ក្រសួងមហាផ្ទៃ សម្រេចបង្កើតភូមិថ្មីចំនួន ៣៧ ស្ថិតក្នុងឃុំ-សង្កាត់ចំនួន ១៧ នៃស្រុក-ក្រុងចំនួន ៥ ក្នុងខេត្តក្រចេះ តាមសំណើរបស់ខេត្តនេះ និងដើម្បីបង្កលក្ខណៈងាយស្រួលដល់ការគ្រប់គ្រងរដ្ឋបាលរបស់អាជ្ញាធរមូលដ្ឋាន ព្រមទាំងការអភិវឌ្ឍនៅតំបន់ដាច់ស្រយាល។
បើតាមប្រកាសរបស់ក្រសួងមហាផ្ទៃ ចុះថ្ងៃទី ៩ ខែ មីនា ឆ្នាំ ២០២១ ដែលចុះហត្ថលេខាដោយលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ការបង្កើតភូមិថ្មីនេះ គឺផ្អែកលើសំណើរបស់រដ្ឋបាលខេត្តនេះ។
ប្រកាសដដែលបានបញ្ជាក់ថា៖ «ការរៀបចំរចនាសម្ព័ន្ធ និងប្រព័ន្ធគ្រប់គ្រងរដ្ឋបាលភូមិបង្កើតថ្មីដូចមានចែងក្នុងប្រកាសនេះ ត្រូវអនុលោមទៅតាមសេចក្តីណែនាំ ឆ្នាំ ២០០៦ របស់ក្រសួងមហាផ្ទៃ ស្តីពីបែបបទ នីតិវិធីនៃការជ្រើសរើសមេភូមិ ការចូលកាន់តំណែង ការផ្លាស់ប្តូរមេភូមិ ការតែងតាំងជំនួយការមេភូមិ និងតួនាទី ភារកិច្ច របៀបរបបធ្វើការងាររបស់មេភូមិ»។
តាមទំព័រហ្វេសប៊ុករបស់ក្រសួងមុខងារសាធារណៈ បានឲ្យដឹងពីម្សិលមិញថា មកទល់បច្ចុប្បន្ន ខេត្តក្រចេះ មានស្រុក-ក្រុងចំនួន ៦ ឃុំ-សង្កាត់ ចំនួន ៤៧ និងភូមិចំនួន ២៥៨។ ក្នុងចំណោមភូមិទាំងអស់នេះ មានឧបសម្ព័ន្ធជារចនាសម្ព័ន្ធ គ្រប់គ្រងរដ្ឋបាលបណ្ដោះអាសន្ន ឬហៅថា ភូមិឧបសម្ព័ន្ធចំនួន ១២។
ក្រសួងនេះបញ្ជាក់ថា៖ «ក្នុងភូមិសាស្ត្រ ភូមិឧបសម្ព័ន្ធទាំងអស់នោះមានប្រជាពលរដ្ឋរស់នៅ ២២ ៦២០ គ្រួសារ។ ចំនួនមនុស្ស ៨៧ ០៧៦ នាក់ ហើយអ្នកដែលមានអាយុចាប់ពី ១៨ ឆ្នាំឡើង មានចំនួន ៤៦ ៨៣៥ នាក់ និងបានចុះឈ្មោះបោះឆ្នោតចំនួន ៣២ ៦៣៨ នាក់»។
តាមទំព័រហ្វេសប៊ុកដដែលបញ្ជាក់ថា ការសម្រេចបង្កើតភូមិថ្មីជាផ្លូវការជំនួសឲ្យភូមិឧបសម្ព័ន្ធបណ្ដោះអាសន្ន មិនត្រឹមតែបានបង្កលក្ខណៈងាយស្រួលដល់ការគ្រប់គ្រងរដ្ឋបាលរបស់អាជ្ញាធរមូលដ្ឋានខេត្តក្រចេះប៉ុណ្ណោះទេ។
ប៉ុន្តែថែមទាំងបានបង្កលទ្ធភាព ធំធេងសម្រាប់ការអភិវឌ្ឍមូលដ្ឋាននៅតំបន់ដាច់ស្រយាលនេះទៀតផង ខណៈភូមិឧបសម្ព័ន្ធដែលនៅសេសសល់ចំនួន ៨០ ទៀត នឹងបានប្រែក្លាយទៅជាភូមិថ្មីជាផ្លូវការបន្ថែមទៀតក្នុងពេលដ៏ខ្លីខាងមុខ។
លោក វ៉ា ថន អភិបាលខេត្តក្រចេះ បានប្រាប់ ភ្នំពេញ ប៉ុស្តិ៍ ពីម្សិលមិញថា តាមសំណើរបស់រដ្ឋបាលខេត្ត គឺបានស្នើបង្កើតភូមិថ្មីជាង ៨០ ភូមិ ព្រោះតំបន់ទាំងនោះ មានមនុស្សរស់នៅច្រើន ដែលតម្រូវឲ្យមានរដ្ឋបាលមួយគ្រប់គ្រង សម្រាប់ផ្តល់ភាពជិតស្និទ្ធនិងងាយស្រួលដល់ពលរដ្ឋ។ ប៉ុន្តែដោយតាមគោលការណ៍នៃការបង្កើតភូមិនិងតម្រូវការជាក់ស្តែង គឺការបង្កើតនេះបានជ្រើសរើសភូមិដែលមានអាទិភាពមុន ព្រោះបច្ចុប្បន្ន ភូមិថ្មីទាំងនេះ មានមនុស្សមកតាំងទីលំនៅជាក់ស្តែងច្រើន។
លោកបញ្ជាក់ថា៖ «ភូមិថ្មីទាំងនេះ មិនទាន់បានរៀបចំរចនាសម្ព័ន្ធអ្វីទេ គ្រាន់តែបានចាត់តាំងអនុភូមិ ឬសមាជិកម្នាក់ទៅគ្រប់គ្រង។ ឧទាហរណ៍គាត់នៅក្នុងភូមិផ្សេង យើងឲ្យគាត់ដែលនៅក្បែរភូមិថ្មីនោះទៅដឹកនាំបណ្តោះអាសន្នសិន ហើយនៅពេលបង្កើតក្រុមប្រឹក្សាបានហើយ យើងប្រគល់សិទ្ធិឲ្យបោះឆ្នោតជ្រើសរើសតាមការគ្រប់គ្រងរដ្ឋបាលភូមិសង្កាត់។ យើងឲ្យគាត់ជ្រើសដោយខ្លួនគាត់ទេ។ ក្នុងនាមខេត្ត យើងគ្រាន់តែបង្កើតជូនគាត់ទេ»។
លោកលើកឡើងថា ការបង្កើនភូមិបន្ថែមទៀត បង្ហាញពីតម្រូវការកាន់តែច្រើន និងប្រកបដោយប្រសិទ្ធភាពចំពោះការផ្ដល់សេវាជូនប្រជាពលរដ្ឋ៕