.jpg)
ក្រសួងមហាផ្ទៃណែនាំឲ្យអាជ្ញាធរគ្រប់ជាន់ថ្នាក់ និងកងកម្លាំង ត្រូវមានវត្តមានជាប្រចាំនៅកន្លែងធ្វើការ ដើម្បីត្រៀមលក្ខណៈដោះស្រាយសភាពការណ៍ក្នុងការថែរក្សាសន្តិសុខសណ្តាប់ធ្នាប់សាធារណៈ និងត្រូវធ្វើការតាមដានក្តាប់សភាពការណ៍។ រូបថត នគរបាល
ភ្នំពេញៈ ក្រសួងមហាផ្ទៃបានចេញសេចក្តីណែនាំឲ្យអភិបាលរាជធានី-ខេត្តត្រូវរៀបចំឲ្យមន្ត្រី និងកងកម្លាំងត្រូវមានវត្តមានជាប្រចាំនៅតាមសាលារាជធានី-ខេត្ត ក្រុង-ស្រុក-ខណ្ឌ ឃុំ-សង្កាត់ ដើម្បីត្រៀមលក្ខណៈដោះស្រាយសភាពការណ៍ក្នុងការថែរក្សាសន្តិសុខសណ្តាប់ធ្នាប់សាធារណៈ និងត្រូវធ្វើការតាមដានក្តាប់សភាពការណ៍ សកម្មភាពចលានារបស់ «ក្រុមឧទ្ទាមក្រៅច្បាប់ដែលប៉ុនប៉ងធ្វើរដ្ឋប្រហារផ្តួលរំលំរាជរដ្ឋាភិបាលស្របច្បាប់» ដើម្បីចាត់វិធានការច្បាប់ឱ្យបានម៉ឺងម៉ាត់ និងទាន់ពេល។
ការចេញសេចក្តីណែនាំនេះកើតមានឡើង ខណៈប្រធានស្តីទីអតីតគណបក្សសង្គ្រោះជាតិលោក សម រង្ស៊ី បានធ្វើការអំពាវនាវជាបន្តបន្ទាប់ និងនៅក្នុងវីដេអូឃ្លីបមួយទៀតដែលចេញផ្សាយនៅយប់ថ្ងៃទី ២៩ ខែតុលា ថា លោកបានត្រៀមខ្លួនរួចរាល់អស់ហើយក្នុងការវិលត្រឡប់ចូលមកប្រទេសកម្ពុជាវិញនៅថ្ងៃទី ០៩ វិច្ឆិកា ដោយលោកត្រូវលះបង់សិទ្ធិសេរីភាពរបស់លោក និងស្ម័គ្រចិត្តបូជាដល់អាយុជីវិតថែមទៀត ដើម្បីមកស្តារលទ្ធិប្រជាធិបតេយ្យ នៅក្នុងប្រទេសកម្ពុជាឡើងវិញ និងផ្តល់សេរីភាពជូនប្រជាពលរដ្ឋខ្មែរ។
ជាមួយគ្នានេះលោក សម រង្ស៊ី ក៏បានអំពាវនាវទៅកាន់សហគមន៍អន្តរជាតិផងដែរឱ្យជួយតាមឃ្លាំមើលរូបលោក និងដាក់សម្ពាធមកលើរដ្ឋាភិបាលកម្ពុជា កុំឲ្យប្រើអំពើហិង្សាមកលើប្រជាពលរដ្ឋខ្មែរដែលមកចូលរួមទទួលស្វាគមន៍ដំណើរវិលត្រឡប់របស់លោក។
បើយោងតាមសេចក្តីណែនាំរបស់ក្រសួងមហាផ្ទៃចេញកាលពីថ្ងៃទី ៣០ ខែតុលា ឆ្នាំ ២០១៩ បានដាក់ចេញនូវវិធានការចំនួន ៨ ចំណុច ដើម្បីបង្កើនការថែរក្សាសន្តិសុខសណ្តាប់ធ្នាប់សាធារណៈនៅក្នុងឱកាសខួប ៦៦ ឆ្នាំនៃទិវាបុណ្យឯករាជ្យជាតិថ្ងៃ ៩ វិច្ឆិកា និងព្រះរាជពិធីបុណ្យអុំទូក បណ្តែតប្រទីបអកអំបុក សំពះព្រះខែនៅដើមខែក្រោយនេះ។
សេចក្តីណែនាំបន្តថា ស្របពេលជាមួយគ្នានេះចលនាក្រុមឧទ្ទាមក្រៅច្បាប់ក៏បានប្រកាសដាក់ចេញនូវគម្រោងផែនការធ្វើរដ្ឋប្រហារ ដើម្បីផ្តួលរំលំរាជរដ្ឋាភិបាលស្របច្បាប់ក្រោមឧបាយកលនៃការប្រកាសវិលត្រឡប់ចូលមកកម្ពុជាវិញរបស់លោក សម រង្ស៊ី និងបក្ខពួកនៅចំពេលដែលប្រជាពលរដ្ឋខ្មែរកំពុងប្រារព្ធពិធីបុណ្យជាតិទាំង ២ ខាងលើនេះ។
សេចក្តីណែនាំបន្តថា ក្រសួងមហាផ្ទៃសូមធ្វើការណែនាំដល់លោក លោកស្រី អភិបាលនៃគណៈអភិបាលរាជធានី ខេត្ត និងជាប្រធានគណៈបញ្ជាការ ឯកភាពរដ្ឋបាលរាជធានី-ខេត្ត ត្រូវអនុវត្តនូវវិធានការចាំបាច់មួយចំនួន។ «អភិបាលរាជធានី ខេត្ត និងជាប្រធានគណៈបញ្ជាការឯកភាព រដ្ឋបាលរាជធានី ខេត្ត ត្រូវមានវត្តមាននៅរាជធានី ខេត្តសាមីជាប់ជាប្រចាំចាប់ពីដើមខែវិច្ឆិការហូតដល់ពិធីបុណ្យជាតិទាំង ២ ខាងលើត្រូវបានប្រារព្ធចប់សព្វគ្រប់។ ទន្ទឹមនេះត្រូវរៀបចំចាត់ចែងមន្ត្រីប្រចាំការនៅតាមសាលារាជធានី-ខេត្ត-ក្រុង- ស្រុក-ខណ្ឌ ឃុំ-សង្កាត់ ដើម្បីត្រៀមលក្ខណៈដោះស្រាយសភាពការណ៍ចំពោះមុខនៅក្នុងដែនសមត្ថកិច្ចរបស់ខ្លួន»។
សេចក្តីណែនាំបន្តថាអភិបាលនៃគណៈអភិបាលរាជធានី-ខេត្ត ក៏ត្រូវដឹកនាំណែនាំដល់មេបញ្ជាការ កងកម្លាំងមានសមត្ថកិច្ចនានាដែលស្ថិតក្នុងដែនសមត្ថកិច្ចរបស់ខ្លួនឲ្យត្រួតពិនិត្យវត្តមានកម្លាំងក្រោមឱវាទ និងគ្រប់គ្រងចាត់ចែងប្រើប្រាស់កម្លាំងស្របតាមផែនការដែលបានកំណត់ និងត្រួតពិនិត្យជាប្រចាំនូវការអនុវត្តផែនការនេះ។
សេចក្តីណែនាំបញ្ជាក់ថា៖ «ក្នុងរាជធានី-ខេត្តនីមួយៗត្រូវធ្វើការតាមដានក្តាប់សភាពការណ៍សកម្មភាពចលនាក្រុមឧទ្ទាមក្រៅច្បាប់ ដែលប៉ុនប៉ងធ្វើរដ្ឋប្រហារផ្តួលរំលំ រាជរដ្ឋាភិបាលស្របច្បាប់ ដើម្បីចាត់វិធានការច្បាប់ឱ្យបានម៉ឺងម៉ាត់ និងត្រូវអប់រំប្រជាជនឱ្យចៀសវៀងការចូលរួមក្នុងសកម្មភាពណាមួយនៃគម្រោងផែនការផ្តួលរំលំរាជរដ្ឋាភិបាលស្របច្បាប់»។
សេចក្តីណែនាំក៏បានណែនាំឲ្យអភិបាលនៃគណៈអភិបាលរាជធានី-ខេត្ត ត្រូវដឹកនាំណែនាំដល់គណៈបញ្ជាការក្រុង ស្រុក-ខណ្ឌ ដើម្បីដឹកនាំ ប៉ុស្តិ៍នគរបាលរដ្ឋបាលឃុំ-សង្កាត់ និងអាជ្ញាធរ ឃុំ-សង្កាត់ ភូមិ ឱ្យពង្រឹងកិច្ចសហការបង្កើនការគ្រប់គ្រងការចេញ-ចូលរបស់ប្រជាជន និងគ្រប់គ្រងមុខសញ្ញានានាតាមគោលការណ៍ជំនាញ និងត្រូវដឹកនាំបង្កលក្ខណៈងាយស្រួលដល់ប្រជាពលរដ្ឋគ្រប់មជ្ឈដ្ឋានឲ្យចូលរួមពិសាអំបុកសាមគ្គីជាតិ ដើម្បីការពារជាតិ សាសនា ព្រះមហាក្សត្រ។
អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិលោក អ៊ូ ច័ន្ទរ័ត្ន បានចាត់ទុកការណែនាំរបស់ក្រសួងមហាផ្ទៃនេះថាជាការឆ្លើយតបហួសហេតុទៅនឹងផែនការវិលត្រឡប់របស់លោក សម រង្ស៊ី។
លោកបញ្ជាក់ថា៖ «វាជាការឆ្លើយតបមួយដែលលើសពីអ្វីដែលអាចកើតឡើង។ វាធ្វើឲ្យបរិយាកាសសង្គមកាន់តែអាប់អួរ និងវាធ្វើឲ្យប៉ះពាល់ដល់អារម្មណ៍របស់ប្រជាពលរដ្ឋដែលចូលរួមកម្មវិធីបុណ្យហ្នឹង»។ លោក នី សុខា ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុកក៏បានថ្លែងកាលពីម្សិលមិញដែរថា បើសេចក្តីណែនាំខាងលើគឺដើម្បីការពារ និងថែរក្សាសន្តិសុខសង្គម និងសណ្តាប់ធ្នាប់សាធារណៈវាគឺជារឿងធម្មតា។
ប៉ុន្តែលោកថា ការចេញសេចក្តីណែនាំបែបនេះនៅក្នុងកាលៈទេសៈនេះគឺវាពាក់ព័ន្ធទៅនឹងបញ្ហានយោបាយដែលសំដៅទៅលើការវិលត្រឡប់របស់លោក សម រង្ស៊ី។ លោកបញ្ជាក់ថា៖ «វាធ្វើឲ្យប៉ះពាល់ដល់សិទ្ធិសេរីភាពមួយចំនួនរបស់ប្រជាពលរដ្ឋនៅក្នុងការដើរហើរ និងធ្វើដំណើរទៅមក...ដែលបញ្ហាទាំងនេះ វាធ្វើឲ្យប្រជាពលរដ្ឋមានការព្រួយបារម្ភ»។
ប៉ុន្តែលោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងកាលពីម្សិលមិញថា វាជាការចាំបាច់ដែលអាជ្ញាធរ និងកងកម្លាំងសមត្ថកិច្ចត្រូវពង្រឹងកិច្ចការពារសន្តិសុខ និងថែរក្សាសណ្តាប់ធ្នាប់សង្គមដែលសំដៅធ្វើការបង្ក្រាប និងកម្ចាត់ចោលភ្លាមៗចំពោះក្រុមចលនាឧទ្ទាមក្រៅច្បាប់ ដែលប៉ុនប៉ងផ្តួលរំលំរបបរាជានិយម និងរាជរដ្ឋាភិបាលស្របច្បាប់ដែលកើតចេញពីការបោះឆ្នោត។
លោកបញ្ជាក់ថា៖ «ដោយសារតែថ្ងៃ ៩ វិច្ឆិកា រាជរដ្ឋាភិបាលយើងបានកំណត់ជាថ្ងៃហូបអំបុកដើម្បីការពារជាតិ សាសនា ព្រះមហាក្សត្រ ដូច្នេះសេចក្តីណែនាំរបស់សម្តេចក្រឡាហោម (ស ខេង) គឺសំដៅឲ្យសមត្ថកិច្ចធ្វើការរួមគ្នា និងប្រមូលកម្លាំងរួមគ្នា ដើម្បីការពារជាតិ សាសនា ព្រះមហាក្សត្រ។ អាអ្នកដែលព្រួយគឺជាអ្នកដែលចង់ឲ្យ សម រង្ស៊ី វាមកដើម្បីបង្កការវឹកវរ និងទទួលបានជ័យភណ្ឌ ហើយបើអ្នកមិនគាំទ្រ (សម រង្ស៊ី) គេមិនមានការព្រួយនោះទេ»។
លោក ខៀវ សុភ័គ បានបន្តថា អង្គការសង្គមស៊ីវិលមួយចំនួនតែងតែធ្វើការរិះគន់ទៅលើរាជរដ្ឋាភិបាល ដោយគ្មានមូលដ្ឋានច្បាស់លាស់ហើយពួកគេធ្វើការរិះគន់នេះ គឺដើម្បីទទួលបានផលប្រយោជន៍ពីខាងក្រុមចលនាឧទ្ទាមក្រៅច្បាប់តែប៉ុណ្ណោះ។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងការពារការណែនាំរបស់ក្រសួងមហាផ្ទៃថា ត្រឹមត្រូវ និងពុំមែនជាសកម្មភាពរំលោភសិទ្ធិមនុស្ស និងសិទ្ធិសេរីភាពបញ្ចេញមតិនៅក្នុងសង្គមប្រជាធិបតេយ្យនោះទេ។
លោកបញ្ជាក់ថា៖ «អាជ្ញាធររាជធានី-ខេត្តមានភារកិច្ចថែរក្សាសន្តិសុខ សណ្តាប់ធ្នាប់សាធារណៈជូនប្រជាពលរដ្ឋ ពិសេសនៅក្នុងពិធីបុណ្យ ប្រពៃណីធំៗបែបនេះដែលមានប្រជាពលរដ្ឋចូលរួមច្រើន ដូច្នេះអាជ្ញាធរត្រូវយកចិត្តទុកដាក់ទៅលើសន្តិសុខ សណ្តាប់ធ្នាប់សាធារណៈ។ ដូច្នេះវាមិនមែនប៉ះពាល់ទៅដល់សិទិ្ធសេរីភាពរបស់ប្រជាពលរដ្ឋ ការរៀបចំពិធីបុណ្យនោះទេ។ វាមិនមែនជាការសម្លុតគំរាមកំហែងពីណានោះទេ»៕
វីដេអូ៖
