The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​មហា​ផ្ទៃ​សម្រេច​បោះ​បង់​ចោល​គម្រោង​ពន្ធ​នាគារ​ទំនើប (VIP) សម្រាប់​ឃុំ​ខ្លួន​អ្នក​ជាប់​ឃុំ​មាន​លទ្ធភាព​បង់​ប្រាក់

ក្រសួង​មហា​ផ្ទៃ​សម្រេច​បោះ​បង់​ចោល​គម្រោង​ពន្ធ​នាគារ​ទំនើប (VIP) សម្រាប់​ឃុំ​ខ្លួន​អ្នក​ជាប់​ឃុំ​មាន​លទ្ធភាព​បង់​ប្រាក់

Content image - Phnom Penh Post
លោក ខៀវ សុភ័គ អ្នក​នាំពាក្យ​ក្រសួង​មហា​ផ្ទៃ។ រូប​ថត សហការី

ក្រសួង​មហា​ផ្ទៃ​សម្រេច​បោះ​បង់​ចោល​គម្រោង​ពន្ធ​នាគារ​ទំនើប (VIP) សម្រាប់​ឃុំ​ខ្លួន​អ្នក​ជាប់​ឃុំ​មាន​លទ្ធភាព​បង់​ប្រាក់

ភ្នំពេញ៖ ក្រសួង​មហា​ផ្ទៃបាន​​សម្រេច​បោះ​​បង់​ចោល​គម្រោង​ពន្ធនាគារ​ទំនើប​​ (VIP) បន្ទាប់​ពី​បាន​ធ្វើ​ការ​សិក្សា​​រក​ពុំ​ឃើញ​មាន​ប្រទេស​ណា​មួយ​ ធ្វើ​ពន្ធ​នាគារ​ទំនើ​ប​បែប​នេះសម្រាប់​ឃុំ​ខ្លួន​អ្នក​ជាប់​ឃុំ​ ដែល​មាន​លទ្ធ​ភាព​បង់​ប្រាក់​ ខណៈ​​ពន្ធ​នាគារ​ដែល​វិនិយោគ​ជា​មួយ​ក្រុម​ហ៊ុន​ឯក​ជន​នេះ​ បាន​សាង​សង់​ជិត​រួច​រាល់​។ នេះ​បើ​តាម​លោក​​ ​ខៀវ សុភ័គ អ្នកនាំពាក្យ​ក្រសួង​មហាផ្ទៃ​។

លោក​ ខៀវ សុភ័គ បាន​ថ្លែង​ប្រាប់​ភ្នំពេញ​ប៉ុស្ដិ៍នៅ​ថ្ងៃ​ទី ១១​ ខែ ​កក្កដា ឆ្នាំ​២០១៩​ ថា ក្រសួង​មហាផ្ទៃ​ បាន​សម្រេច​បោះ​បង់​គម្រោង​សាង​សង់​ពន្ធ​នាគារ​ វីអាយ​ភី (VIP) ដោយ​តម្រូវ​ឲ្យ​អ្នក​ទោស​បង់​ប្រាក់​តិច​បំផុត​​ពេល​ជាប់​ឃុំ​នេះ​ចោល បន្ទាប់​ពី​បាន​ធ្វើការ​​សិក្សា​ពី​តាម​បណ្ដា​ប្រទេស​ផ្សេង​ៗ​មិន​មាន​ប្រទេស​ណា​​ធ្វើ​ពន្ធនាគារ​បែបនេះ​ទេ​ រួម​នឹង​ការ​ខ្វះ​​លទ្ធភាពធ្វើ​ផង​ដែរ​។

លោក​បាន​ថ្លែង​ថា​៖ «យើង​ធ្វើ​ក៏​អត់​មាន​លទ្ធភាព​ធ្វើ​ដែរ​។ យើង​ដើរ​ទៅ​មើល​ប្រទេស​គេផ្សេង​ អត់​មាន​ប្រទេស​ណា​ គេ​មាន​បទ​ពិសោធ​ន៍ធ្វើ​​ពន្ធ​នាគារនេះទេ​។ អ៊ីចឹង ​យើង​ក៏​បោះ​បង់​ចោល​គម្រោង​នេះ​ទៅ។ ប្រទេស​គេ​​ផ្សេង​ៗ ​អត់​ទាន់​មាន​ធ្វើ បើ​យើង​ធ្វើ​គេ​នឹង​យក​គំរូ​តាម​យើង ហើយ​បើ​យើង​ធ្វើ​តែ​ឯង​ក៏​មិន​កើត​ដែរ»​។

បើតាម​លោក ខៀវ សុភ័គ បាន​ឲ្យ​ដឹង​ថា ​គម្រោង​ពន្ធនាគារ​វីអាយ​ភីនេះ​ កន្លង​មក ​ក្រសួង​មហាផ្ទៃ​បាន​​ឲ្យ​ក្រុម​ហ៊ុន​ឯកជនមួយ​ វិនិយោគ​​ធ្វើ​​ពន្ធនាគារនេះ​ ដោយ​ពេល​បញ្ចប់​ការ​សាង​សង់ ​នឹង​ឲ្យ​ជន​ជាប់​ទោស​បង់​ថ្លៃ​ស្នាក់​នៅ​ក្នុង​តម្លៃ​ថោក​បំផុត​។

លោក នុត សវនា អ្នក​នាំពាក្យ​អគ្គ​នាយក​ដ្ឋាន​ពន្ធនា​​​គារ នៃ​ក្រសួង​មហា​ផ្ទៃ​ បាន​ប្រាប់​ភ្នំពេញ​ប៉ុស្តិ៍​កាលពី​ថ្ងៃ​ទី ៣ ខែកក្កដា​នេះ​ថា អគារ​ពន្ធនាគារ ​សម្រាប់​​អ្នក​ដែល​មាន​លទ្ធភាព​បង់​ថ្លៃ​ស្នាក់​នៅត្រូវ​បាន​សាង​សង់​រួច​ហើ​​យ​ ប៉ុន្តែ​នៅ​សេស​សល់​ប្រព័ន្ធ​​មួយ​ចំនួន​ដូច​ជាលូ ទឹក និង​ភ្លើង​ជាដើម។

លោក​បន្ត​ថា ពន្ធនាគារ​​ទំនើប​នេះ​ ត្រូវបាន​ក្រសួង​មហាផ្ទៃ​​បើក​ដំណើរ​​ការ​សាងសង់​​កាល​ពី​ខែ​ ឧស​ភា ឆ្នាំ ២០១៧ ដោយ​មាន​​ការវិនិយោគ​ជាមួយ​ក្រុមហ៊ុន​ គន្ធ​រី​ខុន ហូល​ឌី​ង ក្នុង​​ទឹក​ប្រាក់​​ប្រមាណ ៤​ លាន​ដុល្លារ។ អគារ​ពន្ធនាគារ​សាង​សង់​​នៅ​លើ​ផ្ទៃ​ដី​ ១​ ហិកតា​កន្លះ ប៉ុន្តែ​បរិវេណ​ទាំងមូល​មាន​ទំហំ​ ៣ ហិកតា។

លោក អំ សំអាត ប្រធាន​ផ្នែក​បច្ចេក​ទេស​ ស៊ើប​អង្កេត​នៃ​អង្គការ​លីកា​ដូ បា​នស្វាគមន៍​ចំពោះ​ការស​ម្រេចចិ​ត្តលុ​ប​គ​ម្រោង​ពន្ធាគារ​ VI​P ​របស់​រដ្ឋាភិបាល​នេះ​។

លោក​សំអាត​បញ្ជាក់​ថា៖ «ក្នុង​កាលៈទេស​នេះ​ កម្ពុជា​មិន​គួរ​មាន​ពន្ធនាគារ​ប្រភេទ​នេះទេ​។ វាមាន​ភាព​អ​វិជ្ជា​មា​ន​ច្រើន…ប្រទេស​ជិត​ខាង​យើង​ ក៏មិន​ទាន់​មាន​ពន្ធនាគា​រ​បែប​នេះ​ដែរ»។​ លោក​បន្តថា ពន្ធាគារ​ VIP ​នេះ វា​បង្ក​ឲ្យ​មាន​ការ​រើស​អើង ​រវាង​អ្នក​ទោស ​មក​ពី​គ្រួសារ​អ្នក​មាន និង​អ្នក​ក្រ។ ប៉ុន្តែវា​ក៏អាច​ជួយ​កាត់​ប​ន្ថ​យការ​ចង្អៀត​ណែន​ក្នុង​ពន្ធ​នាគារ​ផង​ដែរ។

លោកថា​៖ «វាធ្វើ​ឲ្យ​អ្នក​មាន​ជាប់​ឃុំ​​ហ្នឹង​មិន​រាង​ចាល ជាពិសេស​អ្នកមាន​ដែល​ប្រព្រឹត្ត​បទ​ល្មើស ដូច​ជារឿង​គ្រឿង​ញៀន​ និង​លួច​ប្លន់​ជា​ដើម»៕

អត្ថបទគួរចាប់អារម្មណ៍