ភ្នំពេញៈ ក្រសួងមហាផ្ទៃស្នើឲ្យលោក រៀល ខេមរិន្ទ្រ ដូរឈ្មោះគណបក្សចេញ ពីឈ្មោះ «ចក្រភពខ្មែរ» ដែលលោកបានស្នើសុំបង្កើត ដោយសារថា ឈ្មោះនេះជាអតីតឈ្មោះប្រវត្តិសាស្ត្ររបស់ប្រទេស កម្ពុជា។
ការជូនដំណឹងរបស់ក្រសួងមហាផ្ទៃធ្វើឡើងកាលពីថ្ងៃអង្គារ មួយសប្ដាហ៍ក្រោយពេលលោក រៀល ខេមរិន្ទ្រ បានដាក់ពាក្យស្នើសុំបង្កើតគណបក្ស ដែលមានឈ្មោះ «ចក្រភពខ្មែរ» កាលពីថ្ងៃទី ១៨ ខែ មីនា ជាថ្ងៃដែលលោកទទួលបានការផ្តល់នីតិសម្បទានយោបាយឡើងវិញ ក្រោយពីត្រូវបានដកហូតសិទ្ធិនយោបាយ កាលពីឆ្នាំ ២០១៧ បន្ទាប់ពីគណបក្សសង្គ្រោះជាតិរបស់លោកត្រូវបានរំលាយ។
យោងតាមលិខិតផ្ញើទៅលោក រៀល ខេមរិន្ទ្រ កាលពីថ្ងៃទី ២៦ ខែ មីនា ចុះហត្ថលេខា ដោយឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង បានប្រាប់លោក ខេមរិន្ទ្រ ថា៖ «ផ្អែកតាមបទប្បញ្ញត្តិ មាត្រា ២ និងមាត្រា ១១ ថ្មី នៃច្បាប់ស្តីពីគណបក្សនយោបាយ ក្រសួងមហាផ្ទៃ ស្នើឲ្យតំណាងស្ថាបនិកគណបក្ស ធ្វើការផ្លាស់ប្តូរឈ្មោះគណបក្សដែលស្នើបង្កើត ដោយសារឈ្មោះ ចក្រភពខ្មែរ គឺជាអតីតឈ្មោះប្រវត្តិសាស្ត្ររបស់ប្រទេស កម្ពុជា»។
លោក រៀល ខេមរិន្ទ្រ គឺជាអតីតតំណាងរាស្ត្រមណ្ឌលស្វាយរៀងនៃអតីតគណបក្សសង្គ្រោះជាតិ ដែលជាបក្សប្រឆាំង និងជាបុគ្គលម្នាក់ក្នុងចំណោម ១១៨ ត្រូវបានហាមឃាត់ធ្វើនយោបាយ ក្រោយពេលអតីតបក្សប្រឆាំងមួយនេះត្រូវបានរំលាយ។ លោកបានទទួលសិទ្ធិធ្វើនយោបាយឡើងវិញ កាលពីសប្ដាហ៍មុន ក្រោយពេលដាក់ពាក្យស្នើសុំទៅក្រសួងមហាផ្ទៃ។
ទាក់ទងកាលពីម្សិលមិញ លោកបានថ្លែងថា លោកនឹងរកឈ្មោះផ្សេងដើម្បីប្ដូរតាមការស្នើរបស់ក្រសួងមហាផ្ទៃ។ លោកថ្លែងថា គណបក្សរបស់លោកកើតចេញពីការចូលរួមនៃមនុស្សប្រមាណ ២០០ នាក់ ដោយលើសពីតម្រូវការរបស់ក្រសួងដែលតម្រូវឲ្យមានស្ថាបនិកតែ ៨០ នាក់ ប៉ុណ្ណោះក្នុងការស្នើសុំបង្កើតបក្សមួយ។
ជំហានបន្ទាប់ លោកនឹងប្រមូលស្នាមមេដៃឲ្យបាន ៤ ពាន់នាក់ដើម្បីដាក់ជូនក្រសួងមហាផ្ទៃ ហើយចុះឈ្មោះដើម្បីប្រកួត ប្រជែង ដោយដំណាក់កាលនេះមានរយៈពេល ៦ ខែ ដើម្បីរកសំឡេងឲ្យបានគ្រប់ក្នុងការបង្កើតបក្សនេះ។
លោកថ្លែងថា គណបក្សរបស់លោកឈរលើបាវចនា ៣ «គឺគុណធម៌ សច្ចធម៌ និងយុត្តិធម៌»។
លោកបញ្ជាក់ពីទិសដៅនយោបាយរបស់គណបក្សនេះថា៖ «គោលនយោបាយគណបក្ស ដែលខ្ញុំដឹកនាំ គឺយើងធ្វើយ៉ាងណាគឺខ្មែរតែមួយ។ ខ្មែរក្រោម ខ្មែរលើ ខ្មែរកណ្ដាលជាខ្មែរតែមួយ ហើយយើងយល់ សាមគ្គីភាពជាមួយគ្នា ដោយមិនប្រកាន់និន្នាការនយោបាយណាទេ អ្នកមិនចូលរួមជាមួយយើងក៏ជាខ្មែរ យើងមិនខឹង យើងអត់លាបពណ៌គេ។ គណបក្សខ្ញុំ គឺយើងមិនវាយប្រហារគណបក្សណាទេ តូចក៏ដោយធំក៏ដោយ គណបក្សកាន់អំណាចក៏ដោយ យើងជាខ្មែរដូចគ្នា បម្រើជាតិដូចគ្នា»។
លោកថ្លែងបន្តថា៖ «អ្នកណាដែលធ្វើខុស អ្នកណាធ្វើត្រូវគឺជាសមត្ថភាពប្រាប់ប្រជាពលរដ្ឋថាគេមានសមត្ថភាពប៉ុនណាដើម្បីបម្រើរាស្ត្រ។ យើងគិតតែលើបក្សដែលយើងបង្កើត។ យើងយកគោលការណ៍របស់យើងទៅបម្រើប្រជារាស្ត្រទៅយកចិត្តប្រជារាស្ត្រដើម្បីឲ្យគាត់ពិចារណាថា តើអ្នកណាជាអ្នកបម្រើរបស់គាត់ដោយស្មោះត្រង់?»។
លោកនិយាយថា លោកនឹងព្យាយាមដណ្ដើមយកបេះដូងប្រជារាស្ត្រ។នៅពេលសួរថា តើលោកនឹងវិលត្រឡប់ទៅចូលរួមជាមួយអតីតគណបក្សរបស់លោកឬទេ ប្រសិនបើបក្សនោះរស់ឡើងវិញ ឬមួយមេដឹកនាំរួមគ្នាបង្កើតបក្សថ្មីមួយនោះ លោកថ្លែងថា លោកមិនវិលត្រឡប់ទៅវិញទេ ប៉ុន្តែ នឹងធ្វើជាគូប្រកួតប្រជែងតាមបែបប្រជាធិបតេយ្យ។
ប៉ុន្តែលោកនិយាយថា៖ «ប្រសិនជាថ្ងៃណាមួយអ្នកប្រជាធិបតេយ្យគេរួបរួមគ្នា ហើយត្រូវការយើងឲ្យរួបរួមដែរ យើងរួបរួមព្រោះយើងជាជាតិតែមួយ យើងប្រជាធិបតេយ្យតែមួយ»។
លោក ឡៅ ម៉ុងហៃ អ្នកវិភាគនយោបាយថ្លែងថានៅពេលនេះគេមិនទាន់អាចវិភាគថា តើគណបក្សរបស់លោក រៀល ខេមរិន្ទ្រ នឹងទៅជាយ៉ាងណាទេមានតែរង់ចាំមើលសិនថា បក្សនេះមានទស្សនវិស័យយ៉ាងណាសម្រាប់ប្រទេសជាតិ ហើយបក្សនេះអាចធ្វើបានប៉ុនណា។
លោកឈឹម កាន អគ្គនាយករងនៃអគ្គនាយកដ្ឋានរដ្ឋបាលក្រសួងមហាផ្ទៃទទួលបន្ទុកកិច្ចការសមាគម និងគណបក្សនយោបាយ ឲ្យដឹងថា គណបក្សនយោបាយដែលបានចុះបញ្ជីមានចំនួន ៤២ បក្ស។ ឯបក្សដែលកំពុងដំណើរការបង្កើតមានចំនួន ៣ គណបក្ស៕