ភ្នំពេញៈ ក្រសួងមហាផ្ទៃបានសម្រេចអនុញ្ញាតឱ្យលោក អ៊ូ ច័ន្ទរ័ត្ន និងស្ថាបនិកផ្សេងទៀតបង្កើត «គណបក្សកែទម្រង់កម្ពុជា» ប៉ុន្តែមិនឱ្យប្រើពាក្យ «សង្គ្រោះបម្រើការពារ» ដូចដែលធ្លាប់បានប្រើនៅក្នុងបាវចនារបស់អតីតគណបក្សសង្គ្រោះជាតិដែលត្រូវបានតុលាការកំពូលចេញសាលដីការំលោយទៅហើយនោះឡើយ។
រដ្ឋមន្ត្រីក្រសួងមហាផ្ទៃលោក ស ខេង កាលពីថ្ងៃទី ១៦ មីនា បានអនុញ្ញាតឱ្យលោក តំណាងស្ថាបនិក គណបក្សកែទម្រង់កម្ពុជា បង្កើតគណបក្សនេះតាមការស្នើសុំ។ គណបក្សនេះមានស្នាក់ការកណ្ដាលនៅភូមិពុកឆ្មា ឃុំអន្លង់វិល ស្រុកសង្កែ ខេត្តបាត់ដំបង។
ប៉ុន្តែក្រសួងមហាផ្ទៃបញ្ជាក់ថា៖ «ទន្ទឹមនេះផ្អែកតាមបញ្ញត្តិមាត្រា ១១ ថ្មីនៃច្បាប់ស្ដីពីគណបក្សនយោបាយក្រសួងមហាផ្ទៃស្នើឱ្យតំណាងស្ថាបនិកបក្សធ្វើការផ្លាស់ប្ដូរពាក្យ សង្គ្រោះបម្រើការពារដែលមាននៅក្នុងសញ្ញាសម្គាល់របស់គណបក្ស ដោយសារពាក្យនេះដូចគ្នានឹងបាវចនារបស់គណបក្សនយោបាយដែលត្រូវបានរំលាយដោយសាលដីកាតុលាការកំពូល» ។
បន្ថែមពីលើនេះ ដើម្បីឱ្យគណបក្សនេះទទួលបានសុពលភាព និងអាចធ្វើសកម្មភាពស្របតាមច្បាប់ស្ដីពីគណបក្សនយោបាយ គណបក្សកែទម្រង់កម្ពុជាត្រូវរៀបចំបែបបទ និងបំពេញលក្ខខណ្ឌស្នើសុំចុះបញ្ជីនៅក្រសួងមហាផ្ទៃស្របតាមកថាខណ្ឌទី២ មាត្រា ៩ មាត្រា ១៨ ថ្មី និងមាត្រា ២០ នៃច្បាប់ស្ដីពីគណបក្សនយោបាយ។
យោងតាមមាត្រា ៩ កថាខណ្ឌទី២ គណបក្សនយោបាយដែលបង្កើតថ្មីត្រូវបោះឆ្នោតជ្រើសតាំងគណៈកម្មាធិការបណ្ដោះអាសន្នដែលមានសមាជិកយ៉ាងតិច ៧ រូប សម្រាប់រៀបចំបែបបទ និងបំពេញលក្ខខណ្ឌនៃការសុំចុះបញ្ជីគណបក្សនយោបាយ។
មាត្រា ១៨ ថ្មីចែងថា ថ្នាក់ដឹកនាំបក្ស មិនត្រូវជាបុគ្គលដែលជាទណ្ឌិត ជាប់ពន្ធនាគារបទឧក្រិដ្ឋ ឬបទមជ្ឈិម ដោយគ្មានការព្យួរទោសឡើយ។ ចំណែកមាត្រា ២០ ចែងអំពីការបំពេញបែបបទ និងលក្ខខណ្ឌសុំចុះបញ្ជីគណបក្សនយោបាយ។
លោក អ៊ូ ច័ន្ទរ័ត្ន ដែលជាអ្នកផ្ដួចផ្ដើមគំនិតបង្កើតគណបក្សនេះថ្លែងថា ពាក្យស្លោកដែលលោកបានដាក់ស្នើសុំចុះបញ្ជីនេះមិនមានអ្វីខុសឆ្គងទេ ព្រោះជាពាក្យខ្មែរដែលខ្មែរគ្រប់រូបអាចប្រើបាន។ ប៉ុន្តែលោកមិនជំទាស់នឹងការដែលក្រសួងស្នើឱ្យដូរពាក្យនេះទេ។
លោកបន្តថា គណបក្សរបស់លោកនៅខ្វះឯកសារមួយចំនួនទៀត ដើម្បីធ្វើសកម្មភាពនយោបាយបាន រួមមានស្នាមមេដៃសមាជិកចំនួន ៤ ០០០ នាក់ គោលនយោបាយបក្ស លក្ខន្តិកៈ និងគណនីធនាគារជាដើម។ ប៉ុន្តែកិច្ចការនេះមិនចំណាយពេលច្រើនទេ។
លោកថ្លែងថា៖ «អ្វីដែលសំខាន់ គឺក្រសួងលោកអនុញ្ញាតហើយមិនមានបញ្ហាអ្វីទៀតទេ អ្វីដែលជាកិច្ចការបន្ទាប់គឺការផ្ដិតមេដៃសមាជិកឱ្យបាន ៤ ០០០ នាក់ ដើម្បីដាក់ទៅក្រសួង លក្ខន្តិកៈ និងបែបបទផ្សេងទៀតប្រហែលជាក្នុងរយៈពេល ៣ ខែ»។
អ្នកវិភាគនយោបាយលោក សេង សារី ថ្លែងថា វាលឿនពេកក្នុងការវាយតម្លៃថាគណបក្សរបស់លោក អ៊ូ ច័ន្ទរ័ត្ន អាចនឹងទទួលបានការគាំទ្រឬយ៉ាងណានោះ។ គណបក្សនយោបាយមួយជោគជ័យអាស្រ័យលើគោលនយោបាយបក្ស សមាសភាពថ្នាក់ដឹកនាំ និងសមាជិកដែលមកពីគ្រប់ទិដ្ឋភាព។ ក្រៅពីនេះគណបក្សនេះក៏នឹងត្រូវហែលឆ្លងពាក្យរិះគន់ជាច្រើនជាពិសេសពីក្នុងចំណោមអ្នកគាំទ្រអតីតគណបក្សប្រឆាំង។
លោកថ្លែងដូច្នេះថា៖ «បើក្នុងករណីដែលគាត់ឆ្លងកាត់ព្យុះភ្លៀង ការលាបពណ៌ ការប្រមាថ ការដៀលត្មះនេះបាន នេះជាគុណសម្បត្តិនៃអ្នកនយោបាយម្នាក់ដែរ ដែលអាចឆ្លងបាន។ អ្នកនយោបាយគឺជាបុគ្គលសាធារណៈដែលពលរដ្ឋអាចរិះគន់បាន។ បើគាត់ឆ្លងកាត់ដំណាក់កាលទាំងនេះបាន ខ្ញុំគិតថាគាត់ជាអ្នកនយោបាយដែលមានការអត់ធ្មត់ខ្ពស់»៕