ភ្នំពេញៈ ក្រសួងរ៉ែ និងថាមពលព្រមានចាត់វិធានការចំពោះស្ថានីយប្រេង និងឧស្ម័នឥន្ធនៈដែលកំពុងសាងសង់ថ្មីនៅទូទាំងប្រទេសក្នុងករណីមិនបានស្នើសុំវិញ្ញាបនបត្របញ្ជាក់បច្ចេកទេសសុវត្ថិភាពតាមកាលកំណត់ដែលអាចនឹងប្រឈមមុខនឹងការផាកពិន័យចន្លោះពី ៤ លានទៅ ១០ លានរៀល។
តាមទំព័រហ្វេសប៊ុករបស់ក្រសួងរ៉ែ និងថាមពលកាលពីថ្ងៃទី ២៣ មករា បានឲ្យដឹងថា ម្ចាស់ស្ថានីយប្រេង និងឧស្ម័ន ឥន្ធនៈដែលកំពុងសាងសង់ថ្មីដោយមិនទាន់មានវិញ្ញាបនបត្របច្ចេកទេសសុវត្ថិភាពពីក្រសួងត្រូវមកដាក់ពាក្យស្នើសុំវិញ្ញាបនបត្របច្ចេកទេសសុវត្ថិភាពពីក្រសួងតាមរយៈមន្ទីររ៉ែ និងថាមពលរាជធានី និងខេត្តទូទាំងប្រទេស។
ក្រសួងបន្តថាក្នុងករណីដែលមិនបានដាក់ពាក្យស្នើសុំវិញ្ញាបនបត្របច្ចេកទេសសុវត្ថិភាពពីក្រសួងតាមការកំណត់នោះទេនឹងទទួលខុសត្រូវតាមច្បាប់ជាធរមាន ដោយស្ថានីយប្រេង និងឧស្ម័នឥន្ធនៈដែលកំពុងសាងសង់ដែលក្រសួងបានចុះស្រង់ស្ថិតិដោយគ្មានវិញ្ញាបនបត្របញ្ជាក់បច្ចេកទេសសុវត្ថិភាពនោះទេនឹងប្រឈមមុខនឹងការពិន័យ។
ក្នុងនោះក្រសួងក៏បានអះអាងដោយយោងតាមមាត្រា ៦៦ នៃច្បាប់ស្តីពីការគ្រប់គ្រងប្រេងកាត និងផលិតផលប្រេងកាតដែលទើបប្រកាសឲ្យប្រើកាលពីពាក់កណ្តាលឆ្នាំមុនថា បុគ្គលណាដែលធ្វើសកម្មភាពផ្នែកដោនស្ទ្រីមដោយគ្មានវិញ្ញាបនបត្របច្ចេកទេសសុវត្ថិភាពពីក្រសួងរ៉ែ និងថាមពលមុននឹងចាប់ផ្តើមសាងសង់ហេដ្ឋារចនាសម្ព័ន្ធដើម្បីបម្រើសកម្មភាពដោនស្ទ្រីមត្រូវផាកពិន័យជាប្រាក់ចំពោះហេដ្ឋារចនាសម្ព័ន្ធដែលមានតម្លៃក្រោម ៨០០ លានរៀលត្រូវផាកពិន័យជាប្រាក់ចំនួន ៤ លាន រៀល និងត្រូវផ្អាកសកម្មភាពសាងសង់នានា។ មាត្រានេះក៏បានបញ្ជាក់ដែរថា ចំពោះហេដ្ឋារចនាសម្ព័ន្ធដែលមានតម្លៃចាប់ពី ៨០០ លានរៀល ត្រូវផាកពិន័យជាប្រាក់ចំនួន ១០ លានរៀល និងត្រូវផ្អាកសកម្មភាពសាងសង់នានា ហើយក្នុងករណីនៅបន្តប្រព្រឹត្តអំពើល្មើសដដែលនឹងត្រូវផាកពិន័យជាប្រាក់ដោយក្រសួងរ៉ែ និងថាមពលចំនួនទ្វេដង។
លោក ជៀប សួរ អគ្គនាយកនៃអគ្គនាយកដ្ឋានប្រេងកាតបានប្រាប់ភ្នំពេញប៉ុស្តិ៍ពីម្សិលមិញថា បច្ចុប្បន្នមានស្ថានីយប្រេង និងឧស្ម័នឥន្ធនៈជាង ៤ ២០០ កន្លែង នៅទូទាំងប្រទេស កម្ពុជា ក្នុងនោះស្ថានីយប្រេង និងឧស្ម័នឥន្ធនៈថ្មីជាង ១០០ កន្លែង កំពុងសាងសង់។
លោកបន្តថា ដោយសារតែច្បាប់ស្តីពីការគ្រប់គ្រងប្រេងកាត និងផលិតផលប្រេងកាតនេះទើបតែប្រកាសឲ្យប្រើប្រាស់ ដូច្នេះក្រសួងផ្តោតទៅលើស្ថានីយដែលកំពុងសាងសង់ថ្មីទាំងជាង ១០០ កន្លែង ដោយកំណត់ឲ្យពួកគាត់ត្រូវដាក់ពាក្យសុំវិញ្ញាបនបត្រ ហើយស្ថានីយប្រេងដែលបានសាងសង់ហើយមុនច្បាប់នេះចូលជាធរមាននឹងបន្តអនុវត្តច្បាប់ពីខែកក្កដាឆ្នាំនេះ។
លោកបញ្ជាក់ថា៖ «ក្រោយពីយើងបានប្រកាសឲ្យស្ថានីយដែលកំពុងសាងសង់ដាក់ពាក្យសុំវិញ្ញាបនបត្រនេះឃើញថាមានម្ចាស់ស្ថានីយតែ ៥០ ភាគរយប៉ុណ្ណោះបានដាក់ពាក្យស្នើសុំចំណែកពាក់កណ្តាលទៀតនៅមិនទាន់ដាក់នោះទេ។ ក្នុងករណីនេះបើផុតកាលកំណត់មន្ត្រីក្រសួងយើងនឹងចុះត្រួតពិនិត្យហើយអាចនឹងឈានការផាកពិន័យតាមច្បាប់ និងផ្អាកអាជីវកម្មផងដែរ»។
លោក ជៀប សួរ បានថ្លែងថា ករណីដែលក្រសួងតម្រូវឲ្យស្ថានីយទូទាំងប្រទេសត្រូវដាក់ពាក្យសុំវិញ្ញាបនបត្របញ្ជាក់បច្ចេកទេសសុវត្ថិភាពពីក្រសួង ក៏ព្រោះដើម្បីទប់ស្កាត់ហានិភ័យដែលអាចនឹងកើតមានឡើងជាយថាហេតុ នៅពេលដែលស្ថានីយទាំងនោះមិនបានគោរពទៅតាមស្តង់ដាបច្ចេកទេស ហើយម្យ៉ាងទៀតលោកថា ក៏ព្រោះពីមុនកម្ពុជាមិនទាន់មានច្បាប់គ្រប់គ្រងស្ថានីយទាំងនេះ ប៉ុន្តែនៅពេលមានច្បាប់ហើយនោះក្រសួងតម្រូវឲ្យគ្រប់ស្ថានីយទាំងអស់អនុវត្តឲ្យបានត្រឹមត្រូវ។
តាមសារាចររបស់ក្រសួងរ៉ែ និងថាមពលកាលពីឆ្នាំ ២០១៤ ស្ថានីយប្រេងឥន្ធនៈត្រូវតែមានទីតាំងឆ្ងាយពីទីប្រជុំជន ហើយប្រសិនបើស្ថានីយស្ថិតនៅក្នុងតំបន់ទីប្រជុំជនគឺតម្រូវឲ្យមានការសាងសង់ជញ្ជាំងការពារដែលមានកម្ពស់យ៉ាងតិច ៣ ម៉ែត្រដែលមានទំហំផ្ទៃដីអប្បបរមាយ៉ាងតិច ៣៧៥ ម៉ែត្រការ៉េ ដើម្បីធានាសុវត្ថិភាព។ ស្ថានីយប្រេងទាំងអស់ត្រូវមានធុងស្តុកប្រេងកប់ក្រោមដីសមស្របទៅតាមលក្ខណៈបច្ចេកទេស និងបំពាក់សម្ភារពន្លត់ អគ្គិភ័យ ត្រូវមានលក្ខណៈសមស្រប៕
វីដេអូ៖