ភ្នំពេញៈ ក្រសួងមហាផ្ទៃបានប្រកាសដាក់ឱ្យដំណើរការជាផ្លូវការនូវគណៈកម្មាធិការចំនួន ២ កាលពីម្សិលមិញដើម្បីរួមសហការគ្នាធ្វើការទាក់ទងនិងការប្រយុទ្ធប្រឆាំងគ្រឿងញៀន ជំងឺអេដស៍ និងកាមរោគ។
គណៈកម្មាធិការទាំង ២ នោះ រួមមានគណៈកម្មាធិការប្រឆាំងគ្រឿងញៀន ដែលត្រូវបានបង្កើតឡើងតាំងពីខែសីហា ឆ្នាំ ២០១៩ និងគណៈកម្មាធិការប្រយុទ្ធនឹងជំងឺអេដស៍ និងកាមរោគត្រូវបានរដ្ឋមន្ត្រីក្រសួងមហាផ្ទៃ សម្រេចបង្កើតតាំងពីឆ្នាំ ២០០១។
លោក កៅ ខុនដារ៉ា រដ្ឋលេខាធិការក្រសួងមហាផ្ទៃបានថ្លែងក្នុងឱកាសដែលប្រកាសដាក់ឱ្យដំណើរការនោះថា បើទោះជាកន្លងមកគណៈកម្មាធិការទាំង ២ មិនទាន់ត្រូវបានប្រកាសជាផ្លូវការ ប៉ុន្តែគណៈកម្មាធិការទាំង ២ បានចូលរួមសហការគ្នារៀបចំការងារបាន ១ ជំហាន ហើយជាពិសេសការរៀបចំនូវកិច្ចប្រជុំជាបន្តបន្ទាប់។
លោកបញ្ជាក់ថា៖ «ភាពយឺតយ៉ាវនៃការប្រកាសដំណើរការជាផ្លូវការនូវគណៈកម្មាធិការទាំង ២ នេះ គឺបណ្តាលមកពីបញ្ហាកូវីដ ១៩ រួមទាំងបញ្ហារួមផ្សំមួយចំនួនទៀត»។
លោក កៅ ខុនដារ៉ា បានលើកឡើងថា ចាប់ពីពេលនេះទៅគណៈកម្មាធិការទាំង ២ នេះនឹងចូលរួមចំណែកលុបបំបាត់បញ្ហាដែលកើតមានឡើងដោយសារគ្រឿងញៀន និងបញ្ហាជំងឺអេដស៍ ដែលកំពុងបន្តគំរាមកំហែងនៅក្នុងប្រទេស តំបន់ និងពិភពលោក។ គណៈកម្មាធិការទាំង ២ គឺត្រូវរៀបចំផែនការបណ្តុះបណ្តាល និងធ្វើការបណ្តុះបណ្តាលពីបញ្ហាគ្រឿងញៀន ជំងឺអេដស៍ និងកាមរោគដល់ក្រុមជនបង្គោល និងតាមអង្គភាពជាសមាជិក និងរាជធានី ខេត្ត។
លោក នាក់ យុទ្ធា ប្រធានលេខាធិការដ្ឋានគណៈកម្មាធិការប្រឆាំងគ្រឿងញៀនថ្លែងថាគណៈកម្មាធិការទាំង ២ នេះគឺមានទិសដៅរួមគ្នា ដោយបញ្ចូលសកម្មភាពតែ ១ ក្នុងការងារផ្សព្វផ្សាយ និងអប់រំ។ ជាពិសេសនោះគឺការងារស្ដារនីតិសម្បទារបស់ជនរងគ្រោះ ដែលរងផលប៉ះពាល់៕