ភ្នំពេញៈ ក្រសួងសាធារណការ និងដឹកជញ្ជូនបានព្រមានចាត់វិធានការតឹងរ៉ឹងចំពោះបុគ្គលទាំងឡាយណាដែលសាងសង់សំណង់ ឬលុបប្រឡាយបង្ហូរទឹកនៅតាមបណ្តោយផ្លួវជាតិលេខ ៤ បន្ទាប់ពីមានការសាងសង់មួយចំនួនចាប់តាំងពីផ្លូវមួយនេះត្រូវបានរដ្ឋាភិបាលដកយកពីក្រុមហ៊ុនមកគ្រប់គ្រងវិញ។
សេចក្តីជូនដំណឹងរបស់ក្រសួងសាធារណការ និងដឹកជញ្ជូនស្តីពីការគ្រប់គ្រងដីចំណីផ្លូវ និងការរក្សាសណ្តាប់ធ្នាប់សាធារណៈ តាមបណ្តោយផ្លូវជាតិលេខ ៤ ភ្នំពេញ-ក្រុងព្រះសីហនុចេញផ្សាយកាលពីម្សិលមិញបានឱ្យដឹងថា ក្រោយពីរដ្ឋាភិបាលសម្រេចលុបចោលនូវកិច្ចព្រមព្រៀងសម្បទានជាមួយក្រុមហ៊ុនអេហ្សិត ឌីស្ទ្រីប្យូហ្ស៊ិន (AZ Distribution Co.) កាលពីថ្ងៃទី ១៣ មករា ឆ្នាំ ២០១៦ ក្រសួងសង្កេតឃើញមានការកើតឡើងនូវបាតុភាពរំលោភច្បាប់ពីសំណាក់បុគ្គលមួយចំនួនដែលរស់នៅតាមបណ្តោយផ្លូវនោះ។
បាតុភាពទាំងនោះរួមមានការសាងសង់សំណង់ ការលុបប្រឡាយស្រះ គន្លងបង្ហូរទឹកសម្រួលសុវត្ថិភាពផ្លូវថ្នល់ ការលក់ដូរ និងការចតយានយន្តគ្មានសណ្តាប់ធ្នាប់លើដីចំណីផ្លូវ ដែលជាទ្រព្យសម្បត្តិសាធារណៈរបស់រដ្ឋនៅតាមបណ្តោយផ្លូវជាតិលេខ ៤ នេះ។
សេចក្តីជូនដំណឹងបន្តថាដើម្បីធានាការពារ និងថែរក្សាទ្រព្យសម្បត្តិសាធារណៈក្រសួងដោយមានកិច្ចសហការពីស្ថាប័នពាក់ព័ន្ធ និងអាជ្ញាធរដែនដីនឹងចាត់វិធានការចំពោះម្ចាស់លំនៅឋាន ឬម្ចាស់កម្មសិទ្ធិអចលនទ្រព្យដែលប្រើប្រាស់ផ្លូវពុំស្របតាមច្បាប់។
សេចក្តីជូនដំណឹងបញ្ជាក់ថា៖ «អាជ្ញាធរពាក់ព័ន្ធនឹងចាត់វិធានការយ៉ាងតឹងរ៉ឹងបំផុតចំពោះបុគ្គលទាំងឡាយណាដែលសាងសង់សំណង់លុបប្រឡាយដោយគ្មានការអនុញ្ញាតពីសមត្ថកិច្ចគ្រប់គ្រងផ្លូវថ្នល់»។
អ្នកស្រាវជ្រាវពីការអភិវឌ្ឍសង្គមលោក កែម ឡី ថ្លែងថាក្រសួងគួរណែនាំដល់អាជ្ញាធរមូលដ្ឋានថ្នាក់ ឃុំ -សង្កាត់ ជាមុនសិនមុននឹងអនុញ្ញាតឱ្យពលរដ្ឋសាងសង់លើចំណីផ្លូវ ដើម្បីចៀសវាងផលប៉ះពាល់ដល់ពលរដ្ឋដែលទទួលបានការអនុញ្ញាតពីអាជ្ញាធរមូលដ្ឋាន។
លោកថា៖ «គ្រាន់តែជាវិធានការធ្វើឱ្យប៉ះពាល់ពលរដ្ឋខ្លាំងតាមពិតអ្នកដែលចេញឱ្យមានការសាងសង់សម្រាប់សំណង់រឹងមាំធំៗគឺអ្នកដែលចុះហត្ថលេខាមុនគេជួយវាស់វែងគឺប្រធានភូមិអ៊ីចឹងប្រសិនបើប្រធានភូមិឱ្យសាងសង់យើងត្រូវតែទៅមើលលិខិតហ្នឹងចាប់ដាក់ពន្ធនាគារហ្មងទៅព្រោះវាខុសការសាងសង់លើដីសាធារណៈ»។
យ៉ាងនេះក្តីលោកថា ក្រសួងគួរផ្តល់សិទ្ធិអំណាចទៅឱ្យអាជ្ញាធរមូលដ្ឋានជាអ្នកគ្រប់គ្រងពោលអាជ្ញាធរដែនដីជាអ្នករស់នៅទីនោះហើយអាចដឹងរាល់សកម្មភាពទាំងអស់នៅពេលពលរដ្ឋចាប់ផ្តើមសាងសង់អ្វីមួយលើចិញ្ចើមផ្លូវសាធារណៈ និងចាត់វិធានការលើអាជ្ញាធរមូលដ្ឋានដែលចេញប្លង់សាងសង់ផ្តេសផ្តាស។
កាលពីដើមឆ្នាំ ២០១៦ រដ្ឋាភិបាលបានប្រកាសឱ្យប្រជាពលរដ្ឋដែលធ្វើដំណើរនៅតាមបណ្តោយផ្លូវជាតិលេខ ៤ ឈប់បង់ប្រាក់សម្រាប់រថយន្តឆ្លងកាត់ផ្លូវជាតិលេខ ៤ ដែលជាផ្លូវត្រូវបានស្ថាបនាឡើងដោយជំនួយរបស់សហរដ្ឋអាមេរិកតែត្រូវបានក្រុមហ៊ុន AZ ទទួលបានសិទ្ធិយកប្រាក់ពីរថយន្តឆ្លងកាត់ចាប់តាំងពីឆ្នាំ ២០០២ ក្រោមកិច្ចសន្យាសម្បទានជាមួយរដ្ឋាភិបាលរយៈពេល ៣៥ ឆ្នាំ។
ភ្នំពេញ ប៉ុស្តិ៍ ពុំអាចសុំការអត្ថាធិប្បាយពីអ្នកនាំពាក្យ ក្រសួងសាធារណការ និងដឹកជញ្ជូនពីវិធានការជាក់លាក់បាននៅឡើយទេ៕
