្វផ្សាយ​ព័ត៌មាន​មិន​ពិត

ភ្នំពេញៈ ​ក្រសួង​ព័ត៌មាន​បាន​ព្រមាន​ចាត់វិធានការ​ផ្លូវច្បាប់ ចំពោះ​អ្នក​ដែល​នៅតែ​បន្ត​ផ្សព្វផ្សាយ​ព័ត៌មាន​មិន​ពិត​ បន្ទាប់ពី​ក្រសួង​នេះ និង​អង្គភាព​អ្នកនាំពាក្យ​រាជរដ្ឋាភិបាល​បាន​ចេញ​សេចក្តី​ថ្លែងការណ៍​ព្រមៗ​គ្នា​មួយ ឆ្លើយតប​ទៅនឹង​ការផ្សព្វផ្សាយ​ព័ត៌មាន​មិន​ពិត​ទាក់ទង​នឹង​ការប្រយុទ្ធប្រឆាំង​ទៅនឹង​ជំងឺ​កូវីដ​ ១៩ ​របស់​រាជរដ្ឋាភិបាល​។

ប្រតិកម្ម​របស់​ស្ថាប័ន​ទាំង​ ២ ​នេះ​ធ្វើឡើងបន្ទាប់ពី​មាន​ការផ្សព្វផ្សាយ​ថា លោកនាយក​រដ្ឋមន្ត្រី ហ៊ុន សែន បាន​ប្រកាស​ត្រៀម​លិខិត​ ១ ​ច្បាប់ ​ដាក់ថ្វាយ​ព្រះមហាក្សត្រ និង​ដាក់ជូន រដ្ឋសភា និង​ព្រឹទ្ធសភា ក្នុង​ការដាក់​ប្រទេស​ក្នុង​គ្រាអាសន្ន ប្រសិនបើ​ស្ថានភាព​ជំងឺ​កូវីដ​ ១៩ រីករាលដាល​កាន់តែ​ខ្លាំង​។

លោក មាស សុភ័ណ្ឌ អ្នកនាំពាក្យ​ក្រសួង​ព័ត៌មាន​ប្រាប់​ ភ្នំពេញ​ ប៉ុស្តិ៍​ កាលពី​ម្សិលមិញ​ថា ក្រសួង​ព័ត៌មាន​តែងតែ​ក្រើន​រំឭក​ និង​អំពាវនាវ​ឱ្យ​អ្នក​ប្រកបមុខរបរ​អាជីព​ជា​អ្នកសារព័ត៌មាន​ទាំងអស់​ឱ្យ​គោរព​ច្បាប់​ និង​បទដ្ឋាន​គតិយុត្ត​ជា​​ធរមាន​ និង​គោរព​តាម​ក្រម​សីលធម៌​វិជ្ជាជីវៈ​ក្នុង​នាម​ជា​​អ្នកសារព័ត៌មាន​។ ប៉ុន្តែ​ក្រសួង​នៅតែ​សង្កេតឃើញ​ថា មាន​​អ្នកសារព័ត៌មាន​មួយ​ចំនួន​តូច​នៅតែ​មិនទាន់​គោរព​តាម​ការអំពាវនាវ និង​ការអប់រំ​ណែនាំ​របស់​ក្រសួង​ហើយ​បាន​អនុវត្ត​ប្រាសចាក​ពី​វិជ្ជាជីវៈ​សារព័ត៌មាន​ខុស​ទៅនឹង​ច្បាប់ និង​ឯកសារ​ដែល​តម្កល់ទុក​នៅ​ក្រសួង​ព័ត៌មាន​។

លោក​ សុភ័ណ្ឌ បាន​ព្រមាន​ថា បើ​អ្នកសារព័ត៌មាន​មួយ​ចំនួន​តូច​ទាំងនោះ នៅតែ​បន្ត​ធ្វើ​ដោយ​ខុសច្បាប់ និង​ប្រាសចាក​ពី​វិជ្ជាជីវៈ​អ្នកសារព័ត៌មាន ក្រសួង​ក៏ដូចជា​ស្ថាប័ន​មាន​សមត្ថកិច្ច​នឹង​ចាត់វិធានការ​តាម​ផ្លូវច្បាប់​ដែល​អាច​ឈានដល់​ការផ្អាក​ ឬ​បញ្ឈប់​ស្ថាប័ន​កុំឱ្យ​មានការ​ផ្សព្វផ្សាយ​បន្តទៀត​។ ​លើសពី​នេះ បើ​បុគ្គល​ដែល​ប្រព្រឹត្ត​នៅក្នុង​ស្ថាប័ន​ព័ត៌មាន​ណាមួយ​បាន​ប្រព្រឹត្ត​ខុស ក្រសួង​ក៏​នឹង​ចាត់វិធានការ​ចំពោះ​បុគ្គល​នោះ​ដោយ​ពិនិត្យ​លើ​អង្គហេតុ និង​អង្គច្បាប់ ចំពោះ​ករណី​នីមួយៗ​។

លោក​បញ្ជាក់ថា​៖ «​ក្រសួង​ព័ត៌មាន​កន្លង​មក​នេះ ពិនិត្យ​មើលឃើញ​ថា ស្ថាប័ន​និង​អ្នក​សារព័ត៌មាន​មួយចំនួន​ធំ​បាន​អនុវត្ត​ទៅតាម​ក្រមសីលធម៌​វិជ្ជាជីវៈ​ត្រឹមត្រូវ​តាមច្បាប់ និង​បទដ្ឋាន​គតិយុត្ត​ជា​ធរមាន ប៉ុន្តែ​ទន្ទឹម​គ្នា​នេះ​ក៏​មាន​ឃើញ អង្គភាព​ស្ថាប័ន និង​អ្នកសារព័ត៌មាន​មួយចំនួន​តូច​នៅតែ​អនុវត្ត​ផ្ទុយ​ទៅ​នឹង​ច្បាប់ក្រម​សីលធម៌ និង​វិជ្ជាជីវៈ ដូច្នេះ​បាន​ជា​ក្រសួង​ជូនដំណឹង​នេះ​»​។

បើតាម​លោក មាស សុភ័ណ្ឌ អ្វី​ដែល​ក្រសួង​សង្កេតឃើញ គឺ​ស្ថាប័ន​ដែល​ទើប​ចាប់ផ្តើម​ប្រកប​វិជ្ជាជីវៈ និង​អង្គភាព​សារព័ត៌មាន​ភាគច្រើន​ដែល​ធ្វើការ​ផ្សព្វផ្សាយ​តាម​ប្រព័ន្ធ​ទំនើប (​អនឡាញ​) តែងតែ​ផ្សព្វផ្សាយ​ព័ត៌មាន​មិន​ពិត ប្រឌិត​រឿង​ខុសពី​ការពិត​។

តាម​សេចក្តី​ថ្លែងការណ៍​របស់​ក្រសួង​ព័ត៌មាន​ចេញ​កាលពី​ថ្ងៃទី​ ៧ ខែធ្នូ ឱ្យដឹងថា ក្នុងអំឡុង​ពេលដែល​រាជរដ្ឋាភិបាល​បាន​អនុវត្ត​វិធានការ​នានា ដើម្បី​ប្រយុទ្ធ​ប្រឆាំង​នឹង​ជំងឺ​កូវីដ​ ១៩ មាន​អ្នកសារព័ត៌មាន​មួយចំនួន​តូច​មិន​បាន​បំពេញ​តួនាទី​ស្របតាម​វិជ្ជាជីវៈ​របស់​ខ្លួន ធ្វើជា​ស្ពាន​ចម្លង​ក្នុង​ការផ្តល់​ព័ត៌មាន​ពី​ប្រជាពលរដ្ឋ​មកកាន់​រដ្ឋាភិបាល និង​ពី​រដ្ឋាភិបាល​ទៅកាន់​ប្រជាពលរដ្ឋ​នោះទេ​។ ប៉ុន្តែ​បែរ​ជា​ឆ្លៀត​ឱកាស ប្រាសចាក​ក្រមសីលធម៌ ផ្សព្វផ្សាយ​ព័ត៌មាន​មិន​ពិត ក្លែងបន្លំ នាំឱ្យ​សាធារណជន​យល់​ខុស និង​មាន​ការសង្ស័យ​លើ​ការអនុវត្ត​ការងារ​របស់​អាជ្ញាធរ​មាន​សមត្ថកិច្ច បង្ក​ឱ្យ​មាន​ភាពភ័យខ្លាច ច្របូកច្របល់ រំខាន​ដល់​ការអនុវត្ត​តួនាទី​របស់​អាជ្ញាធរ​មាន​សមត្ថកិច្ច​ប៉ះពាល់​ដល់​សណ្តាប់ធ្នាប់​សាធារណៈ និង​ការប្រកប​អាជីវកម្ម​របស់​ប្រជាពលរដ្ឋ​។

លើសពីនេះ​អ្នក​សារព័ត៌មាន​ទាំងនោះ​បាន​ទទួល​យក​សំណូក ឬ​ជំរិត​ទារប្រាក់​ជា​ថ្នូរ​នឹង​ការមិន​ផ្សព្វផ្សាយ ឬ​លុប​ព័ត៌មាន ដែល​ជា​ប្រការ​មួយ​រំលោភ​យ៉ាងធ្ងន់ធ្ងរ​ខាង​ផ្នែក​វិជ្ជាជីវៈ​របស់​អ្នកសារព័ត៌មាន ដែល​មិនអាច​ទទួល​យក​បាន​។

សេចក្តី​ថ្លែងការណ៍​ដដែល​បន្តថា ដើម្បី​លុបបំបាត់​ភាពអសកម្ម​របស់​ក្រុម​អ្នក​សារព័ត៌មាន​មួយចំនួន​តូច ដែល​គ្មាន​វិជ្ជាជីវៈ និង​ក្នុង​ករណី​បុគ្គល​ណា ដែល​រង​ផលប៉ះពាល់​ពី​បញ្ហា​ដូចដែល​បាន​រៀបរាប់​ខាងលើ ក្រសួង​ព័ត៌មាន គាំទ្រ​ឱ្យ​បុគ្គល​នោះ​ប្រើប្រាស់​សិទ្ធិ​របស់​ខ្លួន ស្របតាម​ច្បាប់ និង​ស្នើឱ្យ​អាជ្ញាធរ​មាន​សមត្ថកិច្ច​ចាត់វិធានការ​ច្បាប់ ដោយ​មិនបាច់​ជូនដំណឹង​មក​ក្រសួង​ព័ត៌មាន​ជាមុន​ឡើយ​។

ដោយឡែក​អង្គភាព​អ្នក​នាំពាក្យ​រាជរដ្ឋាភិបាល​កាលពី​ថ្ងៃទី​ ៧ ខែធ្នូ ក៏​បានចេញ​សេចក្តី​ថ្លែងការណ៍​មួយ​ផងដែរ​ថា នារយៈពេល​ចុងក្រោយ​នេះ​ក៏បាន​សង្កេតឃើញ​ថា មាន​ជន​មួយចំនួន​បាន​ប្រឌិត​ផ្សព្វផ្សាយ​ព័ត៌មាន​អកុសល មិនពិត បំពុល​បរិយាកាស​សង្គម​ក្នុង​គោលបំណង​ធ្វើឱ្យ​ប្រជាពលរដ្ឋ​ច្របូកច្របល់ ស្លន់ស្លោ ស្តីពី​បញ្ហា​នៃ​ការរីក​រាលដាល​នៃ​ជំងឺ​កូវីដ ១៩​។

ការផ្សព្វផ្សាយ​ព័ត៌មាន​មិន​ពិត​ទាំងនេះ​ធ្វើឡើង​ក្នុង​ពេល​ដែល​រាជរដ្ឋាភិបាល​ស្ថាប័ន​ជំនាញ​អាជ្ញាធរ​មាន​សមត្ថកិច្ច​គ្រប់​ជាន់ថ្នាក់ រួម​ជាមួយ​នឹង​ប្រជាពលរដ្ឋ​ទូទាំង​ប្រទេស​បាននិង​កំពុង​សហការ​គ្នា​យ៉ាងសកម្ម​សស្រាក់សស្រាំ និង​ម៉ឺងមាត់​បំផុត ដើម្បី​ទប់ស្កាត់ និង​បង្ការ ការឆ្លង​វីរុស​កូរ៉ូណា​នៅក្នុង​សហគមន៍​។

លោក ផៃ ស៊ីផាន អ្នក​នាំពាក្យ​រាជរដ្ឋាភិបាល​ថ្លែង​ថា អង្គភាព​ពិនិត្យឃើញ​ជន​មួយចំនួន​បាន​យក​ព័ត៌មាន​ដែល​ផ្សព្វផ្សាយ​ធម្មតា បែរជា​យក​ទៅ​ផ្សព្វផ្សាយ​ប្រឌិត ខុសពី​ការពិត​។ លោក​លើក​ជា​ឧទាហរណ៍​ដែល​លោក​នាយក​រដ្ឋមន្ត្រី ហ៊ុន សែន ប្រកាស​មិន​បិទ​រាជធានី​ភ្នំពេញ ឬ​តំបន់​មួយណា​នោះទេ​ ប៉ុន្តែ​មាន​ការផ្សព្វផ្សាយ​បិទ​ជាដើម​។

លោក​បញ្ជាក់ថា​៖ «​សម្តេចនាយក​រដ្ឋមន្ត្រី​និយាយ​យ៉ាងច្បាស់ គ្រាន់តែ​សម្តេច​ត្រៀម​លិខិត​រួចហើយ ប៉ុន្តែ​វា​មិនទាន់​ប៉ះពាល់​ខ្លាំង​នោះទេ គ្រាន់តែ​ត្រៀម​ទុក នៅពេល​ដែល​មាន​ហានិភ័យ​ណាមួយ​កើតឡើង ហើយ​គ្រប់គ្រង​មិនបាន យើង​ប្រើប្រាស់​លិខិត​នោះ​»​។

បើតាម​លោក ផៃ ស៊ីផាន មាន​អ្នក​ដែលមាន​និន្នាការ​នយោបាយ​មួយចំនួន​បាន​និយាយ​ថា រាជរដ្ឋាភិបាល​បាន​យក​បញ្ហា​ជំងឺ​កូវីដ​ ១៩ ទៅ​រារាំង ឬ​ធ្វើ​ទុក​បុកម្នេញ​សមាជិក​អតីត​គណបក្ស​សង្គ្រោះជាតិ​ទៅវិញ និង​មាន​ការផ្សព្វផ្សាយ​បំភ័យ​ជាច្រើន​ពាក់ព័ន្ធ​នឹង​ជំងឺ​កូវីដ ​១៩ នេះ ខុសពី​ការពិត​ដែល​ធ្វើឱ្យ​មាន​ការភាន់ច្រឡំ និង​ច្របូកច្របល់​ក្នុងសង្គម​។

លោក ប៉ែន បូណា ប្រធាន​ក្លិប​អ្នកកាសែត​កម្ពុជា​ថ្លែង​ថា អ្នកសារព័ត៌មាន​មាន​តួនាទី​យ៉ាងសំខាន់​ក្នុង​ការចូលរួម​ជាមួយ​ភាគី​ពាក់ព័ន្ធ ក្នុង​ការផ្សព្វផ្សាយ​ព័ត៌មាន​ពិត​ឱ្យ​ពលរដ្ឋ​យល់ដឹង​ពី​ការឆ្លង​ជំងឺ​កូវីដ​ ១៩​។ បន្ទាប់ពី​ពលរដ្ឋ​ទទួល​បាន​ព័ត៌មាន​ពិត​ហើយ ពួកគេ​នឹង​ចេះ​ការពារ​ខ្លួន កុំឱ្យ​មាន​ការឆ្លង​ពី​ជំងឺ​នេះ​។ មួយ​វិញ​ទៀត អ្នកសារព័ត៌មាន​គួរ​ធ្វើ​យ៉ាងណា ផ្សព្វផ្សាយ​ព័ត៌មាន​ពិត ដើម្បី​កុំឱ្យ​ពលរដ្ឋ​មាន​ភាពចលាចល និង​ភ័យខ្លាច​។

លោក​បញ្ជាក់ថា​៖ «​បើ​អ្នក​សារព័ត៌មាន​ ឬ​អ្នកលេង​ហ្វេសប៊ុក​បង្ហោះ​ព័ត៌មាន​ខុសពី​ការពិត ហើយ​ធ្វើឱ្យ​ពលរដ្ឋ​មាន​ការយល់ច្រឡំ និង​សង្គម​មានការ​ច្របូកច្របល់ ខ្ញុំ​យល់ថា ជា​កំហុស​មួយ​ដ៏ធំ​ដែល​យើង​ទាំងអស់​គ្នា​គួរតែ​ពិចារណា​ឡើងវិញ​។ ក្នុង​ន័យ​នេះ​សេចក្តី​ថ្លែងការណ៍​របស់​ក្រសួង​ព័ត៌មាន និង​អង្គភាព​អ្នកនាំពាក្យ​របស់​រាជរដ្ឋាភិបាល​ព្រួយបារម្ភ​ពី​ការគ្រប់គ្រង​ជំងឺ​កូវីដ ​១៩ ដោយ​ផ្តើមចេញពី​ការផ្សាយ​ព័ត៌មាន​មិន​ពិត​នេះ​»​។

លោក​យល់ថា សម្រាប់អ្នកកាសែត​អាជីព​មិន​មាន​អ្វី​ជា​បញ្ហា​ទេ ប៉ុន្តែ​មាន​អ្នក​ប្រកប​វិជ្ជាជីវៈ​អ្នក​សារព័ត៌មាន​មួយចំនួន​បាន​អះអាង​ខ្លួន​ជា​អ្នកកាសែត​នោះ​តែងតែ​ផ្សព្វផ្សាយ​ព័ត៌មាន​ធ្វើឱ្យ​មាន​ការច្របូកច្របល់​ក្នុង​សង្គម​»៕

វីដេអូ៖

អត្ថបទគួរចាប់អារម្មណ៍