.jpg)
ទិដ្ឋភាពមេឃងងឹតនិងទឹករលកនៅខេត្តព្រះសីហនុ កាលពីពេលកន្លងមក។ ហ៊ាន រង្សី
ភ្នំពេញៈ ក្រសួងធនធានទឹកនិងឧតុនិយមបានព្រមានថានឹងមានខ្យល់បក់បោកខ្លាំងនិងរលកសមុទ្រធំៗកើតឡើងចាប់ពីថ្ងៃទី១៩ដល់២៥ខែឧសភា ដែលបញ្ហានេះអ្នកនេសាទសមុទ្រនិងអ្នកនិយមដើរកម្សាន្តតាមសមុទ្រគប្បីផ្អាកសកម្មភាពជាបណ្ដោះអាសន្នដើម្បីចៀសវាងគ្រោះថ្នាក់កើតឡើងជាយកថាហេតុ។
បើតាមការព្យាករអាកាសធាតុរបស់ក្រសួងធនធានទឹកនិងឧតុនិយមដែលបានចេញផ្សាយនៅព្រឹកថ្ងៃទី១៨ខែឧសភា ឆ្នាំ២០២១ ប្រទេសកម្ពុជានឹងទទួលរងនូវឥទ្ធិពលពីខ្យល់មូសុងនិរតីខ្លាំង(The Strong Monsoon) ដែលនឹងធ្វើឲ្យមានភ្លៀងធ្លាក់រាយប៉ាយក្នុងកម្រិតពីមធ្យមទៅច្រើនគ្របដណ្ដប់លើផ្ទៃប្រទេស។
ទន្ទឹមនឹងនេះក៏មានបាតុភូតខ្យល់កន្ត្រាក់និងផ្គររន្ទះកើតឡើងផងដែរដែលទាមទារឲ្យមានការប្រុងប្រយ័ត្នខ្ពស់ពិសេសអ្នកដែលរស់នៅក្នុងតំបន់ទំនាបក្នុងភូមិភាគកណ្ដាល និងតំបន់ផ្ទៃរងទឹកភ្លៀងជាប់ជួរភ្នំដងរែកនិងខ្ពង់រាបឦសាន។
ក្រៅពីនេះក្រសួងធនធានទឹកនិងឧតុនិយមក៏បានអំពាវនាវផងដែរថា៖«សូមប្រជានេសាទនិងអ្នកធ្វើដំណើរទេសចរណ៍តាមផ្លូវទឹកមានការប្រុងប្រយ័ត្ន ចំពោះល្បឿនខ្យល់ខ្លាំង និងរលកសមុទ្រខ្ពស់»។
ជាមួយនឹងការអំពាវនាវនេះអ្នកស្រី អ៊ុល សុវណ្ណដា ប្រធានគ្រប់គ្រងទូកទេសចរណ៍ On The Rocks Tours ក្នុងខេត្តព្រះសីហនុបានប្រាប់ភ្នំពេញប៉ុស្តិ៍ថា នៅពេលនេះពុំសូវមានភ្ញៀវទេសចរកម្សាន្តតាមប្រជុំកោះក្នុងខេត្តព្រះសីហនុនោះទេ ដូច្នេះការចេញទូកគឺមានតិចតួចណាស់។ម្យ៉ាងទៀតក្នុងរយៈពេលប៉ុន្មានសប្ដាហ៍ចុងក្រោយនេះ អាកាសធាតុក៏មិនសូវអំណោយផលដែរ គឺមានភ្លៀង និងខ្យល់បក់បោកខ្លាំង។
អ្នកស្រីបន្តថា នៅក្នុងសប្ដាហ៍នេះ ប្រសិនបើមានភ្លៀងខ្យល់បក់បោកខ្លាំងដូចការព្យាកររបស់ក្រសួងធនធានទឹកនិងឧតុនិយមមែននោះ អ្នកស្រីនឹងមិនឲ្យក្រុមនាវិកចេញទូកនោះទេ បើទោះជាភ្ញៀវបានកក់ឬទិញសំបុត្រសម្រាប់ធ្វើដំណើរកម្សាន្តរួចហើយក៏ដោយ។ អ្នកស្រីថា៖« យើងតែងតែគិតដល់ពីសុវត្ថិភាពរបស់ភ្ញៀវ ជាចម្បង»។
ចំណែកប្រជានេសាទនៅភូមិកោះខ្យង ឃុំអូរជ្រៅ ស្រុកព្រៃនុប លោក ណុន ឌឿន បានប្រាប់ភ្នំពេញប៉ុស្តិ៍ដែរថា បច្ចុប្បន្ន អ្នកភូមិរបស់លោកមិនហ៊ានចេញនេសាទត្រីនៅក្រៅតំបន់លម្ហសមុទ្រនោះទេ ព្រោះបារម្ភពីអាកាសធាតុដែលមានការផ្លាស់ប្ដូរឆាប់រហ័សពេក។
លោកថ្លែងថា៖«កាលពីថ្ងៃសុក្រសប្ដាហ៍មុនអ្នកភូមិយើងម្នាក់ចេញទូកទៅនេសាទក្រៅតំបន់លម្ហសមុទ្រហើយជួបគ្រោះថ្នាក់ខ្យល់កន្ត្រាក់វាយពន្លិច តែសំណាងល្អបានក្រុមឆ្មាំសមុទ្រជួយសង្គ្រោះទាន់ពេល»។
បើតាមលោក ឌឿន បច្ចុប្បន្នអ្នកភូមិរបស់គាត់ចេញទូកនេសាទតែក្នុងតំបន់ទឹករាក់ៗប៉ុណ្ណោះមិនឆ្ងាយពីកោះខ្យងនោះទេ៕
