The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង​មហាផ្ទៃ​ឲ្យ​មន្ត្រី​បញ្ឈប់​ធ្វើការ​ពីរ​កន្លែង

ក្រសួង​មហាផ្ទៃ​ឲ្យ​មន្ត្រី​បញ្ឈប់​ធ្វើការ​ពីរ​កន្លែង

លោក ស ខេង ត្រឡប់​មកពី​បំពេញ​ទស្សនកិច្ច​នៅ​ក្រៅ​ប្រទេស​កន្លង​មក​។
លោក ស ខេង ត្រឡប់​មកពី​បំពេញ​ទស្សនកិច្ច​នៅ​ក្រៅ​ប្រទេស​កន្លង​មក​។ ម៉ៃ វីរៈ

ក្រសួង​មហាផ្ទៃ​ឲ្យ​មន្ត្រី​បញ្ឈប់​ធ្វើការ​ពីរ​កន្លែង

ភ្នំពេញៈ ក្រសួង​មហាផ្ទៃ​បាន​ព្រមាន​ទៅ​ដល់​មន្ត្រី​របស់​ខ្លួន​ទូទាំង​ប្រទេស​ឲ្យ​បញ្ឈប់​សកម្មភាព​ជាបន្ទាន់ និង​មក​បំពេញ​ការងារ​នៅក្នុង​ស្ថាប័ន​របស់​ខ្លួន​វិញ​ក្រោយពី​បាន​រកឃើញ​ថា​មន្ត្រី​របស់​ខ្លួន​បាន​ទៅ​បម្រើ​ការងារ​នៅក្នុង​ស្ថាប័ន សង្គម​ស៊ីវិល វិស័យ​ឯកជន​ផ្សេងៗ​ទទួល​បាន​ប្រាក់​បៀវត្សរ៍​ប្រចាំ​ខែ​ ២ ​កន្លែង។ នេះ​បើ​យោង​តាម​លិខិត​របស់​ក្រសួង​មហាផ្ទៃ​ចុះ​ថ្ងៃ​ទី ២១ ខែ​សីហា ២០១៥។

លិខិត​ដដែល​ចុះ​ហេត្ថលេខា​ដោយ​លោក ស ខេង ឧបនាយក​រដ្ឋមន្ត្រី​ និង​រដ្ឋមន្ត្រី​ក្រសួង​មហាផ្ទៃ​បាន​ឲ្យ​ដឹង​ថា​កន្លង​មក​ក្រសួង​បាន​ធ្វើការ​សិក្សា​ស្រាវជ្រាវ និង​បាន​រកឃើញ​នូវ​បញ្ហា​មួយ​ចំនួន​ដែល​ពាក់ព័ន្ធ​នឹង​មន្ត្រី​រាជការ​ស៊ីវិល​ក្រសួង​មហាផ្ទៃ​មួយ​ចំនួន​បាន​ទៅ​បម្រើ​កាងារ​នៅ​ស្ថាប័ន​អង្គភាព​ផ្សេងៗ ក្រៅពី​អង្គភាព​របស់​ខ្លួន​ដូចជា​នៅ​តាម​អង្គការ​សង្គម​ស៊ីវិល វិស័យ​ឯកជន​ជាដើម។ មន្ត្រី​មួយ​ចំនួន​ដែល​បម្រើ​ការងារ​នៅ​លេខាធិការដ្ឋាន គ.ជ.អ.ប អង្គភាព​ចំណុះ​ទីស្តីការ​ក្រសួង​មហាផ្ទៃ និង​នៅ​តាម​រាជធានី​ខេត្ត​នីមួយៗ​បាន​ទទួល​ប្រាក់​បៀវត្សរ៍​ប្រចាំ​ខែ​ពីរ​កន្លែង។

នៅក្នុង​លិខិត​នោះ​បាន​ឲ្យ​ដឹង​ទៀត​ថា​ត្រូវ​ផ្សព្វផ្សាយ​ និង​ណែនាំ​បន្ទាន់​ដល់​មន្ត្រី​រាជការ​ស៊ីវិល​ក្រោម​ឱវាទ​របស់​ខ្លួន​ដែល​មាន​ការ​ពាក់ព័ន្ធ​ឲ្យ​មក​បំពេញ​ការងារ​ជូន​អង្គភាព និង​ត្រូវ​បំពេញ​បែបបទ​ទទួល​ប្រាក់​បៀវត្សរ៍ ឬ​ប្រាក់​បេសកកម្ម​តែ​មួយ​កន្លែង​ដោយ​មិន​ត្រូវ​បន្ត​បើក​ប្រាក់​បៀវត្សរ៍​ប្រចាំ​ខែ ឬ​ប្រាក់​បេសកកម្ម​ពីរ​កន្លែង​តទៅ​ទៀត​ឡើយ។

នៅក្នុង​លិខិត​នោះ​បន្ត​ថា៖ «ក្រសួង​នឹង​ធ្វើការ​តាមដាន និង​ត្រួតពិនិត្យ​បញ្ហា​ពាក់ព័ន្ធ​ខាង​លើ​ជា​បន្ត​ទៀត។ ករណី​មន្ត្រី​ទាំង​នោះ​មិន​ព្រម​អនុវត្ត​តាម​ការ​ណែនាំ​ខាងលើ​ហើយ​នៅតែ​បន្ត​បើក​ប្រាក់​បៀវត្សរ៍​ប្រចាំ​ខែ ឬ​ប្រាក់​បេសកកម្ម​ពីរ​កន្លែង​ទៀត​នោះ​ក្រសួង​នឹង​ចាត់​វិធានការ​នានា​ចំពោះ​សាមី​ខ្លួន​ស្រប​តាម​ច្បាប់ និង​លិខិត​បទដ្ឋាន​គតិយុត្តិ​ជា​ធរមាន»។

លោក​នាយ​ឧត្តមសេនីយ៍ ខៀវ សុភ័គ អ្នក​នាំ​ពាក្យ​ក្រសួង​មហាផ្ទៃ​បាន​ថ្លែង​ថា​ការ​ដែល​លិខិត​នេះ​គឺ​ដើម្បី​ទប់ស្កាត់​កុំ​ឲ្យ​មាន​បញ្ហា​នេះ​កើតឡើង។ លោក​ថា៖ «តាមពិត​ទៅ​ប្រហែល​ជា​មិន​មាន​ទេ​ដូច្នេះ​បាន​ជា​យើង​ទប់ស្កាត់​ឲ្យ​ហើយ»។

គួរ​បញ្ជាក់​ផង​ដែរ​ថា​កាលពី​ខែ​កុម្ភៈ ឆ្នាំ ២០១៥ ក្រសួង​មហាផ្ទៃ​ប្រកាស​ឱ្យ​មន្ត្រី​រាជការ​ស៊ីវិល​ម្នាក់ៗ​ចូល​កាន់​មុខ​តំណែង​តែ​មួយ​ប៉ុណ្ណោះ​ដោយ​មិន​អនុញ្ញាត​ឲ្យ​កាន់​តំណែង​មាន​លក្ខណៈ​អចិន្រៃ្តយ៍​លើស​ពី​មួយ​មុខ​តំណែង​ឡើយ​ដើម្បី​ទុក​លទ្ធភាព​ជូន​មន្ត្រី​រាជការ​ស៊ីវិល​ផ្សេង​ទៀត​អាច​កាន់​មុខ​តំណែង​ដែល​នៅ​ទំនេរ។

លោក អំ សំអាត មន្ត្រី​ស៊ើបអង្កេត​​ជាន់ខ្ពស់​អង្គការ​ការពារ​សិទិ្ធ​មនុស្ស​លីកាដូ​បាន​ថ្លែង​ឲ្យ​ដឹង​ថា​នេះ​គឺជា​ការ​ចាប់ផ្តើម​កំណែទម្រង់​មួយ​ដ៏ល្អ​ពីព្រោះ​កន្លង​មក​បុគ្គលិក​របស់​រដ្ឋ​បាន​ទៅ​ធ្វើ​ការងារ​នៅ​ស្ថាប័ន​ឯកជន​នោះ​បាន​ទុក​ការងារ​នៅ​ស្ថាប័ន​រដ្ឋ​ចោល​ដោយ​គ្រាន់តែ​មក​បើក​ប្រាក់​ខែ​វា​ធ្វើឲ្យ​មាន​ការ​រាំង​ស្ទុះ​ក្នុង​ការ​បម្រើ​ការងារ​ជួយ​ប្រជាពលរដ្ឋ។

លោក​បាន​ថ្លែង​ថា៖ «​នេះ​គឺ​ចំណាត់ការ​ល្អ​ដើម្បី​កុំ​ឲ្យ​រដ្ឋ​ចំណាយ​ថវិកា​ច្រើន»។

សូម​រំឭក​ថា​កាលពី​ថ្ងៃ​ទី ២៣ ខែ​មីនា ឆ្នាំ ២០១៥ អង្គភាព​ប្រឆាំង​អំពើ​ពុករលួយ​បាន​ចេញ​សេចក្ដី​ប្រកាស​មួយ​រំឭក​ដល់​ប្រធាន​អង្គភាព​គ្រប់​លំដាប់​ថ្នាក់​នានា​របស់​រដ្ឋ​ទាំង​ផ្នែក​ស៊ីវិល និង​​កងកម្លាំង​ប្រដាប់​អាវុធ​ឲ្យ​លុប​បំបាត់​ឈ្មោះ​មន្ត្រី​ខ្មោច ឬ​មន្ត្រី​ដែល​មាន​តែ​ឈ្មោះ​បើក​ប្រាក់​បៀវត្សរ៍​តែ​មិន​មក​ធ្វើការ។ សេចក្ដី​ជូន​ដំណឹង​នោះ​បាន​ព្រមាន​ថា​ជន​ណា​រក្សា​ឈ្មោះ​មន្ត្រី​ខ្មោច​គឺ​ត្រូវ​ផ្ដន្ទាទោស​តាម​ច្បាប់។

ប្រទេស​កម្ពុជា​បច្ចុប្បន្ន​មាន​មន្ត្រី​រាជការ​ប្រមាណ ១៨ ម៉ឺន​នាក់​ដោយ​មិន​គិត​កងកម្លាំង​ប្រដាប់​អាវុធ​ដូចជា ទាហាន ប៉ូលិស និង​ប៉េអឹម។ គិត​ចាប់​តាំងពី​ឆ្នាំ ១៩៩៤ មក​រដ្ឋាភិបាល​ធ្លាប់​បាន​ធ្វើ​ជំរឿន​មន្ត្រី​រាជការ​យ៉ាង​តិច ៤ ដង​មក​ហើយ និង​បាន​រកឃើញ​មន្ត្រី​ដែល​មាន​តែ​ឈ្មោះ​ហើយ​​មិន​​មក​ធ្វើការ​ជាង ៦​ ម៉ឺន​នាក់៕

អត្ថបទគួរចាប់អារម្មណ៍