.jpg)
លោកស្រី យ៉ាង សុភ័ណ្ឌ ប្រធានសម្ព័ន្ធសហជីពកម្ពុជា ថ្លែងក្នុងកំឡុងពេលដឹកនាំកម្មករនាពេលកន្លងមក។ រូបថត CATU
ភ្នំពេញៈ ក្រសួងការងារបានចេញលិខិតព្រមានសហជីពមួយដោយឲ្យសហជីពនេះ បញ្ឈប់ជាបន្ទាន់ក្នុងការដឹកនាំកម្មករនៅរោងចក្រ វ៉ាយអូលែត អឹភែរឹល ខេមបូឌា ខូអិលធីឌី តវ៉ាដើម្បីទាមទារឲ្យរោងចក្រដែលប្រកាសក្ស័យធនបើកប្រាក់ឈ្នួល និងប្រាក់អតីតភាពការងារដែលក្រសួងថាជាសកម្មភាពខុសច្បាប់។
កាលពីថ្ងៃទី ១ ខែកក្កដា កម្មកររាប់រយនាក់ពីរោងចក្រ វ៉ាយអូលែតអឹភែរឹល បានផ្ទុះការតវ៉ានៅមុខរោងចក្រនៅសង្កាត់អូរបែកក្អម ខណ្ឌសែនសុខ រហូតដល់បិទផ្លូវដើម្បីទាមទារឲ្យក្រុមហ៊ុនទូទាត់ប្រាក់អតីតភាព និងប្រាក់អត្ថប្រយោជន៍ផ្សេងៗដល់ពួកគេ ខណៈរោងចក្រប្រកាសក្ស័យធន។
លិខិតព្រមានដែលបានផ្ញើជូនលោកស្រី យ៉ាង សុភ័ណ្ឌ ប្រធានសម្ព័ន្ធសហជីពកម្ពុជាចុះថ្ងៃទី ១ កក្កដារបស់នាយកដ្ឋានវិវាទការងារនៃក្រសួងការងារបានឲ្យដឹងថា ផ្អែកតាមសកម្មភាពរបស់លោកស្រីដែលបានប្រព្រឹត្តនៅអំឡុងថ្ងៃទី ១ ខែកក្កដា នៅក្រុមហ៊ុន វ៉ាយអូលែតអឹភែរឹល គឺជាសកម្មភាពល្មើសច្បាប់ ព្រោះការដឹកនាំនេះពុំស្របច្បាប់ ហើយអ្នកទទួលខុសត្រូវកិច្ចការរដ្ឋបាលរបស់សហព័ន្ធសហជីពក៏ត្រូវបានផុតអាណត្តិហើយដែរ។
លិខិតបន្តថា៖ «ថ្នាក់ដឹកនាំសហជីពរូបនេះក៏បានដឹកនាំ និងញុះញង់កម្មករនិយោជិតឲ្យគំរាមកំហែង និងដាក់សម្ពាធលើភាគីនិយោជកដើម្បីទទួលបាននូវការទូទាត់ប្រាក់ឈ្នួលផ្ទុយពីស្មារតីច្បាប់ និងបទប្បញ្ញត្តិពាក់ព័ន្ធនឹងវិស័យការងារ»។
លោក ជ្រុន ថេរ៉ាវង្ស ប្រធាននាយកដ្ឋាន វិវាទការងារបានព្រមានក្នុងលិខិតថា៖ «ចាប់ពីថ្ងៃទទួលបាននូវលិខិតព្រមាននេះ សូមលោកស្រីបញ្ឈប់ជាបន្ទាន់នូវសកម្មភាពល្មើសច្បាប់ខាងលើ។ ករណីពុំមានការកែប្រែ ឬផ្គើនចំពោះលិខិតព្រមាននេះអង្គការវិជ្ជាជីវៈរបស់លោកស្រីអាចនឹងត្រូវប្តឹង ដើម្បីរំលាយចោល ឬទទួលនូវវិធានការផ្សេងៗតាមការកំណត់របស់ច្បាប់ជាកំហិត»។
ប៉ុន្តែលោកស្រី យ៉ាង សុភ័ណ្ឌ ថ្លែងថាអ្វីដែលលោកស្រីបានទៅជួបជាមួយកម្មករនេះក៏ព្រោះតែកម្មករបានទទួលរងនូវភាពអយុត្តិធម៌គឺមិនបានញុះញង់ ឬជំរុញកម្មករឲ្យប្រព្រឹត្តល្មើសច្បាប់ណាមួយទេពីព្រោះអ្វីដែលកម្មករបានធ្វើគ្រាន់តែទាមទារនូវប្រាក់អត្ថប្រយោជន៍ដែលរោងចក្រត្រូវផ្តល់ឲ្យកម្មករទៅតាមផ្លូវច្បាប់ប៉ុណ្ណោះ។ «ខ្ញុំនៅតែឈរលើគោលការណ៍មួយគឺត្រូវតែគាំទ្រទៅសមាជិករបស់ខ្ញុំក្នុងការទាមទារ ព្រោះអ្វីដែលក្រសួងចេញលិខិតព្រមានមកលើខ្ញុំ ដោយសារតែវាប៉ះពាល់ប្រយោជន៍របស់ពួកគាត់ដែលធ្វើឲ្យពួកគាត់ខឹងសម្បាមកកាន់នឹងខ្ញុំ ដែលខ្ញុំប្រើប្រាស់សិទ្ធិមួយជួយដល់សមាជិករបស់ខ្ញុំ ដែលពួកគាត់កំពុងរងនូវអំពើអយុត្តិធម៌»។
កម្មករម្នាក់សុំមិនបញ្ចេញឈ្មោះថ្លែងថា រោងចក្របានប្រកាសព្យួរការងារកម្មកររយៈពេល ២ ខែគឺចាប់ពីខែឧសភា ដល់ខែមិថុនា ហើយនៅថ្ងៃទី ២៥ មិថុនា រោងចក្រ បានប្រកាសបិទរោងចក្រភ្លាមៗដោយបានសន្យាផ្តល់ប្រាក់គ្រប់ចំនួនឲ្យកម្មករទៅតាមលក្ខខណ្ឌច្បាប់នៅថ្ងៃទី ១ កក្កដា។ ប៉ុន្តែមកដល់ថ្ងៃបើកប្រាក់បែរជារោងចក្រប្រកាសផ្តល់ប្រាក់ដល់កម្មករតែ ៣ ចំណុចទៅវិញទើបកម្មករផ្ទុះការតវ៉ាគឺគ្មានការញុះញង់ជំរុញពីសហជីពណាមួយនោះទេ៕
